EP32: Modality: The Problem of Fictional Worlds المشروطية: إشكالية العوالم الخيالية

EP32: Modality: The Problem of Fictional Worlds المشروطية: إشكاليةالعوالم الخيالية

تخيلى انك طفلة صغيرة عايشة فى قرية بسيطة وسط الارياف  مع عمك وعمتك والكلب الصغير بتاعك توتو بعد ما توفى ابوك وامك. الحياة بسيطة وهادية بين الحقول، والمزارع، بتصحى الصبح وتجرى بسرعة انتى وتوتو على المزرعة علشان تساعدى عمك وعمتك فى شغل البيت، هتلاقيهم مشغولين جدا فى شغل المزرعة، هتخرجى انتى وتوتو من المزرعة، هتقضوا اليوم بتلعبوا وتجروا بين المزارع والحقول، هتشوفوا جارتكوا العجوزة اللى بتخوفك جدا جاية فى الطريق، الكلب بتاعك هينزعج جدا ويعضها فى رجلها، قبل ما تجرى انت وهو مرعوبين من الجارة العجوزة! جارتكوا العجوزة هتروح قسم الشرطة وتشتكى ان الكلب بتاعك عضها، وهتاخد تصريح انها يمسكوا الكلب ويعزلوة! هتاجى هى والمحضر على بيتك علشان ياخدوا توتو، هتخافى وتحاولى تستنجدى بعمك وعمتك لكنهم مش هيقدروا يعملوا حاجة لان الجارة معاها تصريح من البوليس، هياخدوا الكلب ويسبوكى وانت فى نوبة من البكاء حزينة على مصير الكلب بتاعك! لكن توتو زكى هيهرب منهم ويرجع بسرعة على البيت بالليل، لما هتشوفى توتو واقف على شباك الاوضة هتفرحى جدا وتقررى ان مصيرك اصبح من مصيرة وانكوا ما تقدروش تفضلوا هنا لان جارتكوا اكيد هترجع تانى علشان تقبض علية! هتتسحبى بالليل وتهربى انتى وتوتو من البيت، هتمشى بين الحقول من غير هدف او جهة، فى الطريق هيقابلك البروفيسور مارفل، اللى الساحر وعلامة الغيب، لما هيعرف انك هربانة من البيت هيصعب عليه اهلك لما يكتشفوا انك هربتى، هيخدعك و يوريكى فى كريستالة مدورة عمتك وهى مريضة وبتموت من ساعة لما عرفت انك هربتى، من قلقلك عليها هتقررى انك ترجعى البيت، لكن فى الطريق عاصفة كبير هتقوم، هتوصلى البيت والعاصفة بتشتد مش هتلاقى حد فى البيت، الرياح، البرق والرعد هيضرب البيت بعنف، شباك الاوضة هيقع على راسك، الدنيا بتلف قدام عينيكى، هتحسى بالبيت بتخلع من الارض والرياح بترفعة فى دوامة كبيرة فى السماء، هتسحبك انتى والبيت وتوتو قبل ما تدخلى فى غيبوبة، هتفوقى على البيت بيقع فى مكان عجيب ملاين باقزام لابسين كلهم شكل بعض، كلهم خايفين منك ومن شكلك الغريب، قبل ما هتظهر واحدة لابسة ابيض طايرة من السما على بساط وتنزل قدامك، هتعرفك بنفسها على انها جليندا ساحرة الشمال الطيبة، وهترحب بيك انت وتوتو فى مدينة الاقزام فى أرض أوز! هتقولك وصولك كان حدث سعيد لمدينة الاقزام لان البيت اللى انتى كنتى فية وقع على ساحرة الشمال الشريرة وقتلها وحرر الاقزام الطيبين من سطوتها، هتقوليلها ان ماكنش قصدك انك تموتى اى حد، فى اللحظة اللى هتهب عاصفة كبيرة وهتشوفوا واحدة طايرة على مقشة خشب بتضحك ضحكات شريرة قبل ما تنزل على الارض قدامكوا، كل الاقزام اترعبوا واستخبوا وراء ساحرة الشمال الطيبة، الست اللى شكلها مرعب ولابسة اسود فى اسود بتفكرك شكلها قريب جدا من جارتكوا العجوزة اللى كانت عاوزة تحبس توتو، هتقول “انا ساحرة الغرب الشريرة، مين اللى قتل اختى ساحرة الشمال؟ .. انتى اللى وقعتى البيت عليها .. اتكلمى؟” هتخافى وتستخبى وراء ساحرة الشمال الطيبة، اللى هتقول لساحرة الغرب الشريرة “مالكيش دعوة بيها هيا مالهاش زنب فى موت أختك” .. ساحرة الغرب الشريرة هتقول ان الجزمة السحرية اللى فى رجل اختها ملكها وانها كل اللى فاضل لها من اختها، قبل ما تاخد الجزمة، الساحرة الطيبة هتنقلها لرجليكى، وتقول لها مش هتقدرى تاخدى الجزمة منها طول ما هى عايشة! الساحرة الشريرة هتركب المقشة السحرية بتاعتها وتتوعدك بالانتقام لمقتل أختها، قبل ما تطير فى السماء وضحكتها الشريرة بتتردد فى كل مكان! الساحرة الطيبة هتنصحك انك تمشى فى الطريق الاصفر اللى هيوصلك لمدينة الزمرد، فيها هتقابلة الساحر أوز اللى هيرجعك بيتك تانى انتى و توتو!

فى الطريق الاصفر لمدينة الزمرد هتوصلى لمفترق طرق مابين الحقول، واقف قدامة خيال مقاتة من القش! هتقفى انتى وتوتو حيرانى فى وسط المفترق مش عارفة تروحى شمال ولايمين، هتسمعى صوت بيقول الطريق من اليمين، هتتلفتى حواليكى بتدورى على مصدر الصوت مش عارفة جاى منين، هتسمع الصوت تانى بيقول او ممكن يكون من الشمال، هتقولى مين اللى بيتكلم؟ توتو هيجرى ناحية خيال المقاتة ويهوهو، قبل ما خيال المقاتة يتحرك ويرد عليك، انا اللى بتكلم، هستغربى جدا ازاى خيال مقاتة من القش بيتكلم، هيقولك انه يقدر يتكلم لكن ماعندوش عقل، هتقوليلة ازاى من الممكن ان يتكلم من غير عقل، هيقول لك مش عارف بس فى ناس بتتكلم كتير من غير عقل، هتعرضى عليه يجى معاكى لمدينة الزمرد ويقابل الساحر أوز يمكن يقدرة يديلة عقل! … هتكملوا رحلتكوا سوا بتغنوا وتجرا فى الطريق الاصفر بين الحقول، لما هتجوعى هتلمى تفاح من شجرة تفاح على جنب الطريق، هتلاقى واقف تحت الشجرة تمثال راجل مصنع من الصفيح، هتندهى على خيال المقاتة يجى يشوف الراجل الصفيح، هتسمعوا صوت طالع منه كأنة بيحاول يقول لكوا حاجة، هتلاقوا مزيتة جنبة هتزيتوا بيها مفاصلة قبل ما يقدر يتحرك ويتكلم، هيقول لكم انه كان واقف بيقطع خشب هنا تحت الشجرة ولما الدينا مطرت خلت مفاصلة تصدى و يتجمد كده، هتقولى له انه دلوقتى بقى كويس، هيقولك بيتهيألك لانه الصانع بتاعة لما عملة من صفيح نسى يركبلة قلب وانه ماعندوش قلب، هتقوليلة يجى معاكوا هو كمان يقابل الساحر أوز علشان يركبلة قلب! .. بتكملوا رحلتكوا انتوا الثلاثة فى الطريق الاصفر بتغنوا وانتوا فرحانين قبل ما الطريق يدخل فى وسط الغابة المخيفة، هتبدأو تخافوا وتقربوا من بعض لما تسمعوا صوت زئير الاسد، اللى هيزهر فجأة ويهددكوا انه هياكلكوا كلكم، لما هيحاول يمسك توتو منك، هتضربية على وشة، فهيبدأ يبكى ويقول لك ليه عملتى كده انا ما عضتش الكلب بتاعك ولاحاجة انا كنت بخوفكوا بس، هتكتشفوا ان الاسد الشجاع مش شجاع ولا حاجة، لكنه جبان بيخاف اكتر من خيال المقاتة، هتعرضوا عليه يجيى معاكوا يقابل الساحر اوز يمكن يديلة شجاعة! هتوصلوا لوادى الزهور وهتشوفوا مدينة الزمرد على الجانب التانى من الوادى، هتجروا بسرعة وسط ملايين الزهور علشان توصلوا للمدينة، لكن الساحرة الشريرة رمت تعوذيتها على الزهور وخلتك رائحة الزهور تخدرك وتنامى انك وتوتو، لكن الساحرة الطيبة هتستخدم سحرها و تخلى الثلج ينزل ويفوقك علشان تكلمى رحلتك! فى مدينة الزمرد كل شئ أخضر بديع، الناس كلها مبسوطة وفرحانة، بتغنى وترحب بيكوا، لما هتقابلوا الساحر أوز هيوافق انه يحقق امانيكوا لو قدرتوا تجيبوا له مقشة ساحرة الغرب الشريرة! هتخرجوا برة مدينة الزمرد محتارين ازاى ممكن توصلوا للغابة اللى فيها الساحرة الشريرة، لكنها هتبعت قردة مجنحين طايرين يهاجموكوا ويخطفوكى انتى وتوتى. فى قصر الساحرة الشريرة مش هتقدر تخلع الجزمة السحرية من رجليلك، لان تعويذة الساحرة الطيبة بتمنعها، هتقرر انها لازم تموتك علشان التعويذة تتفك، هيهرب توتو من القصر ويرجع لأصحابك ويدلهم على طريق قصر الساحرة الشريرة، هيتسحبوا جوا القصر علشان ينقذوكى لكن الساحرة هتشفهم فى الكريستالة السحرية وتقبض عليهم، وهتقرر انها تقضى عليهم كلهم، هتبدأ بخيال المآتة، هتولع النار فى دراعة، هيجرى بجنون وخوف، هترمى مية عليه علشان تطفى النار، لكن جزء من المية هيجى على الساحرة الشريرة، اللى هتبدأ تصوت بجنون والدخان بيتصاعد من كل حتة فيها وتسيح تمام ويصبح مالهاش اثر! هتاخدوا المقشة السحرية وترجعوا بسرعة على مدينة الزمرد! الساحر أوز هيدى الاسد نيشان الشجاعة من الدرجة الرفعية، والراجل الصفيح، قلب على شكل ساعة بيدق كل ثانية، وخيال المآتة شهادة فخرية للعبقرية، الساحر أوز هيحضر المنطاد السحرى بتاعة علشان يرجعك البيت، لكن توتو هيجرى منك والمنطاد بيتحرك هتنزلى بسرعة وراة، والمنطاد بيطير فى السما، هتزعلى جدا من شقاوة توتو اللى ضيع عليكى فرصتك الوحيدة انك ترجعى البيت، قبل ما تظهر ساحر الشمال الطيبة وتقول لك انك تقدرى ترجعى البيت فى غمضة عين لو خبطى كعبين الجزمة اللى انت لابسها ببعض، هتودعى اصدقائك للمرة الاخيرة، قبل ما تخبطى كعب الجزمة، هتفوقى فى بيتك وسط عمك وعمتك، وانتى بتحكيلهم على مغامرتك العجيبة، ومدينة الزمرد البديعة لكنك هتقولى لهم ان مافيش اى مكان فى الارض زى البيت!