EP07: Tripartite Theory of Knowledge نظرية المعرفة الثلاثية

Episode 07 + ECN (Egypt Cancer Network) Ad

ملحوظة: محتوى الحلقة دى دسم جدا، ننصح بالاستماع عدة مرات .. او وقف الحلقة بعد عرض كل فكرة وحاول تهضم الافكار الجديدة!

تخيل انك بتجرى فى غيطان الدرة بعد ماقتلت علون اللى قتل ابوك من سنين، أخدت بتارك وتار أمك ودلوقتى هتقدر تمشى فى وسط الناس وانت رافع راسك .. ماحدش هيقدر يقولك يا ولد بعد كده بقيت راجل، امك خلاص هتقلع السواد و يرد نور وشها اللى انطفى من بعد موت ابوك، هتجرى على الترعة الغربية هتعدى المشاية للبر الغربى نفسك اتقطع بقالك كتير بتجرى نفسك فى جرعة مية تسقى رقيك .. هانت لما تخلص من البندقية الاول هتشرب وترتاح .. هتوصل للساقية المهجورة هتقلع جلابيتك اللى الدم مغرقها، عليوة روحة ماطلعتش بالساهل، هتنزل فى بطن الساقية قلبك ميت مش همك الحية ولا العقارب هتحفر فى الارض اللى تحت الماية الراكده، الريحة عطنة مافيش بنى ادم نزل هنا من زمان .. بتفكر ياترى حمدان وسمعان ولاد علون هيعموا ايه لما يعرفوا انك قتلت ابوهم، بس انت ما قتلتوش انت اخدت تارك ومسحت عاركوا .. سمعان ما يتخافش منه ده لسه عيل ابن امبارح، حمدان هو اللى لازم تعمل حسابة وتفتح عينك علية كويس!

EP06: Knowledge in Islamic Philosophy المعرفة فى الفلسفة الاسلامية

تخيل انك طفل رضيع عمرة ايام، والدتك واقفة بتبكى وهى بتودعك بنظراتها بعد ماحطتك فى سلة طافية فى البحر! بصلها كويس لان دى هتكون أخر مرة تشوفها .. هترسى السلة بيك على شط جزيرة مهجورة ما خطتهاش رجل بشر قبل كده، الجوع هيخليك تبكى قبل ما غزالة فى الغابة تسمع صوت بكائك فتظن انك ابنها التايه،هترضعك وتشربك وتعتنى بيك، هتبقى ابنها الغريب من اللحظة دى. عمرك دلوقتى 10 سنين ما تعرفش غير لغة الحيوان، عايش فى الغابة زى باقى الحيوانات اللى اصبحوا أهلك وكل اللى تعرفة. معرفتك بالكون المحيط، معرفة نقية مافيهاش تدخل بشرى، كبرت أمك الغزالة وضعفت، فى لحظة هتغمض عينها وتنام لكنها مش هتقوم تانى .. هتحاول تصحيها لكنها ما بتستجيبش، هتحاول تفتح عينيها لكنها جامده وما بتتحركش، شكلها سليم قدامك عقلك هيقودك ان سبب علتها بداخل جسمها، هتفكر لو شقيت صدرها ممكن تلاقى سبب العلة وتعالجها، هتشق صدر الغزالة فعلا هتشوف قلبها جامد ما بينبضش .. بعد محاولات كتير هتكتشف ان مافيش فايدة .. هتكتشف ان الجسم ده مجرد وسيلة لكن الشخص نفسة شئ تانى من ماده تانية بيستخدم الجسم كوسيلة عبور فى العالم ده، هيزيد يقينك ان امك الغزالة رحلت عن جسمها الى الابد واصبحت دلوقتى وحيد!

EP05: The Battle of Reason and Experience معركة المنطق والتجربة

تخيل نفسك رجعت فى الزمن للقرن ال17 عصر النهضة الاوروبية، واقف فى قاعة كبيرة عن يمينك مجموعة من الرجال الاوربيين ملامحهم هادية ومألوفة لك .. ديكارت، سبينوزا، و ليبنز وعلى شمالك مجموعة من الرجال الانجليز بملامح باردة هما جون لوك، بيركيلى، وديفيد هيوم! ديكارت منخرط فى شرح ان ازاى حواسنا مليانة بالمشاكل وان المعرفة اللى بتوصلنا عن طريقها مانقدرش نعتمد عليها كمصدر للمعرفة الحق، ديكارت قال: يا جماعة افهمونى يعنى مثلا لو دورتوا حواليكوا فى الكون عن نموذج المثلث المثالى مش هتلاقى ولا مثال واحد حتى الهرم الاكبر فى مصر، لو امعنتوا النظر فى اى مثلث حواليكوا هتكتشفوا فى النهاية ان اضلاعة مش منتظمة .. وبالرغم من كده كلنا عارفين ان فى مثلث مثالى كل اضلاعة منتظمة! سبينوزا هيدعمة ويقول: بالظبط، فكرة المثلث الكامل هى الفكرة الحقيقة المجردة اللى منها بنتعرف على كل اشكال المثلثات الغير كاملة فى العالم اللى حوالينا!

لوك هيرد: وازاى نقدر نوصل للافكار المجردة دى؟ اذا كان ديكارت مش عاوزنا نعتمد على حواسنا

ديكارت: الافكار دى فطرية، موجودة معانا من لحظة ميلادنا .. وهى الاساس لكل المعرفة اللى بنكتسبها بعد كدة فى الحياة

هيوم: كلام مش منطقى .. تقدروا تحصرو لنا الافكار المنطقية دى .. طالما انتم متأكدين منها

EP04: Cogito الأنا

Cogito ergo sum أنا أفكر، أذن أنا موجود

تخيل أنك برنامج كمبيوتر برمجة فريق من المهندسين المحترفين، هدف الفريق كان انه يصنع أول برنامج محاكاه للعقل البشرى علشان يساعدهم فى تصنيع برامج تانية لحل مشاكل فى الواقع عجز العقل البشرى عن حلها! قدرات الفص الشمال من المخ كانت مهمة سهلة للفريق … القدرات الحسابية، والمنطقية اللى حطوها فيك علشان تحاكى عمليات الفص الشمال من المخ كانت أسرع و أفضل من قدرات العقل البشرى .. قدرات الفص اليمين كانت هى التحدى بالنسبة لهم .. ازاى يقدروا يخلوا البرنامج قادر على الاحساس بوجوده ووجود عالم محيط، ويمكن الاصعب من ده قدرات التعلم الذاتى اللى بيمتاز بها العقل البشرى! الفريق نجح فى مهمتة وأصبحت أنت أول برنامج كمبيوتر عندة القدرة على الاحساس وتعليم نفسه بنفسة! الفريق كان حريص انه يحط أمر تدمير ذاتى فى البرنامج لو البرنامج خرج عن السيطرة كنوع من الحماية.

EP03: The Veil of Perception حجاب الأدراك

تخيل انك رحالة مع فريق سفاري فى الصحرا .. الاكل والشرب اللى معاكوا خلص وبقالكوا ساعات تايهين من غير وجهه .. أنت قائد المجموعة و فجأة شفت واحة خضره وبحيرة علي بعد النظر، كل اللى عقلك كان بيفكر فيه ان وصلكوا للواحة دى هو الامل الباقى لانقاذ حياتكم قبل ما تموتوا كلكوا من العطش.. هتحاول تلفت نظر باقى الفريق للواحة البعيدة، مجموعة منهم هتشوف الواحة لكن الباقى مش شايفنها .. هتصمم انت والمجموعة الللى شافت الواحة ان الواحة موجودة على بعد البصر وان باقى الناس مرهقة ومش قادرة تشوف كويس .. المجموعة اللى مش شايفة الواحة مصممة ان مافيش واحة على بعد النظر وان ده مجرد سراب .. ومش هيرحوا معاكوا علشان ما يستنفذوش طاقتهم اللى باقية .. جواك خوف من المخاطرة بحياتك وحياتك زمايلك ويكون فعلا سراب .. لكنكوا هتقرروا تفترقوا وهتروح انت ومجموعتك فى اتجاة الواحة … هتجروا مسافة طويلة فى اتجاة الواحة اللى معالمها بتظر بوضوح اكتر كل ما تقربوا منها .. باقى زمايلك فرحانين انهم اخيرا هيلاقوا حاجة ياكلوها وميه بشربوها .. أول ماتوصلوا عند مكان الواحة هتكتشفوا ان الواحة والبحيرة مالهاش اى وجود وكانت فعلا مجرد سراب .. لكن للأسف قواكم منهكة بعد ما جريتوا المسافة الطويلة دى ومش قادرين تتحركوا، هلاككم اصبح واقع .. زمايلك هيلوموك انت السبب فى النهاية المأسوية ليهم .. هتدافع عن نفسك، لكن من جواك .. انت عارف انك السبب فى الازمة .. بس المشكلة انك متأكد أنك شفت الواحة زى ما انت شايف زمايلك دلوقتى!

EP02: كهف أفلاطون Plato’s Cave

تخيل أنك أسيرمن لحظة ميلادك، مسجون طول حياتك فى كهف ضلمة! أيدك ، رجيلك وراسك متقيدين بحيث انك ماتقدرش تبص غير على الحيطة اللى قدامك. وراك شعلة نار، وبينك وبين النار طريق بيمشي فيه السجانين الللي مقيدينك أنت وباقى زمايلك المساجين، السجانين بيعدوا وراكوا وهما شايلين تماثيل لحيوانات، نباتات، وحاجات تانية بتشوفوا خيالتها المنعكسة على الحيطة اللى قدامكوا.. الخيالات دى هي كل شئ شفتوة وعرفتوة خلال حياتكوا، هي تقريبا حصيلة المعرفة اللى كونتها انت والمساجين التانيين طول العمر ما تعرفوش ومابتتكلموش اوحتى تفكروا فى اى حاجة غيرها!

دلوقتى تخيل أن السجان فك قيودك واطلق سراحك حر طليق، تقدر تمشى في الكهف وتكتشف جوانبة. فى البداية شعلة النار هتزغلل عينيك اللى متعودة على انعكاس الضوء ومش متعودة على ضوء الشعلة الشديد! مش بعيد ترجع تانى تقعد جنب زمايلك قدام الحيطة … بس شوية بشوية هتبدأ تشوف أفضل وهتفهم الموقف داخل الكهف، دلوقتى هتقدر تفهم الخيالات اللي كنت بتشوفها على الحيطة أنت وزمايلك المساجين وكنتوا فاكرينها واقع مصدرها ايه. بعد شوية رجلك هتاخدك خارج الكهف للعالم الخارجي وضوء الشمس، وهتشوف حقيقة الاشياء كاملة وظاهرة تحت ضوء الشمس الباهر فى السما!

EP01: مخ فى وعاء Brain in a Vat

مخ فى وعاء

تخيل أنك تعرضت لعملية جراحية، بيعملهالك عالم شرير قرر أنه يفصل مخك عن جسمك و يخزنه فى وعاء طافي على سوائل مغذية لخلايا المخ وفيتامينات علشان تحافظ على حيويتة.

أطراف الخلايا العصبية فى مخك هتتوصل بكمبيوتر عملاق Super Computer هيمد المخ بموجات كهربائيه ونبضات الكترونية مشابهة للموجات الطبيعية اللى بيفرزها جهازك العصبي فى الاحوال الطبيعية. الكمبيوتر العملاق وظيفتة تكوين عالم أفتراضى محاكى للواقع، هيوهم مخك اللى فى الوعاء إن كل شئ طبيعى فى العالم الافترضى ده زى الواقع بالظبط .. هيبقى فى ناس، طرق، مبانى، سما، أرض، مشاعر، و أفكار! بس فى الحقيقة التجربة اللى مخك بيعشها مجرد موجات ألكترونية الكمبيوتر بيبعتها عن طريق الاعصاب المتوصلة بيه!

كابوس، زي أفلام الخيال العلمي .. مخك بدل ما هيكون فى جمجتك، هيكون طافي فوق سوائل فى واعاء فى معمل العالم الشرير، لكن كل مشاعرك، خبراتك، تجرابك حقيقية تمام زى ما تكون عشتها في الواقع فى حين أن اللى انت شايفه، حاسه، شامه، بتفكر فيه مجرد وهمّ، مجرد محاكاة للواقع