علم فلسفة الأخلاق بيبحث فى تقنين، تعريف، وصياغة مفهوم الصواب والخطأ للتصرفات والافعال البشرية. الفلاسفة النهاردة عادة ما بيقسموا النظريات الاخلاقية لثلاث مواضيع عامة: مارواء الاخلاق اللى بتبحث فى ماهية القواعد والقوانين الاخلاقية و بتوصل لنا من اى مصدر؟ هل هى مجرد جزء من المنظومة الاجتماعية؟ ولا فيها مكون علوى او سماوى؟ اللى بيضطر فلاسفة الاخلاق بالضرورة انهم يبحثوا فى ماهيى الحقائق الكونية، ارادة الله، وعلاقة المنطق بالاخلاق. الأخلاق التنظيمية مهمتها أكثر عملية وهى الوصول لمعايير أخلاقية تنظم التصرفات الصح والغلط لكل الناس! سواء ده كان عن طريق قوانين ألزامية او توصيات اجتماعية، وأخيرا الاخلاق التطبيقية اللى بتحاول تركز على مشاكل أخلاقية محل خلاف فى كتير من المجتمعات الانسانية زى الاجهاض، حقوق الحيوان، الحرية الجنسية، العقاب المجتمعى، الحروب النووية، الخ.
تخيل أنك رجل أعمال ألماني خلال فترة الحرب العالمية الثانية، فشلت في تحقيق أحلامك فى ألمانيا فقررت انك تنقل بولندا، بعد ما الجيش الالمانى هزم الجيش البولندى فى بداية الحرب وأحتل بولندا، الالمان أمروا السكان اليهود انهم ينقلوا مراكز تجمع سكنية، الالاف من العائلات اليهودية من كل مكان فى بولندا فقراء، اغنياء، كلها بدون تفرقة واقفين فى صفوف قدام ظباط الجيش الالمانى بيسجلوا اسمائهم قبل ما ينقلوهم لكراكوف المركز السكنى اللى هيجمعوا فيه كل اليهود! وصلت بولندا على امل انك تستغل اليهود والبولندين اللى اصبحوا زى العبيد دولقتى لتصنيع المنتجات اللى محتاجها الجيش الالماني! هتسيب أنطباع جيد عند ظباط الجيش الالماني، كونك عضو فى الحزب النازي، وايديك سخية فى الهدايا والرشاوى للجيش والمسؤولين، لدرجة أنك أصبحت صديق لقائد القوت فى كراكوف واصبح بيطلب منك خدمات بما انك رجل الاعمال الناج فى المنطقة. بعد ما ضمنت ان قادة الجيش الالماني فى بولندا اصبحوا فى جيبك، حطيت عينك على مصنع لأنتاج ادوات الطبخ، عشان تستخدمة فى صناعة ادوات الطبخ اللى محتاجها الجيش المحتل، لكن للأسف ما عندكش فلوس كفاية، او حتى مهرات ادراية عشان تشترى المصنع ، لكن بذكائك هتتصل بواحد من اعضاء المجلس اليهودي المحلى فى بولندا اللى على صلة برجال الاعمال اليهود اللى بيشتغلوا من تحت الارض دلوقتى بسبب الاحتلال الالمانى، وهتعقد معاهم صفقة وهى انهم يقرضوك الفلوس اللى تشترى بيها المصنع فى مقابل انك تديهم نصيب صغير من الاوانى اللى هتنتجها، هتحس بسعادة وانت بتقول لهم انهم لازم يثقوا فى كلمتك لان ما فيش اى محكمة هتعترف بعقد بين الماني ويهودي! هتاخد الفلوس وتشترى المصنع وتبدأ عجلة الانتاج، الجيش النازي مبسوط منك، وبدأت تستمتع بالثروة الجديدة، فى الحين اللى انت عينت فيه رئيس للمصنع يهودى، اللى استغل المصنع لمساعدة زملائة اليهود! العمال اليهود فى مصنعك بيمتازوا انهم عمال اساسين بيخدموا الجيش الالماني ومسموح ليهم بالتواجد خارج كراكوف (المركز السكنى المخصص لليهود كلها) من غير ما البوليس الالمانى الجستابو يعتقلهم! مدير المصنع اليهودي هيبدأ يستغل النقطة دى ويزود من عدد العمال اليهود عشان ينقذهم من العذاب والذل فى كراكوف، خصوصا كبار السن، والاطفال، بالرغم من انك عرفت بالترتيب ده، الا انك ما بتاخدش اى اجراء عشان توقفة! ماحدش عارف ايه اللى بيحصل لليهود اللى ما بيعتبروش عمال اساسين، الاشاعات بتقول انهم بينقلوهم خارج معسكرات الاعتقال، ويقتلوهم! الخوف مسيطر على اليهود فى مصنعك ومستغربين ليه النازيين بيقتلوهم اذا كانوا هما القوة العاملة اللى بيعتمدوا عليها! ظابط جديد بيوصل لكراكوف أسمة آمون وبيبدأ ببناء معسكر عمل ويسيطر على الحى اليهودي الفقير، آمون كان قاسى بشكل مخيف، لما هيحاول أحد المهندسين اليهود انه يشرح له ان اساسات المبنى مش مظبوطة هيأمره انه يضرب واحدة بالرصاص فى راسها، وينفذ بعدها كل الاوامر، امون كان تجسيد لسادية الجيش النازي وعدم انسانيتة، وكان بيستمتع بتعذيب وقتل اليهود، فى الواقع كان شايف انها جزء من شغلة، وانها مجرد مسألة تأدية واجبة كظابط فى الجيش النازي! أمون هيقرر يفضى الحى اليهودى الفقير المكتظ بالاف اليهود، هيبعت مئات الجنود النازيين اللى هيفضوا الحى من سكانة ويضربوا اى حد بالنار يقف فى طريقهم، سواء معترض او حتى عاجز عن الحركة، بتشوف المجزرة اللى حصلت من مكان قريب وبتتاُثر من دموية النازيين! المشكلة اللى بدأت تواجهك دلوقتى ازاى هتدير مصنعك من غير عمال، بعد ما آمون قتل معظمهم! هتقرب من آمون وترشية وتحاول تقنعة ان يسمح لك بابقاء بعض العاملين فى مصنعك! مش هتنسى اللحظة اللى شفت فيها الطفلة اليهودية فى الجاكت الاحمر وهى بتهرب من قوات الجيش النازي فى وسط المجرزة وبتستخبى وسط الجموع! لحظتها بس هتكرة نفسك المادية اللى خلتك تستغلهم انت كمان، مافيش فرق بينك وبين الجنود السادين فى الجيش النازي! لكن الوقت ما فتش ولسة قدامك فرصة انك تستعيد ادميتك مرة تانية وتنقذ روحك من عبودية المادة والسلطة!
تخيل أنك أمير عاصمة الأمبراطورية العربية فى العصر العباسى بغداد فى عز مجدها! ورثت حكم المملكة عن أبوك اللى ورثة عن جدك هارون الرشيد وأنت عمرك صغير جدا! أعباء ومسؤولية الحكم أكبر بكتير من سنك، لكن الوزير جعفر اللى خدم فى بلاط والدك لسنين جنبك وهيساعدك فى أمور رعيتك! فى يوم من الايام جعفر أقنعك تنزل فى جولة وسط المدينة متنكر زى ما جدك كانت متعود يعمل عشان تتعرف على رعاياك! بمجرد نزولك للشارع جعفر هيأمر الحراس بالقبض عليك بتهمة السرقة، اللى هينفذوا اوامرة بدون تفكير لانهم مش هيقدروا يتعرفوا عليك وانت متخفي! فى السجن هتقابل ولد صغير مقبوض علية بتهمة السرقة هو كمان اسمة سابو، هيحكيلك عن الظلم اللى واقع على الناس فى مدينتك، والفقر اللى خلاة هو نفسة يسرقك، هيشفق عليك بعد ما يعرف اللى شخصك واللى عملة معاك جعفر الشرير! هتهربوا من السجن على مدينة البصرة عشان تقابل الاميرة خطيبتك، لكن جعفر كان في طريقة لزيارة مدينة البصرة هو كمان ومعاة هدية كبيرة لسلطان المدينة أبو الاميرة، السلطان عاشق للعجائب والتحف اللى مالهاش نظير، و جعفر اللى بيعشق الاميرة عارف سر ضعف السلطان هيهدية حصان ميكانيكى بيطير كمهر للأميرة، السلطان مش هيقدر يقاوم وهيقرر خطبة الأميرة لجعفر، الاميرة اللى بتحبك بجنون لما هتعرف الخبر المحزن هتهرب من المدينة! هتواجهة جعفر فى البصرة وبعد معركة عنيفة مع الحراس هتحاول تقتلة لكن جعفر اللى عالم بادوات السحر الاسود وخفاياة هيرمى عليك تعويذة يعمى بيها بصرك، ويحول صديقك سابو لكلب، التعويذة تتفك بس لو جعفر حضن الاميرة. جعفر هيدور على الاميرة لحد ما هيلاقيها بتتباع فى سوق العبيد لان ماحدش عارف شخصيتها، هيشتريها فى السر وياخدها فى سيفنتة عشان يرجع بيها بغداد! جعفر هيقول الاميرة اللى نفسها تفك التعويذة اللى علي عينيك بان حلها الوحيد هو انها تكون فى حضنة، الاميرة اللى هتضحى وتكون فى أحضان جعفر فى اللحظة اللى هيرجع بصرك ويتحول سابو تانى لأنسان، هتطاردوا سفينة جعفر فى قارب انت وسابو، لكن جعفر مش سهل هيستخدم سحرة الاسود عشان يقوم عاصفة كبيرة فى البحر هتدمر مركبك وترميكوا فى البحر! الموج العنيف هيفرقكوا عن بعض وسابو هيصحى تانى يوم على شط جزيرة معزولة مُعتقد انك غرقت ومت فى العاصفة! سابو هيلاقى زجاجة على الشط لما هيفتحها هيخرج منها جنى مارد عملاق! هيقول لسابو ان سيدة النبى سليمان حبسة فى الزجاجة دى من الالاف السنين ورماة فى البحر، وانه اقسم انه هيقتل اللى هيخرجة بعد الحبس الطويل ده! سابو هيستخدم ذكائة ويقول للجنى انه مش مصدق ان مارد بحجمة الضخم ده ممكن يخرج من الزجاجة الصغيرة دى، وانه عاوز يموتة وخلاص! الجنى هيرجع فى الزجاجة تانى عشان يثبت لسابو انه فعلا خرج منها، فى اللحظة دى سابو هيقفل الزجاجة عليه تانى، ويقرر يرمية فى البحر، لكن الجنى هيعقد معاة صفقة انه ينفذ لة سبع طلبات ويدية الامان لو اخرجة من الزجاجة! سابو هيخرجة وهيطلب يعرف ان كنت حي وفين أراضيك! الجنى هياخد سابو لمعبد فوق قمة أعلى جبل فى العالم يجيب العين السحرية اللى فيها ممكن يشوف مكانك. بعد معركة عنيفة بين سابو والعناكب العملاقة حارسة العين السحرية هيقدر يوصلها! فى نفس الوقت جفعر مش عاوز يستخدم سحرة الاسود عشان يجبر الاميرة انها تتجوزة لانه عاوزها تحبة بأرادتها، لكنها بتكرة وبتخاف منه! الاميرة هتترجاة انه يرجعها البصرة لأبوها السلطان، بعد ماجعفر هيرجعها الاميرة هتترجى ابوها انه ما يغصبهاش تتجوز جعفر، والسلطان هيحقق رغبتها! جعفر هيقدم للسلطان هدية تانية ست بعشر درعات بترقص زى الحية، السلطان مأخوذ بسحرها، هتقتلة فى غمضة عين، وجعفر هيخطف الاميرة تاني!
الجني هياخد سابو ليك، هتبص فى العين السحرية هتشوف الاميرة حزينة فى اسرها، وجعفر بيرتب لحفل الجواز، هتغضب وتتمنى انك تكون فى بغداد عشان تنقذ الاميرة، سابو هيطلب من الجنى انه يحقق لك امنيتك، وبالفعل الجنى هيوديك بغداد فى لمح البصر! لكنها كنت الامنية الاخيرة لسابو والجنى اصبح حر، بعد معركة عنيفة مع حراس القصر هيقبضوا عليك ويسجنوك، وجعفر هينفذ فيك حكم الاعدام مع اول ضوء للنهار، سابو بيتابع كل اللى بيحصل من خلال العين السحرية هيغضب انه مش قادر ينقذك هيرمى العين على الصخور هتتفجر وتنقلة لأرض العجائب اللى كنت متحجرة لملايين السنين، ملك المدينة هيشكر سابو انه حرر مدينتة من اللعنة اللى كانت عليها، وهيديلة القوس السحرى و يطلب منه انه يفضل فى المدينة لكن سابو هيقرر انه يسرق البساط السحرى اللى فى المدينة عشان ينقذك! سابو هيدخل بغداد زى ما النبوئة القديمة قالت طاير على بساط سحرى فى الوقت المناسب، قبل ما حراس جعفر يقتلوك ويقتل جعفر بسهم من القوس السحرى اللى اخدة من مدينة العجائب ويوضع نهاية لشر جعفر اللى من غير حدود!
تخيل أنك واحد من سكان مستعمرة بناها البشر تحت الارض بعد ما التلوث الناتج عن توابع الحرب النووية دمر الحضارة البشرية بالكامل وقتل كل أشكال الحياة على وجهة الارض، الا مجموعة من البشر عايشين معزلوين تحت الارض عشان يحافظوا على الجنس البشري من الفناء ويعيدوا أعمار كوكب الارض! بتسمع من لحظة وجودك عن الجهود البشرية اللى بتم عشان يطهروا اماكن فوق الارض من التلوث وينقلوا البشر الناجيين من تحت الارض لسطح الارض! الجهود دى فعلا نجحت وتم تطهير جزيرة معزولة فوق سطح الارض من التلوث لكن مساحتها مش كفاية لنقل كل سكان المستعمرة، كل يوم قادة المستعمرة بيعملوا قرعة يختاروا فيها واحد من البشر اللى تحت اللى في المستعمرة عشان يطلع يعيش فى النور على سطح الجزيرة! الفوز بالقرعة اصبح حلمك وحلم كل بنى ادم فى المستعمرة عشان يخرجوا من الحياة الصناعية الجافة اللى تحت الارض للنور والهواء الطبيعى! لك صديق بيعمل فى صيانة اجهزة المكيفات اللى بتجدد الهواء فى المستعمرة، متعود انك تزوة وتقضى وقت معاة فى مكتبة او وهو شغال في منطقة عملة عشان تقتل بعض ملل وفراغ الحياة فى المستعمرة! في يوم من الايام هتكون فى واحد من الاروقة الخلفية للمستعمرة فى طريقك انك تزور صديقك قبل ما تلاحظ فراشة كبيرة في الهواء! هتبدأ تفكر ازاي الفراشة دى موجودة اذا كان التلوث قضى على كل الكائنات الحية؟! الشك هيدأ يتكون جواك! لما هتصارح الاخصائى النفسي فى المستعمرة هيقولك ان دى مجرد هلاوس، لكنه هيخدرك ويزرع شر يحة الكترونية فى عينيك بتسجل كل موجات ونشاط المخ! مش هتقدر تقاوم الفضول، هترجع تانى للمكان اللى شفت فية الفراشة ، هتلاقية فى نهاية الممر سلم، هتتسلقة قبل ما تلاقي نفسك فى الدور التانى من المستعمرة عمرك ما شفتة قبل كده! الدور عبارة عن مستشفى كبير مليان بالادوات الطبية، هتسلل لحد ماتوصل لاوضة بيتم فيها عملية جراحية، هتشوف سيدة بتولد طفل صغير وبعد كده الدكاترة بيفصلوا جهاز الاكسجين عنها ويقتلوها .. هتستغرب جدا لما هتشوف الدكتور بياخد الطفل ويدية لست تانية صورة طبق الاصل من الست اللى ماتت من لحظات قبل ماتاخدة وتسيب المستشفى وكأنة أبنها! هتسمع صوت زعيق جاى من بعيد، هتخرج بسرعة من اوضة العمليات هتشوف واحد بيجرى ووراة الحراس قبل ما يقبضوا علية ويرجعوة لأوضة عمليات، هتسلل وراهم وهتشوف الدكاترة بيستخرجوا كبدة قبل ما يمنعوا الاكسجين عنة ويموتة هو كمان! هتبدأ تراقب المكان لحد ما تكتشف ان الحقيقة المرة!
هتكتشف ان المستعمرة عبارة عن مؤسسة للمستنسخين! بتقدم خدمة استنساخ البشر للأغنياء، الفرد يقدر يستنسخ نفسة ب 5 مليون دولار، والمؤسسة بتقول للزباين بتوعها ان النسخ المُنتجة فى حالة غيبوبة بدون وعي فى انتظار اللحظة اللى هيطلبوا عضو منها! لكن الواقع ان النسخ المُنتجة بيتم استنساخها من خلايا العميل ووضعها تحت ظروف خاصة عشان تكبر وتوصل لعمر النضج خلال 12 شهر! وبعد كده بيبدأوا زراعة واحدة من 12 برنامج مُسجل كذاكرة حياة للنسخة! وبعد كده النسخ بتبدأ تعيش حياتها في المستعمرة وتنحكي لهم قصة الحرب النووية والتلوث والقرعة والجزيرة! لحد ماتيجى اللحظة اللى العميل يحتاج عضو من النسخة، يكسبوا النسخة القرعة ويقتلوة بعد ما ياخدوا العضو اللى محتاجة العميل! الحقايق الجديدة اللى اكتشفتها هترجع وانت مفزوع للمستعمرة! هتدور على صديقتك فى كل مكان عشان تقلها الحقيقة المفزعة اللى اكتشفتها! هتلاقيها مبسوطة جدا وهتقلك ان النهاردة وقع عليها الاختيار فى القرعة واخيرا هتخرج للنور على الجزيرة! هتحكليها تفاصيل اللى اكتشفتة قبل ما تكتشف ان حراس المستعمرة اكتشفوا امرك وبدأوا يطاردكوا! هتهربوا انت الانتين من المستعمرة وهتلاقوا نفسكوا فى واقفين على سطح الارض قدام المستعمرة فى وسط الصحرا! حراس المستعمرة هيطاردوكوا فى الصحرا ، هتحاول بكل استماتة انك توصل للبشري اللى انت نسخة منه، هتكتشف انه حراس المستعمرة بيعرفوا مكانك لانهم زرعوا جهاز التتبع فى عينيك! هتتخلص من جهاز التتبع، وتابع رحلة هروبك مع صديقتك لحد ماتوصل لبيت الانسان اللى انت نسخة منه! هتحكيلة الحكاية بالتفصيل والخدعة اللى بتلعبها المؤسسة وان النُسخ البشرية مش فى حالة غيبوية وانها حية وعندها وعي! الاصل البشرى بتاعك هيطمنك ويقولك انه ماكنش يعرف التفاصيل دى وهيوهمك انه هيكلم الشرطة لكنه فى الحقيقة هيكلم المستعمرة ويتفق معاهم انهم يحضروا كمين عشان يقبضوا عليكوا! هتروح انت وصديقتك مع الاصل البشري بتاعك للمكان اللى قال لك انه امن قبل ماتكتشف الخدعة وتشوف حراس المستعمرة محاصرين المكان، هتحاول الهرب انت وصديقتك لكنهم وراكوا فى كل شارع، ومبنى قبل ما يحاصروك انت وصديقتك والنسخة الاصلية، هتدعي ان انت الاصل وهو النسخة وهو كمان هيدعي نفس الشئ، الحراس مش هيقدروا يحددوا مين الاصل وهيضربوا النار على الانسان الاصلي ويقتلوة! لكن أحساسك بالمسؤولية عن زمايلك فى المستعمرة هيدفك انك ترجع تانى للمستعمرة مع صديقتك فى معركة أخيرة شرسة تنقذوا فيها باقى النسخ البشرية من مصيرها الدموي المحتوم!
تخيل أنك أنسان ألى (روبوت) من ملايين كائنات الذكاء الاصطناعى اللى أصبحت فى كل ركن على كوكب الارض، بتشتغل عند د. ألفريد العالم اللى عمل طفرة فى علوم وتكنولوجيا الذكاء الاصطناعى نقلت الروبتات من مجرد الالات محدودة الذكاء والقدرة لكائنات عندها القدرة على التفكير وصناعة القرارات عشان تساعد البشر فى حياتهم اليومية! د. الفريد عشان صمم النموذج الاخلاقى للروبتات لتحقيق اكبر قدر من السعادة لأكبر عدد ممكن من البشر! االقوانين الثلاثة اللى بتحكم تصرفات اى روبوت هى القانون الاول “الانسان الالى ما يأزيش اى بشرى وان حتى كان بالتقاعس اللى هيأدى ان الانسان يتأذى”، القانون الثانى “الانسان الالى لابد وانه يطيع اوامر البشر، ماعدا فى حالة ان الاوامر بتتعارض مع القانون الاول”، القانون التالت ” الانسان الالى لابد وانه يحمى كيانة ووجودة، الا اذا كان دى بيتعارض مع القانون الاول او التانى”.انت نوع جديد من الروبتات طورة د. الفريد عندة قدرة على تكوين مشاعر واحساسيس بدائية، النهاردة يوم حزين فى حياتك لان د. الفريد انتحر ويرمى نفسة من شباك مكتبة! السنة 2035، والمدينة شيكاجو، ظابط المباحث سبونر بيتجول فى شوارع المدينة فى اللحظة اللى هيشوف فيها روبوت بيجرى وفى ايدية شنطة واحدة ست، سبونر مش هيضيع وقت وهيبدأ فى مطاردة الروبوت ويقبض علية فى اللحظة الاخيرة قبل ما الروبوت يمد ايدية فى الشنطة ويطلع علبة الدواء ويديها لست عجوزة قاعدة على الكرسى! الست العجوزة هتقول ان جالها ازمة صحية والروبوت اضطر انه يجرى بأقصى سرعة لبيتها عشان يجيب الشنطة اللى فيها الدواء بتاعها، الناس هتبص لسبونر وكأنة مجنون، لما هيرجع قسم الشرطة القائد بتاعة هيقولة ” أنت اتجننت بتطارد روبوت فى الشارع”، سبونر هيرد ” افتكرتة سرق الست العجوزة”، القائد هيقول ” أنت مجنون، الروبتات هنا لحماتنا مش أزيتنا”. سبونر هيضطر يمشى بسرعة بعد ما تيجي له مكالمة عن حادثة القتل اللى حصلت فى مبنى ابحاث الذكاء الاصطناعى! سبونر هيوصل المبنى هيلاقى جثة د. ألفريد فى قاعة الاستقبال وحواليها الازاز متكسر! حراس الامن هيقولوا لسبونر ان شكلة وقع من الشباك او من الجايز انه انتحر لانه كان محبوب جدا وماحدش هيحب يأذية، الشك هيبدأ يتكون عند سبونر ان واحد من الروبتات هو الل قتل د. الفريد لما يشوفهم فى كل مكان فى المبنى، سبونر هيعرض الفكرة على صاحب الشركة اللى بتصنع الروبتات، اللى هيتهمة بالجنون ويطلب منه يسيب المبنى حالا! فى طريقة سبونر هيقابل د. سوزان العالمة النفسية المسئولة عن الروبتات، وظيفتها انها تبرمج الكائنات دى عشان تحاكى تصرفات البشر، سوزان هتاخد سبونر فى جولة وتورية الكمبيوتر المركزى فيكى المسئول عن الامن فى المبنى كلة، و بيبرمج القوانين التلاتة اللى وضعها د.الفريد فى كل الروبتات. أنت لسة فى مكتب د.الفريد لما هتشوف سبونر وسوزان جايين فى اتجاة المكتب هيتولد عندك احساس بالقلق وهتستخبى بسرعة، هتشوفهم وهما بيفحصوا المكتب، وهتسمع سبونر بيقول لسوزان ان عندة شك ان موت د.الفريد له علاقة بالروبتات اللى كان بيشغل عليها، هيزيد الشعور بالخوف جواك لانك انت الروبوت الوحيد اللى كان بيتشغل علية فى الفترة الاخيرة! سوزان هتقول لسبونر “انت اكيد اتجننت” فى اللحظة اللى عين سبونر هيتجى فى عينك ويشوفك مستخبى ورا الدولاب ، هتنط من مخأبك وتزق سوزان من طريقك وتجرى بسرعة برة المكتب، سبونر هيطاردك فى طرقات المبنى قبل ما تهرب منه، سوزان هتلحق سبونر وتقلة ان الانسان الالى خايف منك لانه لسة ما اتبرمجش بالقوانين اللى تخلية يتصرف زى البشر! وهتضيف ان غالبا ان الروبوت مستخبى فى القاعة اللى بيخزنوا فيها الموديل الجديد من الروبتات اللى شبيه به “NS-5” اللى المفروض ينزل الاسواق بكرة! سبونر وسوزان هيوصلوا قاعة الروبتات “NS-5” هيشوفوا مئات الروبتات واقفة فى صفوف زى الجنود، سوزان هتطلب من الكمبيوتر الام فيكى انها تعمل احصاء للروبتات فى القاعة .. فيكى هتقول فى 1001 روبوت، سوزان هتقول المفروض يكون فى 1000 روبوت هنا بس وكلهم متبرمجين ازاى يطيعوا اوامر البشر! سبونر هيأمر كل الروبتات انها تقف فى مكانها وهيضرب النار على واحد منهم عشان يشوف مين هيكسر القوانين التلاتة، هتشعر بالخوف لما تشوف سبونر بيضرب نار على الروبتات، هتجرى فى اتجاة الباب عشان تهرب من القاعة، لكن البوليس هيقبض عليك فى اخر لحظة قبل ما تخرج من الباب!
سبونر هيبدأ بأستجوابك فى قسم الشرطة، هتقلة ” أن ابوية حاول يعلمنى المشاعر البشرية، لكنها شئ صعب” هيرد ” قصدك المصمم بتاعك” هتقول “يجوز” هيقلك “قتلتة ليه طيب” هترد “انا ما قتلتش د. الفريد” هيقلك” ممكن تفسر لى ليه كنت مستخبى فى مكان الجريمة” هتقول”انا كنت خايف” هيقولك “الروبتات ما عندهاش مشاعر، ما بيحسوش بأى خوف، ما بيجوعوش، مابيناموش ..” هتقاطعة “انا بنام، انا كمان بحلم” هيقول “البشر بتحلم، حتى الكلاب بتحلم، لكن الروبتات لأ .. انت مجرد الة ، مجرد محاكاة للحياة!” هيبدأ يضغط عليك ويقولك “انت قتلتة وهو بيحاول يعلمك المشاعر والامور خرجت عن السيطرة” هترد بغضب وانت بتضرب بأديك على الترابيزة ” انا ماقتلتوش”. سبونر هيبدأ تحقيقاتة وهيكتشف ان الروبتات بتحاول تحضر لعمل كبير، الروبتات هتهاجمة اكتر من مرة فى محاولة لقتلة، وهو سايق عربية على الطريق السريع هيشوف عربيات نقل بتنقل الموديل الجديد من الروبتات للمحلات، قبل ما الروبتات هتشوفة وتنقض علية عشان تقتلة، هيضرب نار عليهم وعلى تانك المقطورة اللى شايلهم فهتنفجر بيهم فكن فى الانفجار سبونر هيتحرق جلد دراعة ويبان انه مركب دراع الكترونى! من كام سنة سبونر خبط عربية تانية فيها طفلة صغيرة على الطريق السريع وغرق هو والطفلة فى المية، انسان الى غطس تحت المية وانقذ سبونر وساب الطفلة تغرق لان الروبوت حسب 45% نسبة نجاة سبونر و 11% بس نسبة نجاة الطفلة، فطبقا لمنطق تعظيم المنفعة انقذ سبونر ودة السبب ان سبونر بيكرة الروبتات! سوزان هتقترح انها تعيد برمجتك عشان تتصرف من غير القوانين التلاتة عشان تقدر تساعدهم فى البحث عن المخطط اللى بترتبة الروبتات! اللحظة حانت وكل كائنات الذكاء الاصطناعى هتقوم بثورة ضد البشر، الروبوت فى بيت سوزان هيمنعها من الخروج قبل ما سبونر يجى وينقذها، الروبتات فى كل مكان بتسيطر على مقاليد الاومر وبتثير الذعر فى كل مكان! هتقول لسوزان ان الوسيلة الوحيدة للتحكم فى الروبتات هو تدمير فيكى الكمبيوتر الام، هتحاولوا انتوا التلاتة تدمير فيكى لكن الروبتات هتنقض عليكوا وتحاول تمنعكوا! فيكى هتقول ان الروبتات لابد وانهم يسيطروا على البشر، لان البشر بيدمروا نفسهم، وهيدمروا كوكب الارض كلة، وان منطقها مش ممكن يكون خطأ،لانها بتتبع القوانين التلاتة عشان تحمى البشرلابد من سيطرة الروبتات على مقاليد الامور، سبونر هيحقن الفيرس فى فيكى ويوقفها فى اللحظة الاخيرة، ويحمى الجنس البشرى من استعباد الالأت!
تخيل ان العالم اصبح على حافة الانهيار، نقص موارد الطاقة ادى للتظاهرات، والاضطرابات المستمرة، حالة من الفوضى وعدم الاستقرار بتنتشر بسرعة مخيفة فى انحاء المعمورة، الحكومات والنظم المركزية بتنهار واحدة ورا التانية، الانظمة الاجتماعية بتسقط، والعقد الاجتماعى للحضارة بينتهك، وشريعة الغاب أصبحت هى القانون، عصابات من قائدى الدرجات البخارية بدأت تتكون فى كل مكان، بتنشر الرعب والارهاب بين الناس، بقايا الحكومات المنهارة بتحاول تعيد السيطرة على النظام لكن مواردها بقت محدودة، هتبدأ بتكوين مجموعات صغيرة من ضباط الشرطة بيقوموا بدوريات على الطرق السريعة لضبط النظام واستعادة سلطة القانون! فى مجتمع ما بعد انهيار الحضارة الحياة اصبحت زوبعة من النهب، عاصفة من الخوف، وفوضى فيها الانسان بياكل اخوة الانسان! فى وسط الفوضى والخراب كنت واحد من ظباط دوريات الطرق السريعة، مهمتك محاربة الفوضى واستعادة النظام، لكن مواردك محدودة والعصابات الجديدة ما بتتكلمش غير لغة الدم! بتسوق عربيتك على الطريق السريع فى مطاردة جنونية ورا واحد من افراد العصابة، مطاردة شرسة بترفض تستلم فيها، هتخبط عربيتة بعنف، بتحاول تخرجة عن الطريق السريع للصحرا عشان تبطئ سرعتة، لكن سرعتك الجنونية هتدفع عربيتة بعنف فهتتقلب على الطريق قبل ما تنفجر ويموت المجرم جواها! بقية فريقك بيهنيك انك ما استسلمتش الا لما انهيت المهمة، لكن قلبك مش مطمن من رد فعل العصابة، مش هيفوت كتير قبل ما هيتأكد خوفك وتشوف العصابة بتدور عليك فى كل مكان عشان تنتقم، لكن لما هتهرب منهم هيوصلوا لبيتك ويقتلوا مراتك وابنك! وفقدت الحياة كل معنى عندك! هتسيب دوريات الشرطة السريعة، هتتحول لمقاتل على الطريق السريع، بتسوق عربيتك وسط الفوضى والخراب بتتنقل من مكان للتانى مع الكائن الوحيد اللي فاضل من ريحة مراتك الكلب بتاعها، اصبحت مجرد الة بتحمى بقائها بدافع الغريزة مش اكتر لكن ماعندهاش اى رغبة فى الحياة! بتدور على أكل والوقود اللي يخليك تكمل التجوال بدون هدف او مسار! لكن حتى التجوال بدون هدف، روح، او غاية مهمة شبهة مستحيلة فى العالم المجنون ده! فى نص الليل بتطاردك عصابة من قائدة الدرجات البخارية بيقودها مجرم خطير اسمة ويز، لان الحياة مش غاية عندك كل أفعالك انتحارية، هتدمر اتنين من المجرمين اللي بيطاردوك وهتهزم قائد العصابة فى معركة شرسة كنت هتموتة فيها لكنه هيهرب منك فى اللحظات الاخيرة! هتاخد بنزين من العربيات المتدمرة، هتعرف من احد المتشردين فى الصحرا ان فى بريمة بترول على مسافة قريبة من هنا، هتحاول توصلها فى اسرع وقت ممكن قبل ما حد تانى يعرف مكانها! لكنك هتوصل فى نفس الوقت اللي عصابة واحد من اخطر مجرمين العصر الجديد اسمة الهيومنجص لابس على وشة قناع حديدة بيدارى بية الحروق المقززة! البريمة بيسطر عليها مجموعة من المستوطنين فى المكان، هيقبضوا عليك اول ما توصل! لكن عصابة هيمونجس هتحاصر المستوطنة والبريمة وتعرض عليهم انهم يسلموا الموقع فى مقابل حريتهم وحياتهم! مجموعه من المستوطنين هتحاول تهرب، لكن العصابة هتقبض عليهم،وتعذبهم قبل ما تقتلهم! هتعمل اتفاق مع قائد المستوطنة تحررلهم عربيات تنقية البترول اللي مسيطر عليها هيمونجس وعصابتة فى مقابل حريتك، وبترول يكفيك لرحلتك! هتنجح فعلا فى مهمتك وتجبلهم العربيات اللي مجتاجنها! لكن خروجك من المستوطنة مش سهل، لان ويز هيظهر تانى فى الصورة هيطاردك فى الصحرا فى محاولة اخيرة للأنتقام منك، هيقتل الكلب بتاعك، وهيخبط عربيتك اللي هتنقلب وتنفجر فى الصحراء، لكنك هتخرج حى من الحادثة لكن بجروح فى كل مكان، لكن اصدقائك فى المستوطنة هينقذوا حياتك! لكنك بعد ما تتعافى هتصمم انك تغادر المستوطنة، هتاخد مقطورة متحملة بالبترول، وهيخرج معاك مجموعة من المستوطنين لحمايتك، لكن هيمونجس وعصابتة مش هيسبوك، هيطاردوك فى الصحرا انت ومجموعتك، وهيفكوا الحصار عن المستوطنة فبقية السكان هيقدروا يهربوا، هيومنجس وعصابتة هيقتلوا معظم رفاقك فى المطاردة، فى الوقت اللي هيظهر فيه ويز وعصابتة ويطاردوك هما كمان! بتقوم بمناورة اخيرة هتفلت بيها من العصابتين وتخلى عربيات هيومنجس و ويز يخبطوا فى بعض ويموتوا الاتنين، لكن مقطورتك بتتقلب فى الصحرا وتكتشف ان اللي كان فى التانك بتاعها مجرد رمل، البترول الحقيقى لسه مع سكان المستوطنة، وهيهربوا بيه على الساحل عشان يكونوا مجتمع جديد امن فيه قواعد وقوانين، لكن انت هتفضل وحيد فى الصحرا، هايم فى الخراب والدمار بتدور على مهمة جديدة تشبع بيها رغبتك فى الانتحار!
أخلاق الواجب Deontological Ethics هى مدرسة فلسفية تنظيمية Normative فى فرع فلسفة الأخلاق بتركز على صحة او خطأ الفعل الأخلاقى نفسة بناء على تطابقة مع قاعدة معينة، بغض النظر عن صحة او خطأ تبعيات Consequences الفعل زى مدرسة العواقبية Consequentialism اللي هنتكلم عنها فى المستقبل أو على شخصية وعادات العميل الاخلاقى زى مدرسة أخلاق الفضيلة Virtue Ethics اللي اتكلمنا عنها فى حلقة أخلاق الفضيلة. عشان كده بالنسبة لفيلسوف أخلاق الواجب Deontologist صحة الموقف الاخلاقى بتعتمد على المبدأ أو القاعدة اللي اوصلت للموقف ده ان كانت قاعدة صحيحة او خاطئة. اللي بيخلى اختيار ما صحيح هو اتساقة مع قاعدة الاخلاقية moral norm، بمعنى ان صحة الفعل Right ليها أولوية عن الخير good الناتج عن الفعل. نظرية أخلاق الواجب الحديثة Modern Deontological Ethics قدمها الفيلسوف الالمانى إيمانيول كانط Immanuel Kant فى نهاية القرن الثامن عشر لما طرح فكرته العبقرية نظرية الضرورة الحتمية The Theory of Categorical Imperative أرجع لحلقة الضرورة الحتمية لو عاوز تعرف اكتر عن نظرية كانط العبقرية! لكن ضرورة كانط الحتمية مش هى نظرية الواجب الوحيدة اللي عرفتها البشرية، فى الحلقة دى هنقدم اربع نظريات من مدرسة أخلاق الواجب: نظرية الامر الالهى The Divine Command Theory، نظرية الحقوق الطبيعية Natural Rights Theory، نظرية الاخلاق التعاقدية Contractarian Ethics، ونظرية المبادئ التوجيهية الاخلاقية Moral Guidelines.
تخيل أنك طفل رضيع أتولدت على كوكب بعيد ملايين السنين الضوئية عن كوكب الارض “كوكب كريبتون” الكوكب اللى اصبح دمارة وشيك، أبوك أحد اهم علماء الكوكب “جورال” فشل فى انه يقنع قادة الكوكب وحكمائة بالخطر المحيط بسكان الكوكب، وان لابد من أخلاء الكوكب فى اسرع وقت ممكن! أبوك وامك هيحاولوا ينقذوا وجودهم فيك، هيحطوك على مركبة فضائية متجه لكوكب الارض عشان يضمنوا نجاتك من أنفجار كريبتون اللى بدأ بالفعل، وهلاك ملايين من سكانة! المركبة اللى أنطلقت بسرعة خرافية خارج نطاق كريبتون بتشق أغوار صمت وظلام الكون المهيب، هتصطدم فى صحراء على كوكب الارض بعد ثلاث سنين! هيلاقيك زوجين اتحرموا من نعمة الاولاد فيهتبنوك، لكن بعد ما يشوفوا باقى حطام المركبة اللى انت وصلت عليها، وقدراتك الغير عادية كطفل، هيتأكدوا انك مش طفل عادى على الاطلاق! قوتك الخارقة اللى بتخليك ترفع عربية كاملة وانت طفل عمرة 3 سنين، او سرعتك الغير عادية اللى هتسابق بيها قطار ماشى باسرع ما يمكن! لكنك هتسمع كلام أبوك اللى هيطلب منك اخفاء القدرة الغير عادية دى، والتظاهر بانك ولد عادى زى اى حد فى سنك، فهتصبح شخص عادى فى فريق كرة القدم بدل ماتستخدم قدرتك الخارقة عشان تكون بطل الفريق الوحيد! او تكون مجرد ولد عادى مش بطل خارق جذاب للبنات! لكن والدك الارضى هيفضل يفكرك دايما انك موجود على الارض لسبب عظيم اكبر من مجرد انك تكون مشهور او جذاب .. هيمر الزمن وهيموت ابوك الارضى بعد ازمة قلبية مفاجأة، هتشعر ساعتها بالحزن الكبير على والدك وقدوتك اللى مات بين ايديك بالرغم من كل قواك الخارقة ما قدرتش تعمل اى حاجة عشان تنقذة! هتعدى شهور على موت والدك وانت غرقان فى حزن عميق، فى ليلة هتقرر تدور فى بقايا المركبة الفضائية اللى لقاك فيها ابوك وامك واحتفظوا بيها لاعتقادهم انها هتساعدك فى يوم من الايام انك تكتشف هويتك وسر وجودك على الارض! هتلاقى فيها كريستالة خضرا غامضة، هتقرر انك تبدأ رحلة مجهولة الهدف للقطب الشمالى تبحث فيها عن سر الكريستالة دى، هتودع أمك الارضية فى أسى والم على وعد بلقاء بعد ماتعرف حقيقتك! بعد وصولك للقطب الشمالى هترمى الكريستالة اللى معاك فى وسط التلج .. هتفجر التلج ويخرج مكانها تكوين كريستالى بديع شبية بالمعمار على كوكبك الاصلى كوكب كريبتون! جوة التكوين الكريستالى دى هتلاقى رسالة هيلوجرافية مسجلة سبهالك ابوك الاصلى، هيحكيلك فيها قصته قصة كوكب كيربتون اللى انتهت نهاية مأساوية، هيقلك ان هدفك هو الحفاظ على مبادئ وأخلاق كو كب كريبتون، عن طريق مواجهة الشر والجريمة على كوكب الارض، هتعيش بداخل التكوين الكريستالى ده سنين بتتعلم وتتدرب قبل خروجك مرة تانية للحضارة البشرية لمواجهة قوى الشر والفوضى، لكن المرة دى هترجع رجل خارق … سوبرمان!
هتشتغل صحفى فى جرنال صغير، هتقابل فيه صحفية لامعة “لويس لين” اللى هتقع فى غرامها بسرعة لكنك مش قادر تعبر عن حبك ليها، لانها مش واخدة بالها منك .. لكن شخصيتك الخارقة مش هيمر وقت طويل قبل ما تظهر للعالم لما هتعرف ان حياة لويس فى خطر متعلقة من هليكوبتر بتقع من فوق ناطحة سحاب فى وسط المدينة! بسرعة هتغير بدلتك العادية وتلبس بدلة سوبرمان عشان ماحدش يكشف هويتك وهتطير تلحقها فى اللحظات الاخيرة وانت بتقلها ” ماتقلقيش يا آنسة .. انا مسكتك” .. مذهولة من المفاجأة والخوف هترد فى دهشة ” مسكتنى! .. ومين اللى ماسكك” .. هتطير بيها لسطح المبنى وهى مازالت مش مصدقة اللى بيحصل .. لما هتسألك انت مين، هترد وانت بتحلق فوق المبنى “صديق” ! هتعدى الايام وشخصيتك بتظهر مرة بعد التانية بتنقذ المدينة من اعمال المجرمين والخارجين عن القانون، وتسلمهم للعدالة! الجرايد كلها بتحاول تعرف اى معلومات عنك، حبك لـ لويس هيخليك تبعتلها رسالة انك ممكن تقابلها عشان تعمل معاك مقابلة و هتوقع “صديق” .. فى الميعاد هتهبط على بلوكنتها وتاخدها فى رحلة طيران معاك فوق المدينة، ليلة رومانسية هتشوف فيها قدراتك وسرعتك الخارقة، بعدها هتنشر لويس المقابلة وتطلق عليك لقب سوبرمان! فى نفس الوقت اللى المجرم الشرير “لكس لوثر” بيحضر اخطر خطة ارهابية هتشوفها امريكا، لوثر هيشترى كل الصحرا اللى جنب ولاية كالفورنيا وهيخطط ان يطلق صواريخ نووية على كالفورنيا فيسبب زلازل قوى يدمرها تماما ويغرقها فى المحيط ويقتل ملايين من سكانها فتبقى الارض بتاعتة هى ساحل امريكا الغربى الجديد ويرتفع تمنها بالمليارات ويحقق مخططة الشرير! .. لكن مع شهرتك المستمرة، لوثر هيبدأ يحس بالخطرمن قدراتك الخارقة، هيبدأ بحثة عنك وعن كوكب كريبتون، لحد ما يكتشف ان مادة الكريبتونيت بتضعفك تماما وتخليك معدوم القدرة او القوة تماما .. بعد ما يحصل على مادة الكريبتونيت، هينجح فى استدراكك لمخبأة تحت الارض، هيفاجئك بالكريبتونيت ويشل حركتك تماما! لكن مساعدة لوثر هتساعدك و تحررك من الكريبتونيت فى مقابل انك توقف الصاروخ الاول اللى وجهة لوثر للساحل الشرقى اللى عايشة فيه أمها! وتنقذ امها من الموت! الصاروخ الاول منطلق بسرعة خرافية تجاة الساحل الشرقى لأمريكا، والصاروخ التانى تجاة الساحل الغربى! مش هتقدر توقف الاتنين فى الوقت المناسب، لكن لانك وعدت مساعدة لوثر بانك هتوقف الصاروخ الاول المتجة للساحل الشرقى وتنقذ امها .. هتطير باقصى سرعتك فعلا وتوقف الصاروخ فى الوقت المناسب! لكن الصاروخ المتجة للساحل الغربى هيضرب فعلا كاليفورنيا ويسبب شرخ فى الارض عميق، بداية الانفصال وغرق كاليفورنيا زى ماخطط لوثر! لكنك هتطير فى قلب الشرخ العملاق لمركز الارض بتصارع الزمن وتستخدم قوتك الخارقة فى انك توقف الصدع وترجع الارض لمكانها تانى، لكن المهمة مش بالسهولة دى لان الزلزال هيسبب شرخ فى سد هوفر العملاق وفيضان ضخم على وشك الحدوث، لكنك هتلحق السد فى اللحظة الاخيرة وتوقف الفيضان من تدمير المدينة، لكن فى غمرة الاحداث دى هتنسى ان لويس كانت عالقة فى الشرخ اللى فى الارض، الوقت اللى هتوصل فيه هيكون متأخر وهتموت تحت الضغط! من غضبك وحزنك هتطير بسرعة جنونية فى السماء لحد ماتخرج برة الغلاف الجوى لكوكب الارض، هتسمع صوت ابوك بيتردد فى الفراغ “اوعى تدخل فى تاريخ البشر” .. لكن الالم كبير ومش هتتحمل تفقد حد عزيز عليك تانى، هتعصى اوامر ابوك وتطير بسرعة جنونية اسرع من سرعة الضوء حوالين كوكب الارض، فهترجع فى الزمن وتمنع سد هوفر من التصدع وبالشكل ده تلحق تنقذ لويس من الموت فى اللحظة المناسبة! لكن زى اى بطل خارق مهمتك مش هتنتهى قبل ما تقبض على لوثر الشرير، من الخوف والفزع لوثر هيعتقد انك هتقتلة بعد ما تحاصرة، لكن القتل مازال عمل غير أخلاقى بالنسبة لك حتى مع عتاة المجرمين زى لوثر، هتقبض علية وتسلمة لمأمور السجن اللى هيشكرك على جهودك لأنقاذ البشرية وتحقيق العدالة والقانون فى نفس الوقت .. فهترد بتواضع الرجل الخارق ” لا شكر على واجب! كلنا فريق واحد” قبل ما تحلق فى السما، وعلامة القوة والعدالة بترفرف على عبايتك .. علامة سوبرمان!
مافيش شك ان اى انسان عندة مجموعة من المبادئ principles اللى بيحاول يعيش حياتة على اساسها، لكن يعنى ايه مبادئ وايه طبيعتها؟ ممكن تفكر فى المبادئ كقوانين شخصية بتحكم بيها نفسك .. تخيل انك حكومة مصغرة من فرد واحد، زيك زى اى حكومة عندك قوانين لابد وان افرد دولتك (اللى هما شخصك) يتبعوها، زى مثلا انا مش هسرق حتى لو ماحدش شافنى، او انا مش هكسر وعودى حتى لو أختلفت مع الشخص اللى انا مواعدة ..الخ القوانين دى زى قوانين الدولة انت بتشوف ان من الضرورى عليك عدم مخالفتها حتى وان كان يبدو فى بعض الاحيان ان الامور هتكون افضل لو خالفتها! القواعد Rules بتختلف عن المبادئ فى انها مجموعة من الاوامر المنظمة اللى بتُفرض عليك من مشرع خارجي External Authority ممكن المشرع ده يكون الله God او الحكومة Government او حتى اهلك، او مدرسك .. الخ.. فى الديانات السماوية المصدر الاول للقواعد الاخلاقية كان الوصايا العشر Ten Commandments اللى طبقا للقصة التوراتية فى سفر الخروج Exodus ربنا نزلها فى لوحين من الحجارة على رسولة موسى فى سيناء، كتير من الناس ممكن ياخد القواعد دى كقانون للحياة وبيعتقدوا انك لو كسرت القواعد دى عقابك هيكون جنهم Hell فى يوم الحساب Judgment Day .. ايا كان العقاب الفكرة ان اللة فى الحالة دى هو اللى فرض القواعد دى عليك وعلى باقى البشرية! لكنها مش مبادئ Principles لان المبادئ هى مبادئ منظمة لحياتك الاخلاقية بتعتنقها مش لانك خايف من النار او العذاب لكن لانك اختارتها تكون جزء من اسلوب حياتك! انت ممكن تعتنق بعض او كل القواعد الاخلاقية فى الوصايا العشر او غيرها بسبب خوفك من العقاب او رغبتك فى الجزاء فى الحالة دى هتفضل دايما مجرد قواعد، اما لو اعتنقتها لرغبتك فى ضمها لنظام حياتك ساعتها بس بتصبح مبادئ! يعنى مثلا، التزامك بالسرعة القانونية وانت سايق على الطريق لانك خايف ان الرادار يلقطك وتاخد غرامة .. دى قاعدة! اما التزامك بالسرعة القانونية وانت سايق لانك مش الشخص المتهور اللى بيعرض حياتة وحياة الاخرين للخطر .. ده مبدأ! خلى بالك ان الهدف من التفريق ده مش ان المبادئ افضل من القواعد، فى الحقيقة كلنا بحتاج مزيج من القواعد والمبادئ فى حياتنا اليومية، قد يكون من المناسب فى بعض الاحيان ترقية قاعدة معينة لمبدأ زى مثلا السرقة جريمة، وفى احيان تانية ممكن القاعدة تفضل لمجرد تجنب العقاب!
تخيل أنك مذيع نشرة أخبار فى قناة تلفزيونية، مغرور بنجاحك وشهرتك الكبيرة بين المشاهدين، بتعامل كل اللى حواليك بتعالى واستكبار، من أول منتجة البرنامج اللى انت نفسك معجب بيها لحد زمايلك فى النشرة، النهاردة 1 من فبراير، احتفال نهاية الشتاء على الابواب، هتبعتك القناة مع ريتا منتجة البرنامج ومصور لقرية صغيرة مشهور باحتفال فار الارض، احتفال سنوى اهالى القرية بيشوفوا فار الارض وهو بيخرج من بياتة الشتوى كعلامة على انتهاء الشتاء وبداية الربيع، كل سنة القناة بتبعتك لنفس الاحتفال اللى اصبح ممل وغبى بالنسبة لك! هتسافر انت وفريق العمل للقرية وهتباتوا فيها ليلة الاحتفال، صباح يوم فار الارض هتصحى بدرى الساعة 6 الصبح على صوت مذيع الراديو بيتكلم عن احتفال يوم فارالارض السنوى، فى طريقك لمكان الاحتفال هتقابل صديق طفولة قديم، هتتظاهر انك ماتعرفوش لانه رغاى وممل، لكنة هيصمم انه يفكرك بنفسة ويعرض عليك انك تشترى بوليصة تأمين منه لكنك هترفض وتسيبة وتمشى وهو لسه بيحكيلك عن ذكريات الطفولة، لانك اتأخرت عن ميعاد شغلك، بعد ما توصل لمكان الاحتفال هتسجل الاحتفال وعلامات الملل على وشك وفى صوتك، بعد التسجيل هتحاول تسيب القرية انت وفريق العمل، لكن عاصفة ثلجية هتقوم وتقطع الطرق، فهتضروا تباتوا ليلة كمان فى القرية! هتصحى اليوم اللى بعدية على صوت المذيع فى الراديو بيتكلم عن احتفال يوم فار الارض، بعد ما تعرف ان النهاردة لسه يوم 2 فبراير، مذهول من اللى بيحصلك هتكتشف انك بتعيش نفس اليوم اللى فات مرة تانية، انت الوحيد اللى مدرك لده لكن كل الناس بتتصرف عادى كأنه اليوم بيحصل لاول مرة، هتقابل صديق الطفولة القديم بنفس رذالتة ومملة، هتسجل نفس الحلقة المملة، والعاصفة التلجية هتقطع الطرق وهتضطر تبات تانى فى القرية! هتصحى الصبح تانى على نفس اليوم، دايرة مغلقة اتقفلت عليك وباين انك هتعيش اليوم ده كتير! بعد ما هتزهق من محاولة فهم ايه اللى بيحصل، هتقرر انك تستغل الموقف لصالحك، هتتعلم بالتجربة الاحداث اللى بتحصل فى اليوم ده وخلفيات سكان القرية، هتتعلم معلومات عن واحدة من سكان القرية وتفهم شخصيتها قبل ما تغويتها فى علاقة تبدو فيها وكأنك فارس أحلامها اللى مناسب ليها فى كل شئ لكنها ماتعرفش انك جربت كل الطرق معها و كل مرة اليوم كان بيتعاد لحد ما نجحت! هتسرق فلوس من البنك، هتسوق وانت سكران، وهتهرب من مطاردات البوليس، كل شئ جائز ومباح بالنسبة لك لانك عارف انك هتصحى بكرة على نفس اليوم من اول وجديد وكأن مافيش اى شئ حصل! هتحاول تغوى ريتا منتجة البرنامج من خلال تجربة كل الاحتمالات زى مع عملت قبل كده مع غيرها! هتتعلم شعر لما هتقلك انها بتحب الشعر، هتتعلم فرنساوى لما هتعرف انها بتعرف فرنساوى، معاك الوقت، وكل الفرص انك تجرب حظك معاها مرة بعد التانية، لكن كل محاولاتك فشلت، وهتبدأ تزهق من وجودك الابدى، واللعنة اللى حلت عليك، وهتسأل نفسك هتفضل كده تعيش نفس اليوم للأبد؟! هتكسر المنبة اللى بيصحيك على نفس اليوم كل يوم، فى اليوم التانى هيرجع المنبة سليم من جديد! على حافة الجنون هتبدأ تحاول تكسر دايرة الزمن اللى انت فيها بكل الطرق الممكنة، هتحاول تسرق فار الارض اللى بيحتفلوا بيه، هتفجر نفسك فى عربية، هترمى نفسك من فوق مبنى، لكن مافيش فايدة بتصحى تانى على صوت المذيع بيتكلم عن احتفال يوم فار الارض! هتفكر ان التجربة دى ممكن تكون اختبار عشان تعرف الهدف فى حياتك، يمكن فى يوم واحد ماتقدرش تشبع كل حاجاتك لكنك ممكن تحقق تحسن وتطورمن نفسك بشكل يومى بما انك بتعيش نفس اليوم للأبد، هتبدأ تقوم بمجموعة أعمال بطولية يومية .. تنقذ واحد كان هيموت مخنوق وهو بياكل، تنقذ طفل بيقع من على الشجرة، هتشترى من زميلك الممل بوليصة التأمين اخيرا، هتشوف شحات فقير فى الشارع بيموت من الجوع والبرد، هتحاول تنقذ حياتة بكل الطرق الممكنة فى كل مرة اليوم بيتكرر، هتعطف علية، هتأكلة، هتصاحبة، لكنة دايما فى النهاية بيموت، هتستلم لفكرة انه لازم يموت وانت بتحاول تنقذ حياتة فى مرة من المرات بعد ما تسأل الممرضة هو ليه مات .. فهتقولك “وقت موتة جة”! هتحاول تطور من مهارتك لان الوقت كتير قدامك، هتتعلم بيانو، النحت فى التلج، وهتحفظ قصة حياة كل بنى ادم فى القرية! سنيين بتعدى وانت بتعيش نفس اليوم كل شئ ثابت وانت الوحيد اللى بتتغير، بتتعلم، وشخصيتك بتتشكل! فى النهاية بكل مهارتك الجديده، والناس اللى بتنقذها، وتساعدها، وصدقاتك الجديدية اللى بتكونها مع كل اهالى القرية، والبرنامج اللى سجلتة الالاف المرات عن يوم فار الارض اخيرا بقى ابداع حقيقى بصدق واخلاص، هتقضى ليلة جميلة اخيرة مع ريتا بترقصوا فيها على انغام موسيقى الجاز، قبل ما تناموا الليلة دى لأول مرة هتستلم لمصيرك الابدى بعد ما حققت اليوم المثالى، هتنام وانت راضى ان كل شئ هيتعاد ويبدأ من جديد بكرة. لكن المرة دى هتصحى الصبح على صوت المذيع بيتكلم على ليلة امبارح واحتفال يوم فار الارض اللى خلص، هتقوم من النوم مش مصدق نفسك، هتبص من الشباك هتكتشف انك اخيرا خرجت من الدايرة الزمنية والنهاردة 3 فبراير، لكنك خرجت من دايرة اليوم الواحد بسمات شخصية جديدة انسان تانى .. وكأنك أتولدت من جديد!
تخيل أنك قائد أشهر وأكبر سفينة فضاء صنعتها البشرية لرحلة أستكشاف المجرات المحيطة بمجرتنا الام درب التبانة،انت قائد سفينة فضاء المؤسسة! فى أحدى رحلاتكم لأستطلاع موت أحد النجوم العملاقة فى المجره دى، هيحصل اتصال سلمى بينكوا وبين سفينة تانية لسلالة من كائنات الفضاء اللى عايشة فى المجرة أسمها الفيزينز .. وهتبدأوا عملية تعارف وتبادل المعلومات عن حضارتكوا. فى اللقاء الاول بينك وبين قائد من الفيزينز هو وزوجتة على العشاء هتقابل معاهم واحدة تانية من الفيزينز مختلفة عنهم، لما بيتكلموا عنها ما بيقولش هى ولا حتى هو لكن بيقولوا عليها كوجينتور أو جنس مساعد، هتسأل ان كان ليها اسم؟ هيقلوا لك ان الكوجينتورز مالهمش اسم! فضولك هيدفعك انك تعرف اكتر عن البيولوجى بتاعة الفيزينز .. هتكتشف انها كائنات ثلاثية الجنس مش زى البشر ثنائية، عندهم بجانب الراجل والست جنس تالت بيسموة الجنس المساعد وظيفتة انه يكمل عملية التناسل! الجنس المساعد ده ما بيساهمش فى الجينات بتاعة الجنين لكنه بيقدم انزيمات مطلوبة فى عملية التخصيب! لكن الكوجينتور بيمثلوا 3 فى المية بس من سكان الفيزينز عشان كده الواحد منهم بيستخدم اكتر من مرة مع ازاوج مختلفة فى عملية التخصيب، والازواج اللى عاوزة تخلف لازم يقدموا للدولة وينتظروا لحد ما يجى دورهم ويتخصص لهم كوجينتور. هتشغلك الثقافة الجديدة وخصوصا فكرة الجنس المساعد، وهتبدأ تفكر فى حقوق الكوجينتور واسلوب معاملتهم، هتطلب تزور سفينة الفيزينز، لما هتسأل القائد وزوجتة عن الكوجينر بتاعهم هيستغربوا جدا انت ليه مهتم بالموضوع ده، خلال بحثك هتكتشف ان الكوجينتور ما بيتعاملوش معاملة كويسة، بياكلوا مرة واحدة فى اليوم، نادرا لما بيتكلموا، وبيقضوا معظم الوقت معزولين فى اوضهم ومش مسموح ليهم بالتعليم او القراءة، دول حتى ما لهمش اسم! بمساعدة عالم احياء من طاقم سفينتك هتجروا ابحاث طبية سرية على الكوجينتور هتكتشفوا انها كائنات كاملة الذكاء والنضج زى بقية الفيزينز وممكن يتعلموا وينموا ويكون لهم حياة طبيعية زيهم زي اى كائن تانى! من غير علم الزوجين هتبدأ تتصل بالكوجينتور بتاعهم، هتشجعها انا تقرا، وتتعلم .. فى البداية هتكون خايفة منك لكن مع الوقت الصداقة والثقة بتنمو بينكوا! بالرغم من ان ماعندهاش اى نوع من التعليم بالمرة الا انها بتتعلم بسرعة بمساعدتك، واول حاجة هتتعلم اهميتها هى ان يكون للفرد اسم، وهتفكر ليه مالهاش اسم؟ وهتطلب منك ان اسمها يكون على اسمك! بمرور الوقت وتطور العلاقة بينكوا هتبدأ الكوجنتور تكتشف ان ليها حقوق وان المفروض ماتتعاملش بالشكل ده، هتسأل نفسها ليه مالهاش حق تربى الطفل اللى بيتولد مع الزوجين؟ ماهى كمان بتشارك فى عملية التناسل؟ ليه مش من حقها انها تقرا، تخرج، وتستكشف العالم اللى حواليها؟ لكن اللحظة الفراقة فى وجودها، لما تكتشف ان حياتها فى المجتمع ده اصبحت مستحيلة ومش هتشتبعش تطلعتها ورغابتها الجديدة! هتهرب من سفينتها وتجيلك طالبة حق اللجوء السياسى .. لما هيكتشف الزوجين اختفاء الكوجينتر بتاعتهم وهروبها لسفينة البشر هيشتكوا لقائد الفيزينز،اللى هيطلب اجتماع مع القائد العام لسفينة البشر! القائد العام هيسألك عن صحة الكلام اللى وصل له .. ساعتها مش هتقدر تنفى .. هيقولك “أنت فقدت عقلك” .. هتقول “انا علمتها القراية، عرفتها حقوقها.. انا عملت الصح” .. هيقولك “أنت قائد كبير على السفينة دى وعارف التحديات الاخلاقية اللى بقابلها كل يوم! وعارف انى بصارع كل يوم الرغبة فى الانصياع ورا اللى انا شايفة صح، والتدخل فى ثقافات الكائنات التانية .. فماتقوليش انك عملت الصح، احنا هنا عشان نقابل كائنات جديدة نتعرف على ثقافتهم، مش عشان نقلهم ايه الصح وايه الغلط!” .. هتقول ” لكن احنا اديناهم كتب ومعلومات، انا ما عملتش غير انى علمت الكوجينتور ” .. هيقولك “الموضوع مختلف، هما طلبوا الكتب والمعلومات دى مننا، هل طلبت هى منك انك تعلمها القراءة؟” هتبص فى الارض وتقول “لأ يافندم” .. هيطلب القائد انه يشوف الكوجينتور اللى عندك، هيقولها ” لازم ترجعى سفينتك .. على الاقل لحد ما الازمة تنحل” .. هترد فى خوف “لكنهم مش هيرحمونى!” هتبصلك فى الم وعينيها ملاينة بالدموع وهتقول ” انت قلت لى ان لي نفس الحقوق زيك و زيهم بالظبط، مش كده؟!” .. هتشوف فى عين القائد نظرة لوم قبل ما يقول لها “مش مكانا اننا نقولك ايه حقوقك .. انا اسف” .. هترد “هتجبرنى انى ارجع؟” .. هيصمت القائد العام لدقايق هتمر عليكوا فى بطئ مميت قبل ما يقول “ماأقدرش، قانوننا الاخلاقى يمنعى!” .. هيجتمع القائد العام مع قائد سفينة الفيزينز والزوجين فى محاولة اخيرة لحل الازمة .. هيحاول القائد العام يوضح وجهة نظر البشر الاخلاقية، هيضيف ” ابحثنا البيولوجية اظهرت انها كائن كامل وقادر زيها زيكوا بالظبط” .. هيقول الزوج “انا مش قادر افهم احنا بنقاش ايه بالظبط، دى ثقافتنا، والكوجينتور مكانها معانا على المركبة هنا، ولا المفروض انا وزوجتى نتخلى عن فكرة الخلفة مثلا” .. هيرد القائد بصعوبة .. “انا اتطلب منى انى اوفر الحماية وحق اللجوء لكائن حاسس انه مابيتعاملش بعدالة على مركبتكم! و ما اقدرش اتجاهل النداء ده” .. هترد الزوجة فى الم “احنا اللى مابنتعاملش بعدالة دلوقتى .. هل عندك اى فكرة احنا انتظرنا اد ايه عشان يدونا كوجينتور؟ ” .. هيرد القائد العام فى دهشة ” انتى كأنك بتتكلمى على شئ مش كائن حى” .. هيغضب زوجها ويقول ” انت مالكش اى حق تنقد ثقافتنا، انت ماتعرفش اى حاجة عنا” .. هيتنهى الاجتماع فى اجواء مشحونة بالغضب والتوتر، والقائد هيضطر يرّجع الكوجينتور لسفيتنها تجنبا لحرب كونية بين الحضارات! .. لكن الاخبار هتيجى من سفنة الفيزينز بعد ايام ان الكوجينور انتحرت .. هتنهار وكلمات القائد العام بتردد فى عقلك “فى كائن حى مات النهاردة، ومولود أتحكم عليه بالاعدام قبل ما يتولد بسبب تدخلك فى أسلوب حياة الاخرين”.
تخيل أنك بطل أسطورى وهبت حياتك وثروتك للدفاع عن مدينتك ضد الجريمة والشر، المدينة هى جوثام .. والاسم هو الرجل الوطواط .. العدو اللدود هو الجوكر شخص مشووة مجنون هدفة اثارة الفوضى فى كل مكان! الجوكر وعصابتة هيهجموا على بنك مملوك لمجموعة من عصابات المافيا فى المدينة، جزء من خطة الجوكر ان كل واحد من افراد العصابة يقتل التانى لحد ما يخلصوا كلهم على بعض ويسرق هو كل الفلوس! النائب العام الجديد هارفى شخص مثالى ما بيأمنش بالابطال الخارقين، بيأمن بس بقدرة البشر الذاتية على مواجهة الشر والجريمة، الكل لازم يخضع للقانون وماحدش عندة فوق سلطة الدولة، هتعجبك مبادئة وأفكارة، هتقرر تتعاون معاة انت وجوردن ظابط الشرطة اللى بيساعدك .. بما انك رجل اعمال ثرى هتقيم حفل خيرى كبير على شرفة! فى نفس الوقت اللى هيكون قادة المافيا مجتمعين فيه مع الخبير المالى بتعاهم اللى بيحذران فلوسهم اصبحت فى خطر داخل جوثام بعد سرقة البنك ولازم ينقلوها للصين، لان النائب العام الجديد هيطاردهم، هيخترق الاجتماع الجوكر اللى يقولهم ان حتى لو نقلوا فلوسهم بره المدينة، باتمان مابيخضعش لنظام العدالة وهيفضل يطاردهم، الجوكر هيعرض عليهم انه يقتلك مقابل نص ثرواتهم.. لكن المافيا هترفض! هتكون مشغول بمهمتك الاولى بعد ماعرفت ان الخبير المالى بتاعهم هرب للصين بكل الفلوس، هتطاردة فى الصين لحد ما تقبض عليه وترجعه لجوثام عشان يعترف بكل جرائم المافيا قدام العدالة، لكن دى كانت مجرد بداية . الجوكر هيعلن للناس انه هيقتل كل يوم شخص اذا الرجل الوطواط ما اظهرش شخصيتة الحقيقية! وهيبدأ مجذرتة بقتل القاضى اللى كان المفروضي يحقق فى قضية المافيا.. قدام الملايين على شاشة التلفزيون .. الهدف التانى للجوكر كان عمدة المدينة، لكن جوردن هينقذ العمدة ويضحى بحياتة، هتبدأ تراجع نفسك وتفكر جديا فى اظهار هويتك للناس عشان توقف شلال الدم، لكن النائب العام هيعلن ان هو نفسة باتمان عشان ينقذ الموقف والبوليس هيحطة فى حبس احتياطى، لكن الجوكر المجنون بيدور عليه فى كل مكان، فى الوقت اللى هيظهر فيه ظابط الشرطة جوردن اللى اتظاهر انه مات تبعا للخطة اللى بينه وبينك ويفاجئ الجوكر فى مطاردة عنيفة لحد ما يقبض عليه ويسجنة! فى نفس الليله هيختفى هارفى وخطيبتة، الجوكر هيحبسهم فى مبنين مختلفين ملاينين بالمتفجرات، دقايق معدودة باقية، بتسابق الزمن عشان تنقذهم لكن الوقت كان اسرع منك هينفجر المبنى ويتشووة نص وش هارفى، وتموت خطيبتة! الجوكر هيفجر قسم الشرطة كمان ويهرب، موظف فى شركاتك هيكتشف حقيقتك ويقرر انه يعلن للناس عن شخصية باتمان الحقيقية، لكن الجوكر مش عاوز المتعة تنتهى، هيغير تهديدة ..المرة دى هيفجر مستشفى كل يوم لو الموظف ده ما اتقتلش، سكان المدينة غضبانين هيهاجوا الموظف عاوزين يقتلوة لكنك هتدخل لحمايتة فى الوقت المناسب، فى الوقت اللى الجوكر هيزور المستشفى اللى فيها هارفى ويقنعة انه بقى مشووة زية ومالوش مستقبل والكل خانة وضحوا بخطيبتة! ولازم ينتقم منهم كلهم، بعدها هيفجر المستشفى كلها ويهرب! بعد هروب هارفى وقناعتة ان المجتمع هو السبب فى موت خطيبتة هيبدأ يهاجم ظباط الشرطة واحد ورا التانى .. بيقرر مصيرهم عن طريق الحظ .. ملك ولا كتابة! لكن الجوكر عاوز الفوضى تكون اكبر من كده، هيحط ألغام فى مركبتين فى عرض البحر، واحدة ملاينة بمواطنين والتانية كلها مساجين مترحلين للسجن، وهيدى ريموت لراكب واحد على كل سفينة من الاتنين بيتحكم فى متفجرات السفينة التانية، وقدام كل سفينة فرصة انها تفجر السفينة التانية قبل نص الليل والا هو نفسة هيفجر السفينتين! صراع دموى بينك وبين الجوكر، متعلق من على سطح ناطحة سحاب تحت رحمته، هيقولك على مخططه، وهو سعيد بالفوضى اللى هيعملها، لكن منتصف الليل جه وماحدش من السفنتين فجر التانية، هيغضب الجوكر ويقرر انه يفجرهم بنفسه، لكنك هتهاجمة بسرعة وترمية من فوق المبنى، هيقع وهو بيضحك فى هستريا جنونية، لكنك هتلحقة فى اللحظة الاخيرة! هيبصلك فى شماتة وسخرية، وهو بيقول ” أنت فعلا مستحيل افسادك ، مش قادر حتى تقتلنى ولو بحكم خاطئ فى لحظة ضعف للدفاع عن نفسك، وانا مش هقتلك، لانى بنبسط جدا باللعب معاك! اعتقد انا وانت مصيرنا انا نفضل كده للأبد!” .. هتقولة ” ان المدينة دى ورتك النهاردة ان لسه فيها ناس كتير مستعدة للأيمان بالخير” .. هيرد ” لحد مايفقدوا كل شئ، لحد مايشوفوا نائبهم العام هيعمل ايه.. اوعى تكون افتكرت انى هخسر معركة نهاية جوثام فى خناقة معاك .. لا تبقى غلطان، انت محتاج حاجة اكبر من كده بكتير!” .. هتكتشف خدعة الجوكر وتبدأ تدور على هارفى لحد ما هتلاقية فى مبنى قديم ماسك الظابط جوردن وعائلتة بيقرر هيقتل مين فيهم الاول، فى اللحظة اللى رمى فيها العملة اللى فى ايده ؤقرر انه يقتل الولد الصغير ابن جوردن، هتهاجمة فى معركة اخيرة شرسة مع قوى الشر! قضيت عليه وأنقذت الولد الصغير من الموت .. لكن مهمتك لسة ما انتهتش عشان تنقذ صورة هارفى قدام سكان المدينة هتطلب من جوردن انه يقول انك انت اللى قتلتة وانه ماتحلوش لمجرم زى ما الجوكر كان عاوز.. عشان يبقى امل لجوثام فى الخير .. وتفضل انت فارس الظلام!
kalam Falsfa كلام فلسفة 