EP16: The Problem of Egoism أشكالية الآنوية

Episode 16 + ECN (Egypt Cancer Network) Ad

أسمها كان السهم الأول. بتمثل أربع سنين ونص من التخطيط، الاعداد، والتدريب، والاف السنين من العلم، والرياضيات، واحلام وآمال مش بس أمة واحدة لكن العالم كلة. كانت أول مركبة فضائية صنعها البشر لرحلة أستكشاف الفضاء! وبدأ العد التنازلى .. الثوانى الخمسة الاخيرة قبل ما الانسان يطلق سهمة الاول فى أغوار الفضاء. تخيل انك واحد من ثمانية رواد فضاء اختيروا بعناية كبيرة لتشكيل طاقم السهم الاول. المركبة الفضائية اللى حملت طموح وامل البشرية فى كوكب جديد صالح للحياة، الرحلة اللى انطلقت من ساعات وعقول وعيون البشر على الارض فى كل مكان متعلقة بيها ما لحقتش تكمل يومها الاول فى امان بعد ما اصطدمت بكوكيب عملاق وفقدت كل ووسائل الاتصال بالوحدة المركزية على الارض. هتخرج من بين اشلاء المركبة .. الدمار والجثث حواليك فى كل مكان .. هتبص حواليك تشوف اذا كان فى حد لسة حى من الطاقم .. هتشوف قائد المركبة وجنبة اتنين من زمايلك .. هترفع جسمك بصعوبة من على الارض وانت بتحاول تفادى  باقى جثث أفراد الطاقم .. لما هتوصل للقائد هيقولك ان خطأ فنى حصل والكوكيب العملاق ده ظهر فى مسار المركب، وواضح اننا فقدنا الاتصال بالمحطة الام .. هتسألة اذا كان فى اى امل انهم يقدروا يوصلوا ليكم .. هيبص ليك انت وزمايلك بحزم قبل ما يقول لكم .. “السهم الاول خلاصة معرفة وقدرة البشرية، اخدت اربع سنين ونص عشان نقدر نحولها من فكرة لواقع. ما اعتقدش ان هيكون فى مقدرة وحدة ابحاث الفضاء على الارض انها تصنع مركبة تانية فى اى وقت قريب .. أملنا الوحيد هو اننا نتماسك ونفضل مع بعض” .. هينهى جملتة وهو بيبص فى عينكوا بحزم وتصميم وشفقة فى فى نفس الوقت! هتبص لزميلك الواقف جنبك وزميلك التانى المصاب بشدة وبينازع الموت على الارض وانت بتخبى الخوف والفزع اللى جواك! هتبدأوا تستكشفوا المنطقة المحيطة بيكوا، صحرا وجبال ممتدة فى كل اتجاة مافيش اثر لاى شئ حى على مدى البصر … هترجع لحطام المركبة تدور بين الدمار على ازايز المية اللى فاضلة ، فى الوقت اللى هيبدأ فيه القائد وزميلك يحفروا مقابر عشان يدفنوا جثث زمايلكم اللى ماتوا فى الحادثة .. هيطلبوا منك انك تساعدهم لكنك هترفض لانك عاوز توفر طاقتك والماية اللى معاك! الوقت بيمر ببطئ مميت .. فى كل مرة بتشوف زميلك او القائد بيهدروا الماية على زميلكوا الرابع اللى مازال بين الحياة والموت بتفقد اعصابك .. الخوف، العطش، والجوع أفقدك السيطرة على عقلك .. هتجرى ناحية زميلك وهو بيحاول يشرب زميلكوا المصاب، وتزقة على الارض وتخطف ازازة المية من ايدية .. وتشرب منها بجنون، هينقض عليك زميلك، وتبدأ بينكوا معركة شرسة قبل ما تسمعوا صوت طلقة نارى اطلقة القائد، وهو بيفصلكوا عن بعض .. زميلك هيدافع عن موقفة ويقول انك انت اللى اتهجمت علية، وانت هتبرر انه بيضيع الماية اللى فاضلة على زميلكوا الرابع اللى مصيرة الموت على اى حال .. القائد هيقولك “طالما لسه حى، يبقى له فى الماية زى اى واحد مننا” هيحزرك لو اعتديت عليه تانى مش هيفكر مرتين فى انه يستخدم سلاحة. بعد يومين تانين من المعاناة والنزيف .. هيموت زميلكوا الرابع على اثر الجرح .. هتنقض على ازازة الماية بتاعتة وتخزنها مع باقى ازايز الماية اللى معاك .. اللى بالنسبة لك هى الامل الاخير فى البقاء على قيد الحياة، فى الوقت اللى هينشغل فيه القائد وزميلك الاخير فى دفن جثة زميلكوا المتوفى. فى اليوم الرابع باين عليكوا التعب والاجهاد .. هيأمرك القائد انت وزميلك التانى انك تبدأوا فى استكشاف الكوكيب من حواليكوا يمكن يكون فى اثر لاى مصدر مياة .. بالرغم من انك مش موافق على الفكرة الا انك هتروح مع زميلك تحت تأثير الخوف من السلاح .. لما هترجع بعد غروب الشمس لوحدك هيسألك القائد فين زميلك .. هتستغرب وتقول “هو لسه ما رجعش” .. هتقلة انكوا افتقرتوا فى نص الطريق عشان تغطوا مساحة اكبر من الارض .. ومن ساعتها ما شفتوش .. هيسأل القائد ولقيت اى اثر للماية .. هتقول “لا صحرا وجبال فى كل اتجاة على مد البصر” .. هتشوف الشك والريبة فى عيون القائد .. هيقولك هننتظر هنا لو ما ظهرش هنرجع ندور علية .. الوقت بيمر ببطئ مميت ما بين ترقب وشك .. هيأمرك القائد انك تتقدمة فى المسار اللى انتوا اخدتوة .. لما هترفض فى الاول بحجة التعب، هيجبرك انك تمشى قدامة تحت تهديد السلاح .. هتفضلوا ماشيين ساعات طويلة بدون اى اثر لزميلكوا، لحد ما هيسمع القائد صوت انين جاى من الاتجاة المعاكس .. هيقودك قدامة لحد ماتوصلوا لمصدر الصوت، زميلك مرمى على الارض بين الجبال غرقان فى بركة من الدم بين الحياة والموت .. هتشوف الغضب فى عنين القائد قبل ما يزقك على الارض وياخد الشنطة اللى على ضهرك ويفرغها على الارض .. كلها ازايز ماية، هتقولة “انا ماقتلتوش، هو وقع من على الصخرة .. افتكرتة مات .. فسبتة هنا .. انا اخدت الماية بتاعتة لانى افتكرتة مات” .. هيوطى القائد على زميلك اللى بيموت عشان يسمع هو عاوز يقول ايه، زميلك بيحاول يتكلم لكنه صوته مابيخرجش .. هيرفع ايدية بصعوبة وهو بيشاور على قمة الجبل اللى وراكوا .. قبل ما يلفظ اخر نفس فى حياتة .. هيلتفت القائد ناحية الجبل، هيقولك “ياترى فيه ايه ورا الجبل كان عاوز يقلنا عليه” .. هيقوم القائد ويبدأ فى تسلق الجبل .. فى اللحظة اللى هتاخد بالك انه نسى سلاحة جنب جثة زميلك .. صوت الرصاصة هيخترق صمت الليل ويدوى بين الجبال .. هيترنح القائد من على الجبل وهو بيبص للسلاح اللى فى ايديك ونظرات الشماتة اللى فى عنيك قبل ما ينهار جسمة ويدحرج لسفح الجبل، هتجرى ناحية جثتة وتاخد ازازة الماية بتاعتة .. وتبدأ فى تسلق الجبال .. هتوصل لقمة الجبل مع اول ضوء للفجر .. اول ما هتقف على قمة الجبل وتفرد ضهرك هتتصدم من اللى هتشوفة على الجانب التانى من الجبل .. هشوف طريق سريع مرصوف وعربيات نقل معدية علية، ويافطة كبيرة مكتوب عليها “العاصمة على بعد 5 كيلو متر” .. هتكتشف ان المركبة ما سبتش الارض من الاساس، واصطدمت فى منطقة صحراوية على كوكب الارض .. هتنهار على الارض وانت بتبكى وتضحك فى جنون!

2013112153032541

فكر فى مئات القرارات اللى بتاخدها كل يوم ..  من أول تغسل سنانك الصبح، تروح الجامعة ، تذاكر، تتفرج على التلفزيون، تذاكر، تخرجى من غيرحجاب، تساعد الست العجوزة وهى بتعدى الشارع، تكدب على صحبك، تغش فى الامتحان، أو تفضل طول اليوم على الفيس بوك فى الشغل … ياترى انهى قرارت من دى ممكن نعتبرها قرارات أخلاقية؟ .. بمعنى انها قرارات لها تبعيات أخلاقية، فى الحقيقة كل القرارات اللى بتاخدها كل يوم فى حياتك ليها بعد أخلاقى Moral dimension بما انها قرارات بتؤدى لأفعال فى نهاية الامر. الافعال دى فلاسفة الاخلاق بيقسموها لأربع أنواع بناء على التبعيات الاخلاقية المترتبة على الفعل ده .. يعنى مثلا انت لو قررت انك تسرق مصروف أخوك الصغير، التبعيات الاخلاقية المترتبة على الفعل ده انك مذنب بسرقة الفلوس، وتستحق العقاب، او على الاقل لابد وانك ترد المبلغ المسروق لأخوك، التبعيات الاخلاقية المترتبة على فعلك فى الحالة دى كانت تبعيات سلبية لانك انتهكت التزام أخلاقى محدد. النوع الاول من الافعال الاخلاقية هو الفعل الجائز او المباح The Permissible Act وهو الفعل اللى ما بيترتبش علية اى تبعيات اخلاقية سلبية او ايجابية، زى مثلا انك قررت انك تهز رجلك وانت بتسمعنى دلوقتى، او تشرب كباية شاى .. علماء اللاهوت او الدين بيسموا الفعل ده “حلال”. الفعل الغير جائز او الغير مباح   The Impermissible Actهو الفعل اللى بيخالف ألتزام اخلاقى ما، او بمعنى اصح بينتهك قاعدة متفق فيها ان الفعل ده غير اخلاقى على سبيل المثال السرقة، القتل، الاغتصاب .. علماء الدين بيقولوا على الفعل ده “حرام” . الفعل الواجب او المُلزم The Obligatory Act هو الفعل اللى التبعيات تكون غير أخلاقية لو ماعملتوش،مثلا انك ترفض انك ترجع فلوس اخوك الصغير اللى سرقتها من وراة، او انك ترفض تقول الحقيقة . النوع الاخير من الافعال هو الفعل المُحبذ The Supererogatory Act هو الفعل الجائز اللى لو عملتة تبعياتة كويسة لكنه مش أجبارى. زى الافعال الخيرية اللى بتعملها كل يوم، الناس بتشكرك عليها لكنها مش واجبة عليك.

تنظيمية الفعل Normativity هى فكرة اساسية فى فلسفة الاخلاق بتقول ان الادعاءات الاخلاقية مرتبط بيها ضروريات الزامية بغض النظر احنا بنعترف بالضروريات دى ولا لأ. لما بنقول ” لا ضرر ولا ضرار” .. أو ” القتل جريمة” .. “يجب عليك تقول الحقيقة” ، دى كلها ادعاءات اخلاقية بتعرف الفرد بالضرورة الاخلاقية الواقعة عليه. الجمل التنظيمية، القانونية Prescriptive Claims هى الجمل اللى بتنقل او بتوصل فكرة “الواجب” Ought بمعنى الواجب على الفرد انه يعملة فى المواقف الاخلاقية زى مثلا “واجب على الفرد انه يزكى عن اموالة وصحتة” أو “واجب على الفرد احترام حرية الاخرين” او “كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ”..  على النقيض الجمل الوصفية Descriptive Claims هى الجمل او الادعاءات اللى بتنقل او بتوصل فكرة “الكينونة” is  بمعنى انها بتوصف الحالة الكائنة، او الظاهرة زى مثلا “الجو جميل”، “انا فرحان”، ” إن الإنسان كان ظلوما جهولا” الخ

440px-David_Hume

مقصلة هيوم Hume’s Guillotine .. فى كتاب أطروحة للطبيعة البشرية Treatise of Human Nature اللى نشرة الفيلسوف الاسكتلندى ديفيد هيوم David Hume سنة 1739 هيقدم لأول مرة فى تاريخ فلسفة ماوراء الاخلاق Meta-Ethics أشكالية الكينونة-والوجوب Is–ought problem .. هيوم هيلاحظ ان كتير من المفكرين والفلاسفة بيقدموا ادعاءات اخلاقية عن ما يجب فعلة Ought to be  بناء على اساس جمل ما يكون What is. هيوم وجد ان فى فرق جوهرى بين الجمل الالزامية او التنظيمية Prescriptive والجمل الوصفية Descriptive، ووجد انه مش واضح ازاى ممكن من جملة وصفية Is Statement بتوصف ازاى الاشياء موجودة فى الكون نشتق جملة الزامية Ought Statement تقلنا ازاى المفروض نتصرف فى الكون .. بشكل مختصر ازاى ممكن نشتق “يجب” من “يكون”؟ .. هيوم أعتقد وزية فلاسفة كتير ان مافيش وسيلة للأشتقاق ده! الفجوة بين الوجوب والكينونة اللى سلط عليها الضوء ديفيد هيوم هتصبح واحدة من الاشكاليات الجوهرية فى نظرية الاخلاق واللى عادة ما بيلعب هيوم دور قائد تيار عدم وجود وسيلة للأشتقاق فيها. الاشكالية دى لما بيدمجها الفلاسفة مع نظرية شوكة ديفيد هيوم عن المعرفة Hume’s Fork  اللى فيها هيوم اعتقد ان اى معرفة معتمدة اما على المنطق  Logicاو الملاحظة Observation  بيتضح ان فكرة الوجوب Ought مش ممكن اننا نعرفها لا عن طريق المنطق ولا الملاحظة ، اللى هيأدى لهدم فكرة المعرفة الاخلاقية Moral Knowledge  من الاساس، او بمعنى تانى لو صحت فكرة هيوم مش هنقدر نبنى نظرية معرفية للأخلاق فى يوم من الايام موضوعية مستقلة عن فكرة الله او الدين هو مصدر الاخلاق!

9780915145287_p0_v2_s260x420

المذهب الطبيعى للأخلاق Ethical Naturalism انصارة بشوفوا ان فى حقايق اخلاقية Moral Truths ليها وجود فى الكون ووجودها مرتبط بالطبيعة الفزيائية للواقع المحيط بينا. فلاسفة المذهب الطبيعى بيردوا على أشكالية هيوم بان مافيش مشكلة فى اشتقاق الوجوب من الكينونة، واللى بيتضح عن طريق تحليل السلوكيات الموجهة بهدف Goal directed Behavior مثلا جملة زى” عشان الفرد س يحقق الهدف ص، اذن س يجب انه يعمل الفعل ع” أو ” الفرد يجب انه يجرى بسرعة لو كان هدفة انه يكسب السباق” فى الجمل دى نقدر نشتق الوجوب من الكينونة بناء على الهدف! لكن لو حتى الطبيعين عندهم حق فى الفكرة دى مازال قدامهم اشكالية تفسير الوجوب الاخلاقى Moral Ought .. يعنى فى المثال اللى فات ازاى نقدر نشتق وجوب كسب السباق من الهدف؟ فكرة استخدام الهدف بتساعد كتير فى أضعاف أشكالية هيوم، لكنها مازالت بتواجة تحدى كبير .. فى الحقيقة التحدى ده تحدى اى نظام اخلاقى فى الكون، الوجوب بيوصل بينا فى النهاية لفكرة الخير Good .. فحتى لو قدرنا نفهم او نشتق الوجوب فى ضوء الاهداف او الاحتياجات، التحدى هيكون تحديد مصدر وطبيعة الخيرده، وليه الفرد “واجب” علية انه يسعى ورا الخير، ايه الطبيعة المُلزمة فى السعى ورار الخير … هسيبك تفكر فى السؤال المصيرى ده لحد ما نرجع نناقشة بالتفصيل فى المستقبل!

مذهب الانوية النفسية Psychological Egoism فكرة فلسفية بتقدم تصور او تفسير لأزاى بنتصرف مش ازاى المفروض نتصرف! الاطروحة اللى بيقدمها مبدأ أيثار النفس او الانوية النفسية هى ان فى كل فعل بنعملة بيكون بدافع من المصلحة الذاتية Self-Interest Motive. فى الغالب الادعاء ده هيبدو غريب بعض الشئ بالنسبة لك، معظمنا على الاقل بيعتقد فى انه بيعمل اعمال يومية بيساعد بيها الاخرين بصدق وتجرد .. يعنى لما بتساعد الست العجوزة وهى بتعدى الشارع، او لما بتدى الشحات حسنة، أو حتى المقطع اللى بضيفة فى اول كلام فلسفة عشان اشجعك تتبرع لمستشفى سرطان الاطفال .. كل دى أعمال بنٌأثر فيها مصحلة الاخرين على مصلحتنا الشخصية .. ياترى ازاى انصار مذهب الانوية النفسية هيفسروا امثلة ايثار الاخرين Altruism دى؟ .. فى الحقيقة مذهب الانوية النفسية بينكر ان الافعال دى او غيرها من الافعال ممكن نسمية فعل أيثارى او فعل مش بدافع من المصلحة الذاتيةّ! أنصار الانانية النفسية بيقولوا ان الفرد بيتصرف بوازع من طبيعتة البشرية، وانه مش فى قدرتة الا انه يتحكم  فى التصرف بدوافع المصلحة الذاتية لانها جزء من التركيب البشرى. فى كل مثال من الامثلة اللى فاتت او اى امثلة الشبيهة، علماء نفس الانوية النفسية هيقدموا تفسير يبرر التصرفات ده بدافع من المصلحة الذاتية للفرد.. يعنى مثلا انت لما بتساعد الست العجوزة انها تعدى الشارع بتعمل كده لان الفعل ده هيخليك تحس أفضل تجاة نفسك، او لما بتدى الشحات فلوس الفعل ده هيخلي مظهرك افضل قدام الناس، او مقدمة مستشفى سرطان الاطفال هتخلينى احس بشعور احسن لان مظهرى هيبقى افضل.قدام المستمعين بتوعى! فى  الواقع كُتّاب المسلسل الامريكى الكوميدى الأصدقاء Friends وضحوا الفكرة دى ببساطة وخفة ظل على لسان جوى واحد من أبطال المسلسل وهو بيقول لفيبى “مافيش عمل خير مش انانى” ولما طلب منها تديلة مثال واحد ما قدرتش ..فهيقول “ده لان كل الناس انانية”!

Friends_titles

مذهب المتعة النفسية Psychological Hedonism هو واحد من اشهر صور مذهب الانوية النفسية وبيطرح فكرة ان الدافع النفسى الاعلى لكل أفعال البشر التطوعية هو الرغبة فى الاحساس بالمتعة وتجنب الالم. علماء نفس المتعة النفسية بيجادلوا ان الافعال اما بتكون مسببة بدافع الرغبة فى الحصول على المتعة المباشرة او المتعة فى المستقبل. وده بيفسر ليه عائد صغير من المتعة مباشر ممكن التضحية بية فى سبيل عائد اكبر من المتعة فى المستقبل. مش بس كده البشر مش دايما مدفعوين بتفضيل المتعة وتجنب الالم، لكن على العكس البشر ممكن يتحملوا بعض الالم فى سبيل الحصول على محصل اكبر من السعادة! وفى نهاية الامر كل الافعال ماهى الا اداة للحصول على متعة اكتر او الم اقل، حتى الافعال اللى بيبدو عليها طابع الايثار. مذهب المتعة النفسية جذوره بتبدأ عن المدرسة الابيقورية Epicureanism فى الفلسفة اليونانية القديمة زى ما اتكلمنا فى الحلقة اللى فاتت اللى ادعى مؤسسها الفيلسوف الاغريقى أبيقور Epicurus ان سلوكيات البشر كلها من الطفولة للكهولة يمكن فهمها فى ضوء دافع السعى ورا المتعة. وان البشر بيتصرفوا بشكل أيثارى، مشرف، او فيه نوع من الفضيلة مش عشان الناس التانية، او عشان القانون الاخلاقى Moral Code لكن عشان يزودوا المتعة الذاتية بتاعتهم. الفيلسوف الانجيلزى جيرمى بينثام Jeremy Bentham أعاد طرح نفس الفكرة فى كتابة مقدمة لمبادئ الاخلاق والتشريع An Introduction to the Principles of Morals and Legislation سنة 1789  وان تصرفات الفرد محكومة بحاجتة لزيادة المتعة وتقليل الالم. لكن بينثام راح لابعد من ابيقور وحدد انواع المتع والالام فى الحياة وكمياتها، ايوة كمياتها، بينثام حاول انه يقيس كمية المتعة النفسية وطور نوع جديد من الحساب لقياس المتعة اللى ممكن يسببها فعل سماة أحصاء المتعة Felicific calculus .. عند بينثام صحة أو خطأ الفعل الاخلاقية دالة فى كمية المتعة او الالم الناتجة عن الفعل. الدالة دى ليها مجموعة متغيرات من وجهة نظرة بينثام لو قدرنا نحددها بدقة نقدر نحسب صحة او خطأ الفعل من عدمة! هنرجع نتلكم عن أفكار بينثام بالتفصيل لما ناقش مذهب المنفعة.

9781435108752_p0_v1_s260x420 Jeremy_Bentham_by_Henry_William_Pickersgill_detail

عالم الاحياء والفيلسوف الانجيلزى هيربرت سبنسر Herbert Spencer جادل ان البشر والحيوانات تطورا فى الاصل بدافع النجاة وحماية نسلهم، فكل الكائنات الحية بتحاول تعظم فرصتها فى النجاة ومن هنا سبينسر بيستنتج ان افضل الكائنات قدرة على التكيف معدل المتعة عندهم بيفوق معدل الالم فى البيئة اللى بيعشوا فيها، ومن هنا المتعة بتحقق هدف انانى عند الكائن الحى وهو البقاء حى! بالرغم من ان عالم النفس النمساوى سيجموند فرويد Sigmund Freud ماكنش من اتباع الانوية النفسية الا ان واحد من اشهر أفكارة هو مبدأ اللذة Pleasure principle مقتبس فى جوهرة من مذهب الانوية النفسية، بالتحديد لما فرويد قال ان القوة الغير واعية عند البشر بتدفعهم يخرجوا الضغط والتوتر العصبى اللى اتكون عندهم من الرغبات الكامنة وهتدفعهم بسعوا ورا مزيد من المتعة واللذة الحسية.

images400px-Sigmund_Freud_LIFE

مذهب الانوية النفسية مازال مثير للجدال والخلاف بين العلماء والفلاسفة، الأتباع بيستخدموا أدلة من من تصرفاتهم ونوايهم اللى بتبين الدوافع الشخصية ورا افعالهم، علماء النفس وجدوا من خلال الملاحظات المتواترة لطبيعة التصرفات البشرية ان سلوكيات البشر ممكن التحكم فيها عن طريق المكافأة والعقاب اللى ليها علاقة مباشرة بالمتعة والالم، كمان علماء الاجتماع Social Scientists أثبتوا بشكل تجريبى empirical أن النظرية بتقدم أفضل تفسير لسلوكيات البشر فى المجتمعات. على الجانب التانى أعداء النظرية بيقولوا انها مش افضل التفسيرات على العكس هيقولوا ان نظرية ايثار الاخرين Altruism ابسط بكتير فى تفسير اعمال الناس الخيرة من مذهب الانوية الشخصية، نقد تانى بيقول ان النظرية مش سليمة لانها بتبسط السلوكيات البشرية اكتر من اللازم! واحد من الاعترضات القوية على المذهب هو فكرة وجود بعض التصرفات البشرية اللى مانقدرش نفسرها بدوافع شخصية، مثلا الجندى اللى بيضحى بحياتة فى الحرب عشان ينقذ القائد بتاعة، ايه الدافع الشخصى ورا سلوك زى ده اذا كانت حياة الفرد هتنتهى ومش هيلحق يتمتع باى ناتج متعة من التجربة، رد فلاسفة الانوية النفسية على الاعتراض ده ان بعض الافعال بتصبح روتينية للعقل مع تكرار التدريب عليها حتى لو اصبح مالهاش منفعة مباشرة، يعنى مثلا مدرب الاسد فى السيرك فى الاول لما بيدربة انه لما يقلة “اقعد” فى كلة مرة بيدلة حتة لحمة عشان يسمع الكلام، بعد كده المدرب مش محتاج يدى الاسد حتة اللحمة دى ومع ذلك الاسد هيقعد لما المدرب يأمرة، لان السلوك اصبح روتينى غير مبرر فى عقل الاسد.

Whats-on-Americans-minds-Increasingly-me-UD1RA9SQ-x-large2-300x220

الانوية الأخلاقية Ethical Egoism لو كانت الانوية الاخلاقية بتقدم ادعاء وصفى Descriptive لانها بتقول ان كل أفعالنا بتم بدافع من المصلحة الشخصية، وان السلوك ده جزء اساسى من تركيبتنا النفسية، فالانوية الاخلاقية بتقدم أدعاء الزامى او تنظيمى Prescriptive لانها ما بتقدمش وصف للطبيعة البشرية لكنها بتقدم تصور لأزاى المفروض نتصرف .. تصور للواجب مش للكينونة. المذهب بيقول ان الفرد واجب عليه انه يتصرف دايما فى مصلحته الشخصية، فبدل ما تقول ان علينا واجب تجاة الناس ” اللى هو شئ معظم النظريات الاخلاقية بتقر بيه”، فلاسفة مذهب الانوية الاخلاقية هيقولوا ان علينا واجب واحد بس، تجاة نفسنا. المذهب بيعتبر واحد من مذاهب مدرسة فلسفية كبيرة هى المدرسة الفردانية Individualism  اللى بتطرح موقف أخلاقى، فلسفة سياسية، وايدولوجية او نظرة اجتماعية بتأكد فيها على قيمة الفرد المعنوية، وبتعزز من ممارسة اهداف الانسان ورغباتة بشكل مستقل والاعتماد على الذات، وبتدافع عن ان مصالح الفرد لها الاحقية والاسبقية على مصالح الدولة والمجتمع فى حالة تعارض مصلحة الفرد مع المجتمع او الدولة. مذهب الانوية الاخلاقية عكس مذهب الايثار الاخلاقى Ethical Altruism اللى بيقول ان اى الفرد علية واجب مُلزم انه يساعد الاخرين، لو الفرد فعلا مهم وله قيمة، اذن من الخطأ اننا نجبره على التضحية بحياتة أو حتى أهدافة فى سبيل الصالح العام Common Good، مبدأ الايثار الاخلاقى خطأ من وجهة نظر فلاسفة الانوية الاخلاقية لانه بيدفع الافراد انهم يضحوا بنفسهم، واللى فى نظرهم معناة ان الفرد اصبح مالوش قيمة، وبيرسخ بس لمفهوم الصالح الاجتماعى العام. خلى بالك ان مذهب الانوية الاخلاقية مش بيقول ماتعملش اى حاجة للأخرين، لكنه بيقول ان من الجائز جدا انك تعمل حاجة تساعد بيها الاخرين، بس السبب هيكون انها فى مصلحتك الشخصية مش بتعملها عشان هى شئ كويس ليهم. يعنى مثلا لما بتساعد الست العجوزة تعدى الشارع ممكن يكون انك بتعمل كده عشان شكلك يكون كويس فى نظر الاخرين اللى بالتبعية هيخليك تحس بشعور من الزهو والسعادة، او ممكن تكون بتشيل ازازة مكسورة من على الارض عشان تخلى الشارع مكان امن لنفسك لما تمشى فيه بعد كده ما تجرحش نفسك الخ… كمان الانوية الاخلاقية مش زى نظرية المتعة  Hedonism  لانها بتقول ان واجب عليك انك تعمل بس الافعال اللى بتعظم المصلحة الشخصية، يعنى مثلا لو بتحب تشرب سجاير طبقا لمذهب الانوية الاخلاقية ده فعل غير اخلاقى لانه مش هيعظم مصلحتك الشخصية على المدى الطويل.

Jimbo8

الفيلسوف الامريكى جيمس راتشيلز James Rachels فى مقال بعنوان مذهب الانوية الاخلاقية قدم أهم 3 حجج بتستخدم لتبرير المذهب، الحجة الاولى كل فرد مننا ادرى برغباتة وطموحاتة الذاتية، وكل واحد مننا فى موضع يسمحلة انه يسعى ورا الاهداف والرغبات دى، فى نفس الوقت فكرتنا عن رغبات واهداف الاخرين مش كاملة ومعيبة وموضعنا فى الحياة مش بيأهلنا اننا نسعى وراها، اذن واجب علينا اننا نركز على اهدافنا ورغباتنا. جيمس كان بيحاول يقول ببساطة رجل الشارع  “كل واحد يخلية فى نفس احسن”! كمان جيمس بيقول اننا لما بنقدم احسان للأخرين فى صورة مادية او معنوية، بنقلل من قيمتهم كأفراد، ومن قدرتهم على تحقيق اهدافهم بالاعتماد على نفسهم. الحجة التانية ان مذهب الايثار بينكر قيمة الفرد وبالتالى بيدمر كل من المجتمع وعنصرة الاساسى اللى هو الفرد يمكن الفكرة المسيطرة هنا هى ان الخوف من ان الفرد يعتبرحياتة سلعة ممكن التضحية بيها فى سبيل الاخرين فى مجتمعة لو لزم الامر، واللى فى اعتقاد جيمس هو بداية انهيار المجتمع، وانتشار فكرة تواكل الناس على بعضها، وضعف الانتاجية، وضياع طموح الافراد فى زحمة أنشغالهم بالاخرين! واخيرا الحجة التالتة ان كل الواجبات الاخلاقية المشتركة بين البشر زى ماتأزيش الاخرين، او ماتكدبش، او حافظ على الوعود .. جذورها كلها نابعة من مبدأ واحد من وجهة نظر جيمس هو المنفعة الشخصية.

450px-Nietzsche187a Jenseits_von_Gut_und_Böse_-_1886

فلاسفة الانوية الاخلاقية ممكن تقسيمهم ل 3 انواع انوية أخلاقية فردية Individual Ethical Egoist واللى بيعتقدوا فى ان الناس المفروض تعمل اللى فى مصحلته هو الشخصية، انوية أخلاقية شخصية Personal Ethical Egoist واللى بيعتقدوا فيها الفرد واجب انه يتصرف بدافع من مصلحتة الشخصية، لكن مالوش دعوة ازاى الاخرين بيتصرفوا، انوية أخلاقية كونيةUniversal Ethical Egoist واللى بيعتقدوا فيها ان كل فرد فى الكون لازم يتصرف بدافع من مصلحتة الشخصية. الفيلسوف والاقتصادى الانجليزى هنرى سيدجويك Henry Sidgwick فى كتابة أساليب الأخلاق The Methods of Ethics سنة 1874 طرح للمرة الاولى فى التاريخ الحديث مفهوم الانوية الاخلاقية وجادل ان فى حين ان مذهب المنفعة الاخلاقية Utilitarianism بيدعو لتعظيم المنفعة الكليةللمجتمع، مذهب الانوية بيدعو لتعظيم المنفعة الكلية للشخص بس. لكن الفكرة نفسها أقدم من كده بكتير يمكن اول مرة المفهوم ده تم رصدة فى التاريخ كان فى القرن الرابع قبل الميلاد فى فلسفة الفيلسوف الصينى يونج زو Yang Zhu اللى اعتبر ان الفضيلة الوحيدة المطلوبة لسعادة الانسان هى “كل شئ لنفسى” Everything for myself. مفهوم فلاسفة الاغريق عن الأنوية الاخلاقية كان ان الفرد عليه واجبات ذاتية وأجتماعية، الفيلسوف الالمانى الشهير فريدريك نيتشة Friedrich Nietzsche فى كتابة ماوراء الخير والشر Beyond Good and Evil اللى نشرة سنة 1886 والفيلسوف الاسكتلاندى الاسدير ماكنتير Alasdair MacIntyre فى كتابة بعد الفضيلة After Virtue سنة 1981 أشاروا لان قدماء الاغريق ما ربطوش بين الاخلاق و فكرة ايثار الاخرين او التكافل الاجتماعى بنفس الشكل اللى تم بعد ظهور الاديان السماوية، فمن وجهة نظر أرسطوطاليس Aristotle الفرد عليه واجبات تجاة نفسة، الناس، والمدينة اللى بيعيش فيها، لكن واجبات الفرد تجاة نفسة أولية، تسبق اى واجبات تانية! الفكرة دى هتدفع نيتشة انه يطرح فكرة ان سلوك ايثار النفس او الانوية الاخلاقية بيولد الشعور بالغيرة عند الاخرين وهو ده الدافع النفسى ورا فكرة أيثار الاخرين Altruism  فى الاديان زى المسيحية او الاسلام. نفس الفكرة اكد عليها عالم الاجتماع هيلموت شوسك Helmut Schoeck واعتقد ان الحسد Envy هو الدافع ورا فكرة الجهود الجماعية فى المجتمع اللى بتهدف انها تقلل الفرق فى مكاسب الافراد الناجين عن طريق قواعد أخلاقية وقانونية زى الاحسان، التكافل، او الضرائب.

272px-Objectivist1 Ayn_Rand1

الموضوعية Objectivismهو تيار فلسفى أسستة الكاتبة والفيلسوفة الروسية الامريكية آين راند Ayn Rand فى ستينيات القرن الماضى، راند سمت التيار بتاعها الموضوعية عشان تجسد فكرة ان الانسان مخلوق سامى، السعادة الشخصية هى المعنى والهدف الاخلاقى من حياتة، الانتاج هو هدفة الاسمى، والمنطق هو الحقيقة الوحيدة فى حياتة. راند جادلت ان تفضيل النفس او الانوية الاخلاقية هو المبدأ الاخلاقى الوحيد فى حياة الفرد، وان الفرد وجد بس من اجل نفسة ومصلحتة الذاتية، مش عشان يضحى بنفسة من اجل الاخرين او عشان الاخرين يضحوا بنفسهم عشانة. فى كتابها فضيلة الانانية The Virtue of Selfishness سنة 1964 راند قدمت حل لأشكالية مقصلة هيوم عن الفجوة بين الوجوب والكينونة The Is-Ought Problem عن طريق طرح نظرية فى ماوراء الاخلاق Meta-Ethics بتأسس الهيكل الاخلاقى للفرد على اساس حاجتة للنجاة. وقالت ان الايثار الاجتماعى Altruism غير متكافئ مع احتياجات حياة الانسان وسعادتة.

The_Virtue_of_Selfishness_(centennial_cover)

راند كتبت أتنين من أشهر الروايات فى تاريخ الادب الامريكى المعاصر المنبع The Fountainhead سنة 1943، أطلس مُستهجّن Atlas Shrugged سنة 1957.  الروايتين كانوا من اعلى المبيعات وقتها واتحولوا لأعمال سينمائية تحت نفس الاسم، أنصحك انك تقرأهم فى اقرب فرصة! راند فى الروايتين دول أسست لفكرة الموضوعية الذاتية وفلسفة المصلحة الشخصية وايثار النفس، وساهمت فى تشكيل وجدان جيل كامل من الامريكان والغربيين عموما بيرفع المصلحة الذاتيه فوق كل شئ. بالنسبة لراند واتباع فلسفتها الفرد هو وحدة الاهمية القصوى، واى فعل يخلية يضحى او يتخلى عن مصلحتة او اهدافة الشخصية يصبح فعل غير أخلاقى، ده طبعا بيشمل تشجيع الفرد مثلا على التضحية بنفسة او اهدافة فى سبيل حاجة تانية. ومن هنا راند بتشوف ان التكافل الاجتماعى او تفضيل مصلحة الاخرين على مصلحتنا الفردية عمل غير اخلاقى.

AtlasShrugged TheFountainhead

النقد الموجه للأنوية الاخلاقية وضعها فى قفص اتهام انها اساس الفساد وانعدام الاخلاق Immorality وانها خارج اطار فلسفة الاخلاق، على النقيد اين راند شافت ان الاخلاق ضرورية لنجاة وسعادة الانسان، وجادلت ان تبعيات الاخلاق بما فى ذلك الحقوق الطبيعية ببساطة جزء من فرع اكبر من الاخلاق، بالنسبة لراند الفضيلة بتشمل انتاجية الفرد، وصدقة مع نفسة، و الورع الفكرى. لكن يمكن النقد الاكبر هو ايه الفرق بين الفرد والاخرين اللى بيخلية يحط ذاتة فوق الاخرين؟ هل لانه اكثر ذكاء؟ او نجاح؟ او لانه بيستمتع بحياتة اكتر؟ ايه اللى بيميز اهداف الفرد وسعادتة عن اهداف وسعادتة الاخرين؟ الفشل فى الاجابة عن السؤال ده معناة ان مافيش جذور منطقية للأنوية الاخلاقية .. لكن هل فعلا مافيش اجابة منطقية على التساؤل ده؟! … غالبا الفكرة المسيطرة على عقلك دلوقتى هى وليه التطرف والمغالاة فى ايثار النفس، او ايثار الاخرين .. الاعتدال افضل وخير الامور الوسط، مش هختلف معاك .. لكن السؤال اللى هيطرح نفسة هو ولو فى تعارض بين مصلحتك ومصلحة الاخرين، هل هتأُثر مصلحتك الشخصية ولا مصلحة الاخرين؟ وعلى اى اساس هتحدد؟ ايه هو المعيار او القانون الاخلاقى اللى هتستخدمة عشان تختار بين المصالح المتضاربة؟! .. ولو أخترت مصالحك الشخصية فى الحالة دى انت بالظبط اتبعت الانوية الشخصية اللى اتكلمت عنها راند، اما لو أثرت مصلحة الاخرين فوق مصلحتك ساعتها هتكون بتنافى قواعد الطبيعة ومذهب الانوية النفسية! … لما أتسألت أين راند عن قيمة الانانية، قالت الانانية هى أحترام الذات، ان الفرد يعيش طبقا لقواعد الطبيعة المتمثلة فى قوى العقل، واحترام الفرد لقدراتة العقلية على صنع قرارات سليمة، وبالتالى الثقة فى قدرتة على صنع قرارات أخلاقية سليمة. هسيبك مع اين راند فى جزء من مقابلة تلفزيونية أخيرة ليها أتكلمت فيها عن الانوية  الخلاقية و تيارها الفلسفى.

Ayn_Rand_quote,_American_Adventure,_Epcot_Center,_Walt_Disney_World

القصة اللى بدأنا بيها مقتبسة من حلقة بعنوان أطلقت سهم فى السماء I Shot An Arrow Into The Air من المسلسل الامريكى الكلاسيكى الرائع منطقة الغسق The Twilight Zone، واللى من خلالها حاولت أجسدلك المعضلة الانسانية اللى بيقع فيها الفرد فى محاولة الاختيار الصعبة بين ايثار مصلحتة الشخصية  او ايثار مصلحة الجماعة تحت وطأة ظروف قاسية فيها الحياة قد تكون هى التمن!

ودلوقتى .. فكر فى القرارت و الافعال اللى خدتها النهاردة! … هل ياترى الدوافع ورا قرارتك وافعالك كانت ذاتية نابعة من مصلحتك الشخصية؟ … وهل الدوافع الذاتية هى فعلا المحرك ورا كل أفعال التكافل الاجتماعى والمساعدة اللى بتقدمها للأخرين؟ .. هل فى فعل واحد فى حياتك الدافع وراة ماكنش مصلحتك الشخصية؟ .. حتى وان كان العائد هو مجرد لحظة من الزهو او الشعور بالسعادة .. ياترى هل القانون الاخلاقى اللى بيحكم تصرفاتك وقرارتك هو ايثار المصلحة الذاتية؟ .. وتفتكر ليه مصلحتك الذاتية فوق مصلحة الاخرين؟ .. ولومصلحتك الذاتية مش هى الاولوية الاولى.. هل انت مستعد تضحى اهدافك، سعادتك، او يمكن حتى حياتك فى سبيل الاخرين؟ … فكر تانى

Download MP3: https://app.box.com/s/hv0ke31dgwuj533t8wvu

فى الحلفة الجاية .. هتكون بطل خرافى بقدرات خارقة، فى كل مواجهة بينك وبين قوى الشر بتواجهة تحدى..  تغيير مبادئك حسب المكان والزمان عشان تكسب المعركة، ولا تثبت على مبادئك حتى لو كان التمن انك تكون فارس الظلام؟! .. عن القيم الاخلاقية المطلقة … نظرية النسبية الاخلاقية .. الذاتية الأخلاقية .. والنسبية الثقافية .. هنتفلسف المرة الجاية

من دلوقتى للحلقة الجاية … عيش الحياة بفلسفة

زود معلوماتك:

تنظيمية الفعل Normativity

http://en.wikipedia.org/wiki/Normative#Philosophy

مقصلة هيوم Hume’s Guillotine

http://en.wikipedia.org/wiki/Is%E2%80%93ought_problem

ديفيد هيوم David Hume

http://en.wikipedia.org/wiki/David_Hume

نظرية شوكة ديفيد هيوم عن المعرفة Hume’s Fork

http://en.wikipedia.org/wiki/Hume%27s_fork

المذهب الطبيعى للأخلاق Ethical Naturalism

http://en.wikipedia.org/wiki/Ethical_naturalists

مذهب الانوية النفسية Psychological Egoism

http://en.wikipedia.org/wiki/Psychological_egoism

ايثار الاخرين Altruism

http://en.wikipedia.org/wiki/Altruism_(ethics)

الاصدقاء Friends

http://en.wikipedia.org/wiki/Friends

مذهب المتعة النفسية Psychological Hedonism

http://www.iep.utm.edu/psychego/

جيرمى بينثام Jeremy Bentham

http://en.wikipedia.org/wiki/Jeremy_Bentham

أحصاء المتعة Felicific calculus

http://en.wikipedia.org/wiki/Felicific_calculus

هيربرت سبنسر Herbert Spencer

http://en.wikipedia.org/wiki/Herbert_Spencer

سيجموند فرويد Sigmund Freud

http://en.wikipedia.org/wiki/Sigmund_Freud

مبدأ اللذة Pleasure principle

http://en.wikipedia.org/wiki/Pleasure_principle_(psychology)

الانوية الأخلاقية Ethical Egoism

http://en.wikipedia.org/wiki/Ethical_egoism

المدرسة الفردانية Individualism 

http://en.wikipedia.org/wiki/Individualism

الفيلسوف الامريكى جيمس راتشيلز James Rachels

http://en.wikipedia.org/wiki/James_Rachels

http://www.jamesrachels.org/

أساليب الأخلاق The Methods of Ethics

http://en.wikipedia.org/wiki/The_Methods_of_Ethics

مذهب المنفعة الاخلاقية Utilitarianism

http://en.wikipedia.org/wiki/Utilitarianism

الفيلسوف الصينى يونج زو Yang Zhu

http://en.wikipedia.org/wiki/Yang_Zhu

الفيلسوف الالمانى فريدريك نيتشة Friedrich Nietzsche

http://en.wikipedia.org/wiki/Friedrich_Nietzsche

كتابة ماوراء الخير والشر Beyond Good and Evil

http://en.wikipedia.org/wiki/Beyond_Good_and_Evil

الفيلسوف الاسكتلاندى الاسدير ماكنتير Alasdair MacIntyre

http://en.wikipedia.org/wiki/Alasdair_MacIntyre

بعد الفضيلة After Virtue

http://en.wikipedia.org/wiki/After_Virtue

الموضوعية Objectivism

http://en.wikipedia.org/wiki/Objectivism_(Ayn_Rand)

الكاتبة والفيلسوفة الروسية الامريكية آين راند Ayn Rand

http://en.wikipedia.org/wiki/Ayn_Rand

فضيلة الانانية The Virtue of Selfishness

http://en.wikipedia.org/wiki/The_Virtue_of_Selfishness

المنبع The Fountainhead

http://en.wikipedia.org/wiki/The_Fountainhead

أطلس مُستهجّن Atlas Shrugged

http://en.wikipedia.org/wiki/Atlas_Shrugged

أطلقت سهم فى السماء I Shot An Arrow Into The Air

http://en.wikipedia.org/wiki/I_Shot_an_Arrow_into_the_Air

منطقة الغسق The Twilight Zone

http://en.wikipedia.org/wiki/The_Twilight_Zone_(1959_TV_series)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s