Book: The Concept of Mind by Gilbert Ryle 1949 مفهوم العقل لجيلبرت رايل

مفهوم العقل هو كتاب للفيلسوف جيلبرت رايل أصدرة سنة 1949
واللى بينظر إليه باعتباره وثيقة مؤسسة في فلسفة العقل
فلسفة العقل ما حصلتش على الاعتراف المهني كفرع متميز
ومهم فى الفلسفة إلا بعد سنة 1950 . الكتاب بيجادل  أن “العقل” هو
“وهم فلسفي مبنى اساسا على أفكار ديكارت المثنوية و مدعوم بالأخطاء
المنطقية والتصنيفية اللى أصبحت اعتيادية عند الناس”.
الكتاب عادة ما بيستشهد بيه كالعمل اللى وضع المسمار الأخير في
نعش الثنائية أو المثنوية الديكارتية

Wikipedia
http://en.wikipedia.org/wiki/The_Concept_of_Mind
!تخيل صفحة الكتاب على ويكيبيديا مش موجودة باللغة العربية
أبدأ بحاجة بسيطة مفيدة وحاول تترجم الصفحة للعربى

The Book

https://archive.org/details/conceptofmind032022mbp

Book Review

http://www.scientificamerican.com/article/mind-reviews-touching-nerve/

EP08: The Mind-Body Problem أشكالية العقل و الجسد

Episode 08 + ECN (Egypt Cancer Network) Ad

تخيل أنك مريض نفسى مصاب بعقدة نفسية من الطفولة … بالرغم من كونك شخص عبقرى فى الكمبيوتر وتكنولوجيا المعلومات عقدك النفسية هتستولى عليك وتحولك لسفاح محترف .. سفاح من نوع خاص، بيتستخدم عقلة فى تحقيق نزعاتة المجنونة وافكارة المريضة .. هتبتدع اسلوب جديد فى اختيار ضحياك، هتختار ضحية وتسرق اجندة التليفونات بتعاعتها .. وتبدأ بقتل الاسماء اللى فى الاجندة بالترتيب الابجدى! .. لحد ماتوصل للضحية صاحبة الاجندة، وتخلص عليها .. اسلوب مبتكر ماحدش ابتكرة غيرك فى اختيار ضحاياة .. هيرضى غرورك و يشبع رغباتك! المرة دة معاك اجندة تليفونات سابتها واحده كانت فى زيارة لمحل الكمبيوتر اللى بتستغل فيه امبارح .. هتنسخ قائمة الاسماء وتبدأ من الاول .. الساعة واحدة بعد نص الليل والمطر شديد .. لكنك لازم تقتل الضحية الاولى النهاردة! لازم تلتزم بجدول المواعيد اللى انت محددة بكل دقة! بتسوق بسرعة زى المحنون على الطريق السريع عاوز توصل لهدفك الاول قبل ما يبقى فى حد معاة فى البيت .. مساحات الازاز بتتحرك بحنون قدامك مش شايف كويس الطريق .. اضواء باهتة فى العتمة والضلمة .. فجأة هتظهر المقطور الضخمة قدامك من العدم .. هتحاول تفاديها لكن سرعة القرار خانتك المرة دى! هتخبطك القطورة من الجنب قبل ما العربية تنحرف بعنف على الطريق وتبدأ فى عدمية من الانقلاب … حاسس بالدم طعمة مالح فى بقك وعضمك بينسحق بين كتلة الحديد .. العربية سابت الطريق السريع وانقلبت من على الكوبرى .. حاسس بهبوط لانهائى، قبل الاصطدام الاخير .. والصمت والسكوت يلمى المكان!

EP07: Tripartite Theory of Knowledge نظرية المعرفة الثلاثية

Episode 07 + ECN (Egypt Cancer Network) Ad

ملحوظة: محتوى الحلقة دى دسم جدا، ننصح بالاستماع عدة مرات .. او وقف الحلقة بعد عرض كل فكرة وحاول تهضم الافكار الجديدة!

تخيل انك بتجرى فى غيطان الدرة بعد ماقتلت علون اللى قتل ابوك من سنين، أخدت بتارك وتار أمك ودلوقتى هتقدر تمشى فى وسط الناس وانت رافع راسك .. ماحدش هيقدر يقولك يا ولد بعد كده بقيت راجل، امك خلاص هتقلع السواد و يرد نور وشها اللى انطفى من بعد موت ابوك، هتجرى على الترعة الغربية هتعدى المشاية للبر الغربى نفسك اتقطع بقالك كتير بتجرى نفسك فى جرعة مية تسقى رقيك .. هانت لما تخلص من البندقية الاول هتشرب وترتاح .. هتوصل للساقية المهجورة هتقلع جلابيتك اللى الدم مغرقها، عليوة روحة ماطلعتش بالساهل، هتنزل فى بطن الساقية قلبك ميت مش همك الحية ولا العقارب هتحفر فى الارض اللى تحت الماية الراكده، الريحة عطنة مافيش بنى ادم نزل هنا من زمان .. بتفكر ياترى حمدان وسمعان ولاد علون هيعموا ايه لما يعرفوا انك قتلت ابوهم، بس انت ما قتلتوش انت اخدت تارك ومسحت عاركوا .. سمعان ما يتخافش منه ده لسه عيل ابن امبارح، حمدان هو اللى لازم تعمل حسابة وتفتح عينك علية كويس!

EP06: Knowledge in Islamic Philosophy المعرفة فى الفلسفة الاسلامية

تخيل انك طفل رضيع عمرة ايام، والدتك واقفة بتبكى وهى بتودعك بنظراتها بعد ماحطتك فى سلة طافية فى البحر! بصلها كويس لان دى هتكون أخر مرة تشوفها .. هترسى السلة بيك على شط جزيرة مهجورة ما خطتهاش رجل بشر قبل كده، الجوع هيخليك تبكى قبل ما غزالة فى الغابة تسمع صوت بكائك فتظن انك ابنها التايه،هترضعك وتشربك وتعتنى بيك، هتبقى ابنها الغريب من اللحظة دى. عمرك دلوقتى 10 سنين ما تعرفش غير لغة الحيوان، عايش فى الغابة زى باقى الحيوانات اللى اصبحوا أهلك وكل اللى تعرفة. معرفتك بالكون المحيط، معرفة نقية مافيهاش تدخل بشرى، كبرت أمك الغزالة وضعفت، فى لحظة هتغمض عينها وتنام لكنها مش هتقوم تانى .. هتحاول تصحيها لكنها ما بتستجيبش، هتحاول تفتح عينيها لكنها جامده وما بتتحركش، شكلها سليم قدامك عقلك هيقودك ان سبب علتها بداخل جسمها، هتفكر لو شقيت صدرها ممكن تلاقى سبب العلة وتعالجها، هتشق صدر الغزالة فعلا هتشوف قلبها جامد ما بينبضش .. بعد محاولات كتير هتكتشف ان مافيش فايدة .. هتكتشف ان الجسم ده مجرد وسيلة لكن الشخص نفسة شئ تانى من ماده تانية بيستخدم الجسم كوسيلة عبور فى العالم ده، هيزيد يقينك ان امك الغزالة رحلت عن جسمها الى الابد واصبحت دلوقتى وحيد!