EP08: The Mind-Body Problem أشكالية العقل و الجسد

Episode 08 + ECN (Egypt Cancer Network) Ad

تخيل أنك مريض نفسى مصاب بعقدة نفسية من الطفولة … بالرغم من كونك شخص عبقرى فى الكمبيوتر وتكنولوجيا المعلومات عقدك النفسية هتستولى عليك وتحولك لسفاح محترف .. سفاح من نوع خاص، بيتستخدم عقلة فى تحقيق نزعاتة المجنونة وافكارة المريضة .. هتبتدع اسلوب جديد فى اختيار ضحياك، هتختار ضحية وتسرق اجندة التليفونات بتعاعتها .. وتبدأ بقتل الاسماء اللى فى الاجندة بالترتيب الابجدى! .. لحد ماتوصل للضحية صاحبة الاجندة، وتخلص عليها .. اسلوب مبتكر ماحدش ابتكرة غيرك فى اختيار ضحاياة .. هيرضى غرورك و يشبع رغباتك! المرة دة معاك اجندة تليفونات سابتها واحده كانت فى زيارة لمحل الكمبيوتر اللى بتستغل فيه امبارح .. هتنسخ قائمة الاسماء وتبدأ من الاول .. الساعة واحدة بعد نص الليل والمطر شديد .. لكنك لازم تقتل الضحية الاولى النهاردة! لازم تلتزم بجدول المواعيد اللى انت محددة بكل دقة! بتسوق بسرعة زى المحنون على الطريق السريع عاوز توصل لهدفك الاول قبل ما يبقى فى حد معاة فى البيت .. مساحات الازاز بتتحرك بحنون قدامك مش شايف كويس الطريق .. اضواء باهتة فى العتمة والضلمة .. فجأة هتظهر المقطور الضخمة قدامك من العدم .. هتحاول تفاديها لكن سرعة القرار خانتك المرة دى! هتخبطك القطورة من الجنب قبل ما العربية تنحرف بعنف على الطريق وتبدأ فى عدمية من الانقلاب … حاسس بالدم طعمة مالح فى بقك وعضمك بينسحق بين كتلة الحديد .. العربية سابت الطريق السريع وانقلبت من على الكوبرى .. حاسس بهبوط لانهائى، قبل الاصطدام الاخير .. والصمت والسكوت يلمى المكان!

هينقلك الاسعاف للمستشفى بعد ما يخلصوا جسمك المتدمر من بين الحطام .. الدكاترة بتجرى فى كل مكان بتحاول تنقذك من الموت، بيدخلوا جسمك فى جهاز الاشعة المقطعى علشان يشوفوا تأثير الصدمة على مخك .. البرق والرعد شديد .. هيضرب بقوة محول الكهرباء الرئيسى فى المستشفى .. شحنة اضعاف الشحنة الطبيعية هتدخل جهاز الاشعة .. هتكون مجال كهرومغناطيسى فى لحظة حرجة بين الحياة والموت ..عقلك هيتنقل من جسمك للكمبيوتر الرئيسى فى المستشفى، كيانك .. خبرتك .. نفسك .. كلك بدون جسمك هتصبح كيان افتراضى عايش جوة الكمبيوتر زى اى سوفت وير! هتبدأ تتأقلم مع طبيعة وجودك الجديدة .. هتتنقل من كمبيوتر للتانى مجرد شحنة كهربية وسط ملايين .. من كمبيوتر لسوتش لحد ما توصل للكمبيوتر الام المسيطر على شبكة المعلومات فى البلد .. مازلت رغباتك الرمريضة مسيطرة عليك فى الكيان الجديد ده .. هتبدأ تستخدم امكانياتك الجديدة عشان تنفذ عملية القتل اللى ما اكتملتش .. هتجيب دليل التليفونات بتاع ضحايك من على جهاز الكمبيوتر بتاعهم .. هتبدأ تقتل الضحايا واحد ورا التانى .. تتحكم فى جهاز الميكروويف فى بيت واحد فينفجر فيه .. هتتحكم فى الكهربا فى بين واحد فتصعقة .. كل شئ سهل الوصول اليه والتحكم بيه لانك مسيطر على الكمبيوتر الام .. هتقتل كتير قبل ما يكتشفوا وجودك الافتراضى هيبدأوا يهاجموك على الكمبيوتر الام عن طريق فيرس مصمم لتدميرك .. لكنك اسرع واذكى منهم .. هتكون دايما سابقهم بخطوة وتدمر الفيرس بتاعهم .. قبل ما يقرروا يدمروا الكمبيوتر الام بالكامل عن طريق تعريضة لمغناطيس عملاق عشات يشوش ويشتت كل المجالات الكهرومغنطيسية جواة .. فى اللحظة دى هتكتشف ان كيانك الافتراضى مش كفاية ومش هيحميك منهم .. انت محتاج وسيلة تجسد بيها عقلك الافتراضى فى الواقع علشان تقدر تحاربهم بنفس ادواتهم .. ياترى هتعمل ايه؟

من القرن السابعتشار تقدم العلم اخد كل شئ فى طريقة. الطريق اللى رسمة كوبرنيكس، نيوتون، دارون، وانشتين مليان علامات بارزة للتقدم والمعرفة المكتسبة، واللى بيدينا الامل فى ان العلم هيقدر يفسرلنا كل شئ فى يوم من الايام من ابعد منطقة فى الكون لاصغر جزء فى نواة الذرة .. لكن علشان نبقى موضوعين .. الحاجة اللى واضحة جدا و مازالت غامضة جدا ومتعسرة لحد دلوقتى على الفلاسفة والعلماء سواء هى العقل البشرى!

كلنا مدركيين لأدراكنا بمعنى اننا مدركين ان عندنا افكار، مشاعر، و رغبات شخصية خاصة بينا، احنا مركز العالم وكل شئ بيدور حولنا .. وكل شئ يبدو وكأنة مصمم لخدمتنا او دايما فى مبرر بيخدم افكارنا ومشاعرنا. لكن على النقيض العلم محايد ، موضوعى، بينتصر للبحث الدقيق ويتجنب الافكار الشخصية او الانحيازية. طيب ازاى شئ غريب من غير وجود مادى زى الوعى consciousness ممكن نستوعبة او نفهمة فى عالم مادى كل شئ فى بيكتشف ويفسر دلوقتى بالعلم؟ ازاى نقدر نفسر الظواهر العقلية عن طريق الحالات المادية للجسم؟ الاسئلة دى وغيرها حول فكرة العقل بتكون أشكالية العقل والجسم اللى نقدر نعتبرها بكل ثقة أكتر المشاكل الفلسفية صعوبة.

Phrenology1

زى ما الابستمولوجى فلسفة المعرفة .. فلسفة العقل The Philosophy of Mind فرع من فروع الفلسفة بيهتم بدراسة ماهية العقل وطبيعتة . الفيلسوف الفرنسى رينية ديكارت Rene Descartes فى القرن الساعتاشر عمل تأثير كبيرمازال صداة موجود فى الفلسفة الغربية الحديثة لحد النهاردة. رينية ديكارت لجأ لليقين فى عقلة كوسيلة للتأكد من وجوده الشخصى واللى قادة ان يرفع العقل لدرجة عالية بالمقارنة مع اى شئ تانى خارج العقل ده .. أرجع لحلقة الأنا، أتكلمنا فيها عن افكار ديكارت باستفاضة! ديكارت بشكل ميتافيزيقى metaphysical او غيبى شاف العقل ككيان مستقل تماما عن الجسد .. وكأن العقل مصنوع من مادة عقلية، طبيعتها الاولى هى التفكير لكن كل شئ تانى مصنوع من مادة محسوسة material substance واللى ليها حواص مكانية spatial extension بمعنى انها بتحل مساحة مكانية . علشان كده ديكارت هيتصور عالمين منفصلين .. عالم عقول لامادية او روحية immaterial minds بخواص عقلية زى التفكير، المشاعر . .الخ .. وعالم من الاجسام المادية Material Bodies بخواص مادية زى الحجم والشكل الخ. النظرية الفلسفية دى اللى شكلت العلاقة بين العقل والمادة واللى معروفة بمثنوية المادة Substance Dualism هى نفسها اللى قادت الفيلسوف الانجليزى جيلبرت ريلى Gilbert Ryle يسخر منها بطرح عقيدة شبح فى الالة The Ghost in the Machine .

0226732959

فى كتابة مفهوم العقل The concept of Mind سنة 1949 جيلبرت ريلى هيجادل ان مثنوية ديكارت عن العقل والمادة معتمدة على خطأ تصنيفى Categorical Mistake .. بمعنى تخيل ان فى زائر راح جامعة القاهرة وشاف كل مبانيها ومعاملها و مكتابتها وكل شئ بيكون جامعة القاهرة .. لكنه اشتكى فى اخر الزيارة انه ماشفش الجامعة! الزائر نسب بالخطأ كلا من الجامعة والمبانى المكونة ليها لنفس التصنيف الوجودى ، علشان كده اخطأ فى فهم العلاقة بينهم .. فى نظر ريلى ديكارت ارتكب نفس الخطأ فى فهمة العلاقة بين العقل والجسد لانه أخطأ فى فهم التصنيف الوجودى ليهم .. معتبر انهم من مواد مختلفة تماما! من الفكرة المثنوية دى عن العقل والجسد ريلى هيطرح الصورة الهزلية بتاعة الشبح فى الالة اللى فيها العقل اللامادى أو الروح ممثل فى الشبح بشكل ما عايش جوة الجسد المادى أو الالة بيتحكم فيها عن طريق المحركات والروافع .. بعج ما ريلى هيهاجم المثنوية الديكارتية Cartesian Dualism هيطرح حلة لمشكلة العقل والجسد ممثل فى نظريته السلوكية Behaviorism واللى هنتكلم عنها بالتفصيل فى حلقة تانية قريب.

مشاكل فى النظرية المثنوية: رغبتى فى الشرب سببت انى امسك كبايهة المية و ارفع دراعى، لو دست على دبوس برجلى هيتولد جواية شعور بالالم .. تفاعل بين عقل وجسم .. شئ بديهى! حدث عقلى بيولد حدث مادى والعكس بالعكس .. ما تستعجلش لان نفس الفكرة البديهية البسيطة دى بترمى بظلال الشك على النظرية الديكارتية من الاساس .. واحد من المبادئ العلمية الاساسية بيقول ان اى حدث مادى بيستدعى مسبب مادى! لكننا بفصل العقل والجسد عن بعض وتصنفهم من مواد مختلفة أصبح الاتصال ما بينهم مستحيل طبقا للعلم! ديكارت نفسه ادرك المشكلة دى وقتها و ادرك ان علشان نظريتة تكون صحيحة لابد وان يكون فى تدخل ميتافيزيقى او الاهى يعنى عشان العلاقة السببية دى تتم بمعنى ان العقل يسبب احداث مادية .. لكنة ماطرحش حلول تانية خارج الاطار الغيبى لحل المعضلة دى!

تلميذ ديكارت ومتابعة الفيلسوف الفرنسى نيكولس مالبرنش Nicolas Malebranche قبل النظرية المثنوية واخد على عاتقة حل مشكلة العلاقة السببية بين العقل والمادة المستحيلة طبقا لقوانين العلم، الحل الغريب اللى طرحة ان مافيش اتصال على الاطلاق بين العقل والمادة، على العكس لما بيحصل ان فى اتصال مطلوب بين العقل والجسد، ربنا بيتدخل علشان يخلى الاتصال ده يحصل او بمعنى انه بيسبب الحدث الفيزيائى فى الجسم .. وبالشمل ده ربنا هو اللى بيسبب الاحساس بان فى علاقة سببية .. سبب وحدث Cause and Effect .. العقيدة الفلسفية الغريبة دى اتعرفت باسم العرضية او المناسبية occasionalism حصلت على تأييد ضعيف فى وسط الفلاسفة وزادت من التأكيد على خطورة المشكلة الموجودة فى النظرية المثنوية وضرورة حلها.

حل تانى لتجنب المشكلة اللى واجهة ديكارت طرحة الفيلسوف الالمانى المعاصر لديكارت بروخ اسبنوزا Baruch Spinoza اللى طرح نظرية الخاصية المثنوية Property dualism واللى اعتقد فيها ان فكرة المثنوية مش مرتبطة بالمادة زى ما ديكارت اعتقد لكن بالخواص Properties وان في نوعين منفصلين من الخواص عقلية ومادية ممكن ننسبها للشئ الواحد سواء كان شخص او موضوع .. لكن الخواص دى مختلفة بشكل جذرى لا يمكن تبسيطة او اختزالة .. بمعنى انها مختلفة فى طبيعتها الاولية ومن المستحيل تفسيرها عن طريق بعضها البعض .. اذن اسبينوزا قال ان فى خواص مختلفة فى طبيعتها الاولية بتوصف جوانب aspects مختلفة لنفس الشئ .. علشان كده النظرية دى احيانا بيطلق عليها نظرية ازدواجية الجوانب Double Aspect Theory النظرية بتحاول تفسر ازاى العقل والجسد بيتصلوا ببعض حيث ان الاسباب المسببة لافعالنا نفسها ليها جانبين .. جانب عقلى وجانب مادى! بالرغم من ان النظرية شكلها كويس الا ان من الواضح انها ماحلتش المشكلة نفسها ولكنها حركتها لمستوى تانى.

النظرية الفيزيائية Physicalism الحل البديهى للمطب اللى مقابل النظرية المثنوية لديكارت .. واللى بتتبنى منهج احادى Monistic Approach بمعنى ان فى نوع واحد من المادة فى الكون بغض النظر عن طبيعة الاشياء والموجودات سواء كانت عقلية او مادية.. مجموعة من الفلاسفة تبنوا الفكرة دى يمكن واحد من اشهرهم الفيلسوف الانجليزى جورج بيركلى George Berkeley اللى انتمى للمدرسة المثالية Idealism واعتقد ان الواقع المحيط بينا مكون من عقول وافكار بس! الغالبية العظمى من الفلاسفة بالاخص الفلاسفة المعاصرين لينا دولقتى اختاروا النظرية الفيزيائية لتفسير طبيعة العقل بشكل او باخر وان العقل والمادة ليهم نفس الطبيعية الفيزيائية واللى قاد لده التقدم العلمى الملحوظ فى مناطق كتير، فلاسفة النظرية الفيزيائية بيعتقدوا ان العقل كمان لازم يكون تحت مظلة العلم والبحث العلمى وبما ان العلم بيبحث بس فى الاشياء اللى ليها وجود فيزيائى يبقى لازم العقل يكون بالضرورة له وجود فيزيائى ! فتبقى المشكلة دلوقتى ازاى العقل بشكل مجرد ممكن يكون جزء من الصورة الفيزيائية الكاملة للكون بشكل محسوس علنى قابل لدراسة العلم؟

النظرية الفزيائية اخدت عدة اشكال .. يمكن الشئ المشترك بين الاشكال دى انها كلها نظريات اختزالية Reductive بمعنى ان انها بتتدعى ان اى ظاهرة عقلية ممكن يتم تحليلها بشكل كامل وتام باسلوب مادى وبالشكل ده بيتك اختزال اى معنى غير مادى من الفكرة والا تكون النظرية بتناقض نفسها. التقدم العلمى الكبير مؤخرا فى العلوم العصبية Neuroscience اكدت بشكل كبير فكرة النظرية الفيزيائية وان الحالات العقلية مرتبطة بشكل قوى بالحالة الفزيائية للمخ .. علشان اديك فكرة مبسطة اد ايه العلم وصل فى المجال ده العالم Michael Persinger وفريقة البحثى طوروا جهاز بناء على مجموعة من ابحاثهم عن الفص الصدغى فى المخ والتأثيرات المختلفة علية .. الجهاز دة أطلقوا علية اسم خوذة الله The God Helmet .. الاسم يبدو مثير، لكن السبب فى التسمية ان الجهاز ده عبارة عن خوذة بيلبسها الشخص تحت الاختبار واللى بتبعت مجموعة من الموجات لمناطق معينة فى المخ فتولد احساس عن الشخص بوجود شئ اكبر منه محيط .. واللى بيحاكى التجارب الروحية اللى بيمر بيها الانسان فى حالة التعبد والصلاه لله .. علشان ابقى دقيق فى طرح المعلومات، الجهاز ده فلا طور والتجارب اتعملت على مجموعة كبير من المشاركين لكن النتايج اللى وصلها فريق البحث لسة مش مأكده عن طريق فرق بحث تانية مستقلة Independent Verification واللى جزء اصيل من الطريقة العلمية لتأكيد اى نظرية .. لكن على اى حال المثال ده يديك فكرة العلم وصل لحد فين فى البحث ورا الظاهرة العقلية وعلاقتها بالمخ.

دلوقتى الطريق السهل اللى يقدر ياخدة اتباع النظرية الفيزيائية هو انهم يدعوا ان اى ظاهرة عقلية ممكن تفسيرها عن طريق دراسة التغيرات والعمليات فى المخ وقت حدوثها. يمكن اكتر اشكال النظرية الفيزيائية تطرف هى نظرية المادية المزيلة Eliminative materialism واللى بتقترح ان مع تقدمنا العلمى علم النفس الشعبى Folk psychology اللى هو طريقة تفكيرنا المعتادة فى تفسير تصرفاتنا وافعالنا عن طريق المشاعر، النوايا، الافكار، الالم، والرغبات الى اخرة بدل من العلم هتختفى تماما .. وهيتم استبدالها بأفكار ومبادئ محددة بدقة عن طريق النيوروسينس او علم الاعصاب.

ديكارت كان صحيح اول من صنع التعريف الكلاسيكى لنظرية مثنوية المادة Substance Dualism لكن الفكرة نفسها بالتأكيد مش جديده! أشكال مختلفة من الفكرة المثنوية ضمنية فى اى فلسفة، دين، عقيدة، او رؤية للعالم بتفترض ان فى عالم فوق قوانين الطبيعة Supernatural فيه موجودات غير ماديه غير مفسرة بالمفاهيم الفيزيائية .. زى الروح، الاله، الشيطاين، الملائكة، الجن، الاشباح، العفاريت، الى اخرة .. مثلا فكرة ان فى روح وانها بتتنجو من عملية موت الجسم وتتنقل لجسم مادى تانى فى الحياة زى ما فى بعض الاديان الشرق اسيوية أو بتنتقل لله زى ما فى الاديان السماوية .. فكرة بتطلب رؤية مثنوية للكون.

الحل اللى طرحتة النظرية الفيزيائية ازاح عن الصورة تماما المشكلة اللى قابلت النظرية المثنوية بضربة قاضية! بالتحديد المشكلة اللى قابلت ديكارت فى تحديد العلاقة السببية بين العقل والجسد واستخدامة للغيبيات اتحلت تماما ببساطة لما حطينا الوعى Consciousness تحت اطار التفسيرالعلمى. لكن بالتأكيد زى ما توقعت النقد الموجه للنظرية الفيزيائية بيدعى انها تجاهلت الطبيعة الذاتية Subjective Nature لتجربة الوعى او الادراك .. واعمى اتباعها النجاح اللى اتحقق على المستوى المادى .. لكن التمن من وجهة نظر نقاد النظرية هيكون كبير!

القصة اللى بدأنا بيها، قصة فيلم كلاسيكى من تسعينيات القرن العشرين اسمة شبح فى الالة Ghost in The Machine واللى قصتة مبنية على فكرة جيلبرت ريلى عن النظرية المثنوية لديكارت .. الفيلم حاول يناقش ايه اللى ممكن يحصل لو عقلنا فعلا من مادة مختلفة عن جسمنا .. هل فعلا ممكن ننقل الوعى والادراك بتاع عقلنا ده لجسد تانى .. كمبوتر مثلا؟ الفيلم طبعا هينتهى نهاية كلاسيكية سعيدة زى اى فيلم امريكى والابطال هينتصروا على العقل الشرير ويدمروا وجودة الافتراضى جوة الكمبيوتر.

ودلوقتى … غمض عينيك .. اسمع صوت افكارك، ياترى الافكار دى صدى شئ تانى غير مخك؟ … ولا مجرد ازيز الموجات اللى بتتنقل بين خلايا مخك العصبية؟ … ياترى فعلا فى شئ تانى جواك غير جسمك .. عقلك؟ او روحك؟ او وعيك؟ ولو اجابتك كانت ايوة … طيب ازاى نقدر نفسر العلاقة بين الشئ الغير مادى ده وافعالك المادية؟ .. ولو اجابتك كانت لا .. ياترى هل فى معنى لوجودك؟ …. فكر تانى!

Episode 08 (No Ads)

Download MP3: https://app.box.com/s/4xot9oexn601ggr447z4

فى الحلقة الجاية … هتكون وطواط! … حياتك الضلمة، بتنام طول النهار .. وتعيش الليل تصطاد ضحياك .. نظرك ضعيف .. بتشوف العالم من خلال انعكاسات الموجات الفوق الصوتية العالية اللى بتبثها علشان تكتشف البيئة المحيطة بيك .. ياترى الحياة شكلها ايه كخفاش؟ … عن الوعى ، الادراك .. مشكلة العقل والجسد .. هنكمل فلسفتنا المرة الجاية

من دلوقتى للحلقة الجاية .. .عيش الحياة بفلسفة

زود معلوماتك:

فلسفة العقل The Philosophy of Mind

http://en.wikipedia.org/wiki/Philosophy_of_mind

المثنوية الديكارتية Cartesian Dualism

http://en.wikipedia.org/wiki/Dualism_(philosophy_of_mind)

جيلبرت ريلى Gilbert Ryle

http://en.wikipedia.org/wiki/Gilbert_Ryle

مفهوم العقلThe Concept of Mind

http://en.wikipedia.org/wiki/The_Concept_of_Mind

خطأ تصنيفى Category mistake

http://en.wikipedia.org/wiki/Category_mistake

نيكولس مالبرنش Nicolas Malebranche

http://en.wikipedia.org/wiki/Nicolas_Malebranche

العرضية او المناسبية Occasionalism

http://en.wikipedia.org/wiki/Occasionalism

بروخ اسبنوزا Baruch Spinoza

http://en.wikipedia.org/wiki/Baruch_Spinoza

نظرية الخاصية المثنوية Property dualism

http://en.wikipedia.org/wiki/Property_dualism

النظرية السلوكية Behaviorism

http://en.wikipedia.org/wiki/Behaviorism

النظرية المثالية Idealism

http://en.wikipedia.org/wiki/Idealism

علم الاعصاب Neuroscience

http://en.wikipedia.org/wiki/Neuroscience

جورج بيركلى George Berkeley

http://en.wikipedia.org/wiki/George_Berkeley

النظرية الفيزيائية Physicalism

http://en.wikipedia.org/wiki/Physicalism

Michael Persinger

http://en.wikipedia.org/wiki/Michael_Persinger

خوذة الله The God helmet

http://en.wikipedia.org/wiki/God_helmet

نظرية المادية المزيلة Eliminative materialism

http://en.wikipedia.org/wiki/Eliminative_materialism

علم النفس الشعبى Folk psychology

http://en.wikipedia.org/wiki/Folk_psychology

تناسخ الارواح Reincarnation

http://en.wikipedia.org/wiki/Reincarnation

شبح فى الالة The Ghost in the Machine

http://en.wikipedia.org/wiki/The_Ghost_in_the_Machine

8 thoughts on “EP08: The Mind-Body Problem أشكالية العقل و الجسد

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s