EP11: Persistence of Personal Identity Over Time أشكالية أستمرار الهوية عبر الزمن

Episode 11 + ECN (Egypt Cancer Network) Ad

تخيل أنك فى فى عالم خيالى القراصنة بتحكمة بسفنهم القوية اللى بتاخدهم لمغامرات أعالى البحار يواجهوا الموت بقلوب ميتة ما تعرفش الخوف! عمرك 15 سنة شاب صغير مراهق، شربت من أبوك القرصان أسرار البحارومهارة القائد وحنكة العسكرى ودهاء التاجر، أبوك دولقتى على فراش الموت .. حانت اللحظة اللى تبقى انت فيها الربان! واقف فى حزن والم شديد جنب فراش ابوك وهو بينازع القدر فى لحظات وجودة الاخيره، علشان يديك وصيتة .. هيقولك : يا أبنى الوقت جة ومابقاش فاضل كتير .. أحنا قراصنة .. البحر حياتنا، والخطر قدرنا .. أنا أهلتك من لحظة وجودك عشان اليوم ده، خلاصة تجاربى وحكمتى نقلتها لك عبر السنين دلوقتى ما فضلش غير حاجة اخير، سفينة جدك الكبير سيسس، عمرها الف عام .. سر سطوتنا وسيطرتنا على البحار، من يجى الف سنة البحر الحرب كانت شديدة بين القراصنة يا ابنى! الاف الناس بتموت كل يوم فى معارك فى كل مكان، مافيش قانون، مافيش كبير، مافيش سلطة فى البحر يخاف منها ويحترمها الكل، جدك الكبير سيسس بنى السفينة دى وخاض بيها معارك البحار كلها، جدك كان دايما المنتصر.. الالهة أدتة الحكمة والاردة انه يسطر على البحر كلة من مشارقة لمغاربة، لمئات السنين ماكنش فى فى البحر منازع لقوة وسطوة جدك سيسس وسفينتة، الكل هابة وعملة ألف حساب، والبحر أصبح مكان رزق للبشر من كل مكان .. لما حانت اللحظة وجة وقت موت جدك .. فى ليله البحر كان فيها غضبان، والسما ملفوفة فى سواد الليل، اختفى جدك، وماحدش عرف سيسس راح فين، الناس قالت ان الاله مزجت سيسس مع سفينتة علشان تعيش الاسطورة ويفضل البحر فى سلام .. ومن ساعتها ربان سفينة سيسس هو مالك البحار وحامى القانون والنظام ..  أحنا أحفاد القرصان الاعظم سيسس ورثنا سفينتة أب عن جد، سيسس هى هويتنا ، سلاحنا، بيتنا، و جذورنا .. حافظ عليها .. من غيرها أنت مالكش قيمة ولا وجود، وفى يوم من الايام سلمها لأبنك .. واحكلية حكايتنا وحمله وصيتنا .. وصية سيسس!

يوم أسود أتنكست فية اعلام سيسس، مات الربان .. واتولد قائد جديد هيقود سيسس وطاقم السفينة فى أعالى البحار، التحدى صعب والمسئولية كبيرة، الكل مترقب ادائك، الكل عاوز يشوف ابن 15 سنة هيقود مارد البحار سيسس ازاى، قوة خيالية تحت ايدك، هتوظفها فى الخير وتحافظ على وصية جدك ولا مش هتقدر تتسيطر على المارد وتضيعة من نسل العيلة؟! الزمن مر وعمرك دلوقتى 20 .. اثبت للكل انك اد التحدى وطوعت قوة المارد الجبار اللى تحت اديك .. سيطرت على البحار زى أبوك واجدادك .. دخلت معارك كتير، قتلت كتير من المتمردين والخارجين عن النظام .. كل معركة بتنتصر وترفع راية سفينة سيسس عالية وتكبر أسطولك المهيب .. لكن كل معركة من دول كان ليها تمن! سيسس سفينة قديمة عمرها اكتر من الف عام، فى كل معركة جزء من السفينة بيتأثر لما بترجع للشط انت وطاقم سفينتك بتغيروا الجزء المصاب بجزء جديد .. فى كل مرة بتدفن الجزء الاصلى بتاع السفينة فى جزيرة بعيدة فى قلب البحر الاسود، من هوفك انه يقع فى ايد حد ويستغل الطاقة دى. فات 30 عام وبقيت فى الخمسين .. معركة كبيرة بينك وبين المتمردين فى بحر السباع الاكبر، معركة دامت اسابيع قتلت فيها كتير منهم .. تانى بتثبت للمتمردين و طاقم سفينتك انك انت قائد البحار وربان سفينة سيسس! لكن المعركة دى مختلفة لان اخر جزء اصلى فاضل من سفينة سيسس اللى ورثتها عن جدك اتصاب ولازك تغيرة، هترجع الشط مع طاقم سفينتك، وتغيروا الجزء الاخير اللى عمرة الف عام من سفينة سيسس بجزء جديد، هتاخد الفطعة الاخيرة وتدفنها مع باقى القطع فى جزيرة البحر الاسود. فى ليلة صافية، البحر فيها هادى ، هتلف على سفبنتك تطمن على حال السفينة والطاقم بتاعك .. طاقم السفينة فى بطن السفينة ساهرنين بياكلوا ويتسامروا .. هتسمعهم بيتكلموا: واحد منهم هيقول : بقلك خلاص الاسطورة انتهت، والتعويذة اتفكت! هيرد تانى : أتفكت ازاى .. انت اكيد اتجننت .. الاول: مش الاسطورة بتقول ان الالهه مزجت سيسس مع السفينة، واحنا النهاردة غيرنا اخر جزء من السفينة بنفسنا .. خلاص دى مابقتش سفينة سيسس، لاجبروت ولا قوة .. وهنبقى لقمة سهلة للكل ينتقم منا.  هتسوف الرعب والخوف فى عيون الطاقم وهو بيسمع كلامة .. هتدخل فجأة وتقول: سيسس وسفينتة هى احنا، سيسس دايما معانا الالهة مزجتة مع سفينتة اللى بتدافع عن الحق مش مع اجزائها، وطول ما احنا بنحمى الحق وبندافع عن مبادئ سيسس .. بلقى احنا اصحاب سفينة سيسس. هيهلل الطاقم ويشلوك على اكتافهم وهما بيهتفوا بحياتك وسطوة سفينة سيسس .. هتبتسم وتفرح معاهم، لكن جواك خوف ورهبة ان تكون فعلا التعويذة اتفكت مع اخر جزء اصلى من السفينة .. ياترى هى دى فعلا سفينة سيسس اللى ورثتها؟ البحر ما بيرحمش .. والمتمردين دايما فى كل مكان .. هتخرج مع طاقم سفينتك فى معارك طاحنة تسيطروا بيها على الفوضى و تنشروا النظام .. لكن المعركة دى مختلفة … الحكاية اللى دايرة فى البحر وبين كل الناس عن المتمردين اللى انشقوا عن الطاقم بتاعك وراحوا لجزيرة البحر الاسود .. طلعوا كل اجزاء سفينة سيسس الاصلية وبنوا منها سفينة طبق الاصل من سفينة سيسس بنفس اجزائها .. الكل مرعوب، الكل محتار مين اللى معاة سفينى سيسس دلوقتى .. السفينة اللى انت ورثتها وغيرت كل جزء فيها عبر الزمن؟ ولا السفينة اللى بناها المتمردين من اجزاء سفينة سيسس القديمة؟ …. الاكيد ان المعركة هتكون حاسمة لان اللى معاة سفينة سيسس هيكون هو مارد البحار و معاة الغلبة .. وهيمحى من الوجود اعدائة .. ياترى هل المعركة دى هى معركتك الاخيرة .. ولا هتكون سفينتك هى سفينة سيسس؟

trireme

سفينة سيس   The Ship of Theseus  واحد من الاحاجى الفلسفية اللى عادة ما بيستخدمها الفلاسفة علشان يختبروا بديهيتنا عن هوية الاشياء او الاشخاص عبر الزمن. غالبا ما بتكون البديهيات  دى قوية عندنا لكنها بتتضارب مع بعضها. قصة سفينة سيس أعاد احيائها من تراث الفلسفة القديمة الفيلسوف الانجيليزى توماس هوبس Thomas Hobbes  علشان يناقش فكرتين مهمين جدا فى فلسفة ماوراء الطبيعة Metaphysics أشكالية الهوية واللى اتكلمنا عنها فى حلقة سابقة، وأشكالية التغير. علشان نقدر نفهم الاشكالية دى، لازم الاول نحدد يعنى ايه تغيير.

Thomas_Hobbes_(portrait)

التغيرChange ، بيحصل لما شئ ما بيتغير بطريقة محددة. مثلا أنت لما كان عمرك 15 سنة غير لما كان عمرك 20 سنة، كبرت واتغيرت من حيث الجسد، العقل، الشخصية، وحتى على المستوى الاجتماعى. او لو مثلا أخدنا تعبان بيغير جلدة عدى بمرحلة اتغير فيه شئ معين. ممكن نعمم الفكرة دى ونقول أن شئ س بيتغير من حيث خاصية ص .. فقط لو س فى لحظة معينة فى الزمن كان عندة خاصية ص و فى لحظة تانية مستقبلية فى الزمن س أصبح ماعندوش الخاصية ص. ده وصف لحالة التغير كتير منا يعرفها، طريقة تانية ممكن نوصف بيها التغير فى الشئ، لو الشئ غير اجزائة .. يعنى شئ س بيتغير من حيث جزء من اجزائة ص، فقط لو ص جزء من س فى لحظة من الزمن، لكن فى لحظة تانية من الزمن ص ما بقاش جزء من س. الفكرة دى فى الفلسفة أسمها Mereological essentialism  واللى بتناقش العلاقة بين الكل والاجزاء والشروط اللازمة لأستمراريتهم عبر الزمن، وبتتبنى ان أستمرارية الشئ أو الكل عبر الزمن بتطلب كل أجزاءة بشكل أساسى علشان الاستمرارية دى تتم، فقد الكل لجزء او اكتسابة جزء جديد يعنى ان وجود الشئ ده انتهى او اتغير على الاقل. المشكلة اللى بنحاول نناقشها هنا هى ايه هو نوع التغير فى الشئ اللى بعدية بيفقد الشئ هويتة؟ يعنى مثلا لما شخص بيموت مابنقولش ان حياة الشخص اتغيرت .. لكن بنقول ان حياة الشخص انتهت، نفس الفكرة لما مبنى معين بيقع ما بنقلش ان المبنى ده اتغير عما كان لكن بنقول ان المبنى اتهدم او اصبح بدون وجود. ايه هى الاحداث اللى من ناحية بتسبب تغير بسيط فى الشئ؟ والاحداث اللى ممكن تسبب تغير جذرى فى الشئ زى تغيير طبيعة وجودة مثلا او انهائها تماما؟

330px-MontreGousset001

سؤال سفينة سيسس هو سؤال استمرارية الهوية الشخصية عبر الزمن The Problem of Personal Identity Persistence واللى فى الغالب الاجابة علية هتعتمد على مين بتسألة السؤال ده! أجابة سريعة على السؤال هتكون ان السفينة أتغيرت كتير ومابقتش نفس السفينة اللى ورثها القبطان عن جدة، اذن السفينة مش سفينة سيسس! بس بالمنطق ده انت فى اخر حياتك مش هتكون نفس الشخص اللى فى كان فى بداية حياتك! الاشكالية مش فى السفينة أو الاشياء بس، الاشكالية بتمس البشر كمان .. البشر دايما بيتغيروا عبر الزمن، مش بس جسديا لا كمان نفسيا ومعنويا .. فرق كبير يبن الطفل عبدو اللى عمرة سنتين من حيث الشكل والمعنى عن جدو عبدو العجوز اللى عمرة دلوقتى 90 سنة، واللى حل محل الطفل بعد 88 سنة! ياترى تفتكر هل هما نفس الشخص؟  ولو أجابتك كانت أيوة  … تفتكر ايه اللى بيخليهم نفس البنى ادم؟  بالرغم من تغير الشكل والنفس! تفتكر ياترى من المهم اننا نعاقب عبدو عن غلطة عملها من 70 سنة؟ طيب تعمل ايه لو جدو عبدو ما افتكرش الغلطة اللى عملها دى من 70 سنة؟ بلاش خلينا اًصعب السؤال شوية .. لو عبدو وهو عمرة 40 سنة كتب فى وصيتة انه لو دخل فى غيبوبة وعمرة فوق 80 سنة .. الدكاترة ممكن ياخدوا قرار بتوقيف مخه، او الحكم عليه بالاعدام! تفتكر دلوقتى لو جدو عبدو دخل فى غيبوبة ، هل من حق دكتور قرة وصية مكتوبة بنسخة جدو عبدوا اللى عمرها 40 سنة انه سوق مخة ويموتة؟ السؤال هنا هو سؤال التطابق .. أنا سامعك بتقول بتقول ان جدو عبدو هو “نفس” الطفل عبدو اللى كان عمرة سنتين لكنة أتغير كتير عبر الزمن لكنه نفس الشخص! هتفق معاك فى دة، لكن ايه اللى خلاك تقول انه نفس الشخص .. ايه هو معيار التطابق اللى استخدمتة علشان تقول انه هو نفسة الشخص لكن طرأ علية بعض التغيير؟

سؤال التطابق سؤال صعب جدا علشان كده قبل ما ناقشة خلينا نفرق بين مبدأين مهمين جدا فى الفلسفة، الهوية الرقمية والهوية النوعية. فى مثال جدو عبدو وسؤال التطابق اللى طرحناه كنا بنحاول نحدد اذا كنا بنتكلم عن شخص واحد فى زمنين مختلفين، ولا شخصين مختلفين ليهم صفات متماثلة فى زمنين مختلفين؟ الفكرة دى بنسميها الهوية الرقمية Numerical Identity ، لو قولنا ان شئ س له نفس الهوية الرقمية بتاعة شئ ص .. كأننا بنقول ان س وص هما نفس الشئ، شئ واحد مش اتنين. ده مفهوم مختلف عن الهوية النوعية qualitative identity، شيئين نوعيا متطابقين لو ما تقدرش تفرقهم عن بعض لكنهم مش متطابقين رقميا يعنى مش نفس الشئ .. بالظبط زى التوأم كده! نسخة فى الماضئ منك لازم تكون بالظبط زى نسخة المستقبل علشان نقدر نقول انكوا متطابقين رقميا، لكننا ما بنفضلش متطابقين نوعيا عبر الزمن .. احنا بنتغير مع الوقت .. بنطول، بنتخن .. بنكون افكار جديدة، بننسى أفكار قديمة .. علشان كده السؤال مش ايه المطلوب ان نسخة الماضى منك تكون نوعيا متطابقة مع نسخة المستقبل، السؤال عن التطابق الرقمى.

cancer_full

لو رجعنا لمثال سفينة سيسس علشان نبسط الفكرة نسبيا خلينا نستخدم الرموز حيث انها بتخلى الامور اوضح نسبيا، لو فرضنا ان السفينة اللى بناها الجد سيسس وورثتها انت بعد الف سنة هى السفينة 1، والسفينة اللى اتغيرت كل اجزائها بعد 30 سنة هى السفينة 2، والسفينة اللى بناها المتمردين من اجزاء سفينة سيسس الاصلية وخلوها صورة طبق الاصل من سفينة سيسس هى السفينة 3. لو رجعنا دلوقتى لتعريف التغير اللى حددناة فى اول الحلقة بانة الشئ بيفقد خاصية معينة عبر الزمن، هنكتشف ان التعريف ده بيتطلب ان الشئ يتستمر وجوده علشان نقدر نقول انه فقد او اكتسب خاصية جديدة عبر الزمن. يبقى عامل الاستمرارية هنا مهم علشان نقدر نجاوب على سؤال التطابق! يعنى فى حالة سفينة سيسس ياترى انهى سفينة 2 ولا سفينة 3 هى استمرارية السفينة 1؟

المنهج جسدى Somatic Approach بيتبنى فكرة ان الاستمرارية الفزيائية مطلوبة علشان استمرارية الهوية . يعنى علشان شخصك يستمر عبر الزمن بيتطلب استمرارية جسدية لنفس المادة العصوية المكونة ليك بغض النظر عن أفكارك و خواصك العقلية. أو علشان سفينة سيسس تستمر الاجزاء المكونة ليها لازم تستمر فى وحدتها العضوية المنهج ده عادة ما بيتبناة فلاسفة مدرسة الحيوانية Animalism  اللى بتقول هويتنا هى أجسادنا We are our bodies . بالرغم من ان الفكرة تبدو غريبة الا انها اكتر اتساقا مع رؤيتنا للواقع .. بالنسبة لينا الشخص بتنتهى استمراريتة بانتهاء الوجود الحيوانى او الجسدى بتاعة. أتباع المنهج ده زى فرد طاقم السفينة اللى شاف ان وجود السفينة انتهى بتفكك كل اجزائها وهيشوف ان سفينة 3 هى استمرارية السفينة 1 لانها استمرارية فزيائية.

images

المنهج النفسى Psychological Approach هو المنهج التانى اللى بيحاول يفسر اشكالية الاستمرارية، و اللى بيتطلب علاقة نفسية مطلوبة ضرورية بين الشئ الحالى الشئ اللى فى الماضى علشان يبقى فى استمرارية. سفينة سيسس هى السفينة اللى خاضت كل المعارك والحروب واللى دايما وقفت ضد المتمردين علشان تقاوم الفوضى ويعم السلام، أنت الشخص اللى فى المستقبل اللى بيورث كل الصفات العقلية، والمعتقدات، الذكريات، المفضلات، ونفس الكفاءة والقدرة العقلية بتاعة النسخة اللى فى الماضى. يعنى من منظور أتباع المنهج ده سفينة 2 هى أستمرارية سفينة1 لانها نفسد الامتداد النفسى بتاعها..  فى خلاف على تحديد نوع الوراثة اللى المفروض تحصل بمعنى هل مطلوب ان يكون فى نوع من الاستمرارية الفزيائية بيحصل يعنى الجسد مستمر هو كمان، ولا مافيش استمرارية فزيائية مطلوبة على الاطلاق! خلينا نتخيل للحظة عملية زراعة مخ Brain Transplant  عملية من الممكن تصور انها هتبقى شئ متاح فى المستقبل القريب مع تقدم العلم  ..  فيها هنتخيل ان مخك تم زراعتة فى جسمى … بالبديهة كده هنقول انك حصلت على جسم جديد، لكن مش هنقول ان جسمى زرع مخ جديد، لو متفق معاية فى البديهية دى، اذا الجسم مش شرط اساسى لتحديد الهوية الشخصية. الفكرة دى قادت بعض الفلاسفة انهم ينسحبوا من ربط الجسد بالهوية ويقولوا ان الهوية الشخصية مرتبطة بالمخ بس مش بالجسم كلة .. الفكرة دى هتتماشى مع الفكرة البديهية اللى كانت عندنا بعد ماعملنا عملية زراعة المخ، لكنها مش هتحل المشكلة بالكامل .. لان فى الواقع اللى يهمنا فى المخ اللى بينبع منه مش العضو نفسة. بالرغم من اننا ممكن نكون لسه مش متأكدين ازاى العمليات اللى بتحصل فى المخ بتكون الوعى الذاتى للانسان او الحالات العقلية، لكن غالبا مافيش اختلاف على ان المخ هو المكان اللى بيحتوى العملية دى. لكن فى الواقع اللى يهمنا هو السوفتوير لو جاز التعبير اللى بيكون شخصيتى، ذكرياتى، معتقداتى، وخبراتى .. مش الهاردوير بتاع عضو فزيائى معين . أحساسى الشخصى بذاتى مش هيتغير لو قدرنا ننسخ كل أفكارى، خبراتى، معلوماتى، معتقداتى، وتجاربى لمخ تانى صناعى، او حتى لو اعدنا تحميل مخ بتاع بنى ادم تانى بكل المحتويات الفكرية دى بتاعة مخى…. أنا عقلى .. انا فى المكان اللى فيه عقلى .. وبالشكل ده هويتى الشخصية مش مربوطة لا بجسمى ولا بمخى لكن بعقلى. لكن مازال فى اختلاف كبير على الخواص النفسية أو العقلية اللى مطلوبة وضرورية للأستمرارية انها تحصل. المنهج النفسى بيتبنى فكرة مؤسسة اسمها معيار الذاكرة.

330px-JohnLocke330px-Locke_Essay_1690

الفيلسوف الانجيليزى جون لوك Locke  هيطرح نظرية معيار الذاكرة  Memory Criterion  واللى فيها هيحاول يجاوب على سؤال الدوام والاستمرارية عن طريق الذاكرة، لوك هيقول ان بالضرورة لاى شخص موجود فى لحظة ما من الزمن عشان يكون متطابق مع شخص موجود فى لحظة تانية من الزمن ان الشخص الاول يقدر يتذكر خبرة او تجربة معينة الشخص التانى عاشها فى اللحظة التانية. بمعنى ان الصلة بينك وبين نسخة الماضى منك هى الذكريات، بس المشكلة فى الطرح ده ان بيفترض ان لو حصل عطل معين فى ذاكرتك واتمحت كل الذكريات اللى بتربطك بالماضى اصبحت شخص تانى لان مافيش شئ يربطك بنسخة الماضى منك! الاصعب من كده ازاى هنقدر نربط شخصك بالجنين embryo  اللى حياتك كلها بدأت منه، احنا عارفين ان اكيد انت مش فاكر اى ذكريات عن اللحظة دى فى حياتك! هل معنى كده ان الشخص بيبدأ من اللحظة اللى بيكون فيها الذاكرة والافكار؟

images (1)

مشكلة الاستمرارية عن طريق الذاكرة انها بتفتح الباب لأمثلة غير منطقية بالمرة .. مثلا أفرض ان فى شاب فى الجامعة عمل شئ غير أخلاقى و اتعاقب علية، خلينا نقول مثلا غش فى الامتحان .. دلوقتى الشخص ده كبر وبقى فى منتصف العمر ناجح فى عملة وفاكر كل شئ عن فترة الجامعة بما فيها حادثة الغش يبقى طبقا للنظرية هو نفس الشخص اللى فى الماضى دلوقتى خلينا نقول ان الشخص ده بقى عجوز وفاكر حياتة العملية بس نسى كل شئ عن حياتة فى الجامعة .. فى الحالة دى بقى عندنا سيناريو غير منطقى الشخص اللى فى منتصف العمر هو الشخص اللى فى الجماعة والشخص العجوز هو الشخص اللى فى منتصف العمر لكن الشخص العجوز مش هو الشخص اللى فى الجامعة! نتيجة غير منطقية بالمرة لان زى ماانت فاكر من الرياضيات لو  س يتساوى ص وص بتساوى ع اذا س لازم تساوى ع . واضح ان الشخصية لها صفة أنتقالية transitive لكن الذاكرة لأ. طبعا واحد من الحلول المطروحة ان الاستمرارية غير مباشرة يعنى لو انت افتكرت الرجل اللى فى منتصف العمر وهو افتكر الشاب فى الجامعة يبقى مش ضرورى ان الراجل العجوز يفتكر الشاب اللى فى الجامعة! طيب هنعمل ايه فى مراحل حياتنا اللى مابنفتكرهاش على الاطلاق، زى ماضربنا مثال الجنين مثلا قبل كده. أو حتى لو فكرت فى الاوقات اللى بتصحى فيها من النوم وانت مش فاكر اى حاجة من الاحلام اللى شفتها او اللى حصلك و انت نايم .. هل معنى كده الشخص اللى دخل ينام امبارح شخص تانى؟

طبعا دايما فى الحل الوسط .. انا احنا محتاجيين استمرارية نفسية وجسدية عشان نفضل نفس الشخص عبر الزمن.. النوع ده من الحلول الوسط عادة ما بيتصنف تحت المنهج النفسى، بس المشكلة ان الحل الوسط ده بيواجهة مشكلة أصعب اللى فيها بينفصل النفسى عن العضوى، زى ما شفنا فى مثال زراعة المخ، تخيل ان بطريقة ما قدرنا نخلى جسمى عايش ومستمر بدون عقل.. ومخى فى جسدك مستمر بعقلى .. ياترى فين الاستمرارية دلوقتى؟  الجسد ممكن ينفصل عن المخ اللى هو المكان اللى كلنا على الاقل متفقين انه مكان وجود العقل – ده اذا ماكنش العقل و المخ حاجة واحدة .. يبقى مش ساعتها ازاى هنقدر نحدد الاستمرارية اذا اصبح عندنا استمرارية جسدية ونفسية منفصلتين عن بعض؟!

المنهج التطابقى Anticriterialism  بينفى ان الخواص العقلية او الجسدية ضرورية او كافية للاستمراية، لكن أتباعة بيجادلوا ان الاستمرارية الفزيائية Physical Continuity او الاستمرارية النفسية Psychological Continuity ماهى الا ادلة على استمرارية الهوية لكنها مش سبب للأستمرارية دى ، وما بتضمنهاش .. الشئ الوحيد اللى بيخلى شخص يستمر فى المستقبل هو انه يكون متطابق مع النسخة بتاعة فى الماضى. رجعنا تانى لسؤال التطابق! أزاى نقدر نقول ان سفينة 2 متطابقة مع سفينة 1 أو سفينة 3 متطابقة مع سفينة 1 .. ولو الشرطين دول أتحققوا فى نفس الوقت هل معنى كده ان سفينة 2 و3 متطابقين .. بس أحنا عارفين ان ده مستحيل؟!

Gottfried_Wilhelm_von_Leibniz

الفيلسوف الالمانى ليبنز Gottfried Leibniz هيضع قانون هوية الاشياء المعروف بقانون الهوية لليبنز Leibniz’s law .. القانون بيقول ان علشان شئ س يكون متطابق رقميا مع شئ ص لابد وان الشيئين يكون عندهم نفس الخواص والعلاقات. لو طبقنا القانون على أشكالية سفينة سيسس هنقول أن السفينة 2 هى نفسها السفينة 1 فقط لو كانت كل خاصية وعلاقة عن 2 متطابقة مع 1 .. ياترى هل كل خاصية وعلاقة فى السفينة اللى انت ورثتها عن جدك دلوقتى هى نفسها فى السفينة اللى كانت مع جدك من الف سنة؟! …. بالتأكيد لأ!  الخواص مختلفة، اذن السفينة 2 مش متطابقة مع السفينة 1 .. وبالتالى مش هى سفينة سيسس .. يعنى لو أخدت مثلا دفة السفينة، هنلقيها مختلفة فى السفينى 2 عن السفينة 1 .. ادى خاصية مختلفة بتكسر شرط من شروط قانون ليبنز. كتير من الفلاسفة بيعترضوا بشدة على الرؤية دى! لان بنفس المنطق ده اى خاصية هتتغير فى اى شئ معناة ان الشئ ده هيصبح مختلف تماما عن الشئ الاول والشئ الاول هيتنهى وجودة! يعنى مثلا تخيل موزة خضرا سبتها لفترة من الوقت طابت وبقى لونها أصفر .. هل معنى كده ان الموزة دى مش هى نفسه الموزة اللى كانت خضرا ؟ لان فى خاصية بسيطة زى اللون اتغيرت؟ بالتأكيد لا .. وجهة النظر دى صعب تبنيها لان كل شئ فى حالة تغيير دائم لخواصة وعلقاتة طول الوقت بما فيهم انت نفسك!

6a010535ce1cf6970c013486a11a41970c on-plurality-worlds-david-lewis-hardcover-cover-art

الفيلسوف الامريكى دايفيد لويس David Lewis سنة 1986 فى كتابة فى تعدد العوالم On the Plurality of Worlds هيحاول يشرح المدرستين الفلسفيتين الاشهر فى الوقت المعاصر عن سؤال استمرارية الهوية عبر الزمن .. الرؤية الاولى وهى الديمومة اللحظية Endurantism وهى المدرسة اللى بتتبنى فكرة ان الاشياء ليها وجود مكانى ثلاثى الابعاد بتتحرك فى الزمن من لحظة للتانية، الاستمرارية للأشياء ثلاثية الابعاد معناها ان الشئ له وجود فى لحظة معينة، وبعد كده وجود تانى فى لحظة تانية ، وهكذا .. الشئ بيوجد بالكامل فى اى لحظة من الزمن، وموجود بس فى اللحظة دى بس. مافيش جزء من شئ موجود فى اللحظة الحالية ممكن يكون له وجود فى لحظة تانية فى الماضى او المستقبل. المدرسة التانية هى المدرسة الديمومة المستمرة Perdurantism وهى المدرسة المضادة للديمومة اللحظية واللى بتقول ان الشئ ما بيتواجدش بالكامل فى اى لحظة بيكون موجود فيها، وبتتبنى فكرة ان الشئ مكون من أجزاء زمانية Temporal Parts لما بنشوف شئ دلوقتى .. احنا بنشوف الاجزاء المكونة للشئ فى اللحظة الحالية لكننا ما بنشوفش كل الاجزاء المكونة للشئ .. لان ممكن يكون فى اجزاء تانية للشئ متواجدة فى لحظات زمنية سابقة او لاحقة مش موجودة فى اللحظة دى .. عادة ما بيقال ان المدرسة دى بتتبنى فكرة البعد الرابع للوجود.

600px-Atisane3

مشكلة سفينة سيسس أو أشكالية استمرارية الهوية عبر الزمن، مشكلة صعبة ومعقدة .. وبتفتح الباب لسيناريوهات غريبة خصوصا لما بندأ نطبقها على البشر، يعنى فى مثال جدو عبدو اللى عمرة دولقتى 90 سنة احنا بالبديهة عارفين انه هو نفسة الطقل عبدو اللى عمرة سنتين بالرغم من انهم بيتشاركوا فى عدد صغير جدد من الجزيئات Molecules  اللى بتكونهم لانها بتتغير بشكل جذرى عبر الزمن. لكننا بنشوفهم نفس الشخص مجرد وصف مختلف جدو عبدو العجوز والطفل عبدو الصغير .. فى الواقع قدرتنا على اعادة تحديد هوية الشخص وثقتنا فى ان الشخص ده هو نفس الشخص عبر الزمن خلتنا نخترع احد اهم الاخترعات البشرية اللى بتميزنا عن باقى الموجودات وهو الاسماء .. مجرد فكرة فكرة اننا أطلقنا على الشخص عبدو دليل على ثقتنا فى قدرتنا على اقرار انه هو نفس الشخص مستمر عبر الزمن بالرغم من اننا ما نقدرش نفسر ليه احنا اقرينا الاستمرارية دى. فى الحقيقة من الناحية العلمية الفزياء الكمية quantum physics بتقلنا ان الجزيائات، الذرات، الالكترونات، والبروتونات مالهاش هوية. كل الكترون متطابق مع كل الكترون تانى، وفى ميكانيكا الكم quantum mechanics مانقدرش نتابع ألكترون لوحدة بدقة كفاية .. لان اى الكترون ممكن يتبدل لأكترون تانى بدون اى تغير فزيائى ملحوظ فى النظام بالمرة. وده السبب ان اى شئ فزيائى مش ممكن يفضل ثابت عبر الزمن .. التغير سمة للوجود.

images (2)

ودلوقتى … خد نفس عميق، فكر فى نفس من 30 دقيقة بس لما بدأت تسمع الحلقة دى .. ياترى هل أنت نفس الشخص اللى كان بدأ يسمع الحلقى من نص ساعة؟ …. ولا فعلا انت نفس الشخص، ازاى نقدر نتاكد انك انت نفسك مش مجرد نسخة جديدة متصلة بنسخة الماضى؟ … ولو مش انت نفس الشخص، ايه اللى بيضمن استمرارايتك عبر الزمن ؟  …طبيعتك بتفرض عليك انك تحمى وجودك، بس ازاى تحمى الوجود ده وانت حتى مش قادر تعرف اذا كان الوجود ده مستمر عبر الزمن ولا لأ؟ ! …. فكر تانى


Episode 11 (No Ads)
Download MP3: 
https://app.box.com/s/upx86dqayvz9a60mc5kw

فى الحلقة الجاية … هتكون واحد من البشر اللى نجوا من الفيرس اللى انتشر واصاب معظم البشر على وجهة الارض .. فيرس هيحول البشر لزموتى أحياء، فى صراع وجودى أخير بين البشر والزومبيز، هتحاول تنجو بنفسك! عن الادراك أشكالية العقول … … طبيعة العقل … ومشكلة العقول الاخرى .. هنتفسلف المرة الجاية.

من دلوقتى للحلقة الجاية …. عيش الحياة بفلسفة!

زود معلوماتك:

سفينة سيس Ship of Theseus

http://en.wikipedia.org/wiki/Ship_of_Theseus

توماس هوبس Thomas Hobbes

http://en.wikipedia.org/wiki/Thomas_Hobbes

فلسفة ماوراء الطبيعة Metaphysics

http://en.wikipedia.org/wiki/Metaphysics

Mereological Essentialism  

http://en.wikipedia.org/wiki/Mereological_essentialism

استمرارية الهوية الشخصية عبر الزمن The Problem of Personal Identity Persistence

http://en.wikipedia.org/wiki/Identity_and_change

مدرسة الحيوانية Animalism

http://en.wikipedia.org/wiki/Animalism_(philosophy)

الفيلسوف الالمانى ليبنز Gottfried Leibniz

http://en.wikipedia.org/wiki/Gottfried_Leibni

قانون الهوية لليبنز Leibniz’s law

http://en.wikipedia.org/wiki/Identity_of_indiscernibles

الفيلسوف الامريكى دايفيد لويس David Lewis

http://en.wikipedia.org/wiki/David_Lewis_(philosopher)

فى تعدد العوالم On the Plurality of Worlds

http://en.wikipedia.org/wiki/On_the_Plurality_of_Worlds

الديمومة اللحظية  Endurantism

http://en.wikipedia.org/wiki/Endurantism

الديمومة المستمرة Perdurantism

http://en.wikipedia.org/wiki/Perdurantism

أجزاء زمانية Temporal Parts

http://en.wikipedia.org/wiki/Temporal_part

الجزيئات Molecules  

http://en.wikipedia.org/wiki/Molecule

ميكانيكا الكم Quantum Mechanics

http://en.wikipedia.org/wiki/Quantum_mechanics

2 thoughts on “EP11: Persistence of Personal Identity Over Time أشكالية أستمرار الهوية عبر الزمن

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s