EP14: The Problem of Soul أشكالية الروح

 

Episode 14 + ECN (Egypt Cancer Network) Ad

تخيل أنك طبيب فى مستشفى دولى كبير، أتعرفت على مراتك فى الجامعة، أجمل سنين جياتكوا قضيتوها سوا، اتولد الحب وكبر جواكوا، شخصيتكوا بتكمل بعضها، عقلكوا بينها ألفة، واهدافكوا ومابدئكوا دايما كانت واحدة، وصلة روحية اتكونت من اللحظة الاولى اللى عينكوا اتقابلت فيها، وقواها الزمن والعشرة، عرفتوا وقتها ان مصيركوا جنب بعض! بتمر السنين، والحب بينكوا بيزيد كل يوم عن اللى قبلة، أنتظرتوا مولدكوا الاول سنين، أخيرا حانت اللحظة اللى عشتوا عنها الوقت ده كلة، حانت اللحظة اللى تدمجوا فيها وجدكوا، وتربطوا مصيركوا الى الابد! مراتك حامل فى شهرها السابع، فاضل شهرين وكيان جديد بيجمعكوا يجى للعالم ده، حياتك كلها هتتغير، وعمرك ما هتكون زى الاول ابدا .. فى غمرة الفرح والانتظار فيرس خطير بدأ ينتشر بين الاطفال فى أفرقيا، فريق أغاثة بيتكون من المستشفى اللى بتشتغل فيها انت ومراتك، تخصص مراتك هى الاشهر والاحسن فيه، بينزل عليك الخبر زى الصاعقة، مراتك مسافرة مع فريق الاغاثة شهر، بتحاول تقنعها انها ما ترحش .. ” لو مش عشانى، علشان الحتة اللى منا جواكى”، هتقلك “ورسالتى، والاطفال اللى بتموت كل يوم، أنت نسيت أهدفنا وأحلامنا” .. بيلجمك منطقها، والوقت اسرع من انك تملك زمام الامور، قبل ما تدرك اللى حصل، هيكون مر أسبوعين، ومراتك فى الادغال بتنقذ عشرات الارواح البريئة كل يوم، بتبعتلك جواب كل أسبوع، لكن الاسبوع الاخير ما جلكش منها جوابات، الخوف والقلق بيعصرك، رن جرس التليفون فى نص الليل، وسرق حياتك وقتل كيانك بدون أشعار .. لسة مش قادر تستوعب خبر حادثة الاتوبيس اللى كانت راكبة مراتك وغرف فى الشلالات، سفرك تدور عليها فى كل مكان فى بلاد انت وهى عنها اغراب، جثتها اللى السلطات مش قادرة حتى تلاقيها، شهور من الضياع، بنتك اللى اتوأدت قبل ما حتى تتولد، حياتك اللى فى لحظة خانك فيها الزمن بقت من غير معنى!

Dragonfly (Movie)

شبح أنسان بقيت، أضعف من انك تقتل نفسك، فبتقتل نفسك فى الشغل بجنون، كل حاجة بتفكرك بيها، المستشفى، البيت، اصدقائكوا، جيرانكوا، بتهرب من الواقع وتدفن نفس مابين الذكريات والشغل! حياة أليمة والنهاية باين انها لسة بعيدة .. سهران نباطشى كالعادة فى الاستقبال، بعد نص الليل هيدخل مجموعة من الداكترة والممرضات بيجروا مع سرير عليه طفل عندة ازمة قلبية بيصارع الموت  قبل ما يدخلوا أوضة العناية المركزة.. مش قادر تتحر ك من التعب، زى ما تكون بتحلم، هتسمع صوت الطفل بينادى على اسمك من الاوضة، هتقوم تقف مفزوع، هتدعك عينك وراسك عشان تفوق، لسة بينادى عليك، هتمشى ورا الصوت لحد ماتوصل للأوضة، هتقف فى جنب تتابع زمايلك منهمكين بيحاولوا ينقذوا حياتة، واضح ان ماحدش سامع صوتة غيرة، هتسمعة بيقلك ” أنت واقف بعيد ليه، دى عاوزة تكلمك” .. هتقرب ببطئ فى اللحظة اللى نبض قلبة هيقف على الجهاز، ويموت! الكل مضايق ومصدوم هيخرجوا واحد ورا التانى من الاوضة، هتقرب اكتر من الطفل وانت مازالت مذهول، على غفلة هيفتح عينية ويقلك ” أنا أسفة .. عاوزة أكلمك ” هترجع من المفاجأة لورا، قبل ما جسم الطفل ينتفض وبرجع خط نبض القلب على الجهاز تانى، وخلية الداكترة ترجع حواليكوا من تانى! ضوء ضعيف بين الامل أو الجنون..هتروح تكلم الطفل بعد نجاتة من الموت، هيقولك انه شاف كل حاجة كانت بتحصل فى الاوضة فى لحظة موتة الاكلينيكية، كان محلق فى سقف الاوضة بيبص عليك وانت بتقرب منه، هيقولك انه كان فى نفق طويل ضلمة فى اخرة كان نور، وجمال، وهى كانت هناك، مراتك نقية وجميلة .. هتسألة وانت بتبكى قالتلك ايه .. هيقلك انها كانت عاوز توصلك رسالة بس هو مش فاكرها .. نار اليأس اللى اوشكت تحرقك، اتحولت لشعلة أمل جواك، اتوالت الرسايل من العالم العلوى، روحها بتحاول تتصل بيك بكل وسيلة ممكنة .. هتبعتلك رسالة مع طفل تانى مر بتجربة قريبة من الموت، هتحس بوجودها فى البيت بالليل، هتحس بأنفاسها حواليك فى كل مكان، هتسبلك ادلة فى كل مكان لحد ما تفهم الرساله، هتسافر لمكان الحادثة،هتاخد مترجم معاك، هتروح لمكان الشلال، وتنط فى المياة مكان ما حدسك هيقولك .. هتشوف الاتوبيس فى القاع، وانت بتفتش جواة عن جثة مراتك، هيتحرك الاتوبس وتصبح محاصر جواة، مش قادر تتنفس، الاكسجين بيقل، الضوء بيضعف، وفجأة صمت مطبق قبل ما ضوء قوى يشع قدامك وتشوف مراتك بتسبح ناحيتك، سعيدة ومبتسمة بتقرب منك، هتلمس ايديك، هتحضنك وتقلك “أنا اسفة” قبل ما تختفى ويضعف الضوء، ويشدك المترجم اللى جبتة معاك وينقذك من الموت فى اللحظة الاخيرة، بعد ما تفوق من الغيبوية على الشط، هتقرر تروح القبيلة اللى كانت مراتك بتعالج اطفالها بالرغم من تحذير المترجم، هتجرى ناحية الاكواخ البعيدة ووراك المترجم، أهل القبيلة هيفتكروك عدو، هيحوطوك من كل ناحية بالرماح والسكاكين، هترفع صورة مراتك، هيخيم الصمت والسكون، عليهم قبل ما تظهر حكيمة القبيلة، هتقودك لواحد من الاكواخ، هتقولك عن طريق المترجم ” مراتك كانت ملاك، لما طلعنا جسمها من المية، كانت ضعيفة، بين الحياة والموت، ما قدرناش ننقذها، لكنن قدرنا ننقذ حتة منها” .. هتشيل طفلة رضيعة ضعيفة من على الفرش وتناولها لك وهى بتكمل كلامها ” المسكينة كانت حامل فى شهرها الاخير، وشاء القدر اننا نقذ جزء من روحها” .. دلوقتى بس عرفت ان مراتك ادت مهمتها الاخيرة ووصلت لك الرسالة عشان تنقذ بنتكوا الوحيدة، الكيان الخالد اللى بيجمعكوا .. هتشيل بنتك بين ايديك، لكن رجلك مش قادرة تشيلك، الدموع شلالات سخنة على وشك ..  هتركع على الارض من الذهول والخشوع!

Weighing_of_the_heart3

فكرة الروح قديمة قدم البشر نفسهم، لكن يمكن اول مفهوم موثق ومتكامل لطبيعة الروح  كان عند المصريين القدماء اللى أعتقدوا ان روح الانسان مكونه من خمس أجزاء، جب Lb  أو القلب اللى أعتقد المصريين القدماء انه القلب الميتافيزيقى للأنسان وبيتكون من نقطة دم واحدة من قلب أم الانسان فى مرحلة التكوين .. القلب عندهم هو كام مسكن العواطف، الافكار، الارادة، والنوايا، واعتقد المصريين ان القلب المفتاح لحياة الاخرة لانه بينجو من الموت ويستمر كدليل على عمل الانسان فى الدنيا. الشوت Sheut هو المكون التانى واللى معناة الظل .. واللى بالنسبة للمصريين كان دايما حاضر وهو ممثل الانسان الدائم، الرين Ren أو الاسم هو مكون الروح التالت عند قدماء المصريين وهو بيمثل اسم الانسان اللى بيعطى له عند الولادة، والمصريين أعتقدوا ان الانسان بيعيش على اد ما اسمة بيذكر فى الدنيا و اللى بيفسر اهتمامهم بكتابة اسمائهم فى المعابد والبرديات. البا Ba هى كل شئ فى روح الانسان بتخلية متفرد ومميز او غير متطابق مع اى انسان تانى .. واللى نقدر نقول عليها الهوية، واللى اعتقد المصريين انها بتسمر بعد موت الانسان .. البا فى العقيدة االمصرية القديمة كانت الاجابة على سؤال أستمرار الهوية وقتها .. أرجع لحلقة استمرارية الهوية عبر الزمن لو عاوز تعرف أكتر عن الاشكالية دى، الكا Ka هى المكون الخامس واعتقد المصريين ان الكا هى جوهر الحياة، الشئ اللى فى روح الانسان بيميز بين الانسان الحى والانسان الميت، واللى بتسيب جسم الانسان لما بيموت، المصريين أعتقدوا ان خنوم بيصنع حسم الطفل على عجلة فخار، قبل ما يحطهم فى رحم الام، اله الحياة والخصوبة هيكيت Heqet بتخلق الكا بتاعة الطفل وتنفخها فيه لحظة ولادتة واللى بيتكون بمثابة أكسير الحياة للانسان من اللحظة دى. المصريين القدماء أهتموا جدا فى حياتهم بالاعداد للحياة الاخرة، لأعتقادهم ان الحياة البشرية مرحلة قصيرة ومش دايمة انما الحياة الابدية بتبدأ بعد الموت وبعث الروح البشرية فى صورها الكا والبا ومحسابتها على اعمالها الحياة الدنيا. كتاب الموتى The Book of The Dead هو أقدم بردية مكتشفه عن الحياة الاخرة عند المصريين القدماء، وهو أقدم كتاب دينى عرفتة البشرية .. أتكتب فى بداية عهد الدولة الفرعونية الحديثة. الترجمة الحرفية لأسم البردية “كتاب قوة الخروج اللى الضوء” البردية اللى مازالت نسخها منها محفوظة فى المتحف البريطانى عبارة عن مجموعه أنشايد وصلوات علشان تساعد الشخص المتوفى فى رحلة عبر العالم السفلى. فى فصل “الظهور في النهار بعد العبور خلال القبر” أوزيريس بيقول ” مرحى أيتها الروح .. أنت القوة العظيمة القادرة .. بالحقيقة إني هنا .. لقد أتيت وأنا أنظرك .. لقد بددت حلكة الليل .. لقد أتيت ونظرت أبي المقدس .. لقد فعلت كل الطقوس التي يحتاجها أبي المقدس .. لقد فتحت كل الدروب في السماء وعلى الأرض .. إني الابن الذي يحبه أبيه.. لقد دعمت من يحتاجه وجودي .. مرحى يا كل الآلهة… لقد شققت لي طريقا .. أنا أوزيريس آني المنتصر .. لقد مررت عبر البرزخ”

Bookofthedeadspell17

ياترى ليه المصريين القدماء أعتقدوا فى وجود مكون غير مادى، الروح كجزء من وجودنا؟ وايه اللى بيخلى الغالبية العظمى من البشر النهاردة تعتقد فى وجود الشئ الغيرمادى ده بالرغم من أختلاف دياناتهم ومعتقادتهم؟! .. علشان نقدر نجاوب على السؤال ده، لازم الاول نسأل نفسنا ايه اللى بيخلينا نعتقد فى وجود اى شئ؟ .. لو تفتكر من مجموعة الحلقات السابقة اللى اتكلمنا فيها عن نظرية المعرفة وازاى البشر بتكون معتقد معين او معرفة .. هتلاقى ان الحواس كانت هى وسيلتنا الاولى لتكوين أعتقاد ما .. الاعتقاد ده مش لازم يكون أعتقاد صحيح، بالرغم من انه هيكون مبرر بخبرة مباشرة عن طريق حواسنا.. يعنى مثلا ليه انت مصدق ان فى كمبيوتر قدامك دلوقتى؟ لانك تقدر تشوفة، تلمسة، وتسمعه .. المشكلة ان الوسيلة دى مش هتفسر وجود الروح .. لاننا مش هنقدر نشوفها، نسمعها، نحسها، او نلمسها .. مافيش وسيلة مباشرة للتعامل مع الروح “الموجود الميتافيزيقى المفترض” ده عن طريق الحواس .. أكيد السؤال اللى بيدور فى عقلك دلوقتى، أزاى نقدر نبرهن على شئ ما نقدرش نتعامل معاة بحواسنا؟ فى نهاية المطاف مش كل حاجة بنعتقد فى وجودها بنقدر نتعامل معاها بحواسنا.. مثلا أحنا عندنا أعتقاد فى وجود الذرات، او الجراثيم، او الاشعة الفوق بنفسجية، الخ .. أزاى كونا اعتقاد مبرر صحيح فى وجود الحاجات دى كلها من غير ما نشوفها؟ واحد من أشهر الطرق اللى بنستخدمها فى الحالات دى، طريقة منطقية أتكلمنا عليها أكتر من مرة قبل كده .. وهى الاستدلال لأفضل تفسير inference to the best explanation واللى ببساطة بتقول اننا نقدر نقول ان شئ صحيح من عدمة اذا كان بيقدم افضل تفسير ممكن لظاهرة ما، يعنى مثلا لو اخدت ظاهرة ان الناس لما بتمرض وحالتها البدنية بتأثر لسبب ما بتصبح معدية وبتأثر على الناس اللى حواليها .. الجراثيم بتقدم تفسير للظاهرة دى وعلشان كده بنصدق فى وجودها بالرغم من اننا ما بنشوفهاش! .. عارف انك مش مستريح للحل ده،وانا معاك .. لان مش مجرد اى تفسير ينفع يكون أفضب تفسير .. يعنى على سبيل المثال احنا ممكن نقول ان سبب الامراض والعدوى ان العفاريت والجن غضبانين على الشخص ده فبيصيبوة بالمرض .. ليه لا؟ تفسير نقدرة نستخدمة لتفسير الظاهرة دى .. والجراثيم والعفاريت الاتينن مانقدرش نشوفهم بعنينا المجردة ..

Kandeil-um-hashim Yehia_Hakki

فى الواقع الكاتب المصرى الكبير يحى حقى جسد الفكرة دى ببراعة سنة 1968 فى رواية الشهيرة قنديل ام هاشم .. واللى فيها أسماعيل دكتور العيون بيكتشف ان سبب تدهور حالة خطيبتة فاطمة ان اهلها بيستخدموا قطرات من زيت قنديل مسجد السيدة زينب لأعتقادهم انه زيت مبارك وهيعالج ضعف نظرها .. الواقع ان الاستنتاج مربوط بأفضل تفسير، والنظرية اللى بتقدم أفضل تفسيرلازم تقدم نموذج متكامل للمعرفة عن الظاهرة دى، وتجاوب على كل الاسئلة المطروحة بدون تناقد، وتقدم حلول، وتنبؤات صحيحة .. نظرية الجراثيم بتقدم النموذج الكامل ده لظاهرة المرض والعدوى، على النقيض من نظرية الجن والعفاريت .. علشان كده انت مابتصدقش فيها النهاردة، لكن أجدادك كانوا بيصدقوها لانها كانت افضل تفسيرللظاهرة متاح ليهم وقتها. نفس الفكرة نقدر نطبقها على نظرية الروح .. نقدر نسأل هل فى اى شئ فى وجودنا، او ظاهرة معينة ما نقدرش نفسرها الا باللجوء لفكرة الروح؟ بمعنى تانى هل فى خاصية معينة فى البشر فلاسفة المادية او الطبيعين   Naturalistsما يقدروش يفسروها عن طريق المادة الفزيائية .. لكن فلاسفة المثنوية Dualists يقدروا يفسروها باللجوء لفكرة الروح؟ فى الحقيقة فى مجموعة من الحجج اللى طرحها فلاسفة المثنوية او انصار فكرة وجود الروح واللى عادة ما بتكون فى صورة البشر عندهم الخاصية س، الخاصية س لا يمكن تفسيرها عن طريق المادة الفزيائية فقط، افضل تفسير لوجود الخاصية س هو الروح، اذن البشر عندهم روح .. فى كل حجة نقدر نشيل س ونحط مكانها ظاهرة أو خاصية معينة مطروحة، لكن فى النهاية كلها بتستخدم نفس نوع المنطق وهو الاستدلال عن طريق أفضل تفسير .. هعرض عليك مجموعة من الخواص اللى استخدمها فلاسفة الروح كوسيلة لأثبات وجود الروح. الظاهرة الاولى هى حركة الجسم، لما بنموت اجسادنا بتكون جثة هامدة ما بتتحركش بالرغم من اجزاء الجسم كلها مازالت موجودة، لكن واحنا احياء من الواضح ان اجسامنا بتتحرك طول الوقت! اذن احنا محتاجين الروح عشان نفسر حركة الجسم الحى .. رد الطبيعين على الظاهرة دى، ان الحركة وظيفة من وظايف الجسد، ولما الانسان بيموت بالرغم من وجود الاعضاء كلها الا ان فى شئ فى معين فى طبيعة الاتصال وعمل الاجزاء دى بيتوقف، لكننا مش محتاجين شئ تانى غير الجسم لتفسير وظيفة الحركة .. يعنى مثلا الكمبيوتر بتاعك دلوقتى شغال وبيأدى وظيفتة، لكن لو فرضنا انه وقع على الارض واتكسر كل الاجزاء مازالت موجودة لكن عطل معين بيحصل بيأثر على وظايفة .. رد أنصار فكرة الروح هيكون لكن حركة الجسم مش حركة عشوائية، دى مسببة وليها هدف، واحنا محتاجين الروح عشان نفسر الحركة المسببة بهدف دى .. الطبيعين هيقولوا ان ده مش صحيح لاننا ممكن نبنى انسان الى على سبيل المثال يتحرك حركة مسببة بهدف زى البشر بالظبط، الرد السريع اللى هتسمعة من فلاسفة الروح هو لكن الفرق بينا وبين الانسان الالى هو ان احنا عندنا حرية الارادة Free Will والروح هى اللى بتفسر حرية الارادة د! .. لكن الطبيعين هيردوا ومين قال ان عندنا حرية أرادة؟ .. أرجع للحلقة حرية الارادة.. طيب واضح ان الحجة دى مش مقنعة و بتواجه أعتراضات كتير من ناحية الطبيعين. الظاهرة التانية اللى هيلجأ فلاسفة الروح انهم يفسروها عن طريق الروح هى فى الواقع مجموعة ظواهر بتشمل قدرتنا على تكوين معتقدات، رغبات، خطط، وقرارات  .. والحجة بتقول ان مافيش اى اله عندها قدرة على الظواهر البشرية دى، اذن البشر عندهم روح .. الطبيعين أحتاروا فى الظاهرة دى لفترة طويلة، لكن مؤخرا مع تطور العلم والتكنولوجيا، ظهرت ردود على الحجة دى .. رد الطبيعين أننا نقدر نفسر الظواهر دى كلها عن طريق فهم ازاى المخ “الكمبيوتر العملاق” ده بيشتغل! وان اللغة بترسم حجاب بينا وبين الواقع، بيخلينا نكون المصطلحات المركبة دى اللى مالهاش وجود فى الحقيقية!

330px-Deep_Blue 330px-Kasparov_and_the_machine

يعنى على سبيل المثال لو أخدنا الكمبيوتر اللى طورتة شركة اى بى ام سنة 1996 ديب بلو Deep Blue واللى هزم بطل العالم فى الشطرنج كاسبروف Garry Kasparov سنة 1997 لاول مرة فى تاريخ البشرية .. لو أتفرجت على الفيلم الوثائقى نهاية اللعبة: كاسبروف والالة Game Over: Kasparov and the Machine واللى بيوثق الماتش اللى خسر فيه كاسبروف قدام ديب بلو .. هتشوف ان لما كاسبروف بيحرك قطع  زى الطابية، الحصان، او الفيل بيهاجم بيها الملك بتاع ديب بلو .. هتلاقى ان ديب بلو بيحرك قطع يدافع بيها عن الملك بتاعة، للوهلة الاولى لو انت ماتعرفش ان خطم كاسبورف مجرد كمبيوتر .. هتقول ان خصمة عندة نية انه يكسب المبارة، ورغبة انه يحمى الملك بتاعة، ومعتقدات ازاى ممكن ينفذ الرغبات دى، وبيخط الرغبات والمعتقدات دى محل التنفيذ فبيكون خطة أو استراتيجية وعلى الاساس ده بيحرك القطع بتاعتة! زى ماانت شايف الخصم اصبح عندة نوايا، رغبات، معتقدات، خطط، واستراتيجيات .. لكننا مش هنقول اى حاجة من الكلام دة لمجرد اننا عارفين انه مجرد كمبيوتر، فما بنستعملش اى مصطلح من المصطلحات دى اللى بتحجبنا عن الحقيقة لاننا فاهمين ازاى الكمبيوتر بيشتغل!.. رد فلاسفة الروح على الفكرة دى أن فى جزء من الرغبات الكمبيوتر مايقدرش يحققة، وهو الاحساس بالمشاعر .. هل ياترى الكمبيوتر اللى هزم كاسبروف كان بيشعر بالقلق، بالخوف، بالفرح لما كسب؟ .. الجدلية ان مافيش اى الة ممكن تحس بالمشاعر البشرية وعلشان كده احنا محتاحين الروح عشان نفسر ظاهرة المشاعر! .. رد الطبيعين هيكون صحيح الالات الموجودة دلوقتى ماتقدرش تحس ومعندهاش مشاعر، لكن ده مش معناة ان الالات فى المستقبل مش هتقدر .. المشاعر والاحاسيس ممكن ترجمتها لتصرفات او وظائف معينة بنقوم بيها زى ما شوفنا فلاسفة المدرسة السلوكية Behaviorism والمدرسة الوظائفية Functionalism  من أمثال الفيلسوف الامريكى المعاصر دانيل دانيت Daniel Dennett بيجادل بالحجة القوية دى فى حلقات سابقة قبل كده .. عن طريق فك شفرة الخلايا العصبية وشبكة الوصلات اللى فى مخنا هنقدر نفهم التصرفات السلوكية اللى بتحصلنا لما بنحس بمشاعر معينة .. على سبيل المثال الشركة اليابانية نيوروير Neurowear طرحت منتج سنة 2012 اسمة نكوميمى necomimi بيجسد فكرة المدرسة السلوكية، المنتج عبارة عن ودان قطة صناعية ممكن تلبسها على راسك وفيها جهاز لأستشعار موجات المخ brain wave sensor بيستقبل موجات محددة بيصدرها المخ لما بنحس اننا مثارين، مبسوطين، او فى حالة خمول .. وعلى اساس الموجات دى الودان الصناعية بتتحرك حركات معينة تحاكى بيها القطط لما بتبقى مبسوطة او كسلانة الخ .. يعنى مثلا لما لو لابس الودان الصناعية دى وانت فى الشارع وشميت ريحة أكل بتحبة، مخك يصدر موجة اثارة  هتلقطتها الودان وتقف زى ما ودان القطة بتقف لما بتشم ريحة السمك! .. أنصار فكرة الروح هيتفقوا فى الرد دخ لانهم هيفرقوا بين جانب التصرفات بتاعتنا لما بنحس بشئ، والتجربة الشخصية بتاعة الفرد لما بيحس بشئ معين، هيجادولوا ان صحيح انت ممكن تحاكى التصرفات بتاعة نوع معين من المشاعر لكنك ما تقدرش تحاكى التجربة الشخصية بتاعة الفرد بما بيحس بالمشاعر دى.. يعنى الكمبيوتر ممكن يحاكى تصرفات الخوف عند الانسان، لكنه ماعندوش تجربة شخصية للخوف!.. لو فاكر من حلقة منظور الخفاش، الفكرة  دى اسمها القواليا Qualia أو الجانب الكيفى للتجربة Qualitative Aspect نقطة جدال وخلاف كبيرة بين الطبيعين والمثنويين .. فى نهايى المطاف الطبيعيين بينكروا القواليا او فى افضل حالة بيقولوا ان مافيش تفسير فزيائى واضح ليها لحد لدوقتى لكن مش معنى كده انه مستحيل اننا نوصلة فى المستقبل .. وعلى الجانب التانى المثنويين ماعندهمش تفسير واضح ومحدد أو “أفضل تفسير” للقواليا .. هما بيرجعوا القواليا للروح او العقل لكنهم ما بيقدموش اجابات اكتر من كده على ايه هى طبيعة القواليا، وازاى بتتصل بالجسم المادى، وهل الحيوانات عندها قواليا ولا لا؟ الخ  .. اذن الجدلية دي كمان بتسقط لان الطرفين ماعندهمش تفسير كامل لظاهرة الجانب الكيفى او الشخصى للمشاعر!

الظاهرة التانية اللى هيطرحها انصار الروح هى الابداع Creativity .. البشر بس قادرين على الابداع وتكوين اشياء جديدة .. الاشكالية فى الجدلية دى ان الكمبيوتر النهاردة اصبحت الات فعلا مبدعة لانها بتقدم تكوينات جديدة ماكنش ليها وجود قبل كده .. يعنى لو خدت مثال الكمبيوتر ديب بلو اللى هزم بطل العالم فى الشطرنج، الكمبيوتر ده المبرمجين بتوعة ماحطوش فيه الحركات اللى كسب بيها بطل العالم، فى الواقع لو بطل العالم لعب مع فريق المبرمجين فى الغالب هيكسبهم، المبرمجين حطوا مبادئ اللعبة والكمبوتر قام بمجموعة من الحركات المبرمجين ما فكروش حتى فيها قبل كده .. النهاردة فى برامج كمبيوتر بتكون مقطوعات موسيقية بمجرد برمجتها باساسيات الموسيقى، الموسيقى دى تكوين جديد ماكنش له وجود قبل كده .. ابداع يعنى!

338px-Ascent_of_the_Blessed

الأستدلال بأفضل تفسير كان الخيط المنطقى الاساسى اللى بيربط مجموعة الحجج اللى فاتت كوسيلة لأثبات الروح عن طريق تقديم مجموعة من الظواهر الطبيعية المتعارف عليها ما بينا كبشر وطرح وجود الروح كأفضل تفسير للظواهر دى وشفنا ازاى ان فى معظم الحالات اللجوء لفكرة الروح كقد يكون تفسير للظاهرة لكنة مش قطعا أفضل تفسير! مجموعة تانية من الجدليات الفلسفية اللى بتستخدم لأثبات وجود الروح بتستخدم نفس طريقة الاستدلال لأفضل تفسير لكنها بتحاول تطبقها على ظواهر خارقة للطبيعة Supernatural. على سبيل المثال ظاهرة تجربة الاقتراب من الموت Near Death Experience واللى فيها البشر فى حالات معينة بيقتربوا فيها من الموت بيمروا بتجارب متشابهة بدرجة ملفتة للنظر بالرغم من اختلاف الثقافات، الخلفيات الدينية، المجتمعات، اللغة، وحتى العصر اللى بيعيشوا فيه! فى تجربة الاقتراب من الموت عادة ما بيوصف الفرد شعورة بالانفصال عن جسمة، واحساس غامر بالسعادة والانطلاق، بيحس انه بيحلق فى السما، وبيبص على جسمة والناس المحيطة بجسمة لحظة الموت، وفى حالات تانية الشخص بيشوف نفسة فى نفق طويل فلا اخرة ضوء قوى، لما بيوصلة بيشوف شخصيات من عالم الاموات سواء من اسرتة او احيانا شخصيات دينية معينة! التجارب دى بالرغم من غرابتها وصعوبة تصديقها الا ان تواتر حدوثها لاشخاص مختلفة فى اماكن وازمنة مختلفة بتفاصيل متقاربة جدا بيخلى من الصعوبة تجاهلها! يمكن أول تجربة مدونة لتجربة الافتراب من الموت دونها أفلاطون فى كتابة الاشهر الجمهورية The Republic سفى الفرن الرابع قبل الميلاد تحت عنوان أسطورة أر The Myth of Er واللى حكى فيها عن الجندى أر اللى اتقتل فى معركة لكن جسمة فضل بدون تحلل لعدة ايام وفى جنازتة صحى وبدأ يحكى للناس عن تجربة ما بعد الموت، والبعث، والعالم الاخر! التفسير الافضل من وجهة نظر أنصار مدرسة الروح ان الروج بتنفصل عن الجسم فى لحظات الاقتراب من الموت، وبتمر بتجربة الصعود من الحياة الدنيا للحياة الاخرة .. لكن مع رجوع الانسان للحياة مرة تانية بتكون روحة مرت بالتجارب العلوية دى ومازال بيتذكرها. من وجهة نظر الطبيعين ده مجرد تفسير لكنه مش أفضل تفسير، زى ما انت فاهم من مناقشتنا قبل كده ..

660px-Beta-endorphin

الطبيعين محتاجين يقدموا اطروحة تفسير للظاهرة الخارقة للطبيعية دى من خلال الطبيعة والحياة الفزيائية بس بدون اللجوء لشئ غيبى زى الروح، مجرد الاطروحة تقلنا ان الفكرة نفسها مش مستحيلة وده كافى لان التفسير عن طريق الروح مايبقاش التفسير الافضل  حتى لو التفسير الطبيعى مش مكتمل فى الوقت الحالى، على اى حال الطبيعين بيقولوا ان الحياة عبارة عن مجموعة من العمليات البيولوجية Biological Processes الجسم فيها بيشتغل طبق نظام معين ومحدد، فى حالات الاقتراب من الموت بيحصل خلل ما فى العمليات البيولوجية للجسم ده اللى بتخلى جسم الانسان يتصرف بشكل معين محدد يبدو وكأنة وهم تجربة الروح، يعنى هديك مثال كتير مننا فى تجاربنا الاولى للتعامل مع الكمبيوتر لما كان بيحصل عطل فى الهاردسك او وسيط التخزين، كنا كلنا باختلاف اماكنا وازمنتنا و ثاقتنا بنمر بتجارب مشابهة، بطئ فى الكمبيوتر، توقف مفاجئ، ظهور ملفات على الهاردسك فى اماكن غريبة بعضها حتى بيكون ملفات قديمة انت مسحتها من زمن، الخ ..  الطبيعين بيقولوا ياجماعة الموضوع مجرد عطب فى العمليات البيولوجية نتيجة الضغط الجسدى والعصبى اللى بيقع على الجسم فى تجربة الاقتراب من الموت .. وحدة العمليات البيولوجية دى فى الاساس هو اللى بيخلى لما خلل يحصل فيها التجارب تكون شديدة التشابه! زى ما انت شايف التفسير المنطقى اللى بيطرحة الطبيعين بيقدم نفسة كبديل قوى لفكرة الروح لتفسير تجربة الاقتراب من الموت، بالرغم من اننا لسة ما لجأناش لاى تحليل علمى للظاهرة! .. زى ماانت اكيد دلوقتى متوقع، العلماء شغلوا نفسهم بتجربة الاقتراب من الموت وبدأوا يحققوا بعض التقدم فى تفسير الظاهرة، على سبيل المثال الفيلسوف الامريكى المعاصر تيدور شك Theodore Schick فى كتابة كيف تفكر فى الاشياء الغريبة How to Think About Weird Things طرح مجموعة من التفاسيروالحلول العلمية لتجربة الاقتراب من الموت مثلا هرمون الأندزرفين Endorphin اللى الدماغ بيفرزة عشان يساعد على الاحساس بالراحة والتحسن فى حالات الالم، بيتم افرازة بكميات كبيرة فى تجارب الاقتراب من الموت واللى بيسبب احساس الانسان بحالة كبيرة من الراحة والسكينة، فى تجارب تانية ربطت بين نفص وصول امدادات الاكسجين فى الدماغ و العطب اللى بيحصل فى العصب البصرى يخلى الانسان يشوف الضوء الابيض الباهر فى نهاية النفق، دراسات تانية ربطت الحالة النفسية والعصبية للانسان فى حالة الخطر وبين تجربة الاقتراب من الموت .. اللى عاوز اوصلهولك هنا ان فى بحر من التجارب والابحاث العلمية اللى بتبحث الظاهرة دى وانها بتحقق نجاحات صغيرة لكن متراكمة لتفسير الظاهرة بشكل طبيعي كامل! الوقت مش هيسمحلى انى اغطى كل التجارب الخارقة للطبيعة هنا، يمكن المجال فى المستقبل يسمح لنا بأننا نتكلم عنها بتفصيل اكتر ..

John_Beattie_Eugene_Rochas_seance

لكن نموذج تانى من الظواهر دى هو تجربة الاتصال بعالم الارواح Séance واللى أنصار فكرة الروح بيعتبروها ظاهرة تانية خارقة للطبيعة تدلل على ضرورة وجود الروح كأفضل تفسير للظاهرة، فى أشكال كتير لتجربة الاتصال بالارواح غالبا ما بتكون مُعدة  من طرف الاحياء و بيتخللها ترديد كلمات معينة، بترتيب معين فى جو و ظروف معينة، أو عفوية من طرف الروح نفسها اللى بتختار انها تتصل بشخص بدون اعدادات سابقة، وبيتطبق عليها كلام كتير من اللى قلنا فى تجربة الاقتراب من الموت، فى ان فى تشابهة كبير بين التجارب دى بالرغم من الاختلاف الجذرى فى مرجعيات اللى بيمروا بيها ..

I322 Img895 أنيس_منصور

الكاتب والمفكر المصرى أنيس منصور أتكلم بأستفاضة عن النوعين دول من التجارب فى مجموعة من أعمالة، يمكن أشهرهم أرواح أشباح و حول العالم فى 200 يوم .. اللى فيه منصور وصف بالتفصيل طريقة السلة لتحضير الارواح .. أنصحك بقراية الكتاب الممتع ده. الطبيعين، العلماء، والشكوكيين بينكروا معظم تجارب الاتصال بالاروح فى مجملها، وبيعتبروها نوع من النصب على عقول البشر الغير معدة للتفكير العلمى او النقدى ..

300px-Richard_Wiseman-Emcee-CSICON_2012-Nashville-Opening_Remarks-OCT_26_2012 RANDI

فى الواقع  سنة 2003 فى مجموعة من الابحاث اللى قام بيها عالم النفس الانجليزى اللى بدأ حياتة العملية كساحر محترف ريتشارد ويزمن   Richard Wisemanاتعملت فى مجال علم نفس التجارب الخارقة للطبيعية Anomalistic psychology واللى بين من خلالها ان الاشخاص اللى عندهم نوع  من الاعتقدات الدينية أكثر قابلية انهم يصدقوا تجارب خارقة للطبيعة حتى لو كانت بتتصادم مع قواعد المنطق والعلم طالما انها متفقة بشكل او بأخر مع اعتقادتهم! السحراء Magicians ليهم محاولات كتيرة ناجحة فى اظهار خداع ووهم التجارب الخارقة للطبيعة بشكل عام، يمكن واحد من أشهرهم الساحر والشكوكى الامريكى المعاصر جيمس راندى James Randi اللى بدأ حياتة العملية كساحر بأسم راندى العجيب The Amazing Randi لكن لما وصل سن ال 60 سخر حياتة للبحث فى التجارب الخارقة للطبيعية واظهار انها كلها مجرد حيل او وهم، فى الواقع جيمس راندى والمؤسسة بتاعتة طرحوا تحدى سنة 1964 تحت اسم تحدى المليون دولار للظواهر الخارقة للطبيعة One Million Dollar Paranormal Challenge .. راندى بيتحدى اى شخص انه يقدر يقدم ظاهرة واحدة خارقة للطبيعة تحت الاختبارات العلمية والمعلمية اللازمة عشان نتأكد ان مافيش اى حيل، هيكسب مليون دولار .. من لحظة الاعلان عن التحدى لحد وقتنا الحاضر كان فى الالاف المتقدمين، لكن كلهم فشلوا بلا استثناء ومازال تحدى راندى مفتوح للجميع!

79572 avicenna2

ابن سينا Avicenna يعتبر أهم فيلسوف فى تاريخ الفلسفة العربية، وواحد من أهم المفكرين فى تاريخ البشرية كلها، فى الواقع الدارسين والباحثين فى الفلسفة العربية والاسلامية عادة ما بيقسموا تاريخ الفلسفة العربية لمرحلتين، مرحلة التكوين ( أو مرحلة ما قبل ابن سينا) ، ومرحلة النهضة (مرحلة مابعد ابن سينا) .. ده يديك فكرة ولو بسيطة عن اهمية ومحورية ابن سينا فى الفلسفة العربية والاسلامية. ابن سينا شرح كتير من أعمال أرسطوطاليس Aristotle اللى اتفق معاة فيها بالرغم من أشكاليتها الدينية فى عصرة وقتها زى فكرة أزلية الكون مثلا .. لكن ده حدث لمرة تانية .. ارسطوطاليس أدعى ان الجسم والعقل أو الروح مش شيئين منفصلين او حتى مادتين مفصلتين، لكنهم وحدة واحدة .. وبناء علية أعتقد ان لا الجسم ولا الروح ممكن ينجوا من الموت، بمعنى تانى الانسان مافيش فى تكوينة اى شئ قابل للخلود! ابن سينا اختلف معاة فى الرؤية .. وشاف ان الجسد والروح من مواد مختلفة زى بالظبط زى ما أفلاطون Plato أعتقد من قبلة .. ابن سينا واحد من أشهر المثنوين فى التاريح Dualists، أفلاطون أعتقد ان فى لحظة موت الانسان الروح بتحرر من الجسد اللى فضلت مسجونة فيه طول فترة حياة الفرد، علشان تبعث فى جسم تانى! فى كتاب الشفاء ابن سينا كتب رسالة ” عن الروح” طرح فيها تجربة عقلية كوسيلة لأثبات وجود الروح، التجربة معروفة باسم الرجل الطائر The Flaying Man فيها ابن سينا بيطلب منك انك تتخيل ان وجودك بدأ للتو واللحظة، عندك كل القدرات العقلية لكنك معصوم العنين، طاير فى الهوا واطرافك متقيدة ماتقدرش تلمس اى جزء فى جسمك او تلمس اى شئ تانى، بالرغم من  حواسك بالكامل مشلولة، هيكون مازال عندك يقين ان ليك وجود ، لكن اى وجود؟ اذا ماكنتش تقدر تحس ولا تشوف اى جزء من جسمك! مجرد قدرتك على تخيل التجربة دى بيأكد من وجهة نظر ابن سينا على ان النفس، الروح، او العقل ليها وجود مستقل عن الجسد .. لانك علشان تتخيل وجود شئ لابد وانك تتخيل الشئ .. يعنى مثلا لو قلت لك تخيل ان فى مركب بس مافيش مركب فى التجربة! الجملة اللى فاتت دى مستحيلة لانها متناقضة ازاى تتخيل وجود شئ وفى نفس الوقت تتخيل عم وجودة! الاستحالة هنا جاية من ان المركب شئ واحد اما انه يكون موجود او يكون غير موجود، ومن هنا ابن سينا بيحاول يقولنا مجرد المقدرة على تخيل نفسك طاير فى الهوا من غير ما تحس باجزاء جسمك ومازلت تعتقد فى وجودك دليل على ان الروح او النفس شئ تانى مختلف عن الجسد! الاب الروحى للفلسفة الغربية الحديثة ديكارت Descartes هيطور تجربة ابن سينا العقلية ويعيد طرحها فى تجربة عقلية تانية فيها ديكارت هيطلب منك انك تتخيل انك بعد ما صحيت من النوم وبصيت لنفسك فى المراية اكتشفت انك خفى مش شايف اى جزء من جسمك، هتحاول تمد ايدك عشان تلمس مكان راسك لكنك مش هتحس بأى شئ، انت عارف ان مازال عندك وجود بدليل ان الافكار دى دلوقتى بتحصلك لكنك مش قادر تحس ولا تشوف جسمك! نفس فكرة اطروحة ابن سينا زى ما انت اكيد ملاحظ .. ازاى ممكن تتخيل وجود لنفسك من غير ماتتخيل جسمك الا اذا كان فى وجود تانى منفصل عن جسمك، الوجود ده هو روحك من وجهة نظر ديكارت!  … الحجة دى واحدة من الحجج العقلية القوية جدا فى موضوع الروح، ومصدرها الاول كان العبقرى ابن سينا .. ومازال الفلاسفة بيجادلوا وبناقشوا الحجة دى! لكن عشان اكون منصف معاك لازم اعرض عليك رد قوى مطروح ضد التجربة العقلية دى، تجربة عقلية مضادة .. انت اكيد عارف نجم الليل The Evening Star هو اول نجم ساطع بيظهر فى ضلمة السما عند بداية الليل، وبرضة اكيد عارف نجم النهار The Morning Star وهو أخر نجم ساطع بيفضل ظاهر فى السما الصافية بعد أو ضوء للنهار .. التجربة العقلية المضادة بتطلب منك انك تحاول تتخيل عالم نجم الليل موجود فية لكن نجم النهار مالوش وجود .. فى الواقع علميا نجم الليل ونجم النهار هما نفس الشئ، مجرد  نجم واحد فى الحقيقة هما حتى مش نجم ده كوكب الزهرة .. لكن قدرتك العقلية على تخيل وجود واحد من غير التانى بينافى القاعدة اللى بنى عليها ابن سينا الجدلية بتاعتة  .. قدرتك على تخيل عالم فيه نجم الليل اللى هو كوكب الزهرة لكن فى نفس الوقت مافيهوش نجم النهار اللى هو برضة كوكب الزهرة، معاناة انك قدرت تتخيل وجود نفس الشئ وعدمة فى نفس الوقت .. نفس الفكرة اللى بنى عليها ابن سينا جدليتة!

Phaedo

افلاطون كتب واحد من أروع محاوراتة بعنون “عن الروح” Phaedo واللى فيها صور ملحمة موت معلمة أرسطو Socrates،  فى الحوار الممتع ده أرسطو متحدث بلسان أفلاطون بيناقش طبيعة الحياة بعد الموت، الروح، وخلود النفس البشرية وهو بيشرب النبيذ منتشى بالسعادة فى الليلة الاخيرة قبل اعدامة! فى الحقيقة افلاطون مابيقدمش جدليات فى الحوار ده لاثبات وجود الروح، أفلاطون ومن قبلة سقراط من أوائل فلاسفة المثنوية Dualists وبيعتقدوا فى وجود الروح .. انما أفلاطون حاول يقدم فى حوارة أربع جدليات رئيسية لأثبات خلود الروح، وانها من مادة غير قابلة للفناء او الدمار. أشكالية خلود الروح واستمراريتها بعد الموت أشكالية تانية مختلفة فى الفلسفة عن أشكالية وجود الروح نفسها، المجال هنا مش كافى اننا نغطى اشكالية خلود الروح لكننا هنرجعلها فى حلقات تانية فى المستقبل  .. على نهج أرسطو وأفلاطون ابن سينا بيستخدم حجة الرجل الطائر ومجموعة تانية من الجدليات علشان يوصل فى النهاية ان الروح خالدة على عكس الجسد الفانى وانها من مادة بتنجو من تجربة الموت اللى بيمر بيها الانسان وبتلتحق بالموجودات العلوية الخالدة فى عالم سرمدى .. أفكار ابن سينا وضعتة فى مشاكل مع المفاهيم الاسلامية السائدة فى وقتة، اللى بتعتبر ان الروح والجسد بيبعثا فى يوم الحساب ويفضلوا فى ابدية دائمة بعد كده، الرؤية الل رفضها ابن سينا واعتقد بس فى خلود الروح .. واللى هيدفع عالم الدين الاسلامى الاشهر الشيخ الغزالى فى القرن الثانى عشر فى كتابة تهافت الفلاسفة The Incoherence of the Philosophers انه ينقد فكرة ابن سينا عن خلود الروح بس وفناء الجسد ويسمية بالمهرطق! لكن دى حكاية لمرة تانية.

arton2602 الإمام_الغزالي

يعنى اية حياة؟ .. يمكن لو فهمنا معنى الحياة نقدر نفهم ماهية الروح .. بعض الرؤى الفلسفية بتربط معنى الحياة بمادة روحية غير قابلة للفناء بتتحكم فى جسم الانسان خلال حياتة وبتستمر حتى بعد مماتة، لو الفرد ماعندوش روح او لو عنده روح لكنها مرتبطة بجسمة بشكل خاطئ، اذن حياتة بلا معنى ..

338px-L.N.Tolstoy_Prokudin-Gorsky

فى رؤيتين فلسفيتين لفكرة الروح هى سر الحياة، طرحها الكاتب الروسى ليو تولستوى Leo Tolstoy سنة 1884 واللى فيها جادل ان علشان الحياة يكون ليها معنى، لابد وان يوجد شئ يستحق العمل، ومافيش شئ هيستحق ان الفرد يعملة الا اذا كان له تأثير لانهائى فى العالم، وعلشان الفرد يقدر يعمل ده لابد وانه يكون عندة وجود شخصى روحى خالد! لكن الفيلسوف الامريكى المعاصر روبرت أودى Robert Audi أنتقد الرؤية دى فى كتابة القيمة الجوهرية والحياة ذات المغزى Intrinsic Value and Meaningful Life سنة 2005 وتحدى فرضية ان عشان الفعل يكون له تأثير لانهائى ضرورى لابد يكون له قيمة، الفيلسوف الامريكى المعاصر مايكل ليفين Michael P. Levine أنتقد الرؤية دى من منظور تانى سنة 1987 فى مقال بعنوان ما علاقة الموت بمعنى الحياة؟ What Does Death Have to Do with the Meaning of Life واللى فيه أنتقد فكرة انك لازم تبقى خالد او عندك شئ له صفة الخلود علشان يكون ليك تأثيرلانهائى على العالم ، ولو حتى من منظور دينى.. مجرد ان الله يتذكر وجود الفرد كافى لانه يضفى صفة اللانهائية او الخلود فى أفعالة. الرؤية التانية لفكرة الروح ضرورية لمعنى الحياة بتقول ان الروح ضرورية لمفهوم العدالة الكاملة Perfect Justice واللى هى مطلوبة علشان الحياة يكون ليها معنى، الحياة يبدو وكأنها بدون معنى لما نشوف الظلم، العذاب، عدم تكافئ الفرص، والفساد اللى فى الارض .. ففكرة ان فى عالم تانى العدالة هتطبق فيه سواء كان ده هيتحقق عن طريق مفهوم الاله او حتى عن طريق مفهوم الكارما Karma فى الديانات الشرق آسيوية ..

William_Lane_Craig

الجدلية دى طورها واعاد طرحها من التراث الفيلسوف الدينى المعاصر ويليام لن كريج William Ln Craig فى مقال نشرة سنة 1994 بعنوان عبثية الحياة بدون الله The Absurdity of Life without God لكن زى الرؤية السابقة الهيكل الاستنتاجى ضعيف، الفيلسوف الامريكى المعاصر روى باررت   Roy Perrettأنتقد الرؤية دى سنة 1986  فى مقالة فيما بتعلق بالخلود Regarding Immortality وقال حتى لو الحياة بعد الموت مطلوبة عشان العدالة الكاملة تتحقق، مش واضح من منطق الجدلية دى ليه الحياة بعد الموت لازم تكون ازلية علشان العدالة تتحقق. فلاسفة معاصريين كتيير بيحاولوا بشتغلوا على تقوية الهيكل الاستنتاجى بتاع الحجتين دول زى الفيلسوف المعاصر ستيوارت جويتز stewart Goetz فى كتابة الاخير الهدف من الحياة The Purpose of Life اللى نشرة سنة 2012 او الفيلسوف المعاصر تاديوس ميتز Thaddeus Metz فى كتابة المغزى والجدير بالاهتمام The Meaningful and the Worthwhile اللى نشرة سنة 2013 .. لكن مازالت الحجج دى محل جدال كبيبر بين الفلاسفة!

330px-Grand_prismatic_spring

طيب اذا ماكنش قادرين نعرف الحياة فلسفيا، ممكن نحاول على الاقل نعرفها علميا.للأسف أول شئ هيصدمنا أن مافيش تحديد محدد وواضح لمفهوم الحياة فى العلم الحديث، المفهوم الموجود دولقتى وصفى اكتر منه تعريفى، العلم بيعتبر الحياة هى مجموعة من الخواص والصفات اللى بتميز كائن معين، صفات زى الاتزان الداخلى Homeostasis، منظومة مركبة من الخلايا او وحدات أساسية للحياة  Organization، النمو Growth، التكييف Adaptation، الاستجابة للمؤثرات الخارجية Response to stimuli، التكاثر Reproduction مجموعة الخواص دى العلماء بيسموها الوظائف الحيوية  physiological functions هى مكون الحياة الفزيائية والكميائية الاساسى اللى بتمثل معنى الحياة. تعريف تانى لماهية الحياة من منظور علماء الفزياء الحيوية Biophysicists  بيعرفوا العمليات الحية باعتبارها تأخير نشر أو تشتت الطاقة الداخلية للجزيئات البيولوجية نحو مزيد من حالات الاتزان الداخلى المحتملة. أو ان الحياة واحد من الظواهر اللى فيها الانظمة المفتوحة او المستمرة عندها القدرة على تقليل الانتروبى الدخلى بتاعها على حساب مواد او طاقة خارجية من البيئة الخارجية .. بشكل أبسط الكائنات الحية عبارة عن انظمة تحريك حرارى  thermodynamic systems مكونة من منظومة من مركبات جزيئية. يعنى الحياة هى مادة عندها قدرة على التكاثر والتطور حسب حاجتها للنجاة فى البيئة..

330px-Rotavirus_Reconstruction

طبعا الاعتراض الاول فى عقلك دلوقتى طيب والفيروسات Viruses عندها قدرة على التكاثر، عندها جينات وبتتطور عن طريق الانتقاء الطبيعى  Natural Selection  زى باقى الكائنات الحية ومع ذلك مابنعتبرهاش كائنات حية .. .صحيح العلماء مابيصنفوش الفيرس ككائن حى لانها بتحتاج لعائل للتكاثر وبالشكل ده فقدت خاصية مهمة للكائن الحى وهى قدرتة على التكاثر بشكل مستقل داخل نوعة ( على الاقل من وجهة نظر العلم) .. زى ماانت ملاحظ تعريف العلم لمعنى الحياة تعريف مادى طبيعى Naturalistic مافيش فية اى اشارة لفكرة المكون الروحى، ودى شئ متوقع طبعا .. العلماء عادة لما بيتكلموا عن الروح فى سياق ثقافى مش علمى بيعلموا الروح كمرادف لفكرة العقل البشرى ..

The_Astonishing_Hypothesis(Cover)

يعنى مثلا عالم البيويوجيا الجزئية Molecular biology فرانسيس كريك  Francis Crick فى كتابة الفرضية المذهلة The Astonishing Hypothesis أختار ان العنوان الفرعى يكون “البحث العلمى عن الروح” .. كريك أتكلم عن اننا نقدر نفهم كل شئ ممكن عن الروح البشرية من خلال دراسة طريقة عمل المخ البشرى، وكل ما بيتطور علم الاعصاب neuroscience بيزيد فهمنا لعقل او روح الفرد. الفيلسوف الامريكى دانيل دانيت Daniel Dennett فى مقال بعنوان أنماط حقيقة Real Patterns  نشرة سنة 1991 طرح فكرة أن أستراتيجية النجاة من المخاطر عند البشر بتعتمد بشكل أساسى على فكرة الموقف المتوقع، أو بمعنى تانى انها استراتيجية بتقوم على تنبأ أفعال الاخرين بناء على أفتراض ان عندهم عقول زينا وردود أفعالهم مشابهة لينا .. فى الحقيقة شبكة الاعصاب فى عقولنا فيها خلية عصبية مرآتية Mirror Neuron   واللى بتتفعل لما بنعمل عمل معين او لما بنشوف حد تانى بيعمل نفس العمل، الشبكة العصبية دى من الجائز انها هى اللى بتوفر الارضية اللازمة للفكرة دى، ودانيت هيقترح ان العملية دى ناجحة الى حد كبير لدرجة اننا بنعممها على كل خبراتنا واللى هيقود فى النهاية لتصورنا ان فى شئ اسمة الروح!

i-8fecf60eddfe02315e7c2f1dae02a7ce-nn1611-F1 Makak_neonatal_imitation

يمكن من أطرف المحاولات العلمية للبحث عن الروح كانت تجربة أجراها الطبيب الامريكى دنكان ماكدوجال Duncan MacDougall سنة 1901 لما قرر انه يوزن جسم بعض من مرضاة وهما بيموتوا، وادعى ان فى فقدان فى الوزن حصل بعد الوفاة، واللى بيدل على انهم فقدوا شئ بموتهم .. يقصد الروح طبعا، النتايج اللى اتوصلها ماحدش قدر يعيد أنتاجها تانى علشات كده مابتعتبرش ذات اى قيمة علمية، فى الواقع كل التجارب اللى اتعلمت بتأكد أن الكائن الحى عادة ما بيكتسب وزن بعد موتة على العكس من المتوقع!

weight-of-the-soul-craziest-science-experiment

ودلوقتى .. بص لنفسك فى المراية، ياترى الموجود اللى انت شايفة وحاسة دلوقتى هو كل شئ، ولا فى جواك موجود تانى .. موجود علوى خالد؟ .. يا ترى انت عندك روح؟ .. وهل الروح من مادة تانية غير جسمك؟ .. لكن لو كانت من مادة تانية، ياترى ايه هى المادة دى؟ .. ولو مادة غير فزيائية  .. ازاى تقدر تثبت وجود شئ غير مادى فى عالم من الماديات؟ ..  مش يمكن سر خلود روحك انها من مادة غير فزيائية؟ .. ويمكن كمان يكون سر حياتك هو الروح؟ .. ولو مافيش روح .. ايه ياترى مصير الاموات اللى حبيتهم وعرفتهم  خلال حياتك؟ .. ايه مصيرك انت نفسك بعد الموت؟ .. ياترى الحياة من عدم  لعدم …  فكر تانى

فى الحلقات الجاية .. هنفتح موضوع جديد، هنتكلم عن الاخلاق .. تفتكر القيم ازلية الوجود؟ … ولا نسبية بتتغيرحسب الزمان والمكان؟ … وياترى فى علاقة  بين الاخلاق والموجود الاعلى؟ ..  هناقش نظرية الامر الالهى .. وفكرة حكمة السماء .. و هنرجع  تانى نزور الحتمية المطلقة!  عن القيم .. السعادة .. نداء الواجب .. الحظ ..  الشر .. والفضيلة .. هنتفلسف المرة الجاية

من دلوقتى للحلقة الجاية .. عيش الحياة بفلسفة

زود معلوماتك:

Soul الروح

http://en.wikipedia.org/wiki/Soul

DEATH فلسفة الموت

http://oyc.yale.edu/philosophy/phil-176

Dragonfly (Movie)

http://www.imdb.com/title/tt0259288/

https://www.youtube.com/watch?v=_fglzCnPlec

Ancient Egyptian concept of the soul الروح عند قدماء المصريين

http://en.wikipedia.org/wiki/Ancient_Egyptian_concept_of_the_soul

The Book of the Dead كتاب الموتى

http://en.wikipedia.org/wiki/Book_of_the_Dead

Abductive Reasoning

http://en.wikipedia.org/wiki/Abductive_reasoning

يحيي حقي

http://ar.wikipedia.org/wiki/يحيي_حقي

قنديل أم هاشم

http://ar.wikipedia.org/wiki/قنديل_أم_هاشم_(رواية)

Free Will حرية الارادة

http://en.wikipedia.org/wiki/Free_will

IBMDeepBlue كمبيوتر ديب بلو

http://en.wikipedia.org/wiki/IBM_Deep_Blue

GarryKasparov جارى كاسبروف

http://en.wikipedia.org/wiki/Garry_Kasparov

Game Over: Kasparov and the Machine نهاية اللعبة: كاسبروف والالة

http://www.imdb.com/title/tt0379296/

http://en.wikipedia.org/wiki/Game_Over:_Kasparov_and_the_Machine

https://www.youtube.com/watch?v=gDe-uHsEMn8

Behaviorism المدرسة السلوكية

http://en.wikipedia.org/wiki/Behaviorism

Functionalism المدرسة الوظائفية   

http://en.wikipedia.org/wiki/Functionalism_(philosophy_of_mind)

Daniel Dennett دانيل دانيت

http://en.wikipedia.org/wiki/Daniel_Dennett

Necomimi نكوميمى

http://www.necomimi.com/

https://www.youtube.com/watch?v=JblMzmAyLW8

Qualia القواليا

http://en.wikipedia.org/wiki/Qualia

Near Death Experience تجربة الأقتراب من الموت

http://en.wikipedia.org/wiki/Near-death_experience

Myth of Er أسطورة أر

http://en.wikipedia.org/wiki/Myth_of_Er

The Republicالجمهورية

http://en.wikipedia.org/wiki/The_Republic_(Plato)

Séance تجربة الأتصال بالأرواح

http://en.wikipedia.org/wiki/Séance

أنيس منصور

http://ar.wikipedia.org/wiki/أنيس_منصور

حول العالم في 200 يوم

http://ar.wikipedia.org/wiki/حول_العالم_في_200_يوم_(كتاب)

أرواح وأشباح

http://ar.wikipedia.org/wiki/أرواح_وأشباح

Richard Wiseman ريتشارد ويزمان

http://en.wikipedia.org/wiki/Richard_Wiseman

Anomalistic psychology

http://en.wikipedia.org/wiki/Anomalistic_psychology

Endorphins أندورفين

http://en.wikipedia.org/wiki/Endorphins

James Randi جيمس راندى

http://en.wikipedia.org/wiki/James_Randi

One Million Dollar Paranormal Challenge

http://en.wikipedia.org/wiki/One_Million_Dollar_Paranormal_Challenge

Avicenna  ابن سينا

http://en.wikipedia.org/wiki/Avicenna

The Book of the Healing كتاب الشفاء

http://en.wikipedia.org/wiki/The_Book_of_Healing

Aristotle أرسطوطاليس   

http://en.wikipedia.org/wiki/Aristotle

Descartes ديكارت

http://en.wikipedia.org/wiki/Ren%C3%A9_Descartes

Phaedo عن الروح

http://en.wikipedia.org/wiki/Phaedo

Socrates أرسطو

http://en.wikipedia.org/wiki/Socrates

الغزالى

http://ar.wikipedia.org/wiki/أبو_حامد_محمد_بن_محمد_الغزالي

تهافت الفلاسفة

http://ar.wikipedia.org/wiki/تهافت_الفلاسفة

Leo Tolstoy ليو تيلستوى

http://en.wikipedia.org/wiki/Leo_Tolstoy

RobertAudi روبرت أودى

http://en.wikipedia.org/wiki/Robert_Audi

William Ln Craig ويليام لن كريج

http://en.wikipedia.org/wiki/William_Lane_Craig

Life الحياة

http://en.wikipedia.org/wiki/Life

Entropy انتروبى

http://en.wikipedia.org/wiki/Entropy

thermodynamic systems انظمة تحريك حرارى   

http://en.wikipedia.org/wiki/Thermodynamic_system

Natural Selection الانتقاء الطبيعى 

http://en.wikipedia.org/wiki/Natural_selection

Virus فيرس

http://en.wikipedia.org/wiki/Virus

Mirror Neuron خلية عصبية مراتية

http://en.wikipedia.org/wiki/Mirror_neuron

The Astonishing Hypothesis الفرضية المذهلة

http://en.wikipedia.org/wiki/The_Astonishing_Hypothesis

Duncan MacDougall دنكان ماكدوجال

http://en.wikipedia.org/wiki/Duncan_MacDougall_(doctor)

2 thoughts on “EP14: The Problem of Soul أشكالية الروح

  1. جميل جدا … اثناء قرايتي للموضوع ، حضرني قول الشاعر : تمردتي يا نفس فوق الارض فاهدئي ……..ولا تذهبي في العجب كل مذهب
    فما انت الا ذرة فوق متنها …….. وما هي الا ذرة في الكواكب

  2. جميل جدا ….اثناء قرايتي للموضوع ، حضرني قول الشاعر : تمردتي يا نفس فوق الارض فاهدئي ………ولا تذهبي في العجب كل مذهب
    فما انت الا ذرة فوق متنها ………. وما هي الا ذرة في الكواكب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s