EP23: Ethics of Care أخلاق الرعاية

Episode 23 + ECN (Egypt Cancer Network) Ad

تخيل أنك واحد من سكان مستعمرة بناها البشر تحت الارض بعد ما التلوث الناتج عن توابع الحرب النووية دمر الحضارة البشرية بالكامل وقتل كل أشكال الحياة على وجهة الارض، الا مجموعة من البشر عايشين معزلوين تحت الارض عشان يحافظوا على الجنس البشري من الفناء ويعيدوا أعمار كوكب الارض! بتسمع من لحظة وجودك عن الجهود البشرية اللى بتم عشان يطهروا اماكن فوق الارض من التلوث وينقلوا البشر الناجيين من تحت الارض لسطح الارض! الجهود دى فعلا نجحت وتم تطهير جزيرة معزولة فوق سطح الارض من التلوث لكن مساحتها مش كفاية لنقل كل سكان المستعمرة، كل يوم قادة المستعمرة بيعملوا قرعة يختاروا فيها واحد من البشر اللى تحت اللى في المستعمرة عشان يطلع يعيش فى النور على سطح الجزيرة! الفوز بالقرعة اصبح حلمك وحلم كل بنى ادم فى المستعمرة عشان يخرجوا من الحياة الصناعية الجافة اللى تحت الارض للنور والهواء الطبيعى! لك صديق بيعمل فى صيانة اجهزة المكيفات اللى بتجدد الهواء فى المستعمرة، متعود انك تزوة وتقضى وقت معاة فى مكتبة او وهو شغال في منطقة عملة عشان تقتل بعض ملل وفراغ الحياة فى المستعمرة! في يوم من الايام هتكون فى واحد من الاروقة الخلفية للمستعمرة فى طريقك انك تزور صديقك قبل ما تلاحظ فراشة كبيرة في الهواء! هتبدأ تفكر ازاي الفراشة دى موجودة اذا كان التلوث قضى على كل الكائنات الحية؟! الشك هيدأ يتكون جواك! لما هتصارح الاخصائى النفسي فى المستعمرة هيقولك ان دى مجرد هلاوس، لكنه هيخدرك ويزرع شر يحة الكترونية فى عينيك بتسجل كل موجات ونشاط المخ! مش هتقدر تقاوم الفضول، هترجع تانى للمكان اللى شفت فية الفراشة ، هتلاقية فى نهاية الممر سلم، هتتسلقة قبل ما تلاقي نفسك فى الدور التانى من المستعمرة عمرك ما شفتة قبل كده! الدور عبارة عن مستشفى كبير مليان بالادوات الطبية، هتسلل لحد ماتوصل لاوضة بيتم فيها عملية جراحية، هتشوف سيدة بتولد طفل صغير وبعد كده الدكاترة بيفصلوا جهاز الاكسجين عنها ويقتلوها .. هتستغرب جدا لما هتشوف الدكتور بياخد الطفل ويدية لست تانية صورة طبق الاصل من الست اللى ماتت من لحظات قبل ماتاخدة وتسيب المستشفى وكأنة أبنها! هتسمع صوت زعيق جاى من بعيد، هتخرج بسرعة من اوضة العمليات هتشوف واحد بيجرى ووراة الحراس قبل ما يقبضوا علية ويرجعوة لأوضة عمليات، هتسلل وراهم وهتشوف الدكاترة بيستخرجوا كبدة قبل ما يمنعوا الاكسجين عنة ويموتة هو كمان! هتبدأ تراقب المكان لحد ما تكتشف ان الحقيقة المرة!

the-island-movie-clones-omvudve5

هتكتشف ان المستعمرة عبارة عن مؤسسة للمستنسخين! بتقدم خدمة استنساخ البشر للأغنياء، الفرد يقدر يستنسخ نفسة ب 5 مليون دولار، والمؤسسة بتقول للزباين بتوعها ان النسخ المُنتجة فى حالة غيبوبة بدون وعي فى انتظار اللحظة اللى هيطلبوا عضو منها! لكن الواقع ان النسخ المُنتجة بيتم استنساخها من خلايا العميل ووضعها تحت ظروف خاصة عشان تكبر وتوصل لعمر النضج خلال 12 شهر! وبعد كده بيبدأوا زراعة واحدة من 12 برنامج مُسجل كذاكرة حياة للنسخة! وبعد كده النسخ بتبدأ تعيش حياتها في المستعمرة وتنحكي لهم قصة الحرب النووية والتلوث والقرعة والجزيرة! لحد ماتيجى اللحظة اللى العميل يحتاج عضو من النسخة، يكسبوا النسخة القرعة ويقتلوة بعد ما ياخدوا العضو اللى محتاجة العميل! الحقايق الجديدة اللى اكتشفتها هترجع وانت مفزوع للمستعمرة! هتدور على صديقتك فى كل مكان عشان تقلها الحقيقة المفزعة اللى اكتشفتها! هتلاقيها مبسوطة جدا وهتقلك ان النهاردة وقع عليها الاختيار فى القرعة واخيرا هتخرج للنور على الجزيرة! هتحكليها تفاصيل اللى اكتشفتة قبل ما تكتشف ان حراس المستعمرة اكتشفوا امرك وبدأوا يطاردكوا! هتهربوا انت الانتين من المستعمرة وهتلاقوا نفسكوا فى واقفين على سطح الارض قدام المستعمرة فى وسط الصحرا! حراس المستعمرة هيطاردوكوا فى الصحرا ، هتحاول بكل استماتة انك توصل للبشري اللى انت نسخة منه، هتكتشف انه حراس المستعمرة بيعرفوا مكانك لانهم زرعوا جهاز التتبع فى عينيك! هتتخلص من جهاز التتبع، وتابع رحلة هروبك مع صديقتك لحد ماتوصل لبيت الانسان اللى انت نسخة منه! هتحكيلة الحكاية بالتفصيل والخدعة اللى بتلعبها المؤسسة وان النُسخ البشرية مش فى حالة غيبوية وانها حية وعندها وعي! الاصل البشرى بتاعك هيطمنك ويقولك انه ماكنش يعرف التفاصيل دى وهيوهمك انه هيكلم الشرطة لكنه فى الحقيقة هيكلم المستعمرة ويتفق معاهم انهم يحضروا كمين عشان يقبضوا عليكوا! هتروح انت وصديقتك مع الاصل البشري بتاعك للمكان اللى قال لك انه امن قبل ماتكتشف الخدعة وتشوف حراس المستعمرة محاصرين المكان، هتحاول الهرب انت وصديقتك لكنهم وراكوا فى كل شارع، ومبنى قبل ما يحاصروك انت وصديقتك والنسخة الاصلية، هتدعي ان انت الاصل وهو النسخة وهو كمان هيدعي نفس الشئ، الحراس مش هيقدروا يحددوا مين الاصل وهيضربوا النار على الانسان الاصلي ويقتلوة! لكن أحساسك بالمسؤولية عن زمايلك فى المستعمرة هيدفك انك ترجع تانى للمستعمرة مع صديقتك فى معركة أخيرة شرسة تنقذوا فيها باقى النسخ البشرية من مصيرها الدموي المحتوم!

بمجرد ما بنقول أخلاق Ethics بنكون أعتقاد ان المصطلح موضوعى Objective بمعنى ان من الممكن تطبيقة بشكل عادل على كل الناس. لكن ياترى هل ده بيعكس الواقع؟! مش من الجايز ان الاخلاق مصطلح متحيز بيعكس مصالح وطرق تفكير مجموعة محددة من البشر .. زى الرجالة مثلا؟! فى الحالة دى من العدالة اننا نسمع وجهة النظر الاخلاقية الخاصة بالجماعة البشرية اللى تم تجاهلها .. الستات! الأخلاق النسوية Feminist Ethics   بتركز بالتحديد على وجهة النظر الاخلاقية الخاصة بالستات. من المهم هنا اننا نلاحظ تكوين رؤى ونظريات بُناء على تجارب الفرد من السهل جدا انه يتحول لتجربة غير عادلة وفى احيان كتير ممكن تأزى جماعة بشرية تانية، بالحجر على بعض حقوقها. عشان تقدر تفهم التحدى اللى بتقابلة مدرسة الأخلاق النسوية فى مجابهة النظريات الاخلاقية التنظيمية التقليدية لابد وانك تفهم الاول تيار حقوق المرأة او التيار النسوي Feminism اللى بتندرج تحت عبائتة الأخلاق النسوية! التيار ده بيمثل مجموعة من النظريات الأجتماعية، والحركات السياسية، والفلسفات الأخلاقية  اللى بتحركها داوفع متعلقة بقضايا المرأة. وبيقف ضد النظريات المتحيزة للرجالة اللى ادت ان المرأة تُهمش marginalized فى المجتمع. أنصار التيار النسوى أو احيانا بيطلق عليهم النسويين Feminists بيحاولوا يحللوا وضع المرأة التاريخى والحالى فى المجتمع، سواء من ناحية الممارسات الشخصية، الاقتصادية، او السياسية عشان يشوفوا ان كانت المرأة بتهمش. يعنى على سبيل المثال واحد من المهام اللى بيقوم بيها النسويين انهم يشوفوا ان كانت المرأة فى مجتمع ما بتحتل مناصب اقل اهمية، سلطة، ثروة، او مركز اجتماعى عن الرجل. فلاسفة النسوية عادة ما بيلفتوا النظر الى ان المرأة تم تهميش دورها فى المجتمعات البشرية بطرق مختلفة، وبدأت مؤخرا تكتسب بعض حقوقها المسلوبة زى مثلا الحق فى الانتخاب والمعاملة الادمية مش على انها مجرد احد ممتلكات الرجل. وكتير من الدراسات الاجتماعية الاخيرة بتبين ان الستات فى الغالب ما بيقبضوا مرتبات أقل من الرجال بالرغم من انهم بيقوموا بنفس الوظيفة! ده بالاضافة لان الرجال بيسيطروا على معظم المراكز القيادية، الاقتصادية، والسياسية، وفى الغالب ما بيكون عندهم أستقلالية أكبر فى السلم الوظيفى والاقتصادى! على النقيض الستات من المتوقع منهم انهم يفضلوا فى البيت عشان رعاية الاولاد والزوج، ويفضلوا مُعتمدين أقتصاديا economically dependent على أزواجهم. كتير من النسويين بيقدموا حلول لمشكلة تهميش دور المرأة، الحلول دى غالبا ما بيطلق عليها تحليل وصفى Prescriptive Analysis لانها بتقدم وصفات لمُمارسات مختلفة لحل المشكلة، يعنى مثلا بعض الحلول بتقترح ان الرجل والمرأة يتشاركوا فى الأعمال المنزلية، وضرورة عمل المرأة، والمساواة فى الرواتب وعدم التحيز بناء على الجنس، وتقليل التركيز على فكرة ان مكان المرأة الطبيعى هو البيت، وتشجيع المرأة على لعب أدوار قيادية، اقتصادية، وسياسية فى المجتمع. تيار حقوق المرأة أو الحركة النسوية Feminism مر بثلاث موجات أساسية، الموجة الاولى بدأت فى القرن التاسع عشر وانتهت مع بدايات القرن العشرين والتركيز الاساسى ليها كان تأمين الحقوق الاساسية القانونية للمرأة، النسويين اشتغلوا فى المرحلة دى على الغاء القوانين والعادات الاجتماعية اللى بتعامل المرأة كأحد ممتلكات الرجل، وكمان ساعدوا الستات فى الحصول على الحق فى التصويت فى الانتخابات.

32625_606170022731124_1886790398_n 5977797 Qasim_Amin

الأديب والمفكر المصرى قاسم أمين كان أول رواد الموجة الاولى لتيار حقوق المرأة فى مصر، والعالم العربى والاسلامى لما نشر كتابة تحرير المرأة سنة 1899 بدعم من أقطاب الاصلاح السياسى والفكرى وقتها الشيخ محمد عبدة، سعد زغلول، وأحمد لطفى السيد. قاسم أمين طرح أفكار مازالت مثيرة للجدل لحد النهاردة فى مجتماعتنا زى فكرة ان الحجاب مش فريضة أسلامية، أو فكرة الفصل بين الرجل والمرأة فى المجتمع بدعوى العفة بدون أصل أسلامى، لكن يمكن الاهم من الافكار الدينية المثيرة للجدل اللى تراجع عن بعضها قاسم امين بعد كده، كانت الثورة الاجتماعية اللى نادى بيها أمين وهى الدعوة لتحرير المرأة وخروجها للمجتمع. الكتاب أثار زوبعة وعاصفة من الاحتجاجات والنقد وقتها خلت زعيم الحزب الوطنى وقتها مصطفى كامل يهاجم قاسم أمين شخصيا ويتهمة بعميل للأستعمار الانجليزى، و رد علية الاقتصادى المصرة طلعت حرب بكتاب “فصل الخطاب فى المرأة والحجاب”،  فى الوقت اللى فية وصلت أفكار قاسم أمين للنضج والرشد فرد عليهم بكتابة الاشهر “المرأة الجديدة” سنة 1901 اللى اهداة لصديقة الزعيم المصرى سعد زغلول وطالب فيه باقامة تشريع يكفل حقوق المرأة الاجتماعية، السياسية، والاقتصادية  .. أنصحك بقرائة العمل الخالد ده فى أقرب فرصة ممكنة. الموجة التانية أمتدت من سنة 1940 لنهاية سنة 1980 وبنت على النجاح العالمى اللى حققتة الموجة الاولى، فى الموجة دى النسويين ركزوا على الجانب الاجتماعى خصوصا فكرة القهر الاجتماعى اللى بتتعرض له المرأة والتعامل مع المرأة على انها مُمتلك جنسى للرجل وازاى الاثار السلبية لقهر المرأة الاجتماعى بتمتد للمؤسسات، المُعاملات الفردية المنظمة للمجتمع.

330px-Necip_Mahfuz نجيب4

الأديب المصرى الكبير نجيب محفوظ الحائز على جائزة نوبل فى الادب سنة 1988 فى عملة الخالد الثلاثية المكونة من ثلاث قصص بين القصرين سنة 1956 ، قصر الشوق سنة 1957، والسكرية سنة 1957 واللى بتعد طبقا لأتحاد كتاب العرب أفضل رواية عربية فى تاريخ الأدب العربى رسم ببراعة فائقة نموذج المرأة المصرية المقهورة والمسلوبة حقوقها فى شخصية أمينة زوجة التاجر المصرى أحمد عبد الجواد. وكانت الثلاثية بمثابة الموجة المصرية، العربية، والاسلامية الثانية فى تحرير المرأة واعادة حقوقها الاجتماعية ليها مرة تانية! فى أعتقادى الشخصى التكوين الثقافى والفكرى لاى قارئ عربى فى حالة ماقبل النضج لحد ما يقرأ الثلاثية! لو ماكنتش لسة قرأت ثلاثية نجيب محفوظ الخالدة .. انصحك بقرائتها فى أقرب فرصة ممكنة. الموجة الثالثة بدأت فى بداية التسعينيات ومازالت مستمرة، الموجة دى دفاعية بتقاوم ردود الفعل المناهضة للنجاحات اللى حققتها الموجة الاولى والتانية!

download Kohlberg

النسويين Feminists بيقبلوا بفكرة ان كل انسان بيشوف العالم من خلال تجاربة الشخصية، لكن مع ذلك بيقاوموا بشدة فكرة التحيز Bias. من المهم جدا اننا نفرق بين تكوين وجهة نظر perspective وتحويل وجهة النظر دى لتحيز Bias. فردين نشأوا فى مكانين مختلفين تماما لو تم وضعهم فى نفس المواقف غالبا ما هيشوفوا الامور بشكل مختلف وهيتصرفوا بشكل مختلف! العقل بيبسط التجارب اللى الفرد بيقابها فى حياتة ويعمم مبادئ وأفكار اساسية بناء على التجارب دى ويطبقها على التجارب المستقبلية، فى الغالب الافراد اللى بتكون ظروف نشأتهم متشابهة بيبسطوا التجارب لأفكار ومبادئ متقاربة ومتشابهة عشان كده افراد المجتمع الواحد غالبا ما بتكون افكارهم، ومبادئهم متشابهة لدرجة كبيرة! التحيز Bias بيحصل لما الفرد يبدأ يبص للافكار والمبادئ اللى كونها من تجاربة الشخصية على انها مفاتيح لأزاى العالم الفروض يكون، بمعنى انه بيتجاهل ان الافكار دى اتكونت بناء على تبسيط عقلة لتجاربة الشخصية فى الماضى ويبدأ يحاول يفرضها على أفراد بتجارب تانية مختلفة فى مجتمعات وظروف نشئة مختلفة. فكرة التحيز دى هى اللى بتقلق فلاسفة النسوية! وبما ان الاخلاق بتركز بشكل محورى على ازى افراد الجماعة بيتعاملوا مع بعض، كتيرمن النسويين بيجادلوا ان تجربة الرجل الحياتية مختلفة بشكل كبير عن تجربة المرأة، وبالتالى طريقتهم فى التفكير هتكون مختلفة بشكل جذرى، وبناء علية طريقتهم فى فهم الأخلاق هتكون مختلفة! عالم النفس الامريكى لورنس كولبرج Lawrence Kohlberg قدم واحدة من أشهر النظريات المعاصرة عن مراحل تطور أخلاق العميل الأخلاقى، كولبرج قدم نظريتة فى التمانينيات المعروفة بأسم المراحل الستة للتطور الأخلاقى The Six stages of Moral Development واللى بتقدم منظومة هرمية لأزاى الناس بتطور منطقها الأخلاقى من درجات أقل تعقيدا لدرجات اكثر تعقيدا. فى دراستة كولبرج أهتم بفهم ازاى منطق الاطفال الاخلاقى بيتطور وينمو عبر الزمن. واعتقد انه اكتشف ست مراحل رئيسية للتطور الأخلاقى، خلال تقدم الانسان فى المراحل دى بيصبح تركيزة على مصالحة السخصية Self-Interests أقل وغير متحيز فى تقييم والأستجابة للمواقف الأخلاقية. هرم كولبرج بيتكون من 3 مستويات رئيسية و6 مراحل فرعية ، كل مستوى بيحتوى على مرحلتين.  المستويات والمراحل دى بالترتيب من سفح الهرم لقمتة: المستوى الأول ماقبل العُرف The pre-conventional  اللى بيقع فى ارضية الهرم او بداية السلم وفى الغالب ما بيكون الفرد فيه انانى Selfish وتركيزة قليل على أهتمامات الاخرين، المستوى ده بيحتوى على مرحلتين، الاولى العقاب والمكافأة Punishment and Reward وهى مرحلة حيوانية من وجهة نظر كولبرج لان الناس فيها بيتصرفوا بطريقة يسعوا فيها للمكافأة وتجنب العقاب! زى بالظبط ما مدرب الحيوانات فى السيرك بيقدر يسطر على تصرفاتهم عن طريق التدريب المستمر بالمكافأة والعقاب. المرحلة الثانية،  مرحلة الفردية والغائية التبادلية Egoism and Exchange Relationships تفكير الفرد فى المرحلة دى بيكون معتمد على المصلحة الشخصية وازاى يقدر يحقق أهدافة داخل العلاقات الاجتماعية. أكيد انت عشت التجربة دى وانت طفل صغير لما كنت بتتشارك مع زمايلك فى المدرسة عشان تستفيد انت كمان سواء فى اللحظة نفسها او فى المستقبل. المستوى الثانى هو مستوى العرف The Conventional Level  فى المستوى دى الفرد بيبدأ بهجرة التفكير الانانى اللى كان مسيطر علية فى المستوى الاول وبيرقى تجاة تفكير فية مصداقية حقيقة فلا الاهتمام بالاخرين. لكن كولبرج بيشير ان بالرغم من ان المستوى الثانى فعلا بيركز على أخلاقيات الايثار الحقيقة والبعد عن الانانية الا ان ده بيتم فى اطار الدوائر الاجتماعية العرفية زى الاسرة، المجتمع، والثقافة اللى الفرد جزء منها. المرحلتين اللى بيتكون منهم المستوى ده هما مرحلة التوقعات الشخصية المتبادلة والعلاقات الشخصية والمسايرة الاجتماعية Fostering Good Interpersonal Relationships فى المرحلة دى الفرد بياخد احتياجات واهتمامات الاخرين فى حساباتة الاخلاقية، الفرد عادة ما بيفكر فى المرحلة دى ان من المهم انه يخلى الاخرين سعداء عن طريق انه يكون صديق كويس، او ابن صالح، او زوجة طيبة، الخ وبالتالى بيقوم بتصرفات تحافظ على العلاقات الداخلية الشخصية فى الدوائر العرفية الاجتماعية. المرحلة الرابعة مرحلة النظام الاجتماعي والضمير Respect for the Rules of the Group التركيز فى المرحلة دى بيتنقل من مجرد التركيز على سعادة الناس المحيطة بية وبيتنقل للضروريات المطلوبة لتكوين مجتمع متناغم أخلاقيا. الفرد فى المرحلة دى بيفكر بشكل مجرد فى القوانين والقواعد الاجتماعية او الخاصة بالجماعة اللى بينتمى ليها. ببساطة دى المرحلة اللى الفرد بيحس فيها ان خرق القانون عمل غير أخلاقى والمفروض ما يعملوش مش لمجرد انه خايف من العقاب. المستوى الثالث والاخير هو مستوى مابعد العُرف The post-conventional level دى قمة الهرم عند كولبرج فيها الفرد بيفكر في واجباتة تجاة الاخرين على انها قواعد مجردة بتسمو لقيم عليا فوق القانون والعُرف. المرحليتن اللى بيتشمل عليهم المستوى دى، مرحلة العقد الاجتماعى Social Contract اللى فيها الفرد بيشوف ان القواعد الاخلاقية اللى ليها قوة القوانين هى اللى بيتفق عليها الغلابية العظمى فى المجتمع ومن غير المقبول خرقها. المرحلة الاخيرة هى الحقوق والعدالة Rights and Justice دى المرحلة الاخيرة اللى بيوصلها الفرد من وجهة نظر كولبرج فى المنطق والتفكير الاخلاقى وفيها التركيز كلة بيكون على العدالة.فيه الفرد عشان يكون مثالى فى تفكيرة الاخلاقى لابد و ان يكون عندة القدرة على فصل نفسة عن الموقف عشان يقدر يشوفة بوضوح، ومن هنا يقدر يشوف ان الناس كلها عندها حقوق طبيعية بناء على قوانين كونية  ممكن توصلها كأنسان من خلال التفكير العقلانى، الجدال، العلاقات، الاحتياجات الشخصية، والثقافة اللى انت جزء منها. واى فعل ضد الحقوق دى بيعتبر فعل غير عادل. النسويين بيشوفوا نظرية كولبرج  كوجهة نظر العدالة فى فهم طبيعة الاخلاق Justice Perspective  لانها بتركز على العدالة كمبدأ كونى بيشترك فيه كل الكائنات العاقلة. واللى بيعتبروة نوع من التجريد فى التفكير الاخلاقى. النسويين شافوا زة ما انت اكيد لاحظت ان هرم كولبرج  قريب جدا من بعض النظريات الاخلاقية التظيمية واللى اتكلمنا عنها فى الحلقات اللى فاتت، على سبيل المثال فكرة القواعد المدعومة بقوانين كونية منطقية تبسيط لفكرة كانط العبقرية الضرورة الحتمية (أرجع لحلقة أخلاق الواجب الجزء الاول) وفكرة التفكير بدون تحيز تبسيط لأخلاق المنفعة اللى قدمها بينثام وميل ( أرجع لحلقة أخلاق المنفعة)  وفكرة العقد الاجتماعى والقوانين المتفق عليها بين غالبية المجتمع تبسيط لنظرية الوضع الاصلى لراؤول ( أرجع لحلقة اخلاق الواجب الجزء الثانى). ومن هنا بيشوف النسويين ان هرم كولبرج الأخلاقى متحيز جدا مش بس فى رؤيتة الشخصية لكن فى رؤية كل الرجالة اللى جمع هرمة نظرياتهم الاخلاقية واللى ممكن تبسيطها كلها على الاقل من وجهة نظر النسويين فى الفكرة دى” الرجالة بيشوفوا الأخلاق ببساطة زى الرياضيات، مجردة، كونية، وغير متحيزة”.

In a Different VoiceGilligan-Carol

فيلسوفة الأخلاق، عالمة النفس، وأحد أهم قادة النسويين المعاصرين كارول جيليجان Carol Gilligan كانت أحد تلاميذ كولبرج ولاحظت التحيز الرجالى الواضح فى هرمة الاخلاقى فجادلت ان التحيز دة مش بس بيوضح الطريقة اللى بيفكر بيها الرجالة، لكنة كمان بيوضح الطريقة اللى الرجالة بيتعاملوا بيها مع طريقة تفكير المرأة فى الاخلاق على انها طريقة غير ناضجة، وشافت ان الهرم الاخلاقى ده بيهمش طرق المرأة فى التفكير بشكل عام! نقد جيليجان لهرم كولبرج الاخلاقى بيعتمد على فكرة محورية وهو ان المرأة بتفكر بشكل مختلف عن الرجل!  الدرسات الحديثة بتقول ان المرأة بشكل عام بتكون علاقات بسرعة ، وبيستخدموا عواطف زى التعاطف والمواساة  empathy and sympathy كجزء من طرق تفكيرهم. المرأة كمان بتتردد فى التفكير بشكل مجرد Abstract لانة بيؤدى انها تفصل نفسها عن علاقتها الشخصية. الرجل على الجانب الاخر بشكل عام بيقدر يعزل نفسة عن الاخرين والموقف خلال مراحل تفكيرة، وكمان فى الاغلب مش بيفكر فى الرعاية Care وبيفكر من حيث القواعد، والمبادئ الغير متحيزة والكونية من حيث قابلية تطبيقها على كل الناس، الرجل بشكل عام بيحط قيمة كبيرة على التفكير المجرد لما بيحلل المواقف، وبيحط قيمة قليلة على عواطف زى التعاطف والمواساة وبيتجاهل ازاى العواطف دى ممكن تكون مرتبطة بالموقف، لانه بيشوف العواطف والمشاعر والعلاقات نوع من التحيز اللى بيقف فى طريق التفكير الاخلاقى السليم. كتير مننا زة معظم الفلاسفة والعلماء مش هيختلفوا حول الفروق دى بين طريقة تفكير الرجل والمرأة لكننا بكل تأكيد هنختلف برضة زى ما الفلاسفة والعلماء أختلفوا ان كانت الفرق فى طريقة التفكير دى بيولوجى Biological راجع للعوامل الجينية والطبيعية زية زى الفرق فى ان الست عندها القدرة على الحمل والرجل لأ او اقوى جسديا لان الطبيعه ادت لتطور الرجل والمرأة طبقا لظروف الحياة الاولى للبشر  ولا الفروق دى أجتماعية Social نتيجة الطرق المختلفة اللى بيتم بيها تربية الاولاد عن البنات والتعامل الاجتماعى معاهم. البنت بيجلها عروسة لكن الولد بيجيلة مسدس، البنت لبسها وردى والولد لبسة غامق، البنت رقيقة لكن الولد ذكى او شاطر، البنت ممكن تعيط لكن الولد لأ، الخ.. او يمكن تكون الفروق فى التفكير راجعة لمزيج من العوامل البيولوجية والاجتماعية! بغض النظر عن سبب الفروق دى بنقدر نشوف ان جيليجان كان عندها حق وان هرم كولبرج الاخلاقى متحيز لان طبيعة التفكير بتختلف من الرجل للمرأة، من الواضح ان طريقة تفكير الرجل المجردة المحكومة بالقواعد والقوانين ممثلة فى قمة هرم كولبرج وطريقة تفكيرالمرأة اللى بتعتمد على العواطف، الرعاية، والعلاقات الاجتماعية ممثلة فى سفح الهرم! جليجان هتشوف ان الترتيب الهرمى اللى استخدمة كولبرج فى ترييب المستويات بيوضح ان بعض المستويات افضل وارقى من التانية بدل ما يشوف ان المستويات ماهى الا طرق مختلفة فى التفكير وده تحيز لأسلوب تفكير الرجالة. كولبرج فى دراساتة أختبرمجموعة من الاطفال وعرض عليهم مجموعة من المعضلات الاخلاقية وسجل ردودهم عليها. خلال التجربة لاحظ ان النتائج بتقول ان فى فروق نمطية فى التفاعل مع المشاكل الاخلاقية دى بناء على الجنس. لاحظ ان البنات تفكيرهم الاخلاقى توقف عند المرحلة التالتة والرابعة، وان البنات عادة ما فكروا فى المعضلات الاخلاقية من جانب حماية العلاقات والمحافظة على الاخرين وعدم ازيتهم! على الجانب الاخر ردود الاولاد كانت فى تناغم مع المرحلة الخامسة والسادسة وركزوا على تطبيق نوع من العدالة، القواعد الخلاقية الكونية العامة الغير متحيزة اللى ممكن تطبيقها فى كل المواقف بغض النظر عن العواطف. جيلجان شافت مشكلة فى هرم كولبرج مش لان البنات تفكيرهم الاخلاقى كان متسق مع المرحلة الثالثة والرابعة لكن لان كولبرج رتب الهرم بالشكل اللى خلى مراحل تفكير الاولاد اعلى فى قمة الهرم. فى اعتقادي الشخصى نظرية كولبرج مش غريبة لكتير من الرجالة  بأختلاف ثقافتهم ومجتماعتهم، لانهم بيشوفوا ان الستات بيبوظوا الامور لما بيتدخلوا فى المواقف الاخلاقية المعقدة لان ماعندهمش القدرة على فصل نفسهم عن الموقف وبيفقدوا رؤية الصورة الكبيرة للموقف، لان العواطف بتخلى من المستحيل عليهم انهم يكونوا غير متحيزين! معظم النسويين مش هيشوفوا التحييز الرجالى الواضح دة فى هرم كولبرج شئ غريب، فى نهاية الامر كولبرج رجل واكيد هيشوف ان اسلوب تفكيرة هو الافضل زى باقى الرجالة. فى كتابها “بصوت مختلف” In a Different Voice سنة 1982 كارول جيليجان هاجمت نظرية هرم كولبرج الاخلاقى وأكدت ان وجهة نظر المرأة لابد وانها تتسمع، لانها مش مسموعة فى اطار النظريات الاخلاقية. وطرق تفكير الرجالة فى موضوع الاخلاق هى السائدة وبتقنن كأفضل طريقة للتفكير الاخلاقى، وطرق تفكير المرأة فى الاخلاق بتصبح خروج عن الطريق القويم اللى رسمة الرجالة. فى الحقيقة عشان الانسان يكون كامل لابد وانه يكون ناضج أخلاقيا، نظرية كولبرج بتتضمن فكرة ان عشان تكون ناضج أخلاقيا لابد وانك تفكر زى الراجل! الامر اللى بيعتبر ظالم لكتير من انصار نظرية حقوق المرأة.

download (1)

أخلاق الرعاية Care Ethics هى النظرية الأخلاقية الاهم فى مدرسة الأخلاق النسوية Feminist Ethics على العكس من النظريات الاخلاقية التقليدية اللى ناقشنها فى الحلقات اللى فاتت من كلام فلسفة اللى بتركز على العدالة، الحقوق، وعدم التحيز، أخلاق الرعاية بتركز على حماية العلاقات القريبة من الفرد. وبتركز على أهمية تطوير مشاعر زى التعاطف والمواساة! المهم أخلاقيا فى أخلاق الرعاية هو ازاى الناس بتتجاوب مع الافراد القريبين منهم والتركيز على احتياجات الاخرين واهتمامتهم والتعامل مع ساعدتهم على انها هدف بدل من عبئ! الفكرة أكيد هتبدو غريبة بالنسبة لك لو كنت ولد! على اى حال عشان تقدر تستوعب الفكرة دى لازم الاول تفهم ازاى الراجل والست بيفكروا فى نفسهم، رؤية الرجل لنفسة غالبا ما بتتبع نموذج بيطلق علية الوحدة المتكاملة للفرد atomic model of selfhood واللى فيه الشخص بيبص لنفسة على انه وحدة متكاملة مستقلة بذاتها ومنفصلة عن الاخرين، الفرد ممكن يصنع علاقات مع الاخرين لكن فى النموذج ده وجود الشخص او النفس مش معتمد بأى حال من الاحوال على الروابط والعلاقات مع الاخرين. من وجهة النظر دى هتشوف الاخرين كخطر بيهددك لانهم كيان مستقل عنك، لان الرؤية دى بتحكم ازاى بتعيش وبتخطط لحياتك، الاخرين كيانات مستقلة عنك وليهم خطط منفصلة عنك وبما ان خطط الاخرين مش خططك بالتالى بيصبحوا منافسين محتملين ليك، فلاسفة النسوية بيشوفوا ان النموذج ده فى التفكير مش بس بيحدد ازاى بتفكر فى نفسك لكن كمان فى الاخرين وعلاقتك بيهم، وبما ان كل شخص مستقل اذن كل شخص وحدة متكاملة مستقلة بتحكم نفسها ومن هنا العلاقات لازم تتحسب بدقة ووعى لان من المحتمل انها تهدد تحكم الشخص فى وحدتة المستقلة.مش معنى كده ان فى النموذج ده مافيش علاقات، لكن العلاقات بتم فى اطار مبادئ أحترام والحفاظ على أستقلالية الفرد. أما رؤية المرأة لنفسها عادة ما بتتبع نموذج الفرد كجزء من علاقة The Self as relational جوهر وجود الفرد فى النموذج ده هو انه جوهريا intrinsically مرتبط بالأخرين! بدل ما تشوف النفس على انها وحدة مستقلة بتشوفها على انها وحدة علائقية او ترابطية ، يعنى بمعنى تانى جزء من مفهوم وجودك هو ارتباطك بوجود الاخرين! تماذج وترابط الافراد فى العلاقات المختلفة دى بيحدد معنى وجود الشخص ونتيجة على كده الاستقلالية والانعزال وقيمتهم بالنسبة للعدالة والحقوق مش أساسية او مركزية زى فى مفهوم الرجل. على النقيض الترابط البشرى هو العنصر الاهم. المرأة ككائن حى بيعتمد على نموذج الفرد كعلاقة بتاخد قرارتها الاخلاقية فى اطار مساعدة الافراد القريبة منها لان دة بيشبع رغبة أساسية Basic need عندها وبيحقق مشاريع، امال، واحلام شخصية عندها.

images

أخلاق الرعاية بتشوف ان العلاقات عنصر أولى  Primary، بمعنى تانى ان الحياة الاخلاقية بتطلب انك تتجاوب مع احتياجات الاخرين القريبن منك بالشكل المناسب اللى يقربهم اكتر منك! وعلى النقيض اى مدارس او افكار بتبعد بينك وبين الاخرين بتعتبر غير أخلاقية! والافكار اللى بتركز على التعميم والانفصال عن الواقع والافراد المحيطة بتلعب دور ثانوى فى أخلاق الرعاية.  الاساس اللى مبنى علية أخلاق الرعاية ان وجود الانسان الاساسى مُعرف بالعلاقات القريبة منه بدون شك بديهى! يعنى مثلا لو كنت أب وجودك مرتبط بوجود اولادك وبتتمنى انهم يكبروا ويصبحوا شئ كبير! وكأبن او ابنة وجودك مرتبط باهلك وبتحاول تخليهم سعداء، ولو كنت زوج اكيد بتتصرف بحنان، عطف، وعطاء مع زوجتك عشان تنمى العلاقة بينكوا!  الخ ..لو كنت شخص بيتصرف بنموذج أخلاقى مبنى على أخلاق الرعاية، بشكل طبيعى انت بتنجذب بحنان وتعاطف للأشخاص اللى فى علاقات قريبة منك، وبتحاول بكل جهد انك تقلل الالم اللى بيمروا بية! خلى بالك ان الاسلوب دة فى التفكير مابيعتدمش على المنطق او العقلانية، انت ما بتتصرفش تجاة الاخرين برعاية عشان دة شئ منطقى لكن عشان ده شئ عاطفى بيدفعك انك تتصرف بالشكل ده. مش معنى كده ان المنطق والعقلانية ممنوعين فى أخلاق الرعاية على العكس ليهم وجود، لكن طرق التفكير اللى بتركز على العواطف، القرب، التعاطف، والعلاقات هى الاساس! فيلسوفة أخلاق الرعاية الامريكية  الأشهر نيل نودينجز Nel Noddings حددت ثلاث طرق الشخص اللى بيتبنى أخلاق الرعاية لابد وانه عاطفيا يحس من خلالها انه مرتبط بشخص اخر: (1) لابد وانه يحس بالرغبة والميل تجاة شخص تانى محدد (2) الرغبة دى لابد وانها تحتوى على شعور تجاة أهتمامات الشخص الاخر (3) ولابد وانه يحس ان الرغبة دى كحمل على كاهلة. لو عاوز تفهم اكتر أخلاق الرعاية فكر فى فى الخلافات اللى كانت بينك وبين أخوك او اختك لما كنت صغير فى اسرتك، فى حل الخلافات او النزاعات دى التركيز ما كنش بيبقى على العدالة او الحقوق! على العكس التركيز كان بيبقى على التأثير السلبى على العلاقات الاسرية اللى بيحصل بسبب النزاعات دى! وبالتالى باقى أفراد الاسرة بيركزوا على انهم ازاى يلموا شمل الاسرة ويحلوا الخلاف ويحموا كيان الاسرة. المثال ده ممكن يوضحلك ازاى أخلاق الرعاية مختلفة فى التعامل مع المعضلات الاخلاقية .. تخيل ان فى زوج مراتة بتموت ومحتاجة دواء معين لكن صاحب الصيدلية عاوز يبيع الدواء بسعر غالى جدا والزوج مش معاة فلوس كفاية فاضطر يسرق الدواء عشان ينقذ زوجتة من الموت! أخلاق الرعاية هتشوف ان فكرة  كفاح الزوج عشان ينقذ زوجتة من الموت أخلاقيا على قدم المساواة مع فكرة السرقة ان ماكنتش اهم! أما فى اى نظرية أخلاقية تنظيمية تانية رجالية ممكن هنتفهم موقف الزوج، لكن التفكير العقلانى هيخلينا نعيد التفكير فى الموقف! لان التركيز هيكون على ان كان السرقة عمل أخلاقى ولا لأ؟ او ام الفرد عندة حق طبيعى فى الحياة؟ وان كان الحق ده فى الحياة بيتعدى حقوق الملكية الفردية للأخرين؟! زى ما انت ملاحظ النظريات الاخلاقية الرجالية بدأت تتعامل مع الموقف بمنطق وتجنبت الجانب العاطفى تماما.

images (3)

فرق جوهرى بين أخلاق الرعاية والنظريات الاخلاقية الرجالية ان اخلاق الرعاية نظرية أخلاقية متحيزة Ethics of Partiality لانها بتركز على حماية العلاقات الشخصية وبتطلب ضرورة  الالتزام تجاة الافراد اللى انت قريب منهم فى حياتك! على الجانب الاخر النظريات الاخلاقية الاخرى بتحط قيمة كبيرة على العدالة وعدم التحيز! يعنى لو فاكر من الحلقات اللى فاتت النظريات الاخلاقية التقليدية زى مثلا أخلاق الواجب بتطلب منك انك تتصرف بعدالة تجاة كل الناس. أخلاق الرعاية هترفض المبدأ ده وتشوف ان وجدنا كأفراد بيتحتوى بالضرورة على علاقتنا بالاخرين وبالتالى واجبنا تجاة الناس القريبة منا هيكون اكبر من واجبنا تجاة الاخرين. لو فاكر من حلقة أخلاق المنفعة ضربنا مثال عن فردين بيقعوا من فوق سطح عمارة واحد منهم أخوك وماتقدرش تنقذ غير واحد بس! أخلاق المنفعة شافت ان من الضرورى انك تطبق قانون تعظيم المنفعة وتنقذ الفرد اللى فرصتة اكبر فى النجاة بغض النظر عن علاقتة الشخصية بيك! اما فى أخلاق الرعاية هتفرض عليك بالضرورة  انك تنقذ أخوك لان علاقتك الشخصية بية بتدفعك عاطفيا انك تاخد مصلحتة الشخصية فى حساباتك! ده كمان بيلفت نظرنا ان أخلاق الرعاية بتحاول تكون أخلاق غير تجريدية non-abstract  لان عشان تقدر توفى احتياجات ومصالح الاخرين القريبين منك لابد وانك تاخد المصالح دى فى حسابك، النظريات الاخلاقية التقليدية بتتجاهل الاحتياجات لانها بتسعى للتجريد Abstraction والتعميم وبالتالى بتقتل فكرة الرعاية تماما! نتيجة ان أخلاق الرعاية بتركز على مواقف محددة بيطلق عليها أخلاق تخصصية particularistic لانك لما تجرد الفعل الاخلاقى من تفاصيلة، وتبعد نفسك عن الموقف بتفقد قيمة الرعاية ودة اللى أخلاق الرعاية بتنصح بعدم فعلة! يعنى مثلا تخيل ان شخص عزيز عليك بيغرق قدامك فى البحر، لو بصيت للموقف ده بشكل مجرد، هتقول “الشخص ده فى موقف بيهدد حياتة”، ويمكن حتى تقول “انسان فى موقف بيهدد حياتة” .. كل ما بتزيد درجة التجرد كل ما بيزيد الانفصال والبعد عن الاخرين اللى فى الموقف. لكن الاخلاق مش عن أفراد مجردة مستقلة عن بعضها لكنها عن علاقات بين ناس حقيقين وجدهم متداخل فى علاقات قريبة مبنية على العطف والتراحم.

Movement

النقد الاول الموجة لأخلاق الرعاية بتركز على ان أخلاق الرعاية غير قابلة للتطبيق فى الاطار الاجتماعى العام ، لان الاطار دة فية ناس كتير بتحتك ببعضها طوال الوقت من غير ما تكون جزء من علاقات قريبة وبالتالى من الصعب ان الواحد يشوف ازاى أخلاق الرعاية هتتعامل فى الاطار ده. واللى ادى بعض الفلاسفة يشوفوا ان من الجايز اخلاق الرعاية للطبيق فى اطار العلاقات الخاصة والقريبة بس. النقد ده قوى جدا، يعنى مثلا فكر فى أستاذ الجامعة اللى بيدى درجات عالية متحيزة لأفراد اسرتة لانه بيتبنى نموذج أخلاقى مبنى على أخلاق الرعاية. التصرف ده واضج جدا انه مش طبيعى وغير أخلاقى وان لابد فى المواقف اللى زى كده نطبق قواعد أخلاقية بتحكمها عدم التحييز، والعدالة! رد فلاسفة أخلاق الرعاية على النقد ده انقسم لمدرستين مدرسة شافت ان أخلاق الرعاية فعلا مش مصممة عشان الاطار العام ولابد من التفريق من الاطار الخاص اللى فيه علاقات شخصية والاطار العام، المدرسة التانية بتقول ان المشكلة هتختفى لو شفنا الرعاية والعدالة مش متضادين، يعنى فى الموقف اللى بتاع استاذ الجامعة فلاسفة أخلاق الرعاية هيجادلوا ان الدرجات لابد وانها تكون على اساس الجدارة مش العدالة او عدم التحييز. لان استاذ الجامعة لو ادى قرايبة درجات بدون حق ده مش بدافع من الرعاية بالعكس ده مضر ليهم ولمستقبلهم، على العكس الرعاية بتفرض علية انه يديهم الدرجات اللى بيستحقوها حتى وان كانت سيئة! النقد التانى بيسأل ان كانت أخلاق الرعاية بتفرض على الناس نها تحافظ على علاقات سيئة. أخلاق الرعاية بتشوف انك المفروض تركز على سعادة الاخرين اللى جزء من علاقة قريبة ليك، لكن ياترى ايه العمل لو كانت العلاقة دى مؤذية؟ او لو كان الشخص الاخر شرير؟ هل مازالت أخلاق الرعاية بتفرض علينا تحقيق رغباتة؟ الفكرة دى شغلت كتير من فلاسفة أخلاق الرعاية وكان فى ردود كتير عليها! لكن يمكن اشهر ردين رد الحب القاسى The tough love واللى عادة ما بيستخدم لما الشخص الاخر بيعاملك بطريقة ما فيش فيها رعاية او حب! الرعاية فى الحالة دى بتفرض عليك أحيانا انك تتصرف بشكل قاسى مع الشخص ده، لان الرعاية مش معناها انك تحقق رغبات الشخص الاخر دائما حتى لو كان بيأذيك او بيأذى نفسة. فكرة الحب القاسى بتشوف ان احيانا القسوة على الشخص او عدم تلبية رغباتة فى حد ذاتة نوع من انواع الرعاية اذا كان بيهدف لتحقيق تغيير فى الشخص الاخر. يعنى على سبيل المثال عقاب الاب لأبنائة لما بيغلطوا نوع من انواع الحب القاسى اللى مدفوع بهدف الاصلاح وبالتالى الرعاية! الرد التانى هو التكامل The integrity اللى عادة ما بيستخدم فى حالات اكثر تطرف من كده، واللى غالبا ما بيتطلب انك تقطع نفسك تماما من العلاقة المؤذية دى اللى مافيش أمل من اصلاحها. عشان تقدر تحافظ على تكاملك كشخص بيعتم برعاية الاخرين احيانا لابد وانك تقطع علاقتك ببعض الافراد! عشان تقدر تستوعب الرد ده لابد وانك توافق ان الشخص اللى بيتبنى أخلاق الرعاية مش بس بيرعى الاخرين لكن كمان لابد وانه يرعى نفسة! انك تصبح او تصبحى نفسيا psychologically او جسديا physically مُنتهك abused فى علاقة غالبا ما هيقود انك تفشل فى انك تستمر تكون شخص بيرعى الاخرين بنجاح. وكنتيجة تكاملك Integrity كشخص بينتهج أخلاق الرعاية هيسقط. اذن الرد بيكون فى المواقف اللى زى دى أخلاقيا من الجائز انك تتخلى عن العلاقات اللى من النوع دة، بغض النظر عن الالم الناتج عن الفعل ده. النقد الاخير الموجه لأخلاق الرعاية هو ان كان نموذج أخلاق الرعاية بيأكد الصور النمطية التقليدية traditional stereotypes عن ازاى المرأة بتفكر! لسنين طويلة الستات حاربوا ضد وضعهم فى فى قالب النعومة soft، الحنان Loving، والعواطف Emotional ودلوقتى أخلاق الرعاية بتقضى على كل ده وبتدعى ان الستات فعلا بيفكروا بالطريقة دى! وبالتالى من الضرورى ان الواحد يتسائل ان كانت أخلاق الرعاية بتأذى الستات لانها هتساهم فى تهميش المرأة فى المجتمع!  من هنا بتظهر مشكلتين فى فلسفة أخلاق الرعاية الاولى هى التعميم على كل الستات فى اسلوب تفكيرهم، الستات مجموعة متنوعة من البشر بتجارب مختلفة جذريا سواء فى الطبقة، الثقافة، العرق، الخ .. فمجرد ان أخلاق الرعاية بتفرض ان المرأة بتفكر دائما من حيث الرعاية بيتجاهل الفروق دى! المشكلة التانية لو فعلا الستات بيفكروا دائما بدافع من الرعاية الواحد ممكن يجادل اذن من الطبيعى اننا نشجع المرأة انها تاخد ادوار اجتماعية تتناسب مع طريقة تفكيرها واللى فعلا بتسمعة من كتير من الطوائف والجماعات الدينية فى مجتماعتنا الشرقية على سبيل المثال! وأحد الاسباب الرئيسية ان لحد فترة قريبة جدا كان غير قانونى ان أمرأة تكون قاضى فى مصر، او تكون رأس الكنيسة، او امام المسجد، الخ. على اى حال رد فلاسفة أخلاق الرعاية على النقد ده هيكون بالتركيز على تقليل الربط بين المرأة وأخلاق الرعاية من حيث الفطرة، الطبيعة، او العوامل الجينية! لكنهم بيحاولوا يربطوها بالعوامل الاجتماعية والتربوية! وده عشان يدوا فرصة للنسوين انهم يقاوموا الضغط والاجبار اللى المجتعات الذكورية بتفرضة على المرأة عشان تلعب ادوار محددة فى المجتمع. ومن هنا بينفتح الباب لأخلاق الرعاية لانها تكون مقبولة بشكل عام كنموذج أخلاقى للرجل والمرأة على حد سواء. فلاسفة النسوية عاوزين أخلاق الرعاية تكون الطريق للتعامل مع المشكلة الاخلاقية عند البشر، او حتى يمكن تكون أسلوب حياة! مش مجرد طريقة تفكير مرتبطة بازاى شخص ما او جنس ما بيفكر.

51bA8Cfl6TL._SY344_BO1,204,203,200_

الحركات الاجتماعية Social Movements اللي بتركز على فكرة أخلاق الرعاية فى تزايد مستمر! سنة 2000 ديبرا ستون Deborah Stone أستاذ علوم الفلسفة والاجتماع بجامعة MIT دعت لحركة قومية فى الولايات المتحدة الامريكية لجذب الانتباة للحاجة الملحة لبرامج اجتماعية للرعاية Social Programs of Care زي منظومة تأمين صحي قومية National Health Care، منظومة تعليم أولى، منظومة رعاية للكبار، وتطوير انظمة الحضانة، ورفع دخول العاملين فى مجال الرعاية بشكل عام. سنة 2006 موريس هامنجتون و دروثى ميللر Hamington and Dorothy Miller قدموا مجموعة من المقالات في كتاب بعنوان تعميم الرعاية: الأخلاق النسوية والقضايا العامة Socializing Care: Feminist Ethics and Public Issues  واللى ركزوا فيها على التحليل النقدى النظري وتطبيقات أخلاق الرعاية فى الحياة العامة، وغطوا مجموعة واسعة من المواضيع زي الشؤون الاجتماعية welfare، زواج المثليين Same-Sex Marriage، العدالة التصالحية restorative justice، عولمة الشركات corporate globalization، وحركة امهات القرن الواحد والعشرين the 21st century mother’s movement. الوقت اضيق هنا من انى اناقش الافكار دى من وجهة نظر فلاسفة أخلاق الرعاية (لكن انصحك بقرائة كتاب هامنجتون و ميللر لو حابب تتعرف اكتر على أفكارهم). بالاضافة لكدة فى مجموعة من المؤسسات السياسية الرسمية المختصة بالرعاية معظمها متواجد على الانترنت، وبتنصب معظم افكارها حول أفكار بتندرج تحت أطار الرعاية فى المجتمع زى الامومة Motherhood، الابوة Fatherhood، الرعاية الصحية Heath care، صحة الاطفال، حركات المرأة الاجتماعية، حركات حقوق المثليين، حقوق ذوى الاحتياجات الخاصة، رعاية الكبار،  والرعاية  كمهنة بشكل عام. المؤسسات دى بتشتغل على نشر الوعي، تنظيم المدافعين عن أخلاق الرعاية حول القضايا الاجتماعية الاساسية، وتكوين كتلة تصويتية فى الانتخابات!

النظرية الاخلاقية المعروفة بأسم أخلاق الرعاية The Ethics of Care بتقدم أطروحة ان فى قيمة أخلاقية ما فى العنصر الاساسى للعلاقات الاجتماعية في حياة البشر. بشكل تنظيمي، أخلاق الرعاية بتحاول تحافظ على العلاقات الاجتماعية عن طريق دعم وتقويم مُقدمى الرعاية Care Givers ومُستقبلي الرعاية Care Receivers فى شبكة العلاقات الاجتماعية. عادة فكرة أو فضيلة الرعاية بتشمل فكرة تلبية احتياجاتنا واحتياجات الاخرين. وبتبنى على دافع رعاية الاخرين الاضعف او المحتاجين لينا.

القصة اللى بدأنا بيها مقتبسة عن فيلم الخيال العلمى الامريكي الجزيرة The Island اللى قدمة مخرج الخيال العلمى المشهور مايكل باي Michael Bay سنة 2005. واللى حاولت من خلالة أطرح عليك فكرة أخلاق الرعاية فى صورة خيالية لكنها مش بعيدة عن الواقع البشري اللى بنعيشة كل يوم في حياتنا! بالرغم من ان فكرة تكوين مستعمرات من المُستنسخين من البشر فكرة عملية هتساعد الجنس البشري انه يعيش فترات طويلة، وهيساعدنا اننا نحقق أكبر قدر ممكن من الرعاية للناس المقربين منا لاننا هنقدر نوفر اعضاء بشرية مُستنسخة منهم في اى وقت يحتاجوها! فلاسفة الرعاية هيشوفوا ان المستعمرة فكرة عبقرية لان العلاقات البشرية القريبة هى الاهم وهى محط الاهتمام والاولية فى اى قرار اخلاقى! لوام بتنقذ ابنها من الموت او توابع حادثة او ابن بينقذ ابوة او امة من مرض خبيث باستخدام النُسخ البشرية اللى فى المستعمرة أكيد ده هيكون عمل أخلاقى لانة بيساعد على تقوية العلاقات البشرية دى وتحقيق احتياجات الناس القريبة  فيها! لكن هل فعلا نظرية أخلاق الرعاية أخدت كل الجوانب الانسانية في حسابها زى العدالة والحقوق؟! صحيح النسخ دى مش بالضرورة على نفس المستوى البشرى لكن فى النهاية اكيد ليها نوع من الحقوق وبينطبق عليها نوع من العدالة! لكن هل فلسفة الرعاية فعلا عندها القدرة على المحافظة على العلاقات الاجتماعية ونقلها فى لصدارة القرار الاخلاقي، بجانب الحفاظ على الحقوق وميزان العدالة فى المجتمع!

ودلوقتى .. فكر فى القرارات الاخلاقية اللى بتاخدها كل يوم فى حياتك وبتتعلق بانسان عزيز عليك! … هل علاقتة الشخصية بية كافية انك تديلة افضلية على باقى الافراد في المجتمع؟ .. وهل تحقيق الرعاية للمقربين منك هو فعلا نقيض العدالة؟ .. ولو كانت الرعاية ليها أولية على الحقوق الاجتماعية العامة ازاى هنقدر نحقق اى قدر من العدالة فى المجتمع؟! .. ولو فعلا المرأة ليها منظور منظور مختلف للأخلاق عن الرجل، هل من العدالة ان النموذج الاخلاقي للمجتمع يحتكر تصميمة الرجل؟ .. فكر تانى

Download MP3:https://app.box.com/s/2wsy12fyp5qv7rnpq8xew9gd923ox9w8

فى الحلقة الجاية …  هنرجع في الزمن لعصور النهضة العربية! وصلة من الزمن بين الواقع والخيال، فيها بشر القدر بيحدد مصيرهم، وبشر الشر بيكون مصيرهم! … عن القضاء والقدر، الروح، أشكالية الشر، والفرابي .. هنتفلسف المرة الجاية

من دلوقتى للحلقة الجاية .. عيش الحياة بفلسفة

زود معلوماتك:

الأخلاق النسوية Feminist Ethics

http://en.wikipedia.org/wiki/Feminist_ethics

التيار النسوي Feminism

http://en.wikipedia.org/wiki/Feminism

قاسم أمين

http://en.wikipedia.org/wiki/Qasim_Amin

نجيب محفوظ

http://en.wikipedia.org/wiki/Naguib_Mahfouz

الثلاثية

http://en.wikipedia.org/wiki/Cairo_Trilogy

عالم النفس الامريكى لورنس كولبرج Lawrence Kohlberg

http://en.wikipedia.org/wiki/Lawrence_Kohlberg

المراحل الستة للتطور الأخلاقى The Six stages of Moral Development

http://en.wikipedia.org/wiki/Lawrence_Kohlberg%27s_stages_of_moral_development

كارول جيليجان Carol Gilligan

http://en.wikipedia.org/wiki/Carol_Gilligan

أخلاق الرعاية Care Ethics

http://en.wikipedia.org/wiki/Ethics_of_care

نيل نودينجز Nel Noddings

http://en.wikipedia.org/wiki/Nel_Noddings

الجزيرة The Island

http://en.wikipedia.org/wiki/The_Island_%282005_film%29

One thought on “EP23: Ethics of Care أخلاق الرعاية

  1. Pingback: Ethics Series سلسلة فلسفة الأخلاق | kalam Falsfa كلام فلسفة

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s