EP26: The Nonexistent Problem أشكالية عدم الوجود

Episode 26 + ECN (Egypt Cancer Network) Ad

تخيل أنك مهندس برمجيات عايش حياة مزدوجة! بالنهار بتكتب كود للشركات عابرة القارات العملاقة، وبالليل بتتقمص شخصية هاكر على الانترنت تحت أسم “نيو”. عندك قلق واعتقاد دائم ان فى حاجة غلط فى العالم اللى انت جزء منه! ومحيرك لغز كلمة “المصفوفة” المشفرة اللى بدأت تظهر على شاشة الكمبيوتر بتاعك. مستغرب من مين اللى بيحاول يخترق الكمبيوتر الشخصى بتعاك، هتشوف رسالة تانية بتقول لك “دور على الارنب الابيض”! فى مرة هتكون فى نادى ليلى هتشوف واحدة مرسوم على دراعها وشم ارنب ابيض. هتفتكر الرسالة وهتعرف ان ليها علاقة بالشخص اللى بيحاول يخترق الكمبيوتر بتاعك، هتقرب منك وتعرفك بنفسها هاكر أسمها “ترينتى” هتقول لك انها تعرف كل حاجة عنك وعن المصفوفة وان  شخص أسمة مورفيس ممكن يفسر لك معنى “المصفوفة”!  فى الشغل هيجيلك طرد فية تليفون محمول بمجرد ما تفتحة هيرن، وهيرد عليك صوت عميق لراجل هيقول لك انه مورفيس، هيقولك ان عملاء من البوليس فى اتجاهم ليك دولقتى عشان يقبضوا عليك، هيرشدك عبر التليفون عشان تهرب منهم، لكنهم هينجحوا فى القبض عليك فى النهاية، هيحققوا معاك ويتهموك بانك اخترقت انظمة امنية بدون حق، هتطلب المحامى بتاعك، هيكتفوك ويحطوا حشرة الكترونية غريبة فوق معدتك هتخترق جلدك وتختفى فى بطنك، قبل ما تقوم مفزع من النوم فى اودتك مش عارف ده كان حلم ولا حقيقة. التليفون هيرن تانى لما هترد هتسمع صوت مورفيس بيقول لك انك انت المختار اللى كان بيدور علية طول حياتة، هترتبوا ميعاد تتقابلوا فية، هيجى مورفيس وترينتى وباقى فريقهم، هيخرجوا الحشرة الالكترونية الغريبة من بطنك فهتتصدم لما تكتشف انك ماكنتش فى حلم. مورفيس هياخدك فى مبنى قديم ويقولك انك كنت طول عمرك عبد فى المصفوفة، وهيعرض عليك حبتين حمرا وزرقاء، لو اخدت الحبة الزرقاء هتصحى فى بيتك ومش هتفتكر اى حاجة من اللى حصل، اما لو اخدت الحبة الحمراء مورفيس هيوريك حقيقة المصفوفة. مدفوع بالفضول والرهبة هتاخد الحبة الحمراء، لما هتقوم تلمس المراية اللى قدامك هتتحول لسائل زى الزئبق هيلزق فى ايدك ويبدأ ينسال على جسمك لحد ما يحوطك بالكامل، هتفقد الوعى من الخوف وتصحى عريان فى وعاء مليان سائل لزج فيه كابلات متوصلة بمخك، لما هتبص حواليك هتلاقى ملايين الاوعية فيها بشر زيك متوصلين بالكابلات، قبل ما حشرة عملاقة هتخرم رقبتك وينساب السائل اللزج من حواليك، ويغمرك الضوء من كل ناحية! فى العالم الحقيقى مورفيس وفريقة هيعيدوا تأهيلك من جديد لانك ما استخدمتش عضلاتك من لحظة ميلادك! مورفيس هيقولك ان السنة الحقيقة هى 2199، وهيبدأ يعرفك بفريق العمل، هيطلب منك انك تنام على كرسى وهيغرس فى رقبتك كابل هيوصل بمخك قبل ما تدخل برنامج الكمبيوتر. مورفيس هيقابلك فى برنامج الكمبوتر ويفسرلك ان من سنين طويلة فاتت البشرية طورت ذكاء صناعى لكنها فقدت السيطرة علية، فالبشر قرروا يعملوا شتاء نووى يحجبوا بيه الشمس عن الارض، فالروبت تفقد الطاقة الشمسية مصدرها الوحيد، لكن الروبتات تكيفت مع الوضع ده وصنعت عالم تحصد فيه البشر كغذاء كهروبيولوجى! المصفوفة برنامج كمبيوتر مصمم للسيطرة على البشر، اللى بيعيشوا حياة افتراضية بداخل العالم الافتراضى ده، لكن فى واحد بس اتولد داخل المصفوفة بقدرة على تغيير كل شئ، الانسان ده هو اللى هيحرر العقول البشرية، عراف اتنبأ بيه ومورفيس معتقد ان انت الانسان المختار. مورفيس هيبدأ تدريبك على فنون القتال فى برنامج محاكاة .. بسرعة مهارتك هتطور وتصبح محارب شرس. هتدخل فى برامج تدريب مختلفة .. بتقفز من ناطحة سحاب للتانية، هتقع على الارض، هتفوق من المصفوفة فى سفينة مورفيس وبقك بيدمى، هتتعلم ان بالرغم من ان المصفوفة مش حقيقية الا ان اللى بيحصل فيها بيأثر على جسمة الحقيقة. فى ارض الواقع أخطبوطات ألكترونية بتحوم حول اوعية البشر النايمين متوصلين بالمصفوفة، بتحاول تحس باى نشاط كهروبائى غريب. مورفيس هياخدك عشان تقابل العراف اللى تنبأ برجوعك، فى بيت العراف هتقابل طفل راهب هتشوف المعلقة بتنتى فى ايدة زى البلاستيك، هيقلك ان المعلقة مش هى اللى بتنتى عقلك هو اللى بيصورها بتتنى، المعلقة مالهاش وجود من الاساس! العراف اللى هيجى فى صورة جدة عجوزة، هيقولك انك مش انت المختار وان الوقت هيجى ولابد تختار ما بين حياتك القديمة وحياة مورفيس! فى اللحظة اللى عملاء المصفوفة فى بدلهم السوداء هيظهروا وهيهجموك انت ومورفيس .. معركة شرسة بينك انت ومورفيس وعملاء المصفوفة اللى اعدداهم فى تزايد مستمر، فى النهاية مورفيس هيساعدك تهرب لكن هيتقبض علية. هترجع انت وترينتى عالم المصفوفة الافتراضى، وتدخلوا فى معركة شرسة تنقذوا فيها مورفيس، بعد نجاحك فى انقاذ مورفيس هتثق فى قدرتك هترجع المصفوفة تانى وتدخل فى معركة دامية مع عملاء المصفوفة، فى الوقت اللى الاخطبوطات الالكترونية هتهاجم سفينة مورفيس اللى فيها فريقك وجسمك .. هتنجح فى مهمتك وتدمر عملاء المصفوفة وترجع فى الوقت المناسب للسفينة عشان توقف الاخطبوطات اللى بتهاجكموا! بعد نجاحك فى مهمتك هترجع عالم المصفوفة الافتراضى هتعمل مكالمة تليفونية انت عارف ان الالات بتتجس عليها، هتقول انك هتكشف لكل مساجين المصفوفة عالم جديد ، فى كل شئ ممكن! هتنهى المكالمة وتطير محلق فى فضاء المصفوفة الافتراضى.