EP02: كهف أفلاطون Plato’s Cave


تخيل أنك أسيرمن لحظة ميلادك، مسجون طول حياتك فى كهف ضلمة! أيدك ، رجيلك وراسك متقيدين بحيث انك ماتقدرش تبص غير على الحيطة اللى قدامك. وراك شعلة نار، وبينك وبين النار طريق بيمشي فيه السجانين الللي مقيدينك أنت وباقى زمايلك المساجين، السجانين بيعدوا وراكوا وهما شايلين تماثيل لحيوانات، نباتات، وحاجات تانية بتشوفوا خيالتها المنعكسة على الحيطة اللى قدامكوا.. الخيالات دى هي كل شئ شفتوة وعرفتوة خلال حياتكوا، هي تقريبا حصيلة المعرفة اللى كونتها انت والمساجين التانيين طول العمر ما تعرفوش ومابتتكلموش اوحتى تفكروا فى اى حاجة غيرها!

دلوقتى تخيل أن السجان فك قيودك واطلق سراحك حر طليق، تقدر تمشى في الكهف وتكتشف جوانبة. فى البداية شعلة النار هتزغلل عينيك اللى متعودة على انعكاس الضوء ومش متعودة على ضوء الشعلة الشديد! مش بعيد ترجع تانى تقعد جنب زمايلك قدام الحيطة … بس شوية بشوية هتبدأ تشوف أفضل وهتفهم الموقف داخل الكهف، دلوقتى هتقدر تفهم الخيالات اللي كنت بتشوفها على الحيطة أنت وزمايلك المساجين وكنتوا فاكرينها واقع مصدرها ايه. بعد شوية رجلك هتاخدك خارج الكهف للعالم الخارجي وضوء الشمس، وهتشوف حقيقة الاشياء كاملة وظاهرة تحت ضوء الشمس الباهر فى السما!

بعد اكتشافك لحقيقة الكهف، العالم الخارجي والاشياء، مدفوع بضياء المعرفة الجديدة هترجع الكهف تانى بسرعة علشان تقول لزمايلك اللى لسة مسجونين عن حقيقة الخيالات اللى شايفنها على الحيطة ومصدرها، عينيك أتعودت على ضوء الشمس خارج الكهف هتتكعبل فى الطريق داخل الكهف الظلمة اكتر من مرة قبل ماتوصل لزمايلك المتقيدين قدام الحيطة .. هتتخبط فى الظلمة وانت بتشرح لزمايلك المساجين عن الحقائق اللى اكتشفتها …. تفتكر هيكون رد فعل زمايلك ايه بعد ماتحكيلهم عن حقيقة الكهف، الخيالات، والعالم برة الكهف؟

Plato's Cave

رمزية قصة الكهف تعبر واحدة من أشهر الرمزيات اللى استخدمها الفيلسوف الاغريقي أفلاطون، واللى أستخدمها للمرة الاولى فى الكتاب السابع من الجمهورية The Republic العمل الخالد اللى حاول اتكلم فيه عن الجمهورية المثالية وحاكمها المثالى أو زي ما أطلق علية أفلاطون ” الملك الفيلسوف”. مبرر أفلاطون في انه نصب الفلاسفة فى جمهوريته أولياء الامر واصحاب القرار كان مبنى على دراسة مفصلة فى كتابة للفكرتي الحق ،الفضيلة، والمعرفة .. وفي الاطار ده استخدم أفلاطون قصة الكهف الرمزية.

جمهورية أفلاطون Plato - The Republic

فى الجمهورية أفلاطون كتب مجموعة من الحوارات اللى دارات بينه وبين أستاذة سقراط اللى اتحكم عليه بالاعدام بسبب أفكارة الغير عادية وقتها، فى الحوارات دى سقراط بيطرح اسئلة حول الفضيلة والمفاهيم الاخلاقية وبيقول جملة الشهيرة Virtue is Knowledge أو الفضيلة معرفة .. على سبيل المثال علشان تقدر تكون عادل لازم الاول تعرف معنى مبدئ العدل. لكن أفلاطون قرر ان قبل ما نتكلم عن معنى المبادئ لازم الاول نتكلم عن فكرة المبدئ نفسة وايه اللى بيخلى اى شئ ميبقى مبدئ زى العدل أو الصدق.

أفلاطون أطلق على المبادئ دى أسم الأشكال النموذجية أو المجردة وقال انه علشان المبدئ يكتسب صفتة لازم يبقى ثابت وغير متغير فى كل مكان و زمان .. و بالشكل ده أعتقد أفلاطون أن الاشكال النموذجية لابد ان يكون لها وجود مستقل فى العالم. فمثلا فى العالم فى اشكال وانواع كتير من الاحصنة .. لكننا بنقدر نميز صفة الحصان بمجرد اننا نشوفة .. ده اللى قصدة أفلاطون بفكرة الشكل النموذجى .. فعند أفلاطون فى شكل نموذجى أو صفات مجردة للأحصنة أى كائن حى يكتسبها نقدر نتعرف عليه كنوع أقل مثالية من الشكل المثالى للحصان. الاشكال النموذجية للأشياء عند أفلاطون موجوده فى عالم الوجود أو الواقع اللى مستقل ومنفصل عن العالم المادى اللى بنعيش فيه .. فى العالم المجرد ده موجوده الافكار أو الاشكال زى العدل، الجمال، الصدق، الحق، الطول، الحصان المثالى الخ .. العالم ده عند أفلاطون مانقدرش نوصل له عن طريق حواسنا البشرية .. لكن عن طريق المنطق والحجة.

نظرية الأشكال The Theory of Forms

مفهوم أفلاطون عن المعرفة ومكونتها معقد وله عدة مستويات، وعلشان نقدر نفهم المعرفة عند أفلاطون هنحتاج نفك رموز قصة الكهف! أختلف الفلاسفة عبر العصور – كالعاده- حول التفسير الكامل لمعانى قصة كهف أفلاطون لكن المعنى العام للقصة واضح وغير مختلف علية وده اللى يهمنا دلوقتى.

الكهف بيمثل عالم الحدوث أو العالم المُعاش The realm of becoming ده العالم الملموس اللى بنعيشه كل يوم بتجاربة وخبراتة، عالم كل اللى فيه يفتقد لصفة الكمال و دائم التغيُر ! المساجين المتقيدين بيمثلوا الناس العادية اللى عايشة فى عالم الحدوث، عالم الحواس .. والأوهام. أما السجين اللى أتحرر وأتجول فى الكهف وشاف حقيقتة بيمثل الفيلسوف اللى بيملك أقرب رؤية للواقع فى عالم الحدوث بكل تغيراتة المستمرة وخيالاتة وأوهامة!

على النقيض العالم خارج الكهف هو عالم الوجود The realm of being عالم الحقيقة الواضح بلا حواس خادعة، أو أوهام .. مليان بكل مصادر المعرفة، الكاملة، الابدية، و الثابتة بلا تغييرَ!

نظرية الأشكال The Theory of Forms من وجهة نظر أفلاطون الشئ المعروف مش بس لازم يكون واقع وحق كمان لازم يكون كامل وثابت الصفات لا يتغير بفعل الزمان أو المكان . لكن فى واقع الامر ما فيش أى شئ فى العالم المُعاش ( العالم داخل الكهف ) ينطبق علية الوصف ده. الشخص الطويل قصير جنب شخص أطول منه، او شجرة أطول منة .. حتى أطول برج فى العالم النهاردة بكرة هيكون قصير جنب شئ تانى! التفاحة اللى بتظهر حمرا لعد شوية لونها هيبقى غامق أو حتي أسود لوسبتها فترة كفاية! وبالشكل ده بما أن ما فيش اى شئ فى العالم المُعاش يمكن أن يكون مصدر لمعرفة حقيقة غير متغيرة، أفلاطون أقترج عالم تانى أو تقدر تقول مستوى تانى للمعرفة ( العالم اللى برة الكهف) اللى فيه كل شئ كامل وغير مُتغير.

أفلاطون أقترح أن فى عالم الوجود .. الاشياء غير متغيرة و كاملة الوجود وسماها “الأشكال المجردة Forms” .. والفكرة من كده أنه عن طريق النسخ من الاشكال المجردة يكتسب الشئ فى عالم الحدوث صفة الشكل المجرد .. على سبيل المثال عن طريق نقل أو نسخ الشكل المجرد للعدالة تكتسب الافعال أو الاشخاص العادلة صفة العدالة! لكن الافعال أو الاشخاص العادلة أو اللي بنصفها بعادلة نفسها متغيرة وغير ثابتة ولاتمثل شكل العدالة المجردة. فكرة أفلاطون عن المعرفة أغنى من كده، فأفلاطون ذهب فى قصة الكهف لان الاشكال المجردة فى ما بينها تسلسل درجى زى السلم أشكال مجردة أقل من غيرها فى التسلسل وفى التجرد .. وفى قمة التسلسل الدرجي الشكل المجرد للخير اللى كل الاشكال المجردة تحتة واللى بيعطى كل الاشكال معناها الدائم والحقيقى يظهر وجدوها … الشمس لعبت الرمز ده فى قصة الكهف على فكرة!

الحب الافلاطونى Platonic Love أو فى بعض الاحيان بيطلق علية الحب العذري، يمكن تكون الفكرة الاشهر المرتبطة بأسم أفلاطون ومعروفة لتقريبا البشرية كلها. الفكرة دى تطور طبيعى لمجمل الافكارفى كهف أفلاطون و نظرية الاشكال المجردة بس مُطبقة فى عالم المشاعر والاحاسيس بدل من عالم الافكار. المعنى الكلاسيكى للفكرة أن أقرب أنواع الحب للشكل المجرد لفكرة الحب هو الحب اللى بتعبر عنة بشكل روحى وفكرى مش اللى بنعبر عنة بشكل جسدى! الحب الافلاطونى أحد أشهر الافكار اللى صاغها أفلاطون فى كتابة الندوة The symposium واللى كان مهتم فيه بشكل خاص بطبيعة الحب كشكل من أشكال العلاقات البشرية.

Plato The Symosium

أشكالية المسلمات The problem of universals نظرية أفلاطون عن الاشكال المجردة والجانب الميتافيزك أو الغيبى اللى بتعتمد علية قد تبدو غريبة أو ملتوية بعض الشئ للوهلة الاولى .. لكن المشكلة اللى النظرية بتسعى معالجتها مشكلة المسلمات اللى كانت ومازلت محل جدال كبير فى الفلسفة. تقريبا منذ العصور الوسطى المعركة الفلسفية حول مشكلة المسلمات أصبحت بين فرقين من الفلاسفة .. فريق الواقعين realists وفى بعض الاحيان بيطلق عليهم الافلاطونين اللى بيعتقدوا أن مسلمات أو أشكال مجردة زى صفة الطول أو صفة الأحمرار ليها وجود مستقل عن الاشياء الطويلة أو الحمرا، وفريق الاسمانية The nominalists اللى اكتسب الاسم الغريب ده من فكرة ان الاسماء مجرد مسميات تطلق على الاشياء لتميز صفة معينة فيها وتسهل المقارنة بين الاشياء لكن المسميات أو المسلمات دى ليس لها وجود مستقل عن الاشياء أو خارج أفكارالشخص زى ما بيعتقد أتباع الواقعية الافلاطونية.

نفس الفكرة تقريبا بس تحت مسمى الواقعيه و مكافحى الواقعية realism vs anti- realism مازالت جزء من الجدال الدائر بين الفلاسفة فى مناطق كتيرة من الفلسفة الحديثة. فلاسفة الواقعية يبعتقدوا فى وجود أشياء فى العالم – أشياء ملموسة أو حقائق أخلاقية أو خواص رياضية – لها وجود مستقل عن أدراكنا أو خبراتنا بيها. يعنى لو فرضنا أن فى خاصية أفتراضية مثلا زى الطول حتى لو مافيش اى بنى ادم عرف عن الخاصية دى او جربها فخاصية الطول مازال لها وجود مستقل. وجهة النظر المضادة هى وجهة نظر فلاسفة مكافحة الواقعية اللى وضعوا فرضية أن هناك علاقة أساسية بين الشئ المعروف ومعرفتنا بيه، فالطول على سبيل المثال لاوجود له دون معرفتنا بشخص له صفة الطول! المناقشة اللى مازالت دائرة بين الواقعين ومكافحيهم بدأت من أكتر من ألفين سنة على ايد أفلاطون أحد أكتر فلاسفة الواقعية شهرة. نظرية الأشكال وافكار أفلاطون عن المبادئ المجردة وجدت طريقها بعد كده فى العصور الوسطى فى الفلسفة الاسلامية والمسيحية، وفكرة أن الحجة والمنطق هى الوسيلة الوحيدة للوصول للمعرفة الحق مش عن طريق الحواس البشرية كانت هى الاساس للفلسفة العقلانية فى القرن الـ 17 واللى بتعتمد على الاستنتاج والمنطق بس كوسائل الحصول على المعرفة. فى حقيقة الامر تأثير أفلاطون فى الفلسفة الغربية الحديثة كبير جدا أنه خلى عالم المنطق الانجليزى ألفريد نورث Alfred North يقول أن الفلسفة الغربية الحديثة عبارة عن مجموعة من حواشى أفكار لأفلاطون!

فى قصة الكهف أفلاطون عرض فكرتة المميزة عن الواقع ومعرفتنا بيه، لكنة كمان كمان أستخدم القصة كدفاع عن أستاذة سقراط وبيظهر ده بوضوح فى نهاية القصة لما بيرجع السجين الكهف بيحاول ينشر معرفتة الجديدة بين زمايلة اللى لسة متقيدين قدام الحيطة، لكنه فى محاولته للوصول ليهم يتخبط فى الظلام داخل الكهف بعد ما عينية أتعودت على ضوء الشمس والحقيقة خارج الكهف .. زمايلة المساجين بيبصولة على انه مخبول ومابقاش حتى عارف طريقة جوا الكهف، ولما بيسمعوا أفكارة الغريبة عن النار والتماثيل والشمس بيتأكدوا أنه مجنون ورحلته خارج الكهف أفقدتة صوابة .. بيخافوا على عقولهم منه وبيبطلوا يسمعوة، والنهاية المأسوية أنهم بيقتلوة بعد أصرارة على أفكارة! بالنهاية دى أفلاطون كان بيحاول يرسم صورة المأزق اللى بيقع فيه الفيلسوف من سخرية ، رفض، أضطهاد، وأحيانا القتل فى محاولته لتنوير الناس ووضعهم على الطريق للمعرفة والحكمة. وفى الموضع ده أفلاطون كان بيتكلم عن أستاذة سقراط اللى اضطهد طوال حياتة بسبب أفكارة الفلسفية اللى رفض تغيرها لحد ما نفذت فيه حكومة أثينا الأعدام.

The Death of Socrates

ودلوقتى … بص حواليك ، أتأمل الاشياء … الواقع المحيط بيك … ياترى فعلا هو ده الواقع ولا أنعكاس خيالات الواقع على جدار حياتك … فكر تانى؟

فى الحلقة الجاية … هنتكلم عن حجاب الادراك .. هتكون رحالة مع فريق سفاري فى الصحرا، الاكل والشرب اللى معاكوا خلص وبقالكوا ساعات تايهين من غير وجهه .. فجأة هتشوفوا واحة خضره وبحيرة علي بعد النظر، هي الامل الباقى لانقاذ حياتكم .. بعد ما تجروا مسافة طويلة هتتكشفوا ان الواحة والبحيرة كانت مجرد سراب! عن الادراك .. طبيعة الاشياء .. وحجرة جون لوك المظلمة هنتفلسف المرة الجاية

من دلوقتى للحلقة الجاية  .. عيش الحياة بفلسفة!

زود معلوماتك:

3 thoughts on “EP02: كهف أفلاطون Plato’s Cave

  1. Pingback: نظرية الكهف عند أفلاطون - ساقية

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s