EP 24: Ethics in Islamic Philosophy الأخلاق فى الفلسفة الأسلامية

Episode 24 + ECN (Egypt Cancer Network) Ad

تخيل أنك أمير عاصمة الأمبراطورية العربية فى العصر العباسى بغداد فى عز مجدها! ورثت حكم المملكة عن أبوك اللى ورثة عن جدك هارون الرشيد وأنت عمرك صغير جدا! أعباء ومسؤولية الحكم أكبر بكتير من سنك، لكن الوزير جعفر اللى خدم فى بلاط والدك لسنين جنبك وهيساعدك فى أمور رعيتك! فى يوم من الايام جعفر أقنعك تنزل فى جولة وسط المدينة متنكر زى ما جدك كانت متعود يعمل عشان تتعرف على رعاياك! بمجرد نزولك للشارع جعفر هيأمر الحراس بالقبض عليك بتهمة السرقة، اللى هينفذوا اوامرة بدون تفكير لانهم مش هيقدروا يتعرفوا عليك وانت متخفي! فى السجن هتقابل ولد صغير مقبوض علية بتهمة السرقة هو كمان اسمة سابو، هيحكيلك عن الظلم اللى واقع على الناس فى مدينتك، والفقر اللى خلاة هو نفسة يسرقك، هيشفق عليك بعد ما يعرف اللى شخصك واللى عملة معاك جعفر الشرير! هتهربوا من السجن على مدينة البصرة عشان تقابل الاميرة خطيبتك، لكن جعفر كان في طريقة لزيارة مدينة البصرة هو كمان ومعاة هدية كبيرة لسلطان المدينة أبو الاميرة، السلطان عاشق للعجائب والتحف اللى مالهاش نظير، و جعفر اللى بيعشق الاميرة عارف سر ضعف السلطان هيهدية حصان ميكانيكى بيطير كمهر للأميرة، السلطان مش هيقدر يقاوم وهيقرر خطبة الأميرة لجعفر، الاميرة اللى بتحبك بجنون لما هتعرف الخبر المحزن هتهرب من المدينة! هتواجهة جعفر فى البصرة وبعد معركة عنيفة مع الحراس هتحاول تقتلة لكن جعفر اللى عالم بادوات السحر الاسود وخفاياة هيرمى عليك تعويذة يعمى بيها بصرك، ويحول صديقك سابو لكلب، التعويذة تتفك بس لو جعفر حضن الاميرة. جعفر هيدور على الاميرة لحد ما هيلاقيها بتتباع فى سوق العبيد لان ماحدش عارف شخصيتها، هيشتريها فى السر وياخدها فى سيفنتة عشان يرجع بيها بغداد! جعفر هيقول الاميرة اللى نفسها تفك التعويذة اللى علي عينيك بان حلها الوحيد هو انها تكون فى حضنة، الاميرة اللى هتضحى وتكون فى أحضان جعفر فى اللحظة اللى هيرجع بصرك ويتحول سابو تانى لأنسان، هتطاردوا سفينة جعفر فى قارب انت وسابو، لكن جعفر مش سهل هيستخدم سحرة الاسود عشان يقوم عاصفة كبيرة فى البحر هتدمر مركبك وترميكوا فى البحر! الموج العنيف هيفرقكوا عن بعض وسابو هيصحى تانى يوم على شط جزيرة معزولة مُعتقد انك غرقت ومت فى العاصفة! سابو هيلاقى زجاجة على الشط لما هيفتحها هيخرج منها جنى مارد عملاق! هيقول لسابو ان سيدة النبى سليمان حبسة فى الزجاجة دى من الالاف السنين ورماة فى البحر، وانه اقسم انه هيقتل اللى هيخرجة بعد الحبس الطويل ده! سابو هيستخدم ذكائة ويقول للجنى انه مش مصدق ان مارد بحجمة الضخم ده ممكن يخرج من الزجاجة الصغيرة دى، وانه عاوز يموتة وخلاص! الجنى هيرجع فى الزجاجة تانى عشان يثبت لسابو انه فعلا خرج منها، فى اللحظة دى سابو هيقفل الزجاجة عليه تانى، ويقرر يرمية فى البحر، لكن الجنى هيعقد معاة صفقة انه ينفذ لة سبع طلبات ويدية الامان لو اخرجة من الزجاجة! سابو هيخرجة وهيطلب يعرف ان كنت حي وفين أراضيك! الجنى هياخد سابو لمعبد فوق قمة أعلى جبل فى العالم يجيب العين السحرية اللى فيها ممكن يشوف مكانك. بعد معركة عنيفة بين سابو والعناكب العملاقة حارسة العين السحرية هيقدر يوصلها! فى نفس الوقت جفعر مش عاوز يستخدم سحرة الاسود عشان يجبر الاميرة انها تتجوزة لانه عاوزها تحبة بأرادتها، لكنها بتكرة وبتخاف منه! الاميرة هتترجاة انه يرجعها البصرة لأبوها السلطان، بعد ماجعفر هيرجعها الاميرة هتترجى ابوها انه ما يغصبهاش تتجوز جعفر، والسلطان هيحقق رغبتها! جعفر هيقدم للسلطان هدية تانية ست بعشر درعات بترقص زى الحية، السلطان مأخوذ بسحرها، هتقتلة فى غمضة عين، وجعفر هيخطف الاميرة تاني!

thief of baghdad

الجني هياخد سابو ليك، هتبص فى العين السحرية هتشوف الاميرة حزينة فى اسرها، وجعفر بيرتب لحفل الجواز، هتغضب وتتمنى انك تكون فى بغداد عشان تنقذ الاميرة، سابو هيطلب من الجنى انه يحقق لك امنيتك، وبالفعل الجنى هيوديك بغداد فى لمح البصر! لكنها كنت الامنية الاخيرة لسابو والجنى اصبح حر، بعد معركة عنيفة مع حراس القصر هيقبضوا عليك ويسجنوك، وجعفر هينفذ فيك حكم الاعدام مع اول ضوء للنهار، سابو بيتابع كل اللى بيحصل من خلال العين السحرية هيغضب انه مش قادر ينقذك هيرمى العين على الصخور هتتفجر وتنقلة لأرض العجائب اللى كنت متحجرة لملايين السنين، ملك المدينة هيشكر سابو انه حرر مدينتة من اللعنة اللى كانت عليها، وهيديلة القوس السحرى و يطلب منه انه يفضل فى المدينة لكن سابو هيقرر انه يسرق البساط السحرى اللى فى المدينة عشان ينقذك! سابو هيدخل بغداد زى ما النبوئة القديمة قالت طاير على بساط سحرى فى الوقت المناسب، قبل ما حراس جعفر يقتلوك ويقتل جعفر بسهم من القوس السحرى اللى اخدة من مدينة العجائب ويوضع نهاية لشر جعفر اللى من غير حدود!

J1D30992

فلاسفة ومفكرين الأسلام الاوائل ما ركزوش على المشكلة الاخلاقية زي ماركزوا على المشاكل الفلسفية اللاهوتية، الوجودية، والنفسية! يمكن لأنهم ما شفوش الاخلاق كمشكلة فلسفية صعبة تستدعي البحث والدراسة المتعمقة. ويمكن ده يكون راجع لطبيعة النظام الاخلاقي فى الاسلام المكون من مجموعة محددة وواضحة من القواعد التنظيمية الأخلاقية Normative Ethical Rules اللى بتكون الدستور الأخلاقى للفرد المسلم اللى بيحكم تعملاتة الشخصية داخل الجماعة او الامة الاسلامية! النظام الأخلاقي الاسلامي زى باقى الانظمة الاخلاقية الدينية بيندرج تحت نظرية الأمر الالهى Divine Command Theory، اللى بتعد واحدة من نظرية مدرسة أخلاق الواجب Deontology ( أرجع لحلقة أخلاق الواجب لو عاوز تعرف أكتر عن نظرية الامر الالهى)! كمان النظام الاخلاقى الاسلامي أقترب من نظرية أحصاء المنفعة Felicific calculus اللى قدمها الفيلسوف الانجليزي جيرمى بينثام Jeremy Bentham كخوارزمية Algorithm  أساسية لحساب قيمة السعادة الناتجة عن فعل ما فى نظرية أخلاق المنفعة Utilitarianism ( أرجع لحلقة أخلاق المنفعة لوعاوز تعرف أكتر عن أفكار بينثام). النموذج الاسلامي طرح نموذج حسابي مشابه يقدر يستخدمة العميل الاخلاقي (الفرد المسلم فى الحالة دى) فى تحديد القيمة المترتبة على أفعالة. يعنى على سبيل المثال فى سورة الإنعام، 160 (مَن جَاءَ بِالْحَسَنَةِ فَلَهُ عَشْرُ أَمْثَالِهَا ۖ وَمَن جَاءَ بِالسَّيِّئَةِ فَلَا يُجْزَىٰ إِلَّا مِثْلَهَا وَهُمْ لَا يُظْلَمُونَ)، أو في سورة الزلزلة (فَمَن يَعْمَلْ مِثْقَالَ ذَرَّةٍ خَيْرًا يَرَهُ ﴿٧﴾ وَمَن يَعْمَلْ مِثْقَالَ ذَرَّةٍ شَرًّا يَرَهُ ﴿٨﴾). الدستور الأخلاقي الاسلامى بيحتوى على مجموعة كبيرة من القواعد الأخلاقية المنظمة لحياة الفرد المسلم والمستمدة من القرآن الكريم والسنة النبوية، القواعد الأخلاقية دى بتشمل على فضائل زى تأدية الأمانة، الحكم بالعدل، الأحسان الى الفقراء، البر بالوالدين، وبيمنع رذائل زى التبذير، التكبر، الأستعلاء، أغتصاب حقوق الغير، نشر الفساد فى الارض، الخ .. اضافة لده المنظومة الاخلاقية الاسلامية كانت واضحة جدا فى تحديد كتير من المحرمات اللى يتبغى على الفرد المسلم تجنبها زي الميتة،الدم، لحم الخنزير، الخمر، الميسر، الأنصاب، الأزلام، القتل، وأد البنات، الخ. لكن النظام الاخلاقي المحكم ده ما منعش بعض فلاسفة ومفكريين الاسلام من البحث ودراسة الظاهرة الاخلاقية من منظور عقلي بجانب المنظور النصي.

_32853_was4 download

دراسة الأخلاق فى الفلسفة الأسلامية بدأت فى القرن السابع والثامن وكان محورها الاساسي هو سؤال القدر Predetermination. المدرسة القدرية Qadariyah كانت من أوائل المدراس الفكرية والفلسفية فى الأسلام، روادها دعوا لمبادئ العقلانية والتفكير المنطقي فى المسائل البشرية بما في ذلك المسئلة الدينية! تأثير افكار الفلسفة الاغريقية كان واضح جدا على المدرسة القدرية! والقدريين Qadarites أعتقدوا ان الله Allah أدى الانسان حرية ارادة Free Will اللى من غيرها الانسان من غير المنطقى انه يكون مسؤول بالكامل عن افعالة. حرية الارادة فى وجهة نظر القدريين كان ليها معنى منطقى واحد هو أن الله ما يقدرش يعرف أفعال الانسان مسبقاً. القدرية أتولدت على أيد غيلان القدري فى بداية عهد الخليفة الأموي عمر بن عبد العزيز وقتلة الخليفة هشام بن عبد الملك! لكن أفكار القدرية زاع انتشارها فى دمشق فى نهايات القرن السابع، قبل ما يتم منعها فى العهود الاسلامية التابعة. القدرية تحدت وانكرت فى بعض الاحيان أفكار أساسية فى معتقد الجماعة السنية زى فكرة عذاب القبر Punishment of the Grave، أو قبولهم بس بالاحاديث النبوية المتواترة كأساس للقواعد الاسلامية فى العقيدة، وان صحة سند الحديث أمر غير كافى من وجهة نظرهم لبناء قاعدة عقائدية. على أى حال الجماعة القدرية فى دمش تناولت سؤال القدر فى أطار المسؤولية الاخلاقية للخلفاء الامويين! اللى برروا كتير من سياستهم القمعية على أرضية انها جزء من القضاء والقدر.

geber

المعتزلة Mu`tazila هى المدرسة الفكرية الاشهر فى تاريخ المدارس الفلسفية الاسلامية وانبثقت من المدرسة القدرية فى نهايات القرن الثامن، واتبنت نفس المنهج الفكرى المبنى على المنطق والتفكير العقلى فى كل أمور الحياة بما فى ذلك الامر الديني. المعتزلة ازدهرت فى البصرة وبغداد فى الفترة ما بين القرن الثامن والقرن العاشر. ويمكن أشهر أفكارهم اللى مازال صداها بيظهر على السطح بمجرد ذكر أسم المعتزلة  هى فكرة “خلق القرآن” واللى فيها رفضوا فكرة أن القرآن مخلوق وان وجودة ازلي مع الله. ومن هنا نشأ علم الكلام Kalam نظير العلوم الفلسفية عند المسلمين، واللى من خلالة دعا المتكلمين الاوائل لأخضاع كل شئ للتفكير المنطقى والبحث المنظم بما في ذلك الاوامر الالهية! لان المعرفة مشتقة من المنطق، اذن العقل والمنطق هو الخكم الاخير للتفرقة ما بين الصواب والخطأ. أو زي ما مفكري المعتزلة قالوا “أن الأسبقية القدسية وسيلة غير كافية لتحديد العدالة، او أن المُلزم من الدين مُلزم فقط بالمنطق!”. المعتزلة حسنوا من فكرة القدريين وحاولوا للمرة الاولى اعطاء تعريف محدد لمفهوم الحق والباطل Right and Wrong وعلاقتة بعدالة السماء وأثرة على العالم! والتعريف ده تم التعبير عنة بشكل واجب منطقى Deontological واللى تم قبولة برفض بين التيارالمحافظ وقتها اللى كان ومازال بيعرف الحق والباطل بأوامر الله. واحد من المناطق الاخرى اللى وضح فيها جدا عقلانية المعتزلة فى دراسة المسائل الدينية كانت أعتناق فكرة الهوية المطلقة لله وصفاتة، وعدم قابلية التنازل عن صفاتة وحرية الارداة كشرط أساسي للمسئولية الاخلاقية. المعتزلة كمان أكدوا على حكمة الله وخيرة وعدم مسئوليتة عن الشر فى العالم، اللى صنعة البشر لما أعطاها الله حرية الارداة. مش واضح على وجهة التحديد مدى تأثير المدارس الفلسفية الاغريقية على افكار المعتزلة لان حركة الترجمة ما كنتش بدأت فى الوقت اللى أسس فيه واصل بن عطاء المدرسة المعتزلة للمرة الاولى فى التاريخ، لكننا نقدر نجزم ان كان في احتكاك بين علماء الدين المسيحين فى دمشق وبغداد وقتها واللى حملت فى طيها كتير من افكار الفلسفة الاغريقية وادت لتأثر القدرية والمعتزلة للأسئلة الكونية اللى شغلت فلاسفة الاغريق لفترات طويلة من الزمن.

14a-na-74545 images

الجاحظ Al-Jahiz كان من أوائل آباء المتكلمين العرب اللى اتعرض للمسألة الاخلاقية فى كتابة البخلاء، و “رسالة المعاش والمعاد”، الجاحظ شاف ان أصل الأخلاق هو طبيعة الأنسان. الفرد بيتولد حامل معاة طبائع الغضب، الرضا، البخل، السخاء، الجزع، الصبر، الرياء، الاخلاص، الكبر، القناعة، الخ … وكلها مكونات من شخصية الانسان ما بيقدرش التخلص منها وبتدفعة للأعمال اللى بيقوم بيها، وبتحدد السلوك اللى بيعنون شخصية البنى ادم. لكنة شاف ان جانب الطبائع دى الله ادى الانسان العقل اللى يقدر يستخدمة فى محاولة كبح جماح الشهوات والطبائع وتقويمها، لكن الجاحظ شاف ان الفرد مش هينجح فى نضالة ضد شهواتة دى الا بعد البحث والتجربة المستمرة المتبوعة بالنظر فى عواقب الامور! الوسيلة التانية اللى شاف الجاحظ انها هتساعد فى تقويم الطبائع البشرية هى العقوبة المفروضة على أعمال الشر من السلطة السماوية (مصير العاصى فى جهنم)، او من السلطة الارضية ( سواء كان ده الحبس، الضرب، النفي، و أحيانا القتل). الطبائع البشرية اللى هى أصل الاخلاق عند الجاحظ بتتأثر بالبيئة الطبيعية المحيطة، اللى بتأثر بنفس الطريقة فى الحيوان والنبات، وده السبب من وجهة نظر الجاحظ ان بعض القبائل وصفت الديكة بالبخل لانها بتسرق الحبوب من مناقير الفراخ! مذهب الجاحظ الاخلاقي كان مقدمة لأخلاق المنفعة اللى هيقدمها جيرمى بينثام وجون سيتوارت ميل من بعدة بمئات السنين، لانة لاحظ ان الناس بتحب المنفعة و بيكرهوا الضرر، وبالتالى بيفتشوا عن مصالحهم فى كل مناحى الحياة وبيتعلقوا بفكرة الملكية والاقتناء. من المهم  هنا اننا نوضح حلقات أتصال التاريخ، لأن زى ما بنلاحظ ملامح أفكار نظرية الجاحظ الاخلاقية فى فلسفة أخلاق المنفعة، بنلاحظ ملامح مذهب المتعة Hedonism اللى قدمة من قبلة الفيلسوف اليوناني أبيقورس Epicurus، الجاحظ شاف ان النفس البشرية مطبوعة على حب الراحة والاستمتاع بمدخلات الحواس من المناظر الحسنة، الاكل الكويس، الاصوات الطيبة، الخ. الجاحظ كمان حدد الفضيلة على أنها أهم موضوع فى علم الاخلاق، وهى الصفة الحسنة اللى بيمتاز بيها الانسان على غيرة وهى دائما وسط بين رذيلتين، فمثلا الجود فضيلة لانه وسط بين رذيلتين البخل والتبذير، أوفضيلة التواضع وسط بين المذلة والكبر! المفهوم الوسطى للفضيلة قدمة أرسطو لأول مرة فى التاريخ الفلسفى من قبل الجاحظ بالاف السنين (أرجع لحلقة أخلاق الفضيلة)، لكن الجاحظ جادل انه ما خادش الفكرة دى من أرسطو وان النوسط والاعتزال والاقتصاد أسس المدرسة الأعتزالية اللى انتمى ليها. الجاحظ جادل ان الخير هو اللى بيختارة الانسان من الافعال والاشياء والشر هو النقيض، وأعتقد ان الفضائل كلها من الخير والرذائل كلها من الشر، وان حكمة الله فى الارض ان الخير والشر يكونوا ممتزجين علشان يكون فى معنة لنعمة العقل ومحنة الثواب والعقاب.

AverroHP

الكندي Al-Kindi هو بلا منازع فيلسوف الأسلام الاول، (أرجع لحلقة المعرفة فى الفلسفة الأسلامية). وأول من كتب عن الأخلاق من منظور فلسفي مختلف فى تاريخ الأسلام، وكان متعاطف بشكل كبير مع أفكار المعتزلة المعاصرين له، لكن على العكس منهم الفلسفة الاغريقية كانت نقطة البداية مش القرآن والحديث زى المعتزلة. الكندي مهد الطريق لفلسفة أخلاق  الفضيلة فى العقل الجمعي الأسلامي من خلال كتابة رسالة فى الأخلاق. ووضح من خلال محاورات سقراط مفايهم الفضيلة، الزهد، والتقشف كطريق الاخلاق القويم فى الحياة، لكن من الملفت للنظر أن الكندي  ظهر تأثرة الكبير بالفيلسوف الرواقى Stoic ابكتيتوس Epictetus  من القرن الثاني الميلادي، اللي شاف أن جوهر السعادة نفسي غير مادي بعيد عن الاشياء الخارجية المقتناة! الكندي في رسالتة ” الحيلة لدفع الأحزان” اللى كتبها سنة 865 ميلادية تحت رغبة صديق له فى كتابة كتاب عن سبب الحزن وكيفية الشفاء منه، الكندي جادل أن كل ألم لا يُعرف سببة لا يرجى شفاؤة، وشاف ان لابد من معرفة سبب الحزن عشان نقدر نوصف الدواء، وعلى الاساس ده عرف الحزن على أنه الم نفسي ناتج عن فقد مقربات من النفس أو عدم القدرة على تحقيق الرغبات، والأسباب دى ما حدش هينجو منها لان من المستحيل ان انسان يحصل على كل طلباتة فى الحياة، ومستحيل ان انسان يسلم من فقدان على الاقل جزء من ممتلكاتة، الثبات والدوام معدوم فى عالم الكون والفساد اللى بنعيش فية! وصفة من صفات عالم الكمال فقط!  وقال أن الحزن أما ناتج عن أفعالنا الشخصية أو عن أفعال الاخرين، فى الحالة الاولى واجبنا ككائنات عاقلة أننا نتوقف عن الأفعال اللى بتسبب الحزن، أما فى الحالة الثانية ردع افعال الأخرين قد يكون في قدرتنا أو لأ ، لو كان فى قدرتنا أيقاف الافعال دى بكل تأكيد أحنا مطالبين بأيقافها! أما لو ماكنش فى أمكانا أيقافها لابد علينا ككائنات عاقلة عدم الحزن ومواجهة الألم بثبات. فلسفة الكندي فى الرسالة دى بتعكس الحض على التخلى عن الممتلكات المادية المؤقتة اللى احنا مش مالكين حقيقين لها بتنتهى ملكيتنا ليها بأنتهاء رحلتنا فى الحياة. الرضا والقناعة بالمتاح لينا كبشر وعدم الاسى على اللى فاتنا او ضاع مننا من وجهة نظر الكندي هو جوهر السعادة وترياق الحزن!

330px-Colofón-Libro_de_Medicina_de_Razi 330px-Zakariya_Razi_001

أبو بكر الرازي Al-Razi  ، أحد أهم العلماء والأطباء اللى عرفتهم البشرية على الاطلاق! ووضع كتاب الحاوى فى الطب اللى ضم كل المعارف الطبية من عصر الاغريق لحد عام 925 ميلادية  واللى كان المرجع الطبى الرئيسي فى أوروبا لمدة 400 عام! لكن زي كل علماء عصرة الرازي كان عالم موسوعي درس الرياضيات، الطب، الفلسفة، الفلك، الكيمياء، المنطق، والادب! وكتب أكتر من 200 رسالة في مختلف المجالات. الرازي فى رسالتة الاخلاقية “الطب الروحاني” أشار لأفلاطون Plato بسيد الفلاسفة ورئيسهم، ولأستاذة سقراط Socrates بحكيم الزهد والورع! وأتكلم عن المكونات الافلاطونية الثلاثة للروح، المكون العقلى أو السماوي Rational، المكون الحيواني irascible، والمكون الشهواني concupiscent or vegetative. وهي نفسها المكونات اللى وضعها الفيلسوف، العالم والطبيب السكندري جالينوس Galen فى كتابة “رسالة فى الأخلاق”. الرازي مشى على نهج تعاليم أفلاطون وقال ان كل مكون او روح لابد من السيطرة عليها عن طريق المنطق والترويض فى عملية أطلق عليها “العلاج الروحي” spiritual physic. الرازى وضع للأخلاق أصول ومبادئ بنى عليها أفكارة واراءة، أهمها تحكيم العقل فى أفعالنا لأن العقل أسمى هبة من الله للأنسان، وهو العنصر المميز عن الحيوان ومن خلالة تقدم ورفعة البشر، الرازى شاف ان الرغبة دائما ما بتفضل اللذة او المتعة فى الحاضر بدون النظر للعواقب فى المستقبل، والطباع جزء من تكوين الانسان والحيوان لكن الحيوان ما بيمتلكش قوة تحررة من سلطان الطباع زى قوة العقل اللى بيمتلكها الانسان!

alteb_alraw7ani_bp

الرازي كمان اعتقد ان الانسان بيمتلك الارادة، والحرية اللى اتحرم منها الحيوان واللى بيساعدوة على رفض او قبول الطباع اللى فطر عليها، الحرية دى جزء من ملكة الارادة اللى بتؤدى بالفرد انه يتصرف بعد الروية والتفكير. ومن هنا بيشوف الرازي ان دور التعليم والتأديب مهم جدا، تدريب الطفل فى مراحل نموة الاولى على قمع الهوى ومخالفة الطباع أمر جوهرى فى أساس الاخلاق عند الرازي. ومن المبادئ المهمة جدا فى علم الاخلاق فكرة اللذة، اللى عرفها الرازي على انها خروج من حالة الى وضع الالم ثم العودة مرة تانية للحالة الاولى، يعنى مثلا لو فى راجل عايش فى واحة فى وسط الصحراء اضطر انه يخرج لمهمة شاقة فى الحر ورجع تانى للواحة بعد ما انهى المهمة، شدة تلذذ الرجل بالواحة بعد رجوعة مرتبطة بمقدار ألمة من الحر اللى عانى منه فى الصحراء! أو زى ما الرازي صاغ قواعد اللذة لما قال : لا لذة بدون ألم يتقدمها، ولا ألم ألابالخروج عن الطبيعة، وعلى مقدار الالم تكون اللذة”. فلسفة اللذة عند  الرازى واضح جدا فيها تأثرة بالفلسفة السقراطية-الافلاطونية فيها رفض مذهب المتعة hedonism، لانه شاف ان من الحماقة ان الفرد يعيش حياة بتحكمها المتعة فيتحول لمجرد حيوان تابع لرغباتة، لان معظم المتع البشرية أما مؤقتة او صعبة المنال، وبالتالي هيصبح الفرد فريسة للقلق و الحزن! لكن الفيلسوف مش ممكن يستسلم للحزن، لانه عارف ان ما فيش شئ فى عالم الماديات والفساد دائم وكل شئ مدفوع بالرغبة زائل، واى شئ غير مدفوع بالمنطق مالوش اى قيمة، ومن هنا الرجل العاقل او الحكيم من وجهة نظر الرازي بيتبع المنطق والعقل فقط! الرازي أعتقد زي سقراط ومن بعدة أفلاطون ان الروح بعد خروجها من الجسم هترجع لمسكنها الأصلي فى العالم العلوي، بعد ما تمر بمراحل طويلة من التطهير Purifications، ومن هنا بيجادل أن الخوف من الموت Death شئ غير منطقي! وشاف زى الكندي أن الراجل العاقل لابد وانه يتقبل فكرة الموت كنتيجة منطقية لوجودنا كبنى أدمين! أو زي ما الكندي قال فى رسالتة “الحيلة في دفع الأحزان” وبما أن الانسان حسب تعريفة كائن حي، ميت، عاقل، أذن لابد بدون الموت ، لايمكن وجود الانسان!” أو بمعنى تانى الموت جزء أساسي من تعريف الانسان. لكن الرازي أضاف لجدلية الكندي جدلية تانية كان متأثر بيها بالفلسفة الابيقورية Epicureanism لأبيقور Epicurus. واللى قال فيها أن الموت ماهو الا أنعدام الحواس، فى الموت الانسان بيجرد من حواس المتعة والالم وبالتالى بيكون فى حالة أفضل من الانسان الحي اللى دائما عرضة للألم، والمتعة ماهى الا طبيعة مؤقتة الانسان بيحظى فيها الانسان بتخفيف من الالم قبل ما يرجع تاني للحالة الطبيعية “حالة الالم”. ومن هنا وصل الرازي بالمنطق والعقل لأن حالة الموت أفضل من حالة الحياة!

214583 Al-Farabi1

أول من كتب بمنهجية Systematically  فى الامور والمسائل الفلسفية فى الأسلام كان الفرابي Al-Farabi ، وكتب التعليقات الاولى على كتاب الاخلاق النيكومية Nicomachean Ethics اللى ترجمة للعربية إسحاق ابن حيان. الفرابي قدم أتنين من أهم الكتب الفكرية فى تاريخ الفلسفة الاسلامية سنة 950 ميلادية هما كتاب تحصيل السعادة، وأراء أهل المدينة الفاضلة واللى فيهم شاف ان علم الأخلاق وعلم السياسة فرعين للعلم المدنى اللى بيبختص بالهدف اللى من أجلة وجد الانسان وهو “الكمال”، وبييحث فى الاشياء والامور اللى الفرد يقدر يبلغ بيها الكمال وهى الخيرات والفضائل، والاشياء والامور اللى بتمنه الانسان من بلوغ الكمال زى الشرور والرذائل. الأخلاق ليها أصلين من وجهة نظر الفرابي الأرادة، والطبع. الارادة اللى بتمثل نزعة الانسان لتحقيق الامور اللى بيدركها سواء بالحس، التخيل، او بالقوة الناطقة، النزوع ده قد يكون لعلم ما لو لعمل ما. والدرجة الاسمى من الارادة عند الفرابي بتم لما الانسان بيتصل بالعقل العلوى او الفعال ويتسقى منه المعارف الاولى وبالتالى يصل للحكمة اللى بتمكنة من ادراك السعادة، الفكرة دى بيسميها الفرابي الخير الارادى. أما الشر عند الفرابي فبيحصل لو القوة الناطقة فى نفس الانسان ما شعرتش بالسعادة او ما سعش ليها، او لو انخدعت وتوهمت ان السعادة تكمن فى الللذة والمنفعة الحسية، او السعادة الموهومة زى ما اشار ليها الفرابي. الشرط الاول لبلوغ السعادة عند الفرابي هو أدراكها، والقوة الناطقة فى روح الانسان مش هتدرك السعادة الا لو فاض عليها العقل العلوى الفعال بالمعقولات او المعارف الاولى، لكن الفرابي شاف ان مش كل الناس مفطورة على قبول المعارف الاولى فقط أصحاب الفطر السليمة هم اللى بيحصلوا على السعادة. لكن الفرابي كمان شاف ان الفطرة السليمة مش كافية لتحقيق السعادة لان العميل الاخلاقى او الفرد ممكن يهملها بسبب طباعة فيبطل قوتها ومفعولها، ومن هنا وصل لان الطبع هو أصل الأخلاق الاقوى لان القوة الناطقة محتاجة للطبائع لأدراك السعادة. السعادة هى غاية الانسان الاخيرة والكمال الاسمى والخير الاعظم زى ما الفرابي شاف فى كتابة “التنبية على سبيل السعادة” لما قال “إنها الخير على الاطلاق، وكل ما ينفع فى أن تبلغ بع السعادة وتنال خير أيضا، لا لأجل ذاتة ولكن لأجل نفعة فى السعادة، وكل ماعاق عن السعادة بوجة ما فهو شر على الإطلاق”! والسعادة ممكن تحصيلها فى الدنيا والاخرة بأربع أنواع من الفضائل من وجهة نظر الفرابي، (1) الفضيلة النظرية وهى العلوم اللى من خلالها نقدر نحصل على معرفة الموجودات المعقولة زى الهندسة، الفلك، الموسيقى، المنطق، العلم المدنى، الخ (2) الفضيلة الفكرية وهى قوة استنتاجية بتحدد الاعراض الظاهرة والمتغيرة على المعقولات، ونتاجها عام لامة، مدينة، جماعة، اوصناعة. (3) الفضيلة الخلقية للحكم على الافعال الاخلاقية والتمييز بين الخير والشر وبتعتمد بالدرجة الاولى على طبع الانسان، وفى ناس بطبائع فائقة زى الملوك، الائمة،  وحفظة العلم، بتقع على عاتقهم مهمة مساعدة عوام الناس على تحصيل الفضائل سواء بالتعليم او التأديب. وأخيرا (4) الفضيلة العملية اللى شاف الفرابي انها الطرق الاقناعية، التحليلة، والتجريبية فى ادراك المعقولات.

download (1)

الفرابي Al-Farabi أتبع نهج الفيلسوف الاغريقى أرسطوطاليس Aristotle فى تقسيم الفضائل لعملية وعقلية، الاولي فضائل لتحسين المكون الحيواني للروح زي ضبط النفس temperance، الشجاعة courage، الحرية liberality، والعدالة justice، والفضائل العقلية محاسن للمكون العقلي للروح زى المنطق العملى practical reasoning، الحكم الصالح good judgment، الخ (أرجع لحلقة أخلاق الفضيلة لو عاوز تعرف أكتر عن فلسفة أرسطوطاليس). الفرابي فى دراستة لمفهوم العدالة مشى على نهج أرسطواليس وجادل أن العدالة بتم بالتوزيع العادل للسلع المشتركة داخل الدولة أو المدينة. السلع المشتركة Common Goods دى زى الامن Security، الثروة Wealth، الكرامة Dignity، والسلطة Public Office. اللى كل فرد فى الدولة او المدينة له حق المشاركة فيها، والمفهوم الاعم اللى قدمة الفاربي للعدالة هو ممارسة الانسان للأفعال الفاضلة virtuous actions تجاة نفسة وتجاة الاخرين، اى كانت الفضيلة دى! لكن يمكن العنصر المميز فى فلسفة الفرابي اللى مالوش مثيل فى فلسفة أرسطوطاليس هى دراستة لمفهوم الشر Evil. الفرابي بيبدأ مناقشتة لفكرة الشر بشكل أفلاطونى ويقول “أن الشر ما لوش وجود فى العالم، لكن وجودة فى افعال البشر المخالفة، والطبيعة الاولى لكل شئ هى الخير”. وبالتالى الشر مجرد أنعكاس لأفعال البشر، لكن مالوش وجود مادى فى الواقع المحيط. لكن الفرابي هيختلف مع الأفلاطونية الحديثة فى ان الوجود Being معرف بالخير وعدم الوجود not-being معرف بالشر وهيشوف ان الوجود بيعرف بالخير بس لما يتسق مع العدالة و عدم الخير بيعرف بالشر بس لما يختلف مع العدالة!

download (2)

المنطقي هو اللقب اللى أتعرف بيه يحيى بن عدي التكريتي Yahya ibn Adi  أحد أهم وأشهر المشتغلين بترجمة التراث الفلسفي فى العصر العباسي خصوصا من السريانية الى العربية، بن عدي كان يعقوبى نصراني اتولد فى تكريت العراقية اللى كانت واحدة من منارات الفكر والفلسفة فى العصر العباسى. بن عدي ألف كتاب بعنوان “تهذيب الأخلاق” أتكلم فيه عن اصل الاخلاق، والفضائل والرذائل المختلفة، وشاف ان أصل الأخلاق هو الطبع أو زى ما قال “ان الاخلاق حال النفس بها يفعل الأنسان أفعالة بلا روية ولا أختيار”. والبشر من وجهة نظرة بيغلب على طبعا الشر بسبب الشهوات والغرائز اللى بتقودهم للمهالك حسب تعبيرة. والرادع الوحيد للشهوات دى من وجهة نظرة هو العقل. لو ضعف أصبح الانسان فريسة سهلة للشهوات، الظلم، الاغتصاب، الجور، والفجور. بن عدي أعتقد زى الفرابي ومن قبلة أفلاطون Plato أن النفس البشرية ليها ثلاث قوى الناطقة، الحيوانية او الغضبية، والشهوانية! ومن خلالها بتصدر الاخلاق، وان الانسان والحيوان بيشتركوا فى الشهوانية لو ماقدرش الانسان يسطر على الشهوات والرغبات دى، الغضبية بيشترك فيها الانسان مع الحيوان كمان ومن خلالها بتصدر مشاعر زى الغضب، الجرأة، وحب الغلبة الخ .. ولو قدر الفرد انه يكبح جماح القوة دى يقدر يحولها لطاقة ايجابية بيصدر عنها فضائل زى الحلم، الوقار، الانفة، الترفع، الخ. أما القوة الناطقة فبيمتاز بيها الانسان عن الحيوان وهى اللى بيقدر يميز بيها بين الخير والشر ويفكر فى عواقب الامور ويسيطر بيها على الشهوانية والغضبية ومن أهم الفضائل الصادرة عنها الفقة، النسك، الحياء، الحلم، الخ .. ومن أهم الرذائل الصادرة عنها الحيلة، الخبث، الخديعة، المكر،الرياء، والحسد. تأثير العقيدة المسيحية فى كتابات بن عدي كان واضح جدا خصوصا فى دعوتة لمحبة الناس أجمعين، الرأفة بالضعفاء لان الناس كلها من أصل واحد ويشتملون جميعا على النفس العاقلة اللى هى هبة من الله! من أهم الافكار اللى ناقشها بن عدي هى فكرة الإنسان الكامل أو التام، او بصيغة تانية الانسان الجامع لمحاسن الاخلاق والخالى من الرذائل! تقريبا انسان اقرب للملائكة من البشر، وبحسب رؤيتة النوع ده من البشر نادر الوجود لكنة موجود وهو الغاية اللى هيوصلها البشر من خلال الرقى والتقدم الخلقى والحضارى. بن عدي ماوقفش عند الوصف دة لكنة كمان ادى الوصفة اللى الفرد ممكن يوصل بيها للكمال الخلقى من وجهة نظرة وهى التبحر فى العلوم، والاحاطة بعلل وغايات الاشياء، وصحبة العلماء والاتقياء، والزهد بالمال والملذات، ومحبة الناس أجمعين، ومن هنا بحركة ذكية قدر بن عدي يربط الاخلاق بالمعرفة زى ما عمل سقراط من قبلة (أرجع لحلقات سلسلة المعرفة).

225-405 download (3)

ابن مسكوية Ebn Meskavayh  أو أحمد بن يعقوب هو مؤرخ وفيلسوف فارسي و بيعتبر من أهم علماء المسلمين اللى كتبوا فى فلسفة الاخلاق و لقبة البعض بالمعلم الثالث! فى عملة الاشهر والاهم “تهذيب الأخلاق وتطهير الأعراق” بدأ مسكوية بتقسيم الوجود البشرى على أساس مثنوى زى ما أفلاطون عمل من قبل وزى ما ديكارت (أرجع لحلقة أشكالية العقل والجسد) هيعمل من بعدة، فالانسان عبارة عن جوهر روحانى خالد مختلف فى مادتة عن الجسد الفاني، الجوهر الروحاني هو النفس اللى شاف زى أفلاطون وبن عدي انها بتتكون من ثلاث قوى الشهوانية، الغضبية، والناطقة! كل واحدة من القوى دى لما بتعتدل بينشأ عنها فضائل حميدة، يعنى مثلا أعتدال الشهوانية بيؤدى لفضيلة العفة، اللى بيتفرع منها الحياء، الصبر، السخاء، القناعة، الوقار، والورع. أما اعتدال الغضبية بينشأ عنها فضيلة الشجاعة اللى بيتفرع منها الهمة، الثبات، الحلم، رباطة الجأش، الشهامة، والجلد. وأعتدال القوى الناطقة او العاقلة بيولد فضيلة الحكمة اللى بيتفرع منها الذكاء، الذاكرة، التعقل، والفهم. وجادل أن لو أجتمعت الفضائل الثلاثة دى الحكمة، العفة، الشجاعة بينتج فضيلة رابعة أساسية وهى العدالة اللى بيتفرع منها فضائل زى الصداقة، الالفة، الانصاف، المحبة الخ! مسكوية شاف الفضيلة من منظور وسطى زى أفلاطون والجاحظ، الفضيلة دايما وسط بين طرفين متضادين! مسكوية شاف ان السعادة هى ان الفرد يعيش طبقا لمنطق العقل وقسمها لنوعين سعادة دنيوية، وسعادة أخروية. السعادة الدنيوية تقوم بسيطرة الانسنا على خيرات العالم الدنيوى حسب الحكمة العملية، اما السعادة الاخروية أو الروحية سعادة ابدية مش ممكن الوصول ليها الا فى الحياة الثانية! مسكوية كمان شاف ان في مرضان نفسيان بيكدروا صفو سعادة اى انسان هما الخوف من الموت، والحزن. فى مسألة الخوف من الموت شاف ان الجهل بمصير النفس بعد الموت والاعتقاد انها فانية زى الجسد  والخوف من الحساب والعذاب فى الاخرة هما سبب الخوف من الموت، من هنا شاف ان لتجنب الخوف من الموت الفرد لابد وانه يدرك ان النفس من جوهر مختلف خالد غير قابل للفناء، ولتجنب العذاب فى الاخرة الانسان يقدر يتجنل الاثان فى الحياة الدنيا.

0f0317e1-c95c-4f8f-add9-54d0cc5d1d46 ghazali

حجة الأسلام أبو حامد الغزالي Al-Ghazali أحد أهم أعلام الحياة الفكرية العربية والاسلامية فى القرن الخامس الهجري، فيلسوف،فقية، صوفي، وأحد مؤسسي المدرسة الاشعرية السنية فى علم الكلام، كان له بصمة كبيرة فى علوم زى الفلسفة، المنطق، التصوف، الفقة، وعلم الكلام. الغزالي أهتم جدا بالناحية الاخلاقية فى الفلسفة الاسلامية وحاول انه يضع أسس للأخلاق من خلال دراستة لمفهوم السعادة، الخير، والفضيلة فى كتاب “ميزان العمل”، شاف أن السعادة هى غاية الانسان والخير الاسمى المنشود، وكمان شاف ان الناس بتختلف فى ماهية السعادة وكيفية الوصول اليها. وقسم الناس دى لأربع فرق: الفرقة الاولى (1) المؤمنين بالشرائع السماوية، زى اليهود، المسيحين، والمسلمين الغزالي شاف انهم بيعزفوا عن اللذات الحسية وبيرغبوا فى اللذات الآخروية اللى من الصعب ادراكها او حتى وصفها! الفرقة الثانية، الفلاسفة او المهتمين باللذة العقلية الناشئة عن المعرفة، والعلم وينكرون اللذات الحسية. الفرقة الثالثة، الدهرية ودول من وجهة نظرة الفرقة اللى انكروا وجود الله والحياة الاخرة واعتقدوا ان السعادة قائمة على تحصيل اللذات الحسية او المعنوية زى العزة، الكرامة، المكانية الرفيعة، الخ. الفرقة الرابعة، المتصوفة اللى عزفوا عن اللذات الحسية وزهدوا فى خيرات الدنيا، وشافوا ان السعادة فى انكشاف الامور الالهية والاقبال على الموجود الاعلى، سر الملكوت الاعلى مش من الممكن الوصول اليه من مجرد الدرس والتعلم لكن بالانقطاع عن الدنيا والخلو بالنفس والعبادة المستمرة والدائمة لله. الغزالي شاف ان الفلاسفة والمتصوفة عندهم نفس الغاية وهى ادراك الحق! لكن الطريق اللى بتسلكة كل فرقة مختلف، فالفلاسفة أخدوا طريق البرهان كأصل الحقيقة، والمتصوفة أخدوا طريق الكشف والاتصال بالموجود العلوى كأصل للحقيقة! ا الغزالي كمان شاف ان طريق الصوفية العملى افضل من طريق الفلاسفة النظري بالنسبة لمن تقدم فى السن وما حصلش العلم فى شبابة، لكن طريق الفلاسفة أفضل بالنسبة للشباب. وشاف ان السعادة مش ممكن الوصول اليها الا من خلال العلم والعمل، العلم النافع فى تحصيل السعادة اما نظري او عملي .. النظري اهم انواعة معرفة الله، صفاتة، رسلة، كتبة، ملكوت السماوات، الارض، الخ. اما العلم العملي فقسمة الغزالي ثلاث أنواع علم بالنفس وصفاتها، واخلاقها وشاف ان ده الموضوع الرئيسى لعلم الاخلاق، وعلم بكيفية العيش نظير علم الاجتماع دلوقتى، وعلم السياسة. الغزالي شاف زى افلاطون والجاحظ ان الفضيلة وسط معتدل بين طرفين متضادين وقسم النفس لنفس الثلاث قوى العقلية، الغضبية، والشهوانية زى أفلاطون وباقى المتكلمين العرب اللى سبقوة! لكن الغزالي كان ضد الرأى اللى بيقول ان الطباع ما بتتغيرش وشاف انها وليدة التربية والتعليم والالهام، ولو ان فعلا الاخلاق غير قابلة للتغير ماكنش رسول الاسلام قال “حسنوا اخلاقكم” وكان من غير المنطقى ان المفكرين، والمصلحين عبر العصور يدوا المواعظ والوصايا.وشاف ان حتى أخلاق الحيوانات قابلة للتغيير من خلال الترويض. الغزالي حدد الخير زى ما أرسطو قال من قبلة هو كل ما يقود للسعادة!

images (1)

المشكلة الأخلاقية حظت بأهتمام ضئيل فى الفلسفة الاسلامية، لان فلاسفة الاسلام كانوا مشغولين بقضايا ميتافيزيقية وجودية أو معرفية. وكتير من الدارسين والمحللين بيشوفوا ان موضوع الاخلاق ما شكلش مشكلة عويصة من وجهة نظر مفكرى الاسلام الاوائل، عشان يحطوا فيها جهد من الاساس! ويمكن يكون ده السبب فى ان نتاجهم كان قليل وبيفتقر للعمق والتفصيل المطلوب! وفى نهاية المطاف مال فلاسفة الاسلام فى غالبهم للحل الطبيعي بان الاخلاق وليدة الطباع والفطرة، وأهملوا دور العقل والتربية كمؤثر رئيسي اللى ادى مجال لأفكار مظلمة زى اليأس من الاصلاح، او الفساد المحتوم. ويمكن يكون الميل للحل ده كان مدفوع بتناسبة مع الفكرة العقائدية بان الله خالق كل شئ بما في ذلك أفعال الناس! أما المجددين من أمثال حجة الاسلام الامام الغزالي اللى شافوا ان التربية والنشئة بتلعب دور مهم في صياغة الأفعال الاخلاقية، واجهوا نقد من فقهاء الدين المعاصرين اللى شافوا ان الموضوع الاخلاقي محسوم داخل أطار الدين ومحدد بالارادة الالهية المصاغة فى طباع وفطرة الانسان.

القصة اللى بدأنا بيها، مقتبسة عن الفيلم الامريكي الكلاسيكة لص بغداد The Thief of Baghdad اللى أتعرض على الشاشة لأول مرة سنة 1941 والمأخوذ عن العمل الخالد ألف ليلة وليلة واللى حاولت من خلال قصتة الخيالة اقدملك نموذجين للخير والشر زى ما تصورهم فلاسفة الاسلام الاوائل، الوزير جعفر اللى الشر جزء من فطرتة بيحكم كل تصرفاتة وأفعالة والامير اللى الخير جزء من فطرتة اللى مالوش دخل او ارادة فى صنعها، وبيحكم تصرفاتة أفعالة. كمان الامير أستخدم أرداتة وثباتة فى مقاومة حزنة على الاميرة اللى خطفها منه جعفر الشرير وحاول بكل ما أوتى من قوة انه يغير أفعال جعفر الشرير مدفوع برغبتة فى أزالة سبب حزنة اللى هو ماكنش مسؤل عنة زى ما نصح الكندي فى رسالتة فى دفع الحزن! وظل فى رحلة شاقة طوال الوقت بحثا عن السعادة جوهر الخير الانسانى!

ودلوقتى … فكر فى لحظات الحزن اللى مرت عليك فى الماضى .. هل ياترى الحزن شر مدفوع؟ .. وهل السعادة هى غاية الخير الجوهرية؟ .. وهل فعلا الأخلاق مجرد طباع وجزء من فطرة البشر؟ ..لو فعلا الفطرة هى العامل الاساسى وراء أفعالنا الاخلاقية، أزاى ممكن ندفع الفساد فى الارض؟ .. وازاى ممكن نحاسب البشر على فطرتهم؟ .. ولا يمكن يكون هو ده سر الحياة، صراع دائم بين العقل والفطرة .. فكر تاني

Download MP3 https://app.box.com/s/c8uy8866fg2vzl8mpwmpr9wk85i0dm0a

فى الحلقة الجاية ..  هتكون واحد من أتباع طائفة مضطهدة، مجرد أنتمائك ليها ممكن يكون سبب فى موتك، فى أيدك انك تكون جزء من الجماعة وتنقذ اللى تقدر عليه من ابناء طائفتك، او تفضل وجودك الفردى وتتخلى من قيود الجماعة ووتتحول لمجرد شاهد على واحدة من أبشع الجرائم البشرية! عن الأخلاق .. القوة .. ضد الأخلاق .. الانسان الفائق القدرة .. ونيتشة  .. هنتفلسف الحلقة الجاية

من دلوقتى للحلقة الجاية

عيش الحياة بفلسفة

زود معلوماتك:

الأخلاق فى الفلسفة الأسلامية Ethics in Islamic philosophy

http://www.muslimphilosophy.com/ip/rep/H018

المدرسة القدرية Qadariyah

http://en.wikipedia.org/wiki/Qadariyah

المعتزلة Mu`tazila

http://en.wikipedia.org/wiki/Mu%60tazila

علم الكلام Kalam

http://en.wikipedia.org/wiki/Ilm_al-Kalam

الجاحظ Al-Jahiz

http://en.wikipedia.org/wiki/Al-Jahiz

مذهب المتعة Hedonism

http://en.wikipedia.org/wiki/Hedonism

أبيقورس Epicurus

http://en.wikipedia.org/wiki/Epicurus

الكندي Al-Kindi

http://en.wikipedia.org/wiki/Al-Kindi

ابكتيتوس Epictetus

http://en.wikipedia.org/wiki/Epictetus

أبو بكر الرازي Al-Razi

http://en.wikipedia.org/wiki/Muhammad_ibn_Zakariya_al-Razi

الفرابي Al-Farabi

http://en.wikipedia.org/wiki/Al-Farabi

يحيى بن عدي التكريتي Yahya ibn Adi

http://en.wikipedia.org/wiki/Yahya_ibn_Adi

ابن مسكوية Ebn Meskavayh  

http://en.wikipedia.org/wiki/Ebn_Meskavayh

حجة الأسلام أبو حامد الغزالي Al-Ghazali

http://en.wikipedia.org/wiki/Al-Ghazali

لص بغداد The Thief of Baghdad

http://en.wikipedia.org/wiki/The_Thief_of_Bagdad_%281940_film%29

ألف ليلة وليلة

http://en.wikipedia.org/wiki/One_Thousand_and_One_Nights

One thought on “EP 24: Ethics in Islamic Philosophy الأخلاق فى الفلسفة الأسلامية

  1. Pingback: Ethics Series سلسلة فلسفة الأخلاق | kalam Falsfa كلام فلسفة

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s