Ethics Series سلسلة فلسفة الأخلاق

Ethics Series سلسلة فلسفة الأخلاق

علم فلسفة الأخلاق بيبحث فى تقنين، تعريف، وصياغة مفهوم الصواب والخطأ للتصرفات والافعال البشرية. الفلاسفة النهاردة عادة ما بيقسموا النظريات الاخلاقية لثلاث مواضيع عامة: مارواء الاخلاق اللى بتبحث فى ماهية القواعد والقوانين الاخلاقية و بتوصل لنا من اى مصدر؟ هل هى مجرد جزء من المنظومة الاجتماعية؟ ولا فيها مكون علوى او سماوى؟ اللى بيضطر فلاسفة الاخلاق بالضرورة انهم يبحثوا فى ماهيى الحقائق الكونية، ارادة الله، وعلاقة المنطق بالاخلاق. الأخلاق التنظيمية مهمتها أكثر عملية وهى الوصول لمعايير أخلاقية تنظم التصرفات الصح والغلط لكل الناس! سواء ده كان عن طريق قوانين ألزامية او توصيات اجتماعية، وأخيرا الاخلاق التطبيقية اللى بتحاول تركز على مشاكل أخلاقية محل خلاف فى كتير من المجتمعات الانسانية زى الاجهاض، حقوق الحيوان، الحرية الجنسية، العقاب المجتمعى، الحروب النووية، الخ.

*    *    *

EP15: The Intrinsic Value القيمة الجوهرية 

تفتكر فى قيمة نهائية جوهرية لذاتها مبنى عليها الهيكل الاخلاقى فى حياتك؟ … ياترى هل القيمة دى هى المتعة؟ .. ولو كانت المتعة هى جوهر السعادة .. هل هتختار اقصر طريق يوصلك لأكبر قدر من المتعة بغض النظر عن التبعيات؟ .. ولا يمكن تكون القيمة دى هى الفضيلة .. وساعتها هل هتكون مستعد انك تضحى بمتعتك .. أو حتى حياتك نفسها فى سبيل الفضيلة؟

Read More

Download MP3: https://app.box.com/s/mnzp09ionsx2uixh8cl2

*    *    *

EP16: The Problem of Egoism أشكالية الآنوية 

تفتكر الدوافع اللى ورا كل قرارتك وافعالك ذاتية نابعة من مصلحتك الشخصية؟ وهل الدوافع الذاتية هى فعلا المحرك ورا كل أفعال التكافل الاجتماعى والمساعدة اللى بتقدمها للأخرين؟ .. هل فى فعل واحد فى حياتك الدافع وراة ماكنش مصلحتك الشخصية؟ .. حتى وان كان العائد هو مجرد لحظة من الزهو او الشعور بالسعادة .. ياترى هل القانون الاخلاقى اللى بيحكم تصرفاتك وقرارتك هو ايثار المصلحة الذاتية؟ .. وتفتكر ليه مصلحتك الذاتية فوق مصلحة الاخرين؟ .. ولو مصلحتك الذاتية مش هى الاولوية الاولى.. هل انت مستعد تضحى باهدافك، سعادتك، او يمكن حتى حياتك فى سبيل الاخرين؟

Read More

Download MP3: https://app.box.com/s/hv0ke31dgwuj533t8wvu

*    *    *

EP17: The Nature of Moral Judgments 1 طبيعة الأحكام الأخلاقية  

ياترى ايه الاساس اللى بتبنى عليه احكامك الاخلاقية؟ .. هل بتبنيها على حقايق أخلاقية مستقلة؟ .. لكن ايه هى طبيعة الحقايق الاخلاقية دى؟ وموجودة فين؟ .. ولا يمكن تكون بتأسسها على مطلقات أخلاقية ثابتة غير قابلة للتغيير؟ .. بس هل فكرت ان من الممكن تكون عواقب الحكم الاخلاقى اهم من تطبيق المطلق الاخلاقى نفسة؟ .. وجايز يكون أساس أحكامك الاخلاقية هو مشاعرك وتفضيلات الشخصية! ..بس ازاى هتطور أخلاقيا، لو كل شئ بالنسبة لك مجرد لعبة حظ .. ملك أو كتابة؟!

Read More

Download MP3: https://app.box.com/s/i2u1gohpaarhjgjxds7l

*    *    *

EP18: The Nature of Moral Judgments 2 طبيعة الأحكام الأخلاقية 

فكر فى القرارات والاحكام الاخلاقية اللى أخدتها خلال حياتك … فكر فى التناقضات اللى بينك وبين الاخرين وقت صنع القرارات الاخلاقية .. ياترى ليه قراراتك الاخلاقية هى الاصح؟ … ده ان كانت طبيعة الاحكام الاخلاقية بتحمل الصواب والخطأ من الاساس؟ .. لكن لو ماكنتش طبيعة الاحكام الاخلاقية بتحمل حقيقة ما فى محتواها! .. ازاى ممكن نحل خلافتنا الاخلاقية؟ .. ولو مافيش مطلق أخلاقى نرجعلة أنا وانت لما نختلف فى حكم أخلاقى ما! .. ياترى حال الثقافات، المجتمعات، والدول هيكون ايه؟

Read More

Download MP3: https://app.box.com/s/1fowxvzwe3rn33lhmnfs

*    *    *

EP19: Virtue Ethics أخلاق الفضيلة 

فكر فى تصرفاتك وسلوكياتك خلال مراحل حياتك المختلفة … ياترى السعى ورا الفضيلة وتجنب الرذيلة كان هو مهنج حياتك؟ .. ياترى البيئة اللى نشأت فيها كانت عامل مساعد فى تمهيد الطريق لارادة الفضيلة جواك؟ .. ولو ماكنتش محظوظ ببيئة مساعدة فى تكوين شخصية فاضلة، هل ياترى التمرين والممارسة المستمرة كفاية لتكوين الفضيلة عندك؟ .. وياترى الفضيلة مجرد عادة مطبوعة فى خلايا مخك مالكش تحكم او سيطرة عليها؟ .. وهل فعلا الفضيلة هى مفتاح الحياة السعيدة؟

Read More

Download MP3: https://app.box.com/s/winfz05g9m9y4e127s06

*    *    *

EP20: Deontology 1 أخلاق الواجب 

فكر فى المرات اللى اضطرت تكدب فيها عشان تغطى على صاحبك فى الفصل، او اخوك فى البيت، او يمكن زميلك فى الشغل .. او المرات اللى اضطريت تخلف فيها بوعد عشان مصلحة شخصية .. او المرات اللى زوغت فيها من دفع تذكرة المترو او الاتوبيس .. ياترى الالتزام بالواجب الاخلاقى شئ ممكن دايما تحت كل الظروف؟ … ولو كانت نتيجة الالتزام بالواجب الاخلاقى ده مضرة ليك .. هل بيصبح وقتها ضرورى؟ .. ولو ماكنش الالتزام ده ضرورى، ياترى هيكون ايه حال العالم اللى بنعيش فيه لو كل الناس اتصرفت زيك؟! … وهل فعلا الواجبات الاخلاقية مصدرها العقل والمنطق؟ .. ولا ليها مصدر تانى أعلى من قدراتنا

Read More

Download MP3: https://app.box.com/s/oh1l8zj75juf474020rl

*    *    *

EP21: Deontology 2 أخلاق الواجب 

نظرية أخلاق الواجب بتفترض ان فى خواص مميزة فى القاعدة الاخلاقية نفسها بتديها القوة  الالزامية اللى بتفرضها علينا كبشر، القوة الالزامية دى ممكن يكون مصدرها العقل والمنطق زى ما  ايمانيول كانط تصور فى نظرية الضرورة الحتمية، او ممكن يكون مصدرها سماوى خارق للطبيعة  طبقا لنظرية الامر الالهى، او مصدرها الهروب من الطبيعة الاولى للبشر زى ما توماس هوبز تصور  فى نظرية الحقوق الطبيعية،او يمكن يكون مصدرها مجرد عقد اجتماعى بنصيغة لحظة تكوين  المجتمع، او مجرد مجموعة من التوجيهات الاساسية اللى بيفرضها علينا العقل والمنطق زى ما  ديفيد روس جادل فى نظريتة! اياكان المصدر أخلاق الواجب بتفترض ان القواعد، القوانين، والقيم  اللى في حياتنا ليها قوة الزامية مهمة لفرض حالة من النظام فى حياتنا، وخلق اطار اجتماعى  يسمح لينا كبشر بالتعايش المشترك!

فكر فى القوانين والقواعد الاخلاقية اللى بتبنى عليها أحكامك الاخلاقية كل يوم، ياترى القواعد ليها  طبيعة الزامية فى ذاتها؟ ولا لأنها جزء من التركيبة الجينية بتاعتك؟ّ .. أو جايز تكون طبيعتها  الالزامية مُستمدة من مصدرها سواء كان المصدر ده الهى او انسانى؟ .. لكن لو كانت القواعد دى  الزامية بسبب مصدرها، ايه اللى يضمنلك ان المصدر ده مش هيغيرها فى اى وقت؟ .. وايه اللى  بيدى المصدر دهصلحيات فرض القواعد دى؟ .. وياترى اي نوع من القواعد بينطبق على المصدر  نفسة؟ .. وهل فعلا حالة الطبيعة الاولى عندك زى باقى البشر هى الصراع؟ .. ولا الخير هو  والتعايش هو جوهرك؟ .. وهل ممكن تقدر تتعايش مع أصحابك، جيرانك، وأهلك من غير قيم، قواعد، وقوانين منظمة؟ … من غير عقد أجتماعى؟ .. ولا حياتكوا هتبقى فوضى؟! .. فكر تانى!والمنطق؟  .. ولا ليها مصدر تانى أعلى من قدراتنا العقلية؟

Read More

Download MP3: https://app.box.com/s/e4uvgd06w4uqyt8fxmij

*    *    *

EP22: Utilitarianism أخلاق المنفعة 

أخلاق المنفعة فكرة بسيطة بتقول ان قيمة الفعل الأخلاقية بتتحدد بس بُناء على المنفعة العامة اللى بيساهم بيها الفعل فى تعظيم السعادة أو المتعة لأكبر عدد ممكن من الناس! المنفعة الكلية هنا هى جوهر الفعل الأخلاقى، أكبر قدر ممكن من السعادة لأكبر عدد ممكن من الناس! المنفعة اللى اتسمت النظرية بيها، هى مقياس أقتصادى للأشباع النسبى ، او الرغبة فى أستهلاك السلع، وعشان كده نقدر نقول ان أخلاق المنفعة منهج كمى أختزالى للأخلاق. أخلاق المنفعة بدأت من فكرة أساسية وهى ان السعادة او المتعة قيمة جوهرية  وان اى شئ تانى مجرد سلعة وسيطة  بغرض تعظيم السعادة، لكن ياترى هل المنطق الاختزالى دى كفاية لصناعة الفعل الاخلاقى؟!

فكر فى القرارات الأخلاقية اللى اخدتها مؤخرا .. هل قيمة القرار الاخلاقى مجرد قيمة فى تبعياتة؟ .. أو يمكن فى المنفعة اللى بيسببها الفعل؟ .. هل من الممكن وضع قيمة رقمية على كل فعل بناخدة فى حياتنا؟ .. أو أستخدام منطق كمى لحساب المنفعة الناتجة عن الفعل؟ .. وياترى اية النموذج الاخلاقى اللى المفروض نصمم كائنات الذكاء الاصطناعى بُناء علية؟ .. هل تعظيم المنفعة قانون كافى لصناعة ألالات أخلاقية؟ .. حتى وان كان تمن تعظيم المنفعة فى يوم من الايام هو  التضحية بالجنس البشرى!؟

Read More

Download MP3: https://app.box.com/s/kru3gy4yj6h7szhdbfqw

*    *    *

EP23: Ethics of Care أخلاق الرعاية 

النظرية الاخلاقية المعروفة بأسم أخلاق الرعاية بتقدم أطروحة ان فى قيمة أخلاقية ما فى العنصر الاساسى للعلاقات الاجتماعية في حياة البشر. بشكل تنظيمي، أخلاق الرعاية بتحاول تحافظ على العلاقات الاجتماعية عن طريق دعم وتقويم مُقدمى الرعاية ومُستقبلي الرعاية فى شبكة العلاقات الاجتماعية. عادة فضيلة الرعاية بتشمل فكرة تلبية احتياجاتنا واحتياجات الاخرين. وبتبنى على دافع رعاية الاخرين الاضعف او المحتاجين لينا

فكر فى القرارات الاخلاقية اللى بتاخدها كل يوم فى حياتك وبتتعلق بانسان عزيز عليك! … هل علاقتة الشخصية بية كافية انك تديلة افضلية على باقى الافراد في المجتمع؟ .. وهل تحقيق الرعاية للمقربين منك نقيض العدالة؟ .. ولو كانت الرعاية ليها أولية على الحقوق الاجتماعية العامة ازاى هنقدر نحقق اى قدر من العدالة فى المجتمع؟! .. ولو فعلا المرأة ليها منظور مختلف للأخلاق عن الرجل، هل من العدالة ان النموذج الاخلاقي للمجتمع يحتكر تصميمة الرجل؟

Read More

Download MP3: https://app.box.com/s/2wsy12fyp5qv7rnpq8xew9gd923ox9w8

*    *    *

EP24: Ethics in Islamic Philosophy الأخلاق فى الفلسفة الأسلامية 

فكر فى لحظات الحزن اللى مرت عليك فى الماضى .. هل ياترى الحزن شر مدفوع؟ .. وهل السعادة هى غاية الخير الجوهرية؟ .. وهل فعلا الأخلاق مجرد طباع وجزء من فطرة البشر؟ ..لو فعلا الفطرة هى العامل الاساسى وراء أفعالنا الاخلاقية، أزاى ممكن ندفع الفساد فى الارض؟ .. وازاى ممكن نحاسب البشر على فطرتهم؟ .. ومش جايز يكون هو ده سر الحياة، صراع دائم بين العقل والفطرة
المشكلة الأخلاقية حظت بأهتمام ضئيل فى الفلسفة الاسلامية، لان فلاسفة الاسلام كانوا مشغولين بقضايا ميتافيزيقية وجودية أو معرفية. وكتير من الدارسين والمحللين بيشوفوا ان موضوع الاخلاق ما شكلش مشكلة عويصة من وجهة نظر مفكرى الاسلام الاوائل، عشان يحطوا فيها جهد من الاساس!

Read More

Download MP3: https://app.box.com/s/c8uy8866fg2vzl8mpwmpr9wk85i0dm0a

*    *    *

EP25: Anti-Ethics ضد الأخلاق 

فكر فى قراراتك الاخلاقية، هل ياترى قراراتك الاخلاقية اللى كنت فيها رحيم، او متعاطف مع الاخرين قرارات أخدتها بمنطق ضعف؟ .. بناء على أخلاق العبد زى ما نيتشة تصور! .. هل الاخلاق فعلا ممكن يكون تأثيرها سلبي و تأثر على علاقتك بالله؟ .. ولو أتحطيت فى أشكالية أخلاقية زى محنة أبراهيم ابو الانبياء وامر الله له بقتل ابنه … هل ياترى هتختار انك تنفذ الاوامر الالهية وتكسر القواعد الاخلاقية؟ .. ولا هتبدى القواعد الاخلاقية على الاوامر الالهية؟ وتصبح الاخلاق هى الهك! .. وهل الاخلاق فعلا ضد حالة الطبيعة؟ .. وهل ممكن الخير يتواجد ابدا من غير الشر؟ .. ولا الخير والشر متلازمة مستحيل حلها؟!
عبر التاريخ بعض المفكرين رفضوا فكرة الاخلاق التقليدية، ونقدوا فكرة الأخلاق فى صورة قوانين، قواعد، ومعادلات! الاشكاليات اللى شافها المفكرين والفلاسفة الناقدين للفلسفة بشكلها التقليدى متنوعة  وكتيرة، بعضها اتركز حول ان كانت الاخلاق فكرة محايدة ولا متحيزة، ونقد تانى ركز ان كانت الاخلاق ليها الصلاحية الكونية الللى بتدعيها، ونقد تالت ركز ان كانت الاخلاق بتساعد الانسان فعلا انه يعيش  حياتة بنزاهة وتكامل!

Read More

Download MP3: https://app.box.com/s/sqkwqe40p0iu15aq96v9zhujlouel6sq

*    *    *

على مدار عشر حلقات فاتوا بدأناها مع بداية الموسم الثالث فتحنا موضوع الاخلاق، ناقشنا مدارس ونظريات ماوراء الاخلاق، النظريات الاخلاقية التنظيمية، ومفهوم الاخلاق عبر العصور المختلفة من فلسفة الشرق، للأغريق، للفلسفة الاسلامية، والفلسفة الغربية الحديثة، وختمنا رحلتنا بالمدارس الفلسفية الناقضة لفكرة الاخلاق التقليدية! هنرجع لموضوع الاخلاق فى حلقات مستقبلية هنركز فيها على تطبيق الاخلاق فى المجتمعات، او اللى احيانا بيطلق علية الأخلاق التطبيقية.

Ethics Series: http://goo.gl/438B7V

فى الحلقات الجاية .. هنفتح موضوع جديد، هنتكلم عن فلسفة ماوراء الطبيعة Metaphysics، هنسأل عن طبيعة الواقع؟ .. العلاقة بين العقل والمادة؟ .. الطبيعة المادية للوجود؟ .. طبيعة الوقت؟ .. وهل الله فعلا موجود؟ .. وهل هو واحد ولا أكتر من اله؟ … عن الوجود، الطبيعة … الله … الوقت .. والكون .. هنتفلسف المرة الجاية!

من دلوقتى للحلقة الجاية .. عيش الحياة بفلسفة

3 thoughts on “Ethics Series سلسلة فلسفة الأخلاق

  1. حقيقة جزاك الله كل خير .. لكني بقترح على حضرتك تسهيلا ممكن تنزل الحلقات في صوره كتب pdf اذا امكن

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s