EP15: The Intrinsic Value القيمة الجوهرية

Episode 15 + ECN (Egypt Cancer Network) Ad

تخيل أنك مندوب شركة سيارات وظيفتك انك تقيم الحوادث اللى بتحصل للعربيات اللى بتنتجها شركتك وتحدد الخطأ من الشركة ولا العميل، انت شخص مريض بالارق ..بتنام ساعات معدودة فى الاسبوع ، الدكتور بتاعك مش هيوافق يديك أدوية لانه شايف انها هتضرك، هينصحك تزور جمعيات مرضى السرطان عشان تشوف الالم الحقيقى! هتبدأ تحضر جلسات جميعة مرضى سرطان الخصية بعد ما تدعى انك مريض زيهم، هتحس بشعور غير عادى من الراحة بعد ما تحضر الجلسة دى، ولأول مرة من شهور هتنام طول الليل من غير اى ارق! أصبحت مدمن لجمعيات المرضى من كل شكل ولون، هناك بتشوف المعاناة البشرية من غير حجاب، والبشر حقيقين من غير زيف ولا خداع، هتصبح دى جنتك، العلاج اللى كنت محتاجة عشان تخرج شحنة العواطف المريضة اللى جواك! لحد ما هتظهر مارلا فى الصورة، هتكتشف ان هى كمان زيك مش مريضة بتدعى المرض عشان تحضر جلسات المرضى، كذبتها كشفت كذبتك، وراحت راحة البال ورجع الارق من جديد. فلسفة مارلا في الحياة هي أنها . من الممكن أن تموت في أي لحظة،المأساة ،زى  ما بتقول هي .. أنها ماماتتش!

Fight-Club-Brad-Pitt

فى ليلة بعد رجوعك من رحلة عمل، هتكتشف ان شقتك دمرها انفجار عنيف، وماعندكش اى مكان تلجألة غير شخص اتعرفت علية فى الطيارة، تيلر ديردن .. مندوب بيعات صابون .. شخصية غريبة لكنها جذبت اهتمامك واصبح هو الملاز الوحيد لك فى الازمة دى .. هيوافق انك تقعد معاة فى بيتة لحد ماتدبر امورك .. لكن هيطلب منك انك تضربة بعزم قوتك، مذهول من جنونة لكنك مضطر توافق، هتلكمة فى وشة، وتبدأ بينكوا خناقة هتكون هى نواة الصداقة المصيرية اللى بتتولد! هتصبح هى دى هوايتكم بعد ماتنقل فى بيتة، بالليل تبدأ مصارعة بالايد مع بعض لحد ما تنهك قواكم، هيتلم حواليكوا مجموعة من الناس معجبين بفكرتكم، فى بدروم البار اللى بتتقاتلوا قدامة كل يوم هتبدأوا نادى القتال! القاعدة الاولى لنادى القتال “ماتتكلمش عن نادى القتال” .. عدد الاعضاء بيزيد كل يوم عن التانى، الناس لقيت حاجة صادقة وحقيقة فى نشاطكم، لقيت غاية وهدف لحياتهم. نوادى القتال بتنتشر بسرعة مخيفة من مدينة لمدينة، ما بقتش عارف انت ولا تيلور اللى بيأسسها، تيلور هو القائد الملهم هيحول نادى القتال لمشروع جديد مخيف .. مشروع ضد المادية، ضد استغلال الشركات ، او زى ما تيلور سماة “مشروع مايهم” .. جيش من العمال، والموظفين بدأوا يتوافدوا على بيتك انت وتايلور، عايشين معاكوا تحت تصرف تايلور وكأنهم مبرمجين، تايلور بيخطب فيهم ” أمن مش وظيفتك، انت مش فلوسك اللى فى البنك، انت مش عربيتك، أنت مش بدلتك، انت زبالو العالم كلة بترقص وتغنى! ” .. هيدأ تايلور مع اتباعة يحقق اهداف مشروع مايهم، تدمير محلات، تخريب عربيات، فوضى منظمة بيخططها تايلور وينفزها اتباعة المنشرين فى كل جزء من المدينة! هتحاول تتدخل عشان توقف الفوضى، لكن تايلور هيمنعك، هيقولك “ليه فاكر ان عندك سيطرة على اى حاجة، ليه دايما فاكر انك بتقود حياتك، ليه فاكر ان فى قيمة اول هدف من حياتك، انت مجرد واحد من جيل كامل شغال فى بنزيمات الجاز، والمطاعم، عبيد بقمصان، بنجرى ورا الهدوم، والاكل، بنشتغل فى وظايف بنكرهها، عشان نشترى حاجات مش عاوزينها، احنا ولاد التاريخ المغضوب عليهم، ماعندناش هدف، مالناش مكان، حرر نفسك من الامل، اكسر قيود المنطق، احنا عبيد القيم ,, من عدم لعدم” .. الامور بتتطور بأسرع من قدرتك على السيطرة، واحد من اتباعكم هيتقتل فى عملية، بعدها تايلور هيختفى، هتسافر فى كل مدينة انت عارف  ان فيها نادى قتال، مالوش اى اثر، الغريب ان كل اتباعكم بيتعاملوا معاك على انك تايلور، على حافة الجنون بتدور فى كل مكان وفى كل ورقة على اى اثر لتايلور لحد هتكتشف الحقيقة الصادمة، انت وتايلور شخص واحد!! هتدور على فى كل الاوراق هتكتشف ان العملية الاخيرة لمشروع مياهم هى تدمير كل المبانى والمؤسسات النقدية والشركات الكبيرة فى كل مدينة، فى صراع اخير بينك وبين تايلور ديردين، او بينك وبين نفسك هتحاول توقف مخطط الفوضى الاخير .. تايلور شاف الحياة عدمية من غير هدف ولا قيمة، بالرغم ان انت نفسك تايلور ومؤمن بنفس منطق العدمية الا انك مازالت بتقاوم .. ياترى هتستسلم لتايلور والعدم، ولا هتتمسك بقيمة واحدة على الاقل؟

فلسفة الأخلاق Ethical Philosophy أو أحيانا بيطلق عليها Ethics منقسمة لفرعين أساسيين النظرية الاخلاقية Ethical Theory  الاخلاق التطبيقية Applied Ethics. فى النظرية الاخلاقية الفلاسفة بيسألو أسئلة عن طبيعة الأخلاق بشكل مستقل عن القضايا الاخلاقية نفسها. تقدر تفكرفى النظريات الاخلاقية زى النظريات العلمية من حيث انها بتقدم أفضل طرح يفسر ظواهر معينة بناء على البيانات والمعطيات الموجودة. المواضيع اللى عادة ما بيناقشها الفلاسفة فى النظرية الاخلاقية بتنقسم مابين ثلاث أقسام .. نظرية القيمة  Value Theory، ماوراء الاخلاق أو أحيانا بنسميها الأخلاق الوصفية Meta-Ethics، الأخلاق المعيارية Normative Ethics . فى نظرية القيمة زى ما الاسم بيوحى الفلاسفة بيحاولوا يفهموا طبيعة القيمة ..  وبيسألوا اسئلة عن ايه الاشياء اللى المفروض يكون ليها قيمة؟  بما ان القيم الاساسية والجوهرية اللى بنعتقد فيها هى اللى فى النهاية بتحدد القرارات والاختيارات الاخلاقية اللى بناخدها فى حياتنا. من هنا نظرية القيمة بتحاول تجاوب على سؤال ايه اللى المفروض نحط قيمة له؟ وايه هى القيم الحميدة؟ .. وهل القيم دى حميدة بمعنى موضوعى Objective مستقل عن توابعها ولا ذاتية Subjective لان الغالبية بتفضلها .. ويمكن السؤال الاهم اللى نظرية القيمة بتدرسة هو ايه هى طبيعة الصالح أو الخير Goodness؟ الأخلاق المعيارية بتحاول تجاوب على سؤال الحد او المعيار .. ايه اللى بيخلى فعل ما صح او حق بشكل عام؟ ..بمعنى ايه الاسباب والمبررات اللى بتخلى فعل ما أخلاقى؟ .. افعالنا لابد وانها تكون محكومة بمجموعة من المعايير الاخلاقية، اللى بتحدد اذا كان الفعل واجب، جائز، او غير جائز. المعايير دى Norms هى اللى بتحاول نظرية الاخلاق المعيارية انها تحددها وتحدد ايه منها واجب او ضرورى، يعنى على سبيل المثال واحدة من نظريات الاخلاق المعيارية بتقول ان الفعل واجب اخلاقيا لو كانت تبعياتة هتعظم من قيمة السعادة لأكبرعدد ممكن من الناس، بغض النظر عن نوع او طبيعة الفعل او ازاى بيتم. نظرية تانية مضادة بتقول ان الفعل بيكون واجب اخلاقيا اذا كان متسق مع قواعد المسئولية الاخلاقية بتاعة الفرد بغض النظر عن تبعياتة .. هنتكلم بالتفصيل عن الأخلاق المعيارية فى المستقبل. ماوراء الاخلاق أو Meta-Ethics بتدرس طبيعة الحقايق، المعتقدات، والاحكام الاخلاقية، كلمة Meta فى اللغة اليونانية معناها “فيما وراء او ما بعد” .. بشكل مبسط معناها “عن” فلما بنقول ماوراء الطبيعية Meta-Physics بنقصد الفرع من الفلسفة اللى بيدرس طبيعية الطبيعة، او معنى الوجود والطبيعة نفسها .. نفس الفكرة بالنسبة لل Meta-Ethics هو الفرع اللى بيحاول يدرس طبيعة الاخلاق، فبتطرح اسئلة معرفية واخلاقية عن الاخلاق نفسها .. يعنى على سبيل المثال واحد من المواضيع المطروحة فى فلسفة ماوراء الاخلاق هو طبيعة الحقايق الاخلاقية .. علشان ناخد اى قرار اخلاقى غالبا ما بنعتمد على حقيقة أخلاقية Ethical Fact ندعم بيها قرارنا .. فى ماوراء الاخلاق بندرس ايه هى طبيعة الحقايق الاخلاقية دى؟ وازاى نقدر نحددها ونعرفها؟ .. الفرع التانى من فلسفة الأخلاق هو الاخلاق التطبيقية واللى الفلاسفة بيحاولوا يطبقوا فيها النظريات الاخلاقية على مواضيع وقضايا أخلاقية ملموسة فى حياتنا اليومية  ومحل خلاف او جدال مجتمعى زى مثلا أشكالية الاجهاض  Abortion، او القتل الرحيم Euthanasia فى الحالات المرضية الميئوس منها، او الحرب War .. هنقاش مجموعة من القضايا الشائكة اللى فلاسفة الأخلاق التطبيقية مازلوا بيجادلوا فيها لحد دلوقتى فى أخر مجموعة حلقات فى سلسلة الاخلاق.

ethics

يمكن واحد من أهم الاسئلة اللى اى انسان محتاج يسألة لنفسة فى لحظة ما فى حياتة هو .. ايه هو الشئ اللى له أعلى قيمة واللى لابد اننا نسعى وراة فى الحياة؟ .. يمكن تكون سمعت الجملة المشهورة المنسوبة لسقراط “الحياة الغير مدروسة لا تستحق ان تحيا” The Unexamined life is not worth living واللى بتوضح اد ايه كبيرة القيمة اللى بتحطها الفلسفة على المعرفة فى حياتنا .. نظرية القيمة Value Theory  واحدة من اهم واكتر فروع الفلسفة اللى بيبان فيها بقوه اهمية الفلسفة بشكل عام وليه دراسة الفلسفة مهمة، لانها بتدرس واحد من المبادئ الاساسية فى حياة الانسان، وهى القيمة. الهدف من دراسة الفلسفة مش بس ايه اللى نعرفة، لكن الاهم ازاى نعرفة .. الفلسفة بتبنى المنهج الفكرى للفرد، اللى بيحدد ازاى كل واحد مننا بيفكر فى قضية ما. والقيمة فكرة أساسية فى قلب المنهج الفكرى للأنسان.

agile-intrinsic-value-solutionsiq

نظرية القيمة Value Theory، اى نظرية بتحاول تقدم افضل تفسير لظاهرة معينة باستخدام كل المعلومات المتاحة عنها .. فى نظرية القيمة الظاهرة هى الحاجات اللى احنا عاوزينها، والنظرية بتحاول تفسر ليه أحنا عاوزين الحاجات دى. النظريات العلمية كل ما كانت بسيطة كل ما كانت أفضل واقدر على تفسير الظاهرة لانها عادة ما بتقدم تفسير لمجموعة ظواهر كبيرة باستخدام موارد نظرية قليلة ودة الاساس اللى بيشتغل علية فلاسفة نظرية القيمة .. بيحاولوا يلاقوا قيمة واحدة جوهرية واساسية بيتفق على السعى وراها كل البشر، وفوقها بيبنوا باقى القيم ومن هنا نقدر نفهم منظومة القيم البشرية، واهميتها وعلاقتها بالقيمة الجوهرية دى. وبالتبعية نقدر نفهم القرارات الاخلاقية اللى بناخدها فى حياتنا فى ضوء القيمة الجوهرية اللى بنسعى ليها. يعنى على سبيل المثال، فكر فى القرارات والافعال اللى بتاخدها او تعملها كل يوم فى حياتك، يعنى لو كنت طالب مثلا الاهمية الاولى فى يومك بتكون لمدرستك، دروسك، ومذاكرتك! الاهمية دى نابعة من المسار العام اللى انت رسمته لحياتك، يمكن تكون خطتك انك تدرس وتذاكر كويس عشان تروح جامعة كويسة وتدرس الطب مثلا، وتبقى دكتور كويس فى تخصصك، اللى هو تخصص فى اعتقادك انت بتفضلة وهيكون له دخل مادى كبير! الاسلوب ده فى التفكير بيربط القرارات اللى بتاخدها كل يوم بشكل لاارادى بخطة حياة عامة انت رسمتها لنفسك فى وقت ما، بناء على قيمة معينة! وهو ده السبب فى انك بتصحى كل يوم من النوم عشان تروح مدرستك او جامعتك.. كمان ممكن تسأل نفسك سؤال اعمق .. هو انا ليه عاوز وظيفة كويسة؟ هل ياترى عشان الفلوس؟ ولا فى شئ تانى له قيمة اكبر عاوز تحققة فى حياتك؟ بس الشئ التانى ده اللى له قيمة اكبر اكيد هينافس هدف جمع الفلوس! هل ياترى تقدر تسعى ورا القيمتين . .القيمة المادية، والقيمة التانية دى؟ هل القيميتن دول ممكن اختزالهم لقيمة تانية اكثر جوهرية؟

money-toilet-paper

هو دة الهدف من نظرية القيمة، انها تحدد اقل عدد ممكن من القيم الجوهرية الاساسية .. بشكل مثالى قيمة واحدة بس! بالشكل ده حاجات كتير ممكن تتفسر بأقل عدد من الافكار، والهدف مش اننا نعمل قايمة بالقيم دى، لكن فلاسفة نظرية القيمة عاوزين يفهموا ليه القيم دى اساسية.. وهل نقدر نبسطها لقيم اساسية جوهرية اقل تعقيدا؟ وده اللى هيوصلك فى الاخر انك لازم تختار بين القيم الجوهرية الاساسية دى، لانها قيم متنافسة فى الاساس. ماحدش مننا بيبدأ حياتة باختيار القيمة الاساسية والجوهرية ويشتق منها كل قرارتة واختياراتة! اللى بيحصل اننا لما بنبدأ نفكر فى الافكار دى عادة ما بيكون عندنا مجموعة من القيم اللى بنعيش حياتنا عليها، فى الاول المفروض نحاول نفهم القيم الموجودة عندنا دى واذا كانت بتتضارب مع بعضها ولا لأ، واذا كان من الممكن اننا نبسطها لقيمة او مجموعة قيم ابسط.

images

لما بناخد قرارات معينة او نسعى ورا اهداف صغيرة محددة للوصول لهدف اكبر اشمل واعم. فى الحالة دى شئ واحد (فعل يومى) بنسعى وراة عشان شئ تانى ( قيمة). لما بنختار اننا نعمل فعل محدد مش عشان المنفعة المباشرة اللى هناخدها منه بس لكن بناء على سبب مبدئى هيوصلنا لقيمة اكبر، نقدر نقول على الفعل ده سلعة وسيطة Instrumental Good .. واللى هى مفيدة مش عشان قيمتها لكن عشان القيمة المضافة للهدف الاكبر او القيمة الجوهرية اكبر من القيمة المباشرة للفعل نفسة. فكرة السلع الوسيطة بتفرض فكرة تانية اهم وهى بما ان فى اشياء او افعال وسيطة لابد وان يكون فى اشياء لها قيمة لذاتها مش وسيطة لاى شئ تانى والاشياء الجوهرية دى هى السبب فى ان فى قيم وسيطة عشان توصلنا ليها. فلاسفة نظرية القيمة بيسموا الحاجات اللى من النوع دى السلع الجوهرية Intrinsic Goods .. قبل ما أكمل كلامى عن نظرية القيمة عاوز انتهز الفرصة دى واوضح لك فكرة فلسفية مهمة. المصطلح اللى انا استخدمتة دولقتى جوهرى Intrinsic مصطلح مهم جدا فى الفلسفة وهتشوفة فى فى كتابات و مناقشات الفلاسفة عبر العصور، مضاد المصطلح ده هو الغير جوهرى Extrinsic .. فى الفلسفة عادة ما بيتكلم الفلاسفة عن الخواص الجوهرية والغير جوهرية للشئ .. لو شئ عندة خاصية غير جوهرية لازم يكون فى حاجة تانية خارجة عن الشئ دى تفسرالخاصية الغير جوهرية دى. يعنى مثلا قيمة الفلوس او النقود الورق اللى معاك .. قيمة غير جوهرية تماما، قيمة الفلوس جاية من الترتيب والاتفاق بين الدولة والمؤسسات النقدية زى البنوك والشركات وباقى افراد المجتمع. على النقيد لو شئ عندة خاصية جوهرية، مش محتاج ان يكون فى حاجة خارجة عنة تفسر الخاصية دى .. لو حتى اختفى الكون تماما وفضل بس الشئ ده هتكون الخاصية دى مازالت جوهرية! وهو دة نوع القيم اللى نظرية القيمة بتدور عليها، الاشياء اللى ليها قيمة لذاتها مش لشئ تانى .. وتصبح القيم دى هى جوهر او اساس القيم التانية كلها. على سبيل المثال فكر فى الاكل، معظمنا بيفكر فى الاكل كسلعة بشكل او باخر .. ياترى ايه هى قيمة الاكل؟ …. الاكل ممتع مافيش شك لذاتة، لكن مش ده السبب الاساسى اننا بناكل! الوظيفة الطبيعية للأكل على الاقل بيولوجيا انها تخلينا أحياء .. البقاء احياء ممكن تكون قيمة جوهرية او قيمة وسيطة لقيمة تانية جوهرية .. لو شفنا الاكل كقيمة وسيطة للوصول لقيمة اكثر جوهرية وهى البقاء احياء ساعتها هنشوف الاكل كوسيط لخدمة قيمة اكبر وساعتها مش هيكون الاكل قيمة جوهرية فى ذاتة. على النقيض تخيل لو كان الاكل واحدة من القيم الجوهرية، قيمة ذات منفعة لذاتها مش لشئ تانى مستقلة تماما عن قيمة البقاء احياء او اى قيمة تانية، هتلاقى نفسك بتاكل طول الوقت بغض النظر انت شبعان ولا لأ، لان قيمة الاكل اصبحت منفصلة عن استمرارية الحياة، واصبح له قيمة جوهرية بتسعى وراها لذاتها.

f65e09b5-a8fd-4c6d-8b3c-2f9a5abf3fef

القيمة النهائية Ultimate Value .. هى القيمة الجوهرية النهائية اللى هنوصلها من وجهة نظر Aristotle لو بدأنا من القيم الوسيطة وتتبعنا الاهداف اللى بتقود ليه القيم دى، اللى هتوصلنا لعدد اقل من  القيم اكثر جوهرية لكنها مازالت وسيطة وهكذا فى شكل هرمى لحد مانوصل لقيمة جوهرية لذاتها فى قمة الهرم. أرسطوطاليس فى كتابة الاهم والاشهر عن الاخلاق Nicomachean Ethics واللى لعب دور محورى فى صياغة نظرية الاخلاق الارسطوطالية واللى دونها ابنه Nicomachus عن مجموعة محاضرات له، فى العمل ده المكون من عشر اجزاء أرسطوطاليس هيجادل ان السعى المنهجى عن جوهر القيمة كافى لانه يقود لقيمة واحدة اساسية وجوهرية لذاتها. الجدلية الاستقرائية اللى طرحها بتقول

400px-Hector_Cassandra_Pomarici_Santomasi 500px-Aristotelis_De_Moribus_ad_Nicomachum

  1. لو كل شئ بنسعى وراة مجرد وسيط لشئ تانى، اذن هنكون فى حالة تراجع لانهائى infinite regress وكل رغباتنا هتصبح عديمة القيمة
  2.  بما ان مش كل رغباتناعديمة القيمة
  3. اذن حياتنا لابد وانها تكون موجهه لقيمة جوهرية Intrinsic good بنسعى ليها لذاتها.

الجدلية دى متسقة منطقيا، لكن ده مش كافى لانها تكون صحيحة، زى اى منطق استقرائى الفرضيات لازم تكون صحيحة عشان الاثبات يكون صحيح، الفرضية الاولى فى الحجة دى صحيحة ومانقدرش نجادل فيها، اما الفرضية التانية لو رفضناها يبقى بنحط نفسنا فى موقف صعب مع فلاسفة العدمية Nihilism

nihilism

 اللى بيجادلوا ان مافيش شئ جوهرى لذاتة او بمعنى تانى يستحق اننا نسعى له لمجرد ذاتة، وان الكون وكل مافيه بما فى ذلك وجودنا عديم القيمة وخالى من اى مضمون او معنى حقيقى. يمكن من أشهر انصار الفكرة العدمية كان الشاعر، الاديب، والفيلسوف العربى أبو العلاء المعرى فى العصر العباسى اللى كان مشهور بفلسفتة المثيرة للجدل ورفضة فكرة ان الاديان بشكل عام او الاسلام بشكل خاص بيمتلك الحقيقة، المعرى كان تشاؤمى النزعة فى مذهبة العدمى يمكن بسبب بداياتة القاسية، المعرى بيقول فى واحدة من قصائد الرثاء “خفف الوطء ما أظن أديم الأرض الا من هذه الأجساد”. المعرى مش اول ولا اخر العدمين اللى افكارهم كانت ومازالت مثيرة للجدل، صفحات التاريخ مليانة فلاسفة ومفكرين ارتبط اسمهم بالعدمية زى نيتشة وديستوفسكى. على اى حال أرسطوطاليس، مش هيقف عند الجدلية دى، كمان هيدعى ان مش بس احنا بنسعى ورا قيم جوهرية اساسية، لكن كل واحد مننا المفروض انه يكون عندة قيمة واحدة جوهرية بذاتها كاملة .. هيسميها القيمة النهائية، البديل ان الفرد هيكون عنده مجموعة من القيم الجوهرية النهائية المتعارضة مع بعضها، وماحدش يقدر يعيش بالشكل ده لان هيكون من الصعب تطوير وسيلة للأختيار بين القيم النهائية المتعارضة دى. فى أعتقاد أرسطوطاليس اى فرد عاوز يدرس طبيعة حياتة الاخلاقية مضطر انه يبص عليها بشكل عام شامل، واللى معناة انه هيوحد الاجزاء فى شئ واحد له معنى، ويبدو لأرسطاوطاليس انه من المستحيل انه الفرد يحقق ده من غير ما يستخدم مبدئ واحد لتفسير كل الاجزاء.وبالشكل ده ارسطوطاليس هيوصل بينا ان بمجرد اننا بدأنا نفكر فى القيم الجوهرية الاساسية فى حياتنا هنوصل لفكرة قيمة واحدة جوهرية بذاتها نهائية من خلالها نقدر نفسر كل شئ!

Unknown

بعد ما خدنا فكرة عن نظرية القيمة، وفهمنا الارضية اللى بيبنى عليها فلاسفة الاخلاق الاساس المعرفى او الابستمولوجى للأخلاق، نقدر دلوقتى نتكلم عن مجموعة من القيم المرشحة انها تحتل مرتبة القيمة النهائية الجوهرية لذاتها. وازاى  بيكونوا مبادئ تنظيمية للحياة بشكل عام، والاسباب اللى ورا اختيار قيمة معينة عن اخرى. يمكن القيمة اللى اتفق عليها معظم الفلاسفة كقيمة نهائية جوهرية لذاتها هى قيمة السعادة Happiness! قيمة بيسعى وراها الناس لذاتها مش لاى شئ تانى. السعادة هنا مش بس مقصود بيها التجربة الشخصية او الذاتية للسعادة Subjective بمعنى حالة السعادة مش بس معرفة بمجموعة محددة من المشاعر الايجابية اللى بيعشها الافراد فى لحظة ما، لكن كمان هى حالة موضوعية objective اللى فيها ممكن يكون الفرد بيعش تجربة مشاعر غيرايجابية لكنه مازال فى حالة من السعادة، فكر فى أسر وامهات الشهداء فى الحروب والمعارك بالرغم من التجربة القاسية والمشاعر السلبية اللى بيمروا بيها الا انهم فى حالة من السعادة فى كتير من الاحيان بنقدر نرصدها بوضوح فى تصرفاتهم وكلامهم.

elkordy

مذهب المتعة Hedonism هو الاتجاة الذاتى  subjectiveفى تفسير مفهوم السعادة، بشكل غير رسمى فلاسفة الحياة بيعرفوا مذهب المتعة على انه مذهب احادى النزعة فى البحث عن السعادة بيتحقق عن طريق السعى ورا اكبر، واكثر انواع واشكال المتعة المتاحة و اللى ليها عائد مباشر وكبيرعلى الانسان. لكن فلاسفة القيمة بيقصدوا حاجة مختلفة لما بيتكلموا عن مذهب المتعة، فى الواقع هما بيقولوا ان المقصود هو السعى وراء المتعة، لكن مش بالضرورة المتعة الحسية المباشرة او المتاحة، فى الواقع فلاسفة المتعة نفسهم ماكانوش ورا النوع ده من المتع لكنهم اشاروا ليها لاعتقادهم انها هتوصل للسعادة النهائية. على سبيل المثال الفيلوس الاغريقى أبيقور Epicurus مؤسس الفلسفة الابيقورية Epicureanism  كانت مدرستة بترسخ فكرة ان اللذة هى غاية الحياة، واللذة ممكن الوصل لها عن طريق الحواس سواء بالاكل والشرب او متع الحياة التانية .. لكن بالرغم من كده أبيقور نفسة كان شخص معتدل فى حياتة ولذاتة و ما سعاش ورا اللذات الحسية بالشكل ده، لكنه أعتقد ان اللذات الحسية بتؤدى لقمة المتعة. فى نفس الوقت أبيقور أعتقد ان اللذة العقلية بتسمو على اللذة الجسدية، لانها لذة دائمة مش مؤقتة زى اللذة الحسية، ويمكن فكرتة الاكثر شذوذا عن أفكار مذهب المتعة، هى ان قمة اللذة بتكون فى هدوء البال، وطمأنينة النفس واللى بتتحقق بالحد من الرغبات والاعتدال وعدم الاسراف فى اللذات الجسدية! فى نهاية الامر القيمة الجوهرية اللى بيعتبرها فلاسفة مذهب المتعة نهائية هى الفكرة الذاتية للحياة الهنيئة Subjective sense of Well-being، أبيقور كان من فلاسفة المتعة لأن أعتقد ان المشاعر الذاتية للحياة الهنيئة والمرفهة هى القيمة النهائية الجوهرية بذاتها، وأعتقد ان الاعتدال والمتع العقلية قيمة وسيطة هتوصلة فى النهاية لحياة الرفاهية.

Palace-of-hedonism-1

الاتجاة التانى فى تفسير مفهوم السعادة، هو اتجاة موضوعى Objective بدل الاتجاة الذاتى Subjective، فبدل ما يكون السعى ورا قمة اللذة وغاية التجربة الذاتية للمتعة، يكون السعى ورا حالة من الوجود فيها جودة الحياة فى افضل ما يكون بشكل موضوعى منفصل عن المشاعر والاحاسيس. الفيلسوف اليونانى أرسطوطاليس Aristotle كان أول من قدم مصطلح فلسفى للمعنى ده وهو الصلاح Eudaimonia .. مثال على قيمة صالحة الفرد يقدر يسعى وراها لذاتها كقيمة جوهرية نهائية بغض النظر عن مشاعره واحاسيسة  .. هى الفضيلة Virtue. المدرسة الفلسفية اليونانية الوراقية Stoicism اللى ظهرت فى القرن الرابع قبل الميلاد قدمت الفضيلة كقيمة نهائية جوهرية لذاتها. بالنسبة للرواقين من الجائز ان الانسان يكون فى قمة السعادة حتى وهو بيتعذب طالما ان السبب هو الفضيلة والنتيجة هى الثبات على المبدئ حتى لو كان التمن هو حياتة. لو كانت الفكرة دى تبدو متطرفة بعض الشئ بالنسبة لك فكر فى مذهب المتعة على الطرف التانى اللى بالنسبة لأتباعة الفضيلة ممكن تكون قيمة فى حالة واحدة بس .. وهى انها تكون بتوصل للذة والمتعة الاكبر، ولو كانت الرذيلة هتؤدى لمجمل من المتعة واللذة اكبر من الفضيلة هتصبح هى الهدف اللى بيسعى وراة فلاسفة المتعة! التطرف الشديد ده فى تحديد القيمة الجوهرية النهائية بيبين التناقض الشديد اللى بين فلاسفة المتعة و الرواقين فى تحديد القيمة النهائية.

JohnStuartMill

الفيلسوف الانجليزى صاحب التأثير الكبير فى فلسفة السياسة جون ستيوارت ميل John Stuart Mill فى القرن التاسع عشر فى كتابة الاشهر عن الحرية On Liberty جادل ان البشر بيدوا قيمة لأنهم يكونوا فى ” حالة جيدة” being good لانها بتخليهم “يشعروا بحالة جيدة” Feel Good، ولو ماكنوش بيحسوا بحالة جيدة مش هيحطوا اى قيمة بالمرة على فكرة انهم يكونوا فى حالة جيدة، بمعنى تانى المهم فى النهاية هو القيمة الحسية. هنا ميل بيحاول ينقد فكرة الصلاح اللى نادى بيها فلاسفة الرواقية من الاساس وبيأسس لمدرسة المنفعة  Utilitarianism الامتداد الطبيعى لمذهب المتعة واللى هنتكلم عنها فى حلقات جاية قريب. لكن فى الواقع التحدى الكبير اللى بيقابل فلاسفة مذهب المتعة هى فكرة بسيطة جدا طرحها الفيلسوف الامريكى المعاصر روس شافرلندو Russ Shafer-Landau سنة 2010 فى كتاب بعنوان أصول الأخلاق The Fundamentals of Ethics وهى اننا ممكن نتأذى عن طريق شئ بالرغم من اننا مش هنتألم ذاتيا منه. الجدلية اللى طرحها روس بتقول:

  1. لو مذهب المتعة صحيح، يبقى الشخص ممكن يتأذى عن طريق شئ فقط لو كان الشئ دة بيحزنة أو يألمة.
  2. الانسان ممكن يتأذى بطرق اخرى غير الطرق اللى بتحزنة او تألمة.
  3. اذن مذهب المتعة خاطئ

440px-Russ_shafer-landau the-fundamentals-of-ethics

مثال واضح على الجدلية دى لو ماكنتش قابلتة فى الحياة هتكون اكيد شفتة فى كتير من الدراما المصرية، كتير من الناس بيفضلوا انهم يعيشوا حياة غير اخلاقية، بالرغم من ان الناس دى بتعيش تجربة ذاتية من المتعة والسعادة لكنهم ما بيعيشوش حياة كويسة مبنية على قيمة جوهرية، فى حالتهم دى هما بيأذوا نفسهم من غير حتى ما يشعروا بدة. الفيلسوف الامريكى روبرت نوزياك Robert Nozick قدم تجربة عقلية سنة 1974 فى كتابة دولة الفوضى ، واليوتوبيا Anarchy State, and Utopia بعنوان آلة التجربة The Experience Machine فى تجربتة نوزياك حاول يضحد مذهب المتعة، جادل ان لو الفرضية الاساسية اللى مبنى عليها مذهب المتعة هى ان اللذة والمتعة هى القيمة النهائية الجوهرية لذاتها، اذن اى مكون فى الحياة مالوش تأثير مباشر على المتعة، هيكون مالوش تأثير مباشر على صالح الانسان Well Being. عن طريق تجربة ألة المتعة نوزياك هيحاول يثبت ان فى شئ تانى غير المتعة له قيمة جوهرية وبالتالى هيكون فى الصالح Well Being  بتاع البشر، وكده يكون اثبت ان مذهب المتعة خاطئ!

Anarchy,_State,_and_Utopia Robert_nozick

فى التجربة نوزياك هيفترض ان علماء النفس، المخ والاعصاب قدروا انهم يفهموا كل وصلات النيورون فى المخ وهيصنعوا اله هيوصلوها بمخك، الالة دى تقدر تحاكى اى تجربة متعة او لذة ممكن تتخيلها او تعيشها فى الحياة العادية .. بدقة عالية جدا لدرجة انك مش هتقدر تفرق بينها وبين تجربة المتعة الحقيقية! دلوقتى نوزياك بيسألك لو فى ايدك الاختيار .. هل تفضل توصل للمتعة عن طريق الالة ولا فى الحياة العادية؟!  .. فى أعتقاد نوزياك لو المتعة هى القيمة النهائية الجوهرية، الناس هيكون عندها مبرر كافى انها تفضل متوصلة بالة التجربة طول الوقت، لانها هتديهم الهدف النهائى اللى بيسعوا وراة! نوزياك هيجادل ان الانسان العادى هيختار انه يحصل على المتعة عن طريق معايشة الحياة وهيقدم أربع أسباب يدعم بيها المنطق ده .. اولا البشر بتخوض التجارب نفسها، قبل ما نستمتع بالتجارب .. ثانيا كل انسان عاوز يكون شخص معين بسمات  شخصية معينة .. ثالثا لو اخترنا نتوصل بالالة هنحجم خبراتنا للخبرات اللى برمجها صناع الالة، لكن فى الحياة الاحتمالات غير محدودة حتى للمتعة نفسها .. رابعا البشر مفطورين على ارادة تغير العالم من حواليهم واللى بيدفعهم لحب تجربة الحياة. زى ما انت اكيد ملاحظ الاسباب الاربعة اللى طرحها نوزياك مجرد فرضيات، الوقت مش هيسمحلى انى اخوض فى المنطق اللى حاول نوزياك يستخدمة لدعم الفرضيات دى، لو حابب تتعرف على منطق نوزياك اكتر أنصحك انك تقرا كتابة الاكثر من رائع .. على اى حال الاكتشافات العلمية الحديثة فى مجال علم الاعصاب Neuroscience  قدمت مادة أحيانا ما بتستخدم كجدلية مضادة لتجربة نوزياك .. مركز المتعة Pleasure Center مصطلح عادة ما بيطلقة علماء الاعصاب على المناطق المسؤولة عن الاحساس بالمتعة فى المخ، فى تجربة مشهورة العلماء وضعوا مجموعة من الفئران فى صندوق بعد مازرعوا فى مخهم قطب كهربائى Electrode فى منطقة مركز المتعة، القطب ده متوصل لاسلكيا بزرار لو اضغط عليه بينشط القطب الكهربائى اللى هينشط مركز المتعة ويسبب الاحساس بحالة من المتعة الجنسية عند الفار، فى نفس الصندوق فى زرار تانى لو ضغط علية الفار هينزلة اكل وماية .. الفار فى التجربة دى كل فترة زمنية قدامة يختار انه يضغط على زرار واحد بس، العلماء وجدوا ان الفار بيفضل يضغط على زرار المتعة وبيتجنب زرار الاكل لحد ما يموت من التعب والجوع. لو فكرت شوية فى نتيجة التجربة دى هتلاقى انها كل شئ جادل ضدة نوزياك، الكائن اللى عقلة ابسط من البشر بكتير لما اتحط على الة المتعة اختار انه يفضل متوصل بالالة لحد ما مات .. البعض هيجادل ان البشر عقلهم اكثر تعقيدا من الفار وعشان كده مش هيقعوا فى نفس الفخ، ياترى هل فعلا هى دى الحقيقة؟! ولا مخنا المعقد بيحاول يبعدنا عن الحقيقة المرة؟!  فى نهاية المطاف، مافيش اتنين هيختلفوا على ان فى قيمة للمتعة، وقيمة للفضيلة .. لكن الاختلاف هيكون اى قمية فيهم اولية، اساسية، وجوهرية لذاتها؟ أختيارك لواحدة من القيمتين كقيمة نهائية جوهرية لذاتها يكون له تبعيات على كل قرار صغير او كبير فى حياتك .. فخليك حريص فى أختيارك!

03 figure1 brain-reward stimulation Giraud therewardcicuit

القصة اللى بدأنها بيها مقتبسة عن الفيلم الامريكى الرائع نادى القتال Fight Club اللى أخرجة فى منتصف التسعينيات المخرج العبقرى ديفيد فنشر، الفيلم متاخد عن رواية بنفس الاسم للكاتب الامريكى الروسى المعاصر تشك بولانيك وترجمها للعربية الكاتب المصرى أحمد خالد توفيق .. أنصحك بمشاهدة العمل الفنى الاكثر من رائع لو ماكنتش اتفرجت عليه قبل كده، أو قراية الرواية و ترجمتها المشوقة فى اقرب فرصة. الرواية بتحتوى على قدر كبير من التمرد، الغضب، والفوضوية، وبتهاجم فكرة الملكية الفردية، والبرجوازية الرأسمالية، لكن فى الواقع الفيلم له ابعاد فلسفية اعمق من كدا بكتير، على سبيل المثال التضاد القائم بين المذهب العدمى و نظرية القيمة الجوهرية واضح بقوة فى النزاع الداخلى عند البطل المصاب بفصام الشخصية. واللى بيرصد الصراع الذاتى عند كل انسان بين القيمة والعدم!

fight-club-poster

ودلوقتى .. فكر انت صحيت ليه النهاردة من النوم؟ .. يا ترى عندك هدف اسمى بتسعى وراة فى حياتك؟ .. وهل الهدف ده مرتبط بقيمة جوهرية واحدة بتحكم كل قراراتك واختيارتك؟ … يمكن القيمة دى تكون المتعة؟ .. ولو كانت المتعة هى جوهر السعادة .. هل هتختار اقصر طريق يوصلك لأكبر قدر من المتعة بغض النظر عن التبعيات؟ .. أو يمكن تكون القيمة دى هى الفضيلة .. وساعتها هل هتكون مستعد انك تضحى بمتعتك ويمكن حتى حياتك نفسها فى سبيل مبادئك؟ .. فكر تانى

Download MP3: https://app.box.com/s/mnzp09ionsx2uixh8cl2

فى الحلقة الجاية .. هتكون واحد من طاقم رواد الفضاء اللى هيتم اختيارهم عشان يستكشفوا كوكب المريخ! كوكب صالح للحياة البشرية أصبح الامل بعد ما موارد الحياة بقت فى تناقص مستمر .. لكن الامل ده بقى على المحك، بعد ما هتصطدم المركبة الفضائية فى كوكيب عملاق .. والبقاء على قيد الحياة بقى هدف ذاتى لافراد الطاقم! .. عن الأيثار .. مذهب الفردية .. الانانية النفسية … و الانانية الاخلاقية .. وموضوعية أن راند .. هنتفلسف المرة الجاية

من دلوقتى للحلقة الجاية … عيش الحياة بفلسفة

: زود معلوماتك

نظرية القيمة Value Theory

http://en.wikipedia.org/wiki/Value_theory

فيما وراء الأخلاق Meta-Ethics

http://en.wikipedia.org/wiki/Meta-ethics

الأخلاق المعيارية Normative Ethics

http://en.wikipedia.org/wiki/Normative_ethics

الاخلاق التطبيقية Applied Ethics

http://en.wikipedia.org/wiki/Applied_ethics

القتل الرحيم Euthanasia

http://en.wikipedia.org/wiki/Euthanasia

أرسطوطاليس Aristotle

http://en.wikipedia.org/wiki/Aristotle

الأخلاق الارسطوطالية Aristotelian ethics

http://en.wikipedia.org/wiki/Aristotelian_ethics

الاخلاقالنيكومانية Nicomachean Ethics

http://en.wikipedia.org/wiki/Nicomachean_Ethics

فلسفة العدمية Nihilism

http://en.wikipedia.org/wiki/Nihilism

السعادة Happiness

http://en.wikipedia.org/wiki/Happiness

مذهب المتعة Hedonism

http://en.wikipedia.org/wiki/Hedonism

أبيقور Epicurus

http://en.wikipedia.org/wiki/Epicurus

الفلسفة الابيقورية Epicureanism 

http://en.wikipedia.org/wiki/Epicureanism

الصلاح Eudaimonia

http://en.wikipedia.org/wiki/Eudaimonia

الوراقية Stoicism

http://en.wikipedia.org/wiki/Stoicism

جون ستيوارت ميل John Stuart Mill

http://en.wikipedia.org/wiki/John_Stuart_Mill

روس شافرلندو Russ Shafer-Landau

http://en.wikipedia.org/wiki/Russ_Shafer-Landau

روبرت نوزياك Robert Nozick

http://en.wikipedia.org/wiki/Robert_Nozick

دولة الفوضى ، واليوتوبيا Anarchy State, and Utopia

http://en.wikipedia.org/wiki/Anarchy,_State,_and_Utopia

الة التجربة The Experience Machine

http://en.wikipedia.org/wiki/The_Experience_Machine

مركز المتعة Pleasure Center

http://en.wikipedia.org/wiki/Pleasure_center#Actions_and_rewards

نادى القتال Fight Club

http://en.wikipedia.org/wiki/Fight_Club

https://www.youtube.com/watch?v=SUXWAEX2jlg

2 thoughts on “EP15: The Intrinsic Value القيمة الجوهرية

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s